Month: February 2017

Бянзүрх дүүргийн цагдаагийн хэлтэст ажиллаж байсан ахлах дэслэгч С.Батзолбоо авлига авсан нь тогтоогджээ.

Тус хэргийг цагдаагийн байгууллагын дотоод хяналтын шалгалтаар илрүүлсэн байна. Хэргийн талаар тодруулбал тус дүүргийн цагдаагийн байгууллагад Г гэх эмэгтэй хятадын иргэнд зодуулсан талаар гомдол гаргажээ.

Гэвч дэслэгч С.Батзолбоо нь уг гомдлын амар хялбар аргаар шийдэхийн тулд хятад иргэнээс сая төгрөг авсан байна. Харин гомдол гаргасан иргэн Г нь энэ талаар АТГ-ын мөрдөн шалгах хэлтэст мэдэгдэж, улмаар гэм буруутай нь тогтоогдсон байна. Эрүүгийн анхан шатны шүүх хэрэг бүртгэгч С.Батзолбоод торгууль оногдуулж, ажлаас нь чөлөөлжээ.

Ипотекийн орон сууцны санхүүжилтийн журмыг өнгөрсөн оны 10-р сарын 25-нд шинэчлэн баталсан. Шинэчилсэн журмын хүрээнд Монголбанк, Засгийн газар, МИК болон арилжааны банкууд хамтран ажиллах гэрээ байгуулан ажиллаж байгаа бөгөөд өнгөрсөн баасан гаригт арилжааны банкууд гэрээнд гарын үсэг зурж, баталгаажууллаа.

Энэ талаар “Голомт” банкны гүйцэтгэх захирал Ө.Ганзориг, “Ипотекийн зээлийн санхүүжилтыг нэмэх шаардагатай гэж үзэж байна” гэв. Шинэ журам батлагдсанаас хойш Монголбанк зээлийн санхүүжилтэд 111.8 тэрбум төгрөг олгож, 1646 иргэн иргэний зээлийн хүсэлтийг шийдвэрлэжээ.

О.ӨНӨР

Монгол бөхөн мялзан төст өвчнөөр нийт сүргийнхээ тал хувийг алдаад байгаа билээ. Хүйсийн говь, Дөргөний хүрэн талыг халдварын голомтот бүс хэмээж, Шаргын говийг тусгаарлах, бөхөн бэлчээрлэх хоёр гол замд пост гарган хамгаалж байлаа.

Гэвч өнгөрсөн долоо хоногт Шаргын говьд бэлчээрлэж явсан найман бөхөнгөөс шинжилгээ авахад нас бие гүйцсэн зургаа нь эрүүл гарч хоёр янзагаас нь өвчний шинж тэмдэг илэрсэн байна. Одоогийн байдлаар 4100 гаруй бөхөн, 32 хар сүүлтийн сэг зэмийг устгаад байгаа аж.

О.ӨНӨР

Шатахуун импортлогч компаниуд шатахууныхаа үнийг литр тутамд нь 100-150 төгрөгөөр нэмээд байгаа билээ. Энэ нэмэгдлийг судлах хоёр ч ажлын хэсэг ажиллаж байгаа аж. Уул уурхай, хүнд үйлдвэрийн яам, Ашигт малтмал, газрын тосны газрын холбогдох албаныхан багтсан ажлын хэсэг дүгнэлтээ өнөөдөр УУХҮЯ-ны Түлшний бодлогын газарт танилцуулах юм байна.

Харин ШӨХТГ-аас байгуулагдсан ажлын хэсгийн хяналт шалгалт үргэлжилж буй гэдгийг тус газрын Өрсөлдөөний бодлого зохицуулалтын газрын дарга Ч.Цоодол хэлэв. Дүгнэлтийг ойрын хугацаанд гаргана гэнэ.

НӨАТ-ын урамшууллын 20 дахь удаагийн сугалааны тохирол энэ ням гарагт буюу хоёрдугаар сарын 19-нд явагдана. Өнгөрсөн сарын худалдан авалтуудыг баримтжуулсан баримтууд дунд энэ сард сугалаа явуулах юм байна.

