Month: February 2017

“Алтан унжлагат хэмээх гал тахиа” жил гарах гэж байгаатай холбогдуулан Нийслэлийн засаг дарга бөгөөд Улаанбаатар хотын захирагч С. Батболд ерэн наснаас дээш нас сүүдэр зооглож байгаа ахмадууд гарын бэлэг хүргүүлж байна. Нийслэлийн засаг даргын тамгын газрын хэлтсийн дарга нар амралтын өдрүүдэд өндөр настаны гэрт нь очиж, хотын даргын бэлгийг өглөө.

Баянзүрх дүүргийн 1 дүгээр хорооны иргэн , Монгол улсын генерал Т. Алтангэрэл гуай энэ жил 99 нас хүрч байна. Цэргийн байгууллагад 47 жил тасралтгүй ажилласан, 1945 онд Улаанбаатар хотод Сэлэнгэ аймгаас шилжин ирж амьдарч байна. Агаарын хүчинд алба хаахаас өгсүүлээд 1945 оны чөлөөлөх дайнд хүртэл байлдаж явсан түүхтэй азай буурал юм. Энэ эрхэм азай буурлыг хүндэтгэн хотын даргын бэлгийг гэрт нь ирж гардуулан өглөө гэж нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээллээ.

НӨАТ-ын урамшууллын системийн дагуу иргэд худалдан авалт хийсэн үнийн дүнгийнхээ хоёр хувийг буцаан авч, Ebarimt.mn сайтад бүртгүүлсэн баримтаараа сугалаанд оролцох болсон.

Одоогийн байдлаар 2016 онд бүртгүүлсэн баримтын сугалааны тохирлыг 19 удаа явуулаад байгаа бөгөөд 2017 онд хамаарах баримтын сугалааны тохирол маргааш “Боловсрол” суваг телевиз болон Ebаrimt фэйсбүүк хуудсаар явагдах юм.

Сугалаанд оролцохын тулд худалдан авсан баримтуудаа хоёрдугаар сарын 18-ны өдрийн 23 цаг 59 минутаас өмнө Цахим төлбөрийн баримтын системд бүртгүүлсэн байх ёстой.

Тохирол 19:35 цагаас орон даяар шууд явагдах юм.

“Утааны эсрэг аав, ээжүүдийн холбоо”-ноос дахин жагсахаа илэрхийллээ. Өнгөрсөн оны сүүлээр нэгдсэн аав ээжүүд хоёр ч удаа утааны эсрэг томоохон жагсаал зохион байгуулсан билээ. Жагсаалын үеэр Засгийн газар, Ерөнхий сайд, УИХ-д шаардлага хүргүүлсэн юм. Харин уг шаардлагын хариу өнөөдрийг хүртэл ирээгүй гэдгийг тус холбооныхон хэлж байна. Иймээс цаашид шаардлагын албан ёсны хариуг ирүүлэхгүй бол дахин жагсана хэмээн мэдэгдлээ.

Тус холбооныхон хүүхдийн өвчлөл, нас баралтын шалтгааны мэдээллийг долоо хоног бүр статистик тоогоор гаргах, хүүхдийн эмнэлэг барих, Улаанбаатар хотын сургууль, цэцэрлэгүүдэд агаар цэвэршүүлэгч байрлуулах, Засгийн газрын яамд, хэрэгжүүлэгч агентлагын автомашиныг 15-40 хувь бууруулах, Утааны голомтод байгаа жирэмсэн эх, 0-3 хүртэлх насны хүүхдүүдийг утааны улиралд хотоос гаргах зэрэг арга хэмжээ авахыг шаардсан байна.

Нийслэлийн Засаг дарга бөгөөд Улаанбаатар хотын захирагч С.Батболд санаачлагаар Улаанбаатар хотын худалдааны танхимтай хамтран энэ сарын 20-ны өдөр “Улаанбаатар-хөрөнгө оруулалт 2017” бизнес уулзалтыг зохион байгуулах гэж байна.

Нийслэлийн эдийн засгийн хөгжлийг дэмжих, бизнес эрхлэгчдийн эрх ашгийг хамгаалах, төр хувийн хэвшлийн хамтын ажиллагааг хөгжүүлэх, иргэд, аж ахуйн нэгжид хөрөнгө оруулалт бизнесийн таатай орчин нөхцөлийг бүрдүүлэхэд энэхүү уулзалтын гол зорилго оршиж байгаа юм.

Бизнес уулзалтын талаар нийслэлийн Засаг даргын орлогч П.Баярхүү болон холбогдох албаны хүмүүс өнөөдөр хэвлэлийн бага хурал хийлээ. “Энэ жилийн хамгийн гол хөрөнгө оруулалт бүтээн байгуулалт дэд бүтцийн ажилруу чиглэнэ. Зам, гэр хорооллын дахин төлөвлөлт, орлогод нийцсэн орон сууцны салбаруудруу дийлэнх хөрөнгө оруулалт, худалдан авалтын үйл ажилгаанууд зарлагдаж байгаа. Энэ салбаруудыг бид бизнесийн салбарынхандаа танилцуулах гэж байна. Нийт 65 худалдан авалтын 174 тэрбум төгрөгний худалдан авах ажиллагааг бизнесийн салбарт үйл ажиллагаа эрхлэдэг аж ахуйн нэгж, иргэдэд зарлан танилцуулна. Мөн энэ удаагийн уулзалтын гол онцлог нь ААН-үүдийг алдаа гаргалгүй ажиллахад зөвлөн туслах, үнэн бодит зөв мэдээллээр хангах зорилго чиглэлтэйгээр зохион байгуулж байгаа. Улаанбаатар хотод бизнес эрхлэгчдээ дэмжиж, ямар зөв бодлого барих ёстой вэ гэдэг дээр харилцан ойлголцсон чухал уулзалт болно гэж үзэж байгаа” хэмээн Засаг даргын орлогч П.Баярхүү хэвлэлийн хурлын үеэр хэлэв.

