Month: February 2017

Мал аж ахуйн чиглэлийн бодлого, зорилтыг малчид, фермер эрхлэгчдэд сурталчлах, танилцуулах, тэдэнд тулгамдаж буй асуудлыг хэлэлцэх, отрын бүс нутаг болох хил залгаа сумдын хамтын ажиллагааг сайжруулах зорилго бүхий “Малчдын зөвлөгөөн”-ийг өнгөрсөн долоо хоногт зохион байгууллаа. Зөвлөгөөнийг Багануур дүүргийн ЗДТГ-аас зохион байгуулсан бөгөөд уг арга хэмжээнд нийт 360 гаруй малчин хамрагдсан байна. Уг арга хэмжээнд нийслэлