Month: February 2017

Энэ сарын 2-нд
Өмнөговь аймгийн Цогтцэций сумын Цагаан-Овоо багийн нутаг /Таван толгойн
уурхайгаас зүүн хойд зүгт 2 км-ийн зайд/-т 22:18:37 цагт 3.7 магнитутын хүчтэй
газар хөдлөлт болжээ. Газар хөдлөлийн магнитут нь дээрх хэмжээсийг заасан
талаар Одон орон геофизик судалгааны хүрээлэн гаргажээ.

Оршин суугчдад газар
хөдлөлийн чичирхийлэл мэдрэгдсэнээс хохирол учраагүй юм байна. Цогтцэций сумын
хувьд өмнө нь буюу 2016 оны арванхоёрдугаар сард нэг өдрийн дотор хэд, хэдэн
удаагийн газар хөдлөлт болж, сумын дунд сургуулийн сурагчдыг нүүлгэн
шилжүүлэхээс эхлээд холбогдох бүхий л арга хэмжээг аймгийн Онцгой байдлын
газраас хэрэгжүүлж ажилласан байна.

Олон улсын магадлан итгэмжлэлийн ACBSP-ийн 8-р бүсийн олон улсын их дээд сургуулиудын дунд анх удаа зохион байгуулсан “Business Simulation” тэмцээн өнгөрсөн 12 сард болсон билээ. Арабын нэгдсэн Эмират улсын Дубай хотод явагдсан энэхүү тэмцээнд олон улсын боловсролын магадлан итгэмжлэлийн наймдугаар бүсэд харьяалагддаг нийт арван сургууль өрсөлдсөн бөгөөд Монголоос МУИС, Отгонтэнгэр Их сургууль, Мандах бүртгэл дээд сургуулийн гурван баг өрсөлдсөн юм.

Адил гараанаас эхэлж сонирхолтой, өгөөжтэй, мэдлэг сорьсон, бодит нөхцөлтэй уялдсан энэ удаагийн тэмцээнд Отгонтэнгэр Их сургуулийн баг дэд байр, МУИС-ийн баг гуравдугаар байр, Мандах бүртгэл дээд сургуулийн баг тусгай байр эзэлсэн.

Арабын нэгдсэн Эмират, Катар, Монгол, ОХУ, Чех, Франц зэрэг улсуудын их сургуулиудын арван баг тэмцээний найман үеийн турш гар утасны глобал зах зээлийн төлөв байдлын өөрчлөлтөнд нийцүүлсэн шийдлүүдээр шийдвэр гарган өрсөлдсөн юм.

Олон улсын бизнес загварчлалын тэмцээнд дэлхийн нэр хүндтэй их сургуулиудтай өрсөлдсөн манай оюутнууд боловсролын салбарт ийнхүү Монголынхоо нэрийг гаргаж чадлаа. Тэр дундаа хувийн их дээд сургуулиуд дэлхийд өрсөлдөхүйц Монгол мэдлэгийг түгээж байгааг их хайрханаар овоглосон чадварлаг залуус дэлхийн хэмжээний томоохон тэмцээнд оролцон, олон орны оюунлаг залуустай англи хэл дээр, тэр тусмаа мэргэжлийн түвшинд өрсөлдөж эх орон, сургуулийнхаа нэрийг дэлхийн тавцанд гаргасан байна.

Отгонтэнгэр их сургуулийн багийн бүрэлдэхүүнд Санхүү 4б ангийн Э.Ундраа, Э.Ганбаяр, Санхүү 3-р ангийн Э.Энхзаяа, Олон улсын худалдааны менежментийн 4-р ангийн Н.Намуунтөгс, Нягтлан бодох бүртгэлийн 4б ангийн Э.Уянга нар багтсан байна. Тэднийг ОТИС-ийн Эдийн засгийн тэнхимийн эрхлэгч судлаач Э.Ганбат удирдан энэхүү дэлхийн нэр хүндтэй тэмцээнд амжилттай оролцуулсан юм.

Тэмцэнд амжилттай оролцсон ОТИС-ийн баг болон бусад сургуулиудын багуудад өнөөдөр БСШУЯ-ны сайд Ж.Батсуурь ACBSP байгууллагын сертификат, цомыг албан ёсоор гардуулан өглөө.

