Month: February 2017

Улсын Дээд шүүхийн Эрүүгийн хэргийн танхимаас “Хэрэг бүртгэлт, мөрдөн байцаалтад анхаарах зарим асуудал” сэдэвт уулзалт ярилцлагыг Нийслэлийн эрүүгийн хэргийн давж заалдах шатны шүүх хуралдааны танхимд боллоо.

Уулзалт ярилцлагад Улсын Ерөнхий прокурорын орлогч, төрийн хууль цаазын шадар зөвлөх Б.Амгаланбаатар, ЦЕГ-ын дарга, тэргүүн комиссар Ө.Энхтөр болон Эрүүгийн хэргийн анхан, давж заалдах шатны шүүхийн ерөнхий шүүгч, шүүгч нар оролцсон байна. Энэ үеэр хар тамхи мансууруулах бодистой холбоотой хэргийн талаар болон цагдан хорих, гүйцэтгэх ажлын арга хэрэгсэл болгон ашиглаж авсан баримт сэлтийг нотлох баримтын хэмжээнд үнэлэх,шүүхийн шийдвэрийн үндэслэл болгох зэргийн тухай ярилцаж, харилцан санал солилцжээ.

Түүнчлэн Нийслэлийн Эрүүгийн хэргийн давж заалдах шатны шүүхийн шүүх хуралдааны жишиг танхимтай танилцсан бөгөөд цаашид бүх шүүхийг ийм танхимтай болгох шаардлагатай байгаа талаар ярилцсан байна гэж Улсын Дээд шүүхээс мэдээллээ.

Эрдэнэт”-ийн 49 хувийг төрд авах шийдвэрийн талаар Ерөнхийлөгчийг байр сууриа илэрхийлэхийг хүссэн хүсэлт одоо ч ирсээр байгаа аж. Тэрээр УИХ-ын чуулганд хэлсэн үгээ өөрийн твиттер хуудаснаа жиргэсэн. Иргэд түүний үгийг дэмжиж, төр хувийн хэвшлийн хамтын засаглал “Эрдэнэт” үйлдвэрт зайлшгүй хэрэгтэй гэдгийг ихэнх нь зөвшөөрсөн байлаа. Ерөнхийлөгч Ц.Элбэгдоржийн намрын чуулганы хаалтын хуралдаанд хэлсэн үгээс Эрдэнэт үйлдвэрийн цаашдын хувь заяатай холбоотой саналыг түүвэрлэн хүргэж байна.

1. “Эрдэнэт” үйлдвэрийн дансыг шилэн болгох хэрэгтэй

“Эрдэнэт” үйлдвэрийн дансыг шилэн болгох ёстой. Харамсалтай нь Шилэн дансны хуулийг манай өнөөгийн эрх баригчид хөтлөхгүй байна. Хуулийг сонгож хэрэгжүүлдэг. Өнөөдөр энд нэг л их хариуцлага, шударга ёс ярьж байна. Та бүхэн гарч ирээд хуулийг сонгож хэрэгжүүлдэг болж байгаа шүү дээ. Шилэн дансны хуулийг нийт албан тушаалтны 60 хувь нь мөрдөхгүй байна.

2. Худалдан авалт бүр ил тод байхыг шаардах ёстой.

“Эрдэнэт” үйлдвэрийн худалдан авалтыг шилэн болгох хэрэгтэй. Хаанаас, дотоодоос ямар бүтээгдэхүүн, ямар үнээр авч байгаа юм. Хүн бүхэн шууд интернэтээр ороод харчихдаг боломжтой байх ёстой. Үүнийг бид шаардах ёстой.

3. Олон улсын стандартад нийцсэн засаглал нэвтрүүлье

“Эрдэнэт” үйлдвэр дээр олон улсын стандартад нийцсэн засаглал байх ёстой гэж шаардах ёстой. “Эрдэнэт” үйлдвэр дээр жил бүхэн олон улсын стандартын дагуу аудит хийж байх ёстой гэж шаардах ёстой. “Эрдэнэт” үйлдвэрийн 49, 51 хувь дээр байгаа нөхдүүдээс “Эрдэнэт” үйлдвэрийн хаалт, хөгжлийн асуудал дээр бодлого оруулж ир гэж шаардах ёстой.