Энэ онд супер шагналын санг 200 саяас 100 сая болгон бууруулсан билээ. Улмаар сугалааны тохирлыг сард нэг удаа явуулж байхаар болсон юм. Төлбөрийн баримтын мэдээллээ цахим системийн 2017 оны баримт бүртгүүлэх цэсэнд бүртгүүлснээр НӨАТ-ын сугалаанд хамрагдах боломжтой.

Эрдэнэс Монгол, МАК компаниуд геологийн хайгуул, судалгааны чиглэлээр ажиллах “Эрдэнэс Ашид” хамтарсан компанийг байгуулах гэрээнд гарын үсэг зурж, уул уурхай эрдэс баялгийн салбарт анх удаа төр, хувийн хэвшлийн түншлэлийг байгуулав.

Гэрээнд гарын үсэг зурах ёслолд Эрдэнэс Монгол компанийг төлөөлж Гүйцэтгэх захирал Ц.Түмэнцогт, Тэргүүн дэд захирал С.Эрдэнэбулган, Дэд захирал О.Одбаяр, Дэд захирал Г.Ганболд, Монголын алт корпораци (МАК)-ийг төлөөлж Ерөнхийлөгч Н.Цэлмүүн, Тэргүүн дэд ерөнхийлөгч Г.Цогт, Дэд ерөнхийлөгч Б.Энхмандах нар оролцлоо.

“Эрдэнэс Ашид” хамтарсан компани нь хайгуул, судалгааны ажил хийгдсэн болон хийгдээгүй эрдсийн хуримтлал бүхий талбайд геологийн эрэл-үнэлгээ, нарийвчилсан хайгуулын ажил эрхлэх, орд газрыг түшиглэн ашигт малтмалыг баяжуулах болон олборлолт, үйлдвэрлэлийн үйл ажиллагаа эрхлэн явуулах юм.

Гарын үсэг зурах ёслолын үеэр “Эрдэнэс Монгол” компанийн Гүйцэтгэх захирал Ц.Түмэнцогт “Монгол Улсын хэмжээнд судлагдаагүй ашигт малтмалын асар их нөөц бололцоо байгаа. Эдгээр эрдэс баялгийг судалж, эдийн засгийн ач холбогдлоор нь ангилах, ордын нөөцийг тооцоолох, үнэлгээ өгөх чиглэлүүдэд үндэсний тэргүүлэгч компани Монголын Алт Корпорацитай хамтран ажиллах болсондоо баяртай байна. Уул уурхайн салбарт анх удаа төр, хувийн хэвшлийн түншлэлийг байгуулсан нь эдийн засгийн тогтвортой өсөлтийг хангах, экспортыг нэмэгдүүлэх, импортыг орлох, нэмүү өртөг шингэсэн, өрсөлдөх чадвартай үйлдвэрлэлийг бий болгоход чухал ач холбогдолтой” гэдгийг онцоллоо.

“Эрдэнэс Монгол” компани нь 2016 оноос эрчим хүчний Шивээ Энержи цогцолбор төсөлд нүүрсний нөөц бүрдүүлэх зорилгоор “Шинэ Шивээ” компанитай хамтарсан “Эрдэнэс Шивээ Энержи” компанийг байгуулан ажиллаж байгаа юм.

Монголын алт корпораци (МАК) нь металл, ашигт малтмалын чиглэлээр эрэл хайгуулын ажлыг нарийвчлан хийж, шинээр орд илрүүлж, нөөцийг тогтоох, ордын нөөцийг нэмэгдүүлэх, геологийн мэдээлэл цуглуулах, хянах, боловсруулах ажлыг олон улсад хүлээн зөвшөөрөгдсөн (JORC, CIM) стандартад нийцүүлэх зэрэг чиглэлээр ажилласан арвин туршлагатай, геологи уул уурхайн үйл ажиллагаа явуулдаг, үндэсний хөрөнгө оруулалттай тэргүүлэгч компани юм.