Month: February 2017

Categories
мэдээ улс-төр

Засгийн хуралдаанаар өвөлжилтийн асуудлыг хэлэлцэнэ

Засгийн газрын ээлжит хуралдаан өнөөдөр 15.00 цагаас эхэлнэ. Энэ өдрийн хуралдаанаар өвөлжилтийн талаар авах арга хэмжээг хэлэлцэж, санхүүжилтийг шийдэх юм байна.

№

Хэлэлцэх асуудал

Засгийн газрын гишүүн

1.

Хөрөнгө гаргах тухай

У.ХҮРЭЛСҮХ

2.

Хөрөнгө гаргах тухай* (өвс тэжээл)

У.ХҮРЭЛСҮХ

3.

Журам батлах тухай

Ц.МӨНХ-ОРГИЛ

4.

Эрчим хүчний салбарт хамтран ажиллах тухай Монгол Улсын Засгийн газар, Оросын Холбооны Улсын Засгийн газар хоорондын хэлэлцээрийн төслийн тухай*

П.ГАНХҮҮ

5.

Бусад асуудал*

Ж.ЭРДЭНЭБАТ

Танилцуулах асуудал

6.

Хүн амын амьжиргааны 2017 оны доод хэмжээг тогтоосон талаарх танилцуулга

Ж.МӨНХБАТ

7.

Гадаад харилцааны сайдын НҮБ-ын Ерөнхий Ассамблейн чуулганд оролцсон талаар

Ц.МӨНХ-ОРГИЛ

8.

Гадаад харилцааны сайдын НҮБ-ын Хүний эрхийн зөвлөлийн чуулганд оролцох талаар

Ц.МӨНХ-ОРГИЛ

9.

Монгол Улсын Ерөнхийлөгч Дэлхийн эдийн засгийн чуулга уулзалтад оролцсон дүнгийн талаар

Ц.МӨНХ-ОРГИЛ
Categories
мэдээ нийгэм

Цагдаагийн алба хаагчдыг шагнав

Их хэмжээний мөнгөн ус тээвэрлэж явсан хэргийг илрүүлсэн Хан-Уул дүүргийн Замын цагдаагийн хэлтсийн зохицуулагч, цагдаагийн ахлах дэслэгч Б.Эрдэнэжаргал, цагдаа зохицуулагч, цагдаагийн ахлах ахлагч Б.Баярхүү нарыг Цагдаагийн ерөнхий газрын “Баярын бичиг”-ээр шагналаа. Алба хаагчид өнгөрөгч 2016 оны 12 дугаар сарын 22-ны өдөр нийслэлийн БГД-ийн нутаг дэвсгэр Тээврийн дээд сургуулийн урд талын замд албан үүргээ гүйцэтгэж байхдаа “Range rover” маркийн Э жолоочтой автомашиныг шалган 64,5 кг мөнгөн усыг хууль бусаар тээвэрлэж явсныг илрүүлсэн юм. Химийн хорт болон аюултай бодисыг зохих зөвшөөрөлгүйгээр тээвэрлэж явсан иргэнийг илрүүлж, хуулиар хүлээсэн үүргээ нэр төртэй биелүүлсэн алба хаагчид шагнууллаа.

Categories
мэдээ эдийн-засаг

Төгрөгийн албан ханшийн мэдээллийг ТҮЦ машинаас авах боломжтой

Төгрөгийн гадаад валюттай харьцах албан ханшийн мэдээллийг ТҮЦ машинаас авах боломжтой боллоо. Энэхүү лавлагаа нь дэлхийн 36 улсын валютын төгрөгтэй харьцах тухайн өдрийн болон улирлын дундаж ханшаас гадна алт, мөнгө худалдан авах ханшийн мэдээллийг мөн багтаасан байна. Монголбанкинд иргэн, хуулийн этгээдээс төгрөгийн албан ханшийн лавлагаа авах хүсэлт жилд 1500 орчим удаа ирдэг бөгөөд Монголбанк албан бичгээр хариу хүргүүлдэг байв. Харин ТҮЦ машинаас ханшийн лавлагааг авах боломжтой болсноор иргэдэд мэдээлэл хүргэх үйл явц хялбарчлагдаж, түргэн шуурхай боллоо.