4. “Эрдэнэт” өөр шинэ үйлдвэр Монголд хэрэгтэй

“Эрдэнэт”-ийн баялаг нь дуусаад ирэхэд бид өөр шинэ үйлдвэрүүдтэй болсон байх ёстой Одоо Монголд 100 хувь хүрэд ирсэн юм бол “Эрдэнэт” үйлдвэрийнхээ зэсийг Монголдоо хайлуулна аа. Одоо “Эрдэнэт” үйлдвэрийн зэс хайлуулах үйлдвэр байгуулах ёстой гэж шаардах ёстой. Зэс хайлуулах үйлдвэрээ түшиглээд зэсээр юм хийдэг үйлдвэрүүдийг байгуул гэж шаардах ёстой. Нэмж ажлын байр бий болго. “Эрдэнэт” үйлдвэр дээр Эрдэнэтийн баялаг нь дуусаад ирэхэд бид өөр шинэ үйлдвэрүүдтэй болсон байх ёстой. Энэ бодлогыг одоо бид ярьж байх ёстой. Үүнийг 49, 51 хувь дэр байгаа нөхдөөс шаардах учиртай.Энэ шаардлага, энэ зүйлүүд өнөөдөр явахгүй байна.

5. Эдийн засаг, санхүүгийн олон улсын хориг Монгол дээр тавигдана

Энэ шийдвэрийг гаргасан цаг мөчөөс эхлээд Монгол руу харах гэж байсан санхүүгийн байгууллага, эдийн засгийн бүх байгууллага үйл ажиллагаагаа зогсооно. Шууд эдийн засаг, санхүүгийн олон улсын хориг Монгол дээр тавигдана. Аль нэг улсын Засгийн газар шийдвэр гаргахгүй байж болно. Монгол руу зүглэж яах юм бэ. Өөрийнхөө бизнесээс булааж авч байгаа улс хүний бизнесийг хайрлах уу?

6. Ард түмэндээ хувийг нь өгөх, хяналт бий болгох алхмыг хийж болно

Эрдэнэтийн 49 хувь Монголд ороод ирсэн. Эргүүлээд ард түмэндээ, хүмүүст хувийг нь Хөрөнгийн биржээр өгөх, хяналт бий болгох алхмыг хийж болно. Би ийм хувилбар бодож байсан. 51-ээс 17 хувь ч гэдэг юм уу, 49-өөс нь 16 хувь, ингээд 16, 17 гэх юм бол 33 хувь. Ийм хэмжээнд Хөрөнгийн биржээр зарж болно. Хувийнх нь 33 хувьтай байж болно. Нөгөө тал нь 34-тэй байж болно. Иймэрхүү байдлаар ард иргэдийн оролцоотой, төрийн оролцоотой, хувийн хэвшлийн оролцоотой асуудлыг шийдэх боломж байж болно. Ийм зүйл ярьж болно. Энэ дээр Засгийн газар зуучлаад, хамтарч оролцоод орж ирж болно.

Нийслэлийн Давж заалдах шатны шүүх дөрвөн настай охиноо хөнөөсөн гэх Т.Цогт, Г.Маралмаа нарт холбогдох хэргийг дахин шүүн хэлэлцэж эцэг Г.Цогтыг гэм буруугүй гэж сулласныг хэрэгсэхгүй болгож мөн хойд эх Г.Маралмаад 23 жилийн хорих ял өгснийг хүчингүй болгож хэргийг буцаажээ.

Г.Маралмаа нь анхан шатны шүүхийн шийдвэрийг хүлээн зөвшөөрөлгүй, давж заалдах шатны шүүхэд гомдол гаргасан юм. Ингээд талийгаач охины төрсөн эцэг Т.Цогтыг анхан шатны шүүх хурал болтол хорих 461 дүгээр ангид цагдан хориод байгаа юм байна.

О.ӨНӨР

Цагдаагийн байгууллагаас Улаанбаатар хотод хулгай, дээрэм, танхайн гэмт хэрэг олноор үйлдэгддэг эмзэг цэгийн судалгааг гаргаж, энэ төрлийн гэмт хэргээс урьдчилан сэргийлэх, таслан зорилгоор зөөврийн хяналтын камер байрлуулан ажиллаж байна.

Энэхүү хяналтын камерыг гэмт хэрэг үйлдэгдэх магадлалтай эмзэг цэгт өндөрлөг газар байрлуулж, ажиллуулснаар хулгай, дээрэм, танхайн гэмт хэргийг таслан зогсоох, урьдчилан сэргийлэхэд үр дүнтэй байна гэж Улаанбаатар хотын Цагдаагийн газрын Хулгайлах гэмт хэрэг мөрдөх хэлтсийн дарга, цагдаагийн хошууч П.Очбадрах ярилаа.