Уулзалтад УИХ болон Засгийн газрын гишүүд, Монгол Улсад суугаа Онц бөгөөд Бүрэн эрхт Элчин сайд нар, нийслэлийн ИТХ-ын төлөөлөгчид, Нутгийн захиргааны байгууллагын удирдлагууд, Улаанбаатар хотын худалдааны танхимын гишүүд, олон улсын байгууллагын төлөөлөгч, үндэсний баялаг бүтээгчид, хөрөнгө оруулагчид оролцоно. “Улаанбаатар хөрөнгө оруулалт-2017” бизнес чуулга уулзалтаар төр хувийн хэвшлийн түншлэл, эдийн засгийн стратеги, хөрөнгө оруулалтын төсөл хөтөлбөр, худалдан авалт, шилэн тендер, хот байгуулалт, дэд бүтэц зэрэг асуудлыг хэлэлцэх юм. Гадаад, дотоодын төсөв, хөрөнгө оруулалтаар хийгдэх хаврын бүтээн байгуулалтын ажлаа нийслэлээс ил тод зарлаж, аж ахуйн нэгж, бизнесийнхэнд тендерээр зарлах ажлуудаа танилцуулах аж.

Хаврын бүтээн байгуулалт, хөрөнгө оруулалтын ажил эхлэхээс өмнө бизнесийнхэн чуулж буй уг арга хэмжээнд нийслэлийн иргэд, аж ахуйн нэгжүүд оролцох бүрэн боломжтой. “Улаанбаатар хөрөнгө оруулалт-2017” бизнес уулзалтыг TV5, UBS, BLOOMBERG телевиз болон Монголын үндэсний олон нийтийн телевизүүд шууд дамжуулан үзүүлнэ гэж нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээллээ.

Нийслэлийн Засаг даргын орлогч Ш.Анхмаа өнөөдөр Азийн хөгжлийн банкны Төсөл хөтөлбөрийн албаны дарга Андерс Петтерсоныг хүлээн авч уулзлаа. Уулзалтад нийслэлийн Боловсролын газрын дарга Ж.Гантулга, НЗДТГ-ын Төсөл, хөтөлбөр, хамтын ажиллагааны тасгийн дарга И.Батхүү болон холбогдох албаны хүмүүс байлцлаа. Нийслэлийн Боловсролын газраас санал болгосны дагуу АХБ-наас өнгөрсөн нэгдүгээр сард барилга, газар, байгаль орчны үнэлгээ хийх мэргэжилтэнгүүд ирж ажиллаад есөн сургууль, 30 цэцэрлэгийн барилга барих ажлыг санхүүжүүлэх боломжтой гэсэн урьдчилсан дүгнэлт гаргасан аж. Үүнийг ажил хэрэг болгох талаар өнөөдрийн уулзалтын үеэр талууд ярилцсан юм.

Засаг даргын орлогч Ш.Анхмаа “Энэ төслийг нийслэлд хэрэгжинэ гэж найдаж байна. Бид сургууль, цэцэрлэгийн хүрэлцээг сайжруулж, цаг алдалгүй бүтээн байгуулалтын ажлыг эхлүүлэх хэрэгтэй. НЗДТГ, нийслэлийн Хөрөнгө оруулалтын газар, нийслэлийн Боловсролын газар хамтран энэ төслийг хэрэгжүүлэх бүрэн боломжтой. Төсөл хэрэгжиж эхлэх болбол манай талаас бүхий л боломжоороо дэмжин ажиллах болно” хэмээлээ.

Ноён Андерс Петтерсон “Та бүхний саналыг нааштайгаар хүлээн авч байна. Бид судалгааны ажлаа дуусгаад энэ төслөө ажил болгон хэрэгжүүлэхийн төлөө ажиллах болно” гэдгийг хэллээ.

Нийслэл хотод төрийн өмчийн цэцэрлэггүй 25 хороо, төрийн өмчийн сургуульгүй 51 хороо байдаг аж.Улаанбаатар хотод 240 хүүхдийн 162 цэцэрлэг, 960 суудалтай 69 сургууль барих шаардлагатай гэсэн тооцоо байдаг юм байнагэж нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээллээ.

Монголын Морин спорт уяачдын холбооноос өнгөрсөн жилийн 2 дугаар сарын 28-ны өдөр зохион байгуулсан Төвийн бүсийн хаврын морин уралдааны явцад 16 хүүхэд мориноос унаж, 2 хүүхдийн хөл хугарсан байна. Тиймээс Хүний эрхийн Үндэсний Комиссоос Монгол Улсын Ерөнхий сайд Ж.Эрдэнэбатад хандан хүйтний улиралд хурдан морины уралдаан зохион байгуулахгүй байх талаар зөвлөмж хүргүүллээ.

“Монгол шуудан” ХК-ийн ТУЗ-ийн энэ сарын 14-ны өдрийн тогтоолоор нэгж хувьцаандаа 3,03 төгрөг буюу 2016 оны нийт цэвэр ашгийн 30 хувь болох 301.9 сая төгрөгийг ногдол ашиг болгон хувьцаа эзэмшигчдэдээ тараах шийдвэр гарчээ.

Энэхүү ногдол ашгийг ирэх тавдугаар сарын 1-ний өдрөөс эхлэн тарааж эхлэх юм байна. Ногдол ашиг авах эрхтэй хувьцаа эзэмшигчдийн нэрсийн жагсаалт гаргах өдрийг 2017 оны хувьцаа эзэмшигчдийн ээлжит хурлын бүртгэлийн өдрөөр тогтоохоор болжээ.