Хүнсний аюулгүй байдал, хөдөө аж ахуйн хяналтын хэлтсийн 2017 оны үйл ажиллагааны төлөвлөгөө болон нийслэлийн Мэргэжлийн хяналтын газрын дэд даргын баталсан 02-03/50 тоот “Урьдчилан сэргийлэх хяналт шалгалт хийх тухай” удирдамжийн хүрээнд батлагдсан хөтөлбөрийн дагуу “Монгол наадам цогцолбор” ОНӨТҮГ-ын ажилтан ажиллагсдад зөвлөн туслах үйлчилгээ үзүүлж сургалт зохион байгууллаа. Сургалтаар Хүнсний чиглэлийн үйл ажиллагаа эрхлэгчийн үүрэг хариуцлага, Эрүүл ахуйн болон үйлдвэрлэлийн зохистой дадал сэдвээр холбогдох албан тушаалтан ажилтан ажиллагсдад сургалт зохион байгуулж 1.10 кодтой “Хоол үйлдвэрлэлийг шалгах хяналтын хуудас”-аар зоогийн газрын ажлын байрны эрсдэлийг үнэлж зөвлөн туслах сургалтыг зохион байгуулав. Зөвлөн туслах үйлчилгээний явцад илэрсэн зөрчлийн шалтгааныг тодорхойлж арилгуулах арга хэмжээ аван цаашид авах арга хэмжээний талаар мэргэжил арга зүйн зөвлөгөө өглөө гэж нийслэлийн Мэргэжлийн хяналтын газраас мэдээллээ.

Сүхбаатар аймгийн Засаг дарга өчигдөр буюу энэ сарын 03-нд “Гамшгаас хамгаалах өндөржүүлсэн бэлэн байдлын зэрэгт шилжүүлэх тухай” захирамж гаргалаа.

Захирамжаар тус аймгийн Эрдэнэцагаан, Асгат сумдад малын гоц халдварт шүлхий халдварт өвчин оношлогдож, Баруун-Урт, Сүхбаатар сумдад өвчний шинж тэмдэг илэрч, өвчний тархалт нэмэгдэх хандлагатай байгаа тул хоёрдугаар сарын 3-ны өдрөөс эхлэн Гамшгаас хамгаалах өндөржүүлсэн бэлэн байдлын зэрэгт шилжүүлэхийг үүрэг болгосон байна.

Иймд Сүхбаатар аймгийн хэмжээнд өчигдрөөс эхлэн гамшгаас хамгаалах өндөржүүлсэн бэлэн байдлын зэрэгт шилжиж, олон нийтийн аливаа үйл ажиллагааг тодорхой бус хугацаагаар хориглолоо.

5-нд баруун аймгуудын нутгийн заримгазар, төвийн аймгуудын нутгийн хойд хэсгээр, 6-7-нд ихэнх нутгаар, 8-нд нутгийн өмнөд хэсгээр цас орж, цасан шуурга шуурна. Салхи 5-нд зарим газраар, 6,7-нд нутгийн өмнөд хэсгээр секундэд 14-16 метр хүрч ширүүснэ. 5-нд ихэнх нутгаар, 6-нд нутгийн өмнөд хэсгээр хүйтний эрч сулавтар байх боловч цаашдаа хүйтний эрч чангарч Увс нуур болон Дархадын хотгор, Завхан голын эх, Идэр, Тэс голын хөндийгөөр шөнөдөө 38-43 градус, өдөртөө 23-28 градус, Хөвсгөл, Хэнтийн уулархаг нутаг, Орхон-Сэлэнгэ, Хараа, Ерөө, Туул, Тэрэлж, Хэрлэн, Онон, Улз, Халх голын хөндий, Хүрэн бэлчир орчмоор шөнөдөө 29-34 градус, өдөртөө 16-21 градус, Их нууруудын хотгор, Монгол Алтайн нурууны өвөр хэсэг, Хангайн уулархаг нутгаар шөнөдөө 25-30 градус, өдөртөө 13-18 градус, говийн бүс нутгийн өмнөд хэсгээр шөнөдөө 12-17 градус, өдөртөө 6-11 градус, бусад нутгаар шөнөдөө 19-24 градус, өдөртөө 10-15 градус хүйтэн байна гэж Цаг уур, орчны шинжилгээний газраас мэдээллээ.