Month: February 2017

Монгол түмний уламжлалт сар шинийн баярыг угтан бүх нийтийн их цэвэрлэгээг энэ амралтын өдрүүдэд зохион байгуулах дүүргийн Засаг даргын захирамж гарлаа. Захирамжийн дагуу дүүргийн нутаг дэвсгэрийн бүх аж ахуй нэгж, байгууллага гаднах орчны 50 метр хүртэлх зам талбайн ил задгай хог хаягдлыг цэвэрлэж тээвэрлүүлэх, гэрлийн шон дээрх зарлал, сурталчилгааны хуудсыг хуулж, дээвэр дээрх цас мөсийг буулгаж цэвэрлэх юм. Иймд бүх нийтийн их цэвэрлэгээнд иргэн, аж ахуй нэгжийг идэвхтэй оролцохыг уриалж байна.

Монгол улсын хоёр иргэн Эрээнд хар тамхи зөөвөрлөж яваад баривчлагдсан талаар “Синьхуа” агентлагт мэдээллээ.

Хэрэгт холбогдсон гэх Энхжаргал нь бямба гаригт Бээжингээс Улаанбаатар хүрэх галт тэргэнд гар тээшиндээ 72.57 грамм метамфетамин зөөвөрлөж явжээ. Түүнчлэн Эрээн хотын гаалийн хяналтынхан мөн өдөр Монголын иргэн Нямжав гэгчийг 53.65 грамм метамфетамин, 0.84 грамм хар тамхины ургамал зөөвөрлөн авч явсныг илрүүлэн баривчилжээ.

“Жи Тайм” корпорацийн Монгол дахь албан ёсны салбарын ерөнхий захирал Казакстаны иргэн Ж.Маратыг энэ сарын 12-ны өдөр “Чингис хаан” Олон улсын нисэх онгоцны буудлаас хил гарах гэж байхад нь баривчилжээ. Түүнтэй хамт найман хүнийг саатуулсан байна.

Ж.Марат нь сүлжээний бизнес эрхлэн олон иргэнийг хохироосон байж болзошгүй хэмээн ийнхүү саатуулжээ. Одоогоор түүний дансанд байсан зургаан тэрбум төгрөгийг битүүмжлээд байгаа гэнэ. Эцсийн байдлаар хэдэн хүн хохирсон болон хэдийн хэмжээний мөнгө угаасныг тогтоохоор Эрүүгийн цагдаагийн газрын эдийн засгийн гэмт хэрэгтэй тэмцэх албанаас мөрдөн байцаалт явуулж байна.

Түүнд хилийн хориг энэ сарын 10-ны өдөр тавигдсан байжээ.

Харин түүний эхнэр хилийн хориг тавьсан тэр өдөр Монгол Улсын хилээр гарч чадсан байна.

Коксжих нүүрсний үнэ 4.7 хувиар хямдарч, мягмар гаригт тонн нь 154.8 ам.долларт хүрлээ. Энэ нь өнгөрсөн есдүгээр сарын эхнээс хойших доод үзүүлэлт гэдгийг mining.com цахим хуудсанд бичжээ. Уг нь нүүрсний томоохон худалдан авагч Хятадын нийт импорт нэгдүгээр сард өссөн дүнтэй гарсан билээ. Тус улс өнгөрсөн онд 59.2 сая тонн коксжих нүүрс импортолсон нь 2015 оныхоос 24 орчим хувиар нэмэгдсэн юм. Үүний 23.6 сая тонн нь Монгол Улсад ногдсон нь 85 хувиар өссөн үзүүлэлт юм байна. Тэгвэл коксжих нүүрсний нийлүүлэлт 9.3, 19.4 хувиар багассан гэнэ. Харин АНУ урд хөрш рүү коксжих нүүрс нийлүүлээгүй аж. Гагцхүү Монгол Улсын нүүрсний үнэ зах зээлийнхээс 75 хувиар хямд байгааг дээрх цахим хуудсанд дурджээ.

О.ӨНӨР

Манай улсад жуулчны визээр 2001 онд орж ирээд “харласан” БНХАУ-ын иргэн Сэргэлэн гэгчийг өчигдөр шүүхийн шийдвэрээр баривчлан саатуулжээ.

Өмнө нь түүнийг цагдаагийнхан нэг бус удаа илрүүлж байжээ. Тэрбээр Монголд “харлаад” тогтохгүй иргэний үнэмлэх гаргуулан амьдарч, манай нэг томоохон компанид удирдах алба хашиж байжээ.

Мөн манай улсын иргэнтэй гэрлэж, хоёр хүүхэдтэй болсон байна. Хууль сахиулах байгууллагынхан нарийвчилсан шалгалт хийснийхээ дараа албадан гаргах, эрүүгийн хариуцлага хүлээлгэх, эсэхийг шүүхээр шийдвэрлүүлэх юм байна. Дашрамд дурдахад, өнгөрсөн онд гадаадын 450 иргэнийг албадан гаргажээ.

Увс аймгийн Улаангом суманд хиймэл нуурын далан сэтэрчээ. Үүний улмаас улсын чанартай авто замын зорчих хэсэг хаагдах, 500 гаруй айл өрх усанд автах нөхцөл байдал үүссэн байна.

Энэ тухай мэдээллийг тус аймгийн Онцгой байдлын газар хоёрдугаар сарын 14-ний өдрийн 17:00 цагт хүлээн авч нийт 62 хүн, 6 автомашинтай ажиллаж байна гэж ОБЕГ-аас мэдээллээ. Одоогоор албан хаагчид усны урсгал өөрчилж, суваг татах, татсан сувгийн дагуу далан босгох ажлыг хийж байгаа аж.