Categories
мэдээ улс-төр

Ерөнхий консул Л.Амарсанаа консулын патентаа гардуулав

Монгол Улсаас ОХУ-ын Эрхүү хотод суух Ерөнхий консул Л.Амарсанаа 2017 оны 2 дугаар сарын 13-ны өдөр Эрхүү мужийн Амбан захирагч С.Г.Левченкод консулын патентаа гардуулжээ. Консулын патентаа гардуулсантай холбогдуулан Амбан захирагч С.Г.Левченко Ерөнхий консул Л.Амарсанааг хүлээн авч уулзсан байна. Амбан захирагч С.Г.Левченко Эрхүү хотод суралцаж төгссөн, дипломат албаны туршлагатай хүн Ерөнхий консулаар томилогдон ирсэнд таатай байгаагаа хэлээд хоёр талын харилцаа, хамтын ажиллагааг өргөжүүлэн хөгжүүлэх чиглэлээр нягт хамтран ажиллахаа илэрхийлсэн байна. Мөн тэрээр Монгол Улс, ОХУ-ын харилцаанд Эрхүү муж онцгой үүрэг гүйцэтгэдэг, хоёр улсын стратегийн түншлэлийн хүрээнд хамтын ажиллагаа идэвхтэй хөгжиж байна гээд цаашид худалдаа, эдийн засгийн харилцаа, үүний дотор эрчим хүч, эрдэс баялаг, байгаль орчин, аялал жуулчлал, зам барилгын салбарт хамтын ажиллагааг идэвхжүүлэх шаардлагатай байгааг онцлон тэмдэглэжээ.

Ерөнхий консул Л.Амарсанаа Монгол Улс ОХУ-ын Эрхүү мужтай олон жилийн уламжлалт найрсаг харилцаатай бөгөөд энэхүү харилцаа бүхий л салбарт хөгжиж ирснийг дурдаж Эрхүү хотын их, дээд сургуулиудад манай улсаас 5000 гаруй хүн суралцаж эх орондоо үр бүтээлтэй ажиллаж байгааг онцолсон байна. Цаашид хоёр талын хамтын ажиллагаа ялангуяа худалдаа, эдийн засгийн хамтын ажиллагааг илүү хөгжүүлэх талаар анхаарч, идэвхтэй хамтран ажиллахаа илэрхийлжээ.

Categories
мэдээ эдийн-засаг

Хоёрдугаар сарын 16-ны өдрийг дуустал татварын тайланг авна

Аж ахуйн нэгж байгууллагуудын 2016 оны татварын тайланг хүлээн авах хугацааг нэг хоногоор сунгаж, хоёрдугаар сарын 16-ны өдрийг дуустал авахаар болсон байна. Учир нь Татварын албаны цахим сайт саатаж, тайлан хүлээн аваагүй учраас тэрхүү хугацааг нөхөн ийн нэг өдрөөр сунгажээ. Хуулиараа аж ахуйн нэгж байгууллагууд жилийн эцсийн тайлангаа хоёрдугаар сарын 15-ны дотор харьяа татварын албандаа өгөх ёстой байдаг.

Мөн түүнчлэн нэг өдрийн энэхүү сунгалт Хүн амын орлогын албан татварын тухай хуулийн дагуу татварын хөнгөлөлт, чөлөөлөлтөд хамрагдахаар хүсэлт гаргаж буй иргэдэд ч хамаатай юм байна. Шинээр байр орон сууц худалдан авсан, байшин барьсан болон тухайн жилдээ хүүхэд нь оюутан болсон иргэд татварын хөнгөлөлт чөлөөлөлтөд хамрагддаг билээ.

Categories
мэдээ нийгэм

Төрийн тусгай хамгаалалттай газар хүн амины ноцтой хэрэг гарав

Баянзүрх дүүргийн 26 дугаар хорооны нутаг дэвсгэр Маршалын гүүрний хажууд, Үндэсний цэцэрлэгт хүрээлэнгийн баруун урд далангийн дулааны шугам дамжуулах хоолойд хүн нас барж, шатсан байна гэсэн дуудлага цагдаагийн байгууллагад иржээ. Дуудлагын дагуу цагдаагийн ажилтнууд очиж ажиллахад хэргийн газарт эрэгтэй, эмэгтэй, хоёр хүнийг хоолойн тус газарт нь хутгалж амь насыг нь хөнөөсөн байжээ. Мөн цогцсыг шатаасан байна. Баянзүрх дүүргийн цагдаагийн ажилтнууд хэргийг шалгаж, талийгаачдын хэн болохыг тогтоожээ. Талийгаачид тодорхой оршин суух хаяггүй 40 настай Н.Энхцэцэг, 48 настай Д.Батбаатар нар болохыг тогтоожээ.