Өнөөдөр Олон улсын эх хэлний өдөр тохиож байна. Эх хэл, соёлын олон янз байдал болон олон хэлний талаарх ойлголт мэдлэгийг дээшлүүлэх зорилгоор 1999 онд НҮБ-ын Боловсрол, соёл, шинжлэх ухааны байгууллага /ЮНЕСКО/ жил бүрийн хоёрдугаар сарын 21-нийг “Олон улсын эх хэлний өдөр” болгон зарлаж, 2000 оноос албан ёсоор тэмдэглэж эхэлжээ.

Энэ өдрийг тэмдэглэх болсон түүх 1952 оноос эхтэй. Өөрийн эх хэлээрээ бичих эрхээ хамгаалахын тулд хийсэн нийгмийн хөдөлгөөн нь энэ өдрийг дэлхий даяар тэмдэглэж эхлэх үндэс суурь болсон байна. Тодруулбал, 1952 оны энэ өдөр Бангладешийн Даккагийн их сургуулийн оюутнууд өөрсдийн эх хэлээ Зүүн Пакистаны албан ёсны хоёр хэлний нэг болгохоор одоогийн Бангладешийн нийслэл Дакка хотын Дээд шүүхийн ойролцоо жагсаал хийх үеэр цагдаа нар гал нээж, таван хүнийг буудан хөнөөжээ. Эх хэлээ аварч, хамгаалахын төлөө тэмцэж байгаад амиа алдсан эдгээр хүний дурсгалыг хүндэтгэн энэ өдрийг бангладешчууд ”эх хэлний өдөр” болгон тэмдэглэдэг болжээ.

Хэл бол биет болон биет бус өвөө хадгалан үлдэж, хөгжүүлэх хамгийн хүчирхэг хэрэгсэл юм.

“Олон улсын эх хэлний өдөр-2017”-г “Олон хэлний боловсролоор дамжуулан тогтвортой ирээдүйг бий болгох нь” сэдвийн хүрээнд дэлхий даяар тэмдэглэж байна.

Монголын Сэтгүүлчдийн нэгдсэн эвлэлээс Хэвлэл мэдээллийн салбарт зохиогчийн эрхийг дээдлэх тунхаг баталсаныг мэдээлэв. Сэтгүүлзүй, хэвлэл мэдээллийн салбарт зохиогчийн эрхийг дээдлэх энэхүү тунхаг нь нээлттэй баримт бичиг бөгөөд дэмжигч байгууллагуудыг нэгдэхийг тус байгууллагаас уриалжээ.

Уг тунхагт “Сэтгүүлзүй, хэвлэл мэдээллийн салбарт зохиогчийн эрхийг дээдлэж, оюуны өмчийг эрхэмлэх асуудлыг Улаанбаатар хотноо хэлэлцэн;

Монголын үндэсний сэтгүүлзүйн цаашдын зөв хөгжилд зохиогчийн эрх, оюуны өмчийг дээдлэх соёлыг төлөвшүүлэх хэрэгцээ нэн чухал байгааг хүлээн зөвшөөрч;
Оюуны өмч, зохиогчийн эрхийг салбартаа эрхэмлэн мөрдөх баталгааг нэгдмэл саналтайгаар гаргахын чухлыг цохон тэмдэглэж;
Зохиогчийн эрх, оюуны өмчийн зөрчил хэвлэл мэдээлэл, сэтгүүлзүйн салбарт ултай оршин буйг ухамсарлан;
Төрийн зүгээс энэ асуудлыг зохицуулах шаардлага нэрийн дор хэвлэл мэдээллийн эрх чөлөөнд халдах, сэтгүүлзүйн мэргэжлийн хараат бус байдалд нөлөөлөх нөхцөл бодитой байсаар байгаад түгшиж;
“Сэтгүүлзүй ба оюуны өмч” Үндэсний хэлэлцүүлгийн илтгэл, саналуудыг сайшаан;
2017 оны 02 дугаар сарын 17-ны өдөр энэхүү Тунхаглалыг батлав хэмээжээ.