Энэ хэрэгтэй холбогдуулан Баянзүрх дүүргийн 10 дугаар хороонд оршин суух Б.Батцэнгэл гэх 28 настай залуу, түүний хамтран амьдрагч 32 настай П.Эрдэнэтуяа нарыг баривчлан саатуулаад байгаа аж. Төрийн тусгай хамгаалалттай газар үйлдэгдсэн энэ хэргийн эргэнд тойронд чухам юу болж буй тухай “Өдрийн сонин”-ы лхагва гаригийн шинэ дугаарт дэлгэрэнгүй нийтлэв.

Categories
мэдээ нийгэм

Солонгосын визний журмын өөрчлөлт ирэх сарын 1-нээс хэрэгжинэ

БНСУ визгүй зорчих журамд өөрчлөлт орж, ирэх сарын 01-нээс хэрэгжиж эхлэхээр болжээ. Шинэчилсэн журмаар тус улс руу 90 хоног визгүй зорчдог байсныг болиулж, байнгын зорчдог болон олон удаагийн виз олгох аж. Байнгын визгүй зорчигч гэдэг нь сүүлийн 2 жилийн дотор 4 буюу түүнээс дээш удаа Солонгосын хилээр нэвтэрсэн хүнийг хэлэх юм. Олон удаагийн виз нь 1, 3 болон 5 жилийн хугацаатай олгох бөгөөд энэ хугацаанд тус улс руу хэдэн ч удаа зорчиж болох юм.

Мөн Грек, Нидерланд, Норвеги, Дани, Герман, Литва Европын нэр бүхий 30 оронд ажиллаж, амьдарч байсан иргэд тухайн улсаасаа Солонгос руу шууд нэвтрэхэд виз авах шаардлагагүй аж.
Харин виз авах хүсэлт хүргүүлсэн өдрөөс өмнөх 3 жилийн хугацаанд БНСУ-д хууль бусаар оршин суусан эсхүл тус улсын хууль тогтоомж зөрчиж 5 сая воноос дээш торгууль хүлээсэн иргэдэд зөвшөөрөл олгохгүй аж.

Categories
мэдээ улс-төр

​Хөдөөгийн иргэд ипотекийн зээлийн талаар асуув

УИХ-ын дарга Ховд аймгийн иргэд, хөдөлмөрчдийн төлөөлөлтэй уулзалт хийв. Уулзалтын үеэр иргэд санал бодлоо илэрхийлж, асуулт асуув. УИХ-ын 2016 оны сонгуулийн үр дүнгээр байгуулагдсан шинэ төр, засгийн хийж хэрэгжүүлж байгаа ажлыг бид дэмжиж байна, өнгөрсөн богино хугацаанд чамгүйг хийж амжууллаа. Цаашид эдийн засгаа сэргээж, алдаа завхралыг засаж, хөгжил дэвшилд хүргэнэ гэдэгт бид итгэж байна гэж иргэдийн олонхи хэлж байлаа.

Ховдын иргэд төр засгийн байгууллагын удирдах ажилтны томилгоонд мэргэжлийн ур чадвар, ёс зүй, туршлагыг эн тэргүүнд харгалзах, орон нутаг дахь улстөржилтийг зогсоох, залуу малчдыг дэмжих, бэлтгэх, уул уурхайн олборлолтын үйл ажиллагаанд иргэний хяналтыг хүчтэй болгох, хөдөөд үйлдвэрлэлийг түлхүү дэмжих, иргэдээ ажилтай, орлоготой байлгах бүх боломжийг дайчлах зэрэг асуудлыг хөндөж байлаа.

УИХ-ын дарга М.Энхболд түүнд хандаж тавьсан иргэдийн асуултад хариуллаа. Ипотекийн зээл цааш үргэлжлэх эсэх, хөдөөгийнхөнд хүртээх боломж хэр байгаа талаарх асуултад “Эх үүсвэр одоогоор хангалтгүй байна. Засгийн газар эх үүсвэр бүрдүүлэх чиглэлээр ажиллаж байгаа. Тэгэхээр үргэлжилнэ гэсэн үг. Хөдөө хотоор ялгаварлах явдал байхгүй. Анх “100.000 айл” орон сууцны хөтөлбөр хэрэгжүүлэх болж, энэ ажлыг хариуцсан хорооны даргаар тухайн үеийн Засгийн газрын Шадар сайдын хувиар миний бие ажиллаж байсан юм. Зургаан хувийн хүүтэй зээлд Засгийн газраас 20.0 тэрбум төгрөг гаргаж, нэлээд үр дүнтэй хэрэгжиж байсан юм. Харамсалтай нь сүүлд хүүг нь 5 хувь болгох зэрэг улс төрийн зорилготой шийдвэр гаргаснаар эрч нь буурч, зохион байгуулалт нь алдагдсанд харамсаж явдаг гэлээ.
УИХ-ын гишүүдийн ирц хангалтгүй, хуралдаанаа тасалдаг талаарх шүүмжлэлийн хариуд “Бидэнд анхаарах асуудал бий. Гэхдээ бодит байдлыг гуйвуулж, олон нийтэд өөрөөр харагдуулахыг илэрхий хүсдэг хүмүүс бас бий шүү. Уг нь энэ удаагийн УИХ-ын ирц өмнөх парламентуудаас харьцангуй сайн байгаа юм” гэлээ.
Улсын өрийн тухай иргэний сонирхсон асуултад “Манай улс 1992-2012 оны хооронд 139.2 тэрбумын өр тавьсан байдаг. Харин 2012-2016 оны хооронд энэ тоо 391 тэрбум болж өссөн. Буруу зөрүү ашигласан зүйл ч байхыг үгүйсгэхгүй. Зөв юманд зарцуулсан нь ч байгаа байх. Зөвийг зөв гэж, бурууг буруу гэж л үзнэ. Бурууд хариуцлага ногдуулах зарчим баримтална” гэв.

-Ховдын иргэдийн санал хүсэлт дотор Цементийн үйлдвэр, бүсийн эмчилгээ оношлогооны төв байгуулах, Эрдэнэбүрэнгийн УЦС-ын төслийн үйл ажиллагааг үргэлжлүүлж дуусгах гэсэн гурван том бүтээн байгуулалтын асуудал хөндөгдлөө. Аль аль нь зөвхөн Ховдын биш, баруун бүс нутгийн асуудал, ирээдүйд хэрэгтэй бүтээн байгуулалт юм байна. Шийдэх ёстой. Улсын эдийн засаг өнөөхөндөө хэцүү байна. Гэхдээ эндээс сонгогдсон УИХ-ын гишүүдтэйгээ хамтраад анхаарлаа хандуулж ажиллая гэсэн амлалтыг УИХ-ын дарга М.Энхболд Ховдынхонд өглөө. Иргэдийн тавьсан салбарын чиглэлийн асуултуудад УИХ-ын гишүүн, Хууль зүйн сайд С.Бямбацогт, УИХ-ын гишүүн, Нийгмийн хамгаалал, хөдөлмөрийн сайд Н.Номтойбаяр, УИХ-ын гишүүн О.Батнасан, Б.Пүрэвдорж болон яамдын дэд сайд нар хариулт өгч, тайлбар хийв.

Categories
мэдээ эдийн-засаг

​Зэсийн үнэ 6106 ам.долларт хүрчээ

Лондонгийн металлын биржид зэсийн үнэ гурван сарын дараа 0.3 хувиар нэмэгдэн тонн нь 6106 ам.доллартай тэнцлээ. Энэ нь Индонезийн Грасберг уурхайн зэсийн экспортод тавьсан хориг болон Чилийн Эскондида уурхайн ажилчид ажил хаяж цалингаа нэмэгдүүлэхийг шаардсанаас хамаарч байгаа гэнэ.

Сануулахад зэсийн үнэ өнгөрсөн баасан гаригт тонн нь 5872 ам.доллартай тэнцэж байсан билээ. Одоогийн байдлаар зэсийн үнэ өнгөрсөн тавдугаар сараас хойш хамгийн өндөр түвшиндээ хүрээд байгаа юм байна.

Categories
гадаад мэдээ

​Д.Трамп: Энэ бол манай улсын түүхэнд гаргасан хамгийн буруу шийдвэр байсан

АНУ-ын Ерөнхийлөгч Д.Трампын Германы “Bild”, Их Британийн “Times “ сонинуудад өгсөн ярилцлагыг сонирхуулъя.