• Монголын сэтгүүлчид шударга ёс, хүний эрх, эрх чөлөөг дээдэлж, ёс зүйтэй, хариуцлагатай, мэргэжлийн сэтгүүлзүйг төлөвшүүлэхийн тулд зохиогчийн эрхийг хүндэтгэх;
• Аливаа мэдээ мэдээлэл, нийтлэл нэвтрүүлэг, сурвалжлага зэрэг сэтгүүлзүйн бүтээл, гэрэл зураг, дуу, дүрс бичлэг нь Зохиогчийн эрх болон түүнд хамаарах тухай хууль, эрхзүйн бусад баримт бичгүүдээр хамгаалагдах бөгөөд түгээн хувилах, олшруулах эрхийг зохиогч болон хэвлэл мэдээллийн байгууллага нь чөлөөт хэлцлээр зохицуулах;
• Бусдын бүтээлээс олон нийтэд түгээх зорилгоор тоо баримт, материалыг эш татахдаа эх сурвалжийг тодорхой дурьдахыг энгийн соёл болгон хэвшүүлэх;
• Хэвлэл мэдээллийн хэрэгсэл, сэтгүүлч, хэвлэн нийтлэгчид нь зохиогчийн эрхийг зөрчиж, оюуны өмчид халдсан аливаа үйлдэл гарахаас нийгмийг хамгаалж, соён гэгээрүүлэх, энэ чиглэлээр төртэй хамтран ажиллах;
• Хэвлэл мэдээллийн хэрэгслүүд, тус салбарт ажиллагсад нь зохиогчийн эрхээ хамгаалах, баталгаажуулах ажлыг зохион байгуулж, оюуны өмчийн зөрчлийг арилгах талаар идэвхтэй ажиллах;
• Монголын хэвлэл мэдээлэл, сэтгүүлзүйн салбар дахь оюуны өмч, зохиогчийн эрхийг хамгаалах, зохицуулах хууль эрх зүйн орчныг сайжруулах асуудлаар хэвлэл мэдээллийн байгууллага, сэтгүүлчид идэвхтэй, нэгдмэл байр суурьтай, хамтран ажиллах;
• Хэвлэл мэдээлэл, сэтгүүлзүйн салбарын өөрийн зохицуулалтын байгууллага болох Монголын Хэвлэл Мэдээллийн Зөвлөлөөс батлан гаргасан “Хэвлэл мэдээллийн ёсзүйн зарчим”-ыг нийт хэвлэл мэдээллийн хэрэгсэл, сэтгүүлчид үйл ажиллагаандаа мөрдлөг болгон оюуны өмчийн аливаа хэлбэрийн зөрчлийг нэн даруй залруулах, арилгахыг эрмэлзэх;
• Зохиогчийн эрх, түүнд хамаарах эрхийн асуудлыг хэвлэл мэдээллийн байгууллага нь өөрийн хөдөлмөрийн гэрээ, хамтын гэрээ, чөлөөт хэлцлийн журмаар шийдвэрлэх соёл нэвтрүүлэхийг эрхэмлэх;
• Зохиогчийн эрхийн зөрчлийг төрийн эрх бүхий байгууллагаас хянаж, шийдвэрлэхдээ иргэний нийгэм болон олон нийтийн төлөөллийг оролцуулан, ил тод зарчмаар шийдвэрлэхийг эрмэлзэх;
• Төрийн эрх бүхий байгууллагаас зохиогчийн эрхийн зөрчлийн асуудлаар хэвлэл мэдээллийн хэрэгслийн үйл ажиллагааг зогсоох, хаахыг урьтал болгохоос илүүтэйгээр тухайн зөрчлийг арилгахыг шаардаж сануулж, харилцан ойлголцож, шат дараатай алхам хийхийг эрхэмлэх;
• Сэтгүүлчийн аливаа бүтээлийг ашиглахдаа сэтгүүлчийн мэргэжлийн ёсзүйн зарчим, зан суртахууны эрхийг дээдлэн хүндэтгэх хэмээжээ.

Монгол түмний маань хамгийн том уламжлалт бая Сар шинийн өдрүүд удахгүй болох гэж байгаа билээ. Үүнтэй холбогдуулан томоохон захууд энэ долоо хоногт амралтын өдрөгүй ажиллаж байгаа юм байна.

“Нарантуул” худалдааны төв цагийн хуваарийн дагуу өнөөдөр буюу мягмар гарагт ажиллахгүй байсан гэвч Сар шинийн баярын зохицуулалтын дагуу өнөөдөр хэвийн цагийн хуваарийн дагуу ажиллаж аж.