-Ноён Ерөнхийлөгч өө, таны өвөө Герман, ээж тань Шотландаас гаралтай. “Times” сонины сэтгүүлч маань шотланд, би герман. Та манай орнуудтай хэрхэн хамтран ажиллах гэж байна?
-Ер нь бол хамтын ажиллагаа ижил байх болно. Бид танай хоёр улсад хайртай, сайхан ч орон, гайхалтай газар. Их Британи Европын Холбооноос татгалзсан нь маш сонин явдал болсон. Ингэнэ гэдгийг би тодорхой хэмжээгээр урьдчилан хэлсэн байгаа. Би Тернберрид гольфийн клуб худалдаж авсан. Ажил нь ч их бүтэмжтэй явж байна. Танд гэж хэлэхэд танай фунт стерлингийн ханш унаж байгаа нь маш сайхан хэрэг. Учир нь Их Британийн зарим нутагт бизнес их сайн байгаа. Явж явж BREXIT-ийн ажил тун амжиллттай болох байх.
-АНУ, Их Британи хоёр тун удахгүй худалдааны хэлэлцээ байгуулна гэж хэлэх гээд байна уу?
-Тэгэлгүй яахав. Маш хурдан байгуулна. Би бол Их Британийн шүтэн бишрэгч. Тиймээс байдлыг залруулахын тулд бид шуурхай бөгөөд ухаалгаар аль аль талд нь ашигтай байхаар хамтран ажиллана. Бид уулзцагаана… Та хүсвэл түүний (Их Британийн Ерөнхий сайд Тереза Мэйг хэлж байна) энэ талаар бичсэн захидлыг үзүүлье. Тэр уулзахыг хүссэн байна. Намайг Цагаан Ордонд нүүж очсон даруйд уулзаж, байдлыг засч залруулна.
-Таны бодлоор BREXIT-ийг байгуулах болсон шалтгаан нь юу вэ?
-Улс оронд нь харийн хүн ирчихээд эвдэж сүйтгээд байхыг хүмүүс хүсэхгүй. Миний эх оронд ч бид эхнийхээ өдрөөс хилийн аюулгүй байдлыг хангахад онцгой анхаарал хандуулна. Би хамгийн түрүүн энэ талаар тогтоол гаргана. Ерөнхийлөгчийн албыг хүлээн авсан ажлынхаа эхний өдөр, баасан, бямбад бус даваа гаригт шүү. Би үүнийг баярын өдрүүдийн дараа хиймээргүй байна. Сириэс манайд хэн нь мэдэгдэхгүй хүмүүс ирээсэй гэж бодохгүй байна. Тэднийг шалгах боломж ч бидэнд байхгүй. Би германчууд шиг болмооргүй байна. Хэдийгээр би Ангела Меркелийг хүндэлдэг хэдий ч түүн шиг байдалд орохгүй хүсэхгүй. Миний харж байгаагаар манайх хангалттай тулгамдсан асуудалтай. Д.Трампын талаар нэг зүйлийг баттай хэлнэ, бүх юм аюулгүй байх ёстой. Улс төрийн дүрэм үгүй бол дипломат арга байхгүй гэсэн үг.
-Сонгуулийнхаа сурталчилгааны үеэр та дэлхийн исламын шашинтнуудыг АНУ-ыг зорих гэдгийг болиулна гэж хэлсэн. Та үүнийгээ хэрэгжүүлэх хэвээрээ юу?

-Терроризмтэй асуудалтай байгаа дэлхийн өнцөг булан бүрт байгаа исламын шашинтнуудыг хэлсэн юм. Би Европын зарим хэсгийг хэлж байна, дэлхийн болон Европын зарим хэсгийг. Исламын шашинтнууд очоод асуудал үүсгээд байгаа тэр хэсэг шүү дээ. Манайхан ийм асуудалтай байгаасай гэж хүсэхгүй байна. Та хар даа. Би эдгээр асуудал болон аюулгүй байдлыг хангасан. Хил, худалдаа, цэргийн салбар зэрэг асуудлыг голчлон хөндөж байж сонгуульд ялалт байгуулсан. Манайх хүчирхэг зэвсэгт хүчинтэй байсан.

-Таны өвөг дээдэс герман гаралтай гэдгийг та дурдсан. Биеэр тань герман цус урсаж байгаа нь таны хувьд юу гэсэн үг вэ?
-Энэ бол үнэхээр гайхалтай. Би Германаар бахархдаг бөгөөд Герман бол ер бусын орон. Бад-Люркхайм гэдэг бил үү? Энэ бол жинхэнэ Герман, тийм биз дээ? Ярих ч шаардлагагүй, энэ бол жинхэнэ Герман. Би Германаар үнэхээр их бахархдаг. Би Германд хайртай, Их Британид хайртай.
-Ингэхэд та Германд очиж байсан уу?
-Очсон.
-Б.Обама Ерөнхийлөгч байхдаа хамгийн сүүлд Германд айлчилж, болдог байсан бол дараагийн сонгуулиар А.Меркелийн төлөө саналаа өгнө гэж хэлсэн. Та ч гэсэн ингэх байсан уу?
-Нэгдүгээрт түүнтэй хэн өрсөлдөж байгааг би мэдэхгүй байна. А.Меркелийг би танихгүй, уулзаж байгаагүй, гэхдээ түүнийг хүндэлдэг гэдгээ хэлсэн. Гайхалтай удирдагч. Гэхдээ миний бодлоор хууль бус цагаачдыг улс орондоо оруулж аймшигтай алдаа гаргасан. Хаанаас ирсэн нь хамаагүй, хамгийн гол нь оруулсан явдал, тэгээд ч тэд хаанаас ирснийг хэн ч мэдэхгүй. Түүнийг маш аюултай, том алдаа гаргасан гэж би боддог. Гэсэн хэдий ч би түүнийг хүндэлдэг, надад таалагддаг. Өөрөөр хэлбэл би хэн нэгнийг дэмжинэ гэж хэлж чадахгүй, ер нь би хэн нэгнийг дэмжиж байсан юм болов уу.
-Та АНУ-ын Ерөнхийлөгчийн хувьд хэзээ Их Британид айлчлах вэ?

-Би маш баяртайгаар айлчлах болно. Ээж маань дэг жаягийг чандлан баримталдаг хүн байсан. Тиймээс надад ийм зан байдаг. Аав маань маш энгийн хүн байлаа. Ээж маань Английн хатан хаанд их хайртай, түүн шиг ихэмсэг хүн. Ордны дэг жаяг, тансаг, гоё байдалд их дуртай. Ийм юмыг англичууд л хийж чаддаг. Телевизээр хатан хаан гарах болгонд ээж маань үзнэ. Гайхалтай байгаа биз?

-Шотланд ээжээсээ өөр юуг нь өвлөн авсан вэ?
-Шотландчууд жижиг мөнгөндөө нэлээд анхаарал хандуулдаг. Би ч гэсэн мөн адил. Одоо би том юм хийдэг болохоор ингэх нь нэлээд асуудалтай болчихоод байгаа.
-Тэгвэл танд германчуудын ямар зан чанар байдаг вэ?
-Би дэг журамд дуртай. Юмыг хийсэн шиг хийх дуртай. Германчууд үүгээрээ алдартай шүү дээ. Би дэг журам, эрч хүчинд дуртай.
-Сонгуулийн сурталчилгааны үеэр та А.Меркелийн Сирийн цагаачдын талаар явуулж буй бодлогыг нэлээд шүүмжилсэн. Таны бодол өөрчлөгдөөгүй л байна уу?

-Миний бодоход энэ нь сайн зүйл биш. Энэ бол Германы хувьд маш том алдаа болсон. Герман шүү дээ. Гэтэл энэ улс гадаадын иргэдийг нэвтрүүлэхдээ хамгийн чанга дүрэм журамтай орон байсан. Би А.Меркельтэй уулзана. Би түүнийг хүндэлдэг, тэр надад таалагддаг. Хүн бол алдаа гаргадаг, гэхдээ энэ бол маш том алдаа болсон.

Миний бодоход бид Сирид аюулгүй бүс бий болгох ёстой байсан. Энэ нь хамаагүй хямд тусна. Персийн булангийн орнууд үүнийг санхүүжүүлэх нь зүйтэй байсан болов уу. Ер нь тэд чинь мөнгөтэй хүмүүс шүү дээ. Энэ нь одоо Германы амсч байгаагаас хамаагүй хямд тусах байсан болов уу. Сирид аюулгүйн бүс байгуул гэж хэлмээр байна.
Энэ явдал хэрээсээ хэтрэх ёсгүй байсан юм. Ирак руу довтлох ёсгүй байсан юм тийм үү? Энэ бол манай улсын түүхэнд гаргасан хамгийн буруу шийдвэр байсан. Бид энэ дайныг эхлүүлсэнээр зөгийний үүр рүү чулуу шидэх шиг л юм хийсэн. Энэ бол дэлхийн хамгимйн том гамшиг болчихоод байна. Би сая нэг юм үзчихлээ… Үүнийг танд харуулж болохгүй, нууц юм… Би талибанчуудыг харсан шүү… Талибанчуудыг харах юм бол огт өөр, тэд жил ирэх тусам улам бүр нэмэгдсээр. Ингэхэд л тэнд юу болоод байна гэж асуудаг.
Үргэлжлэл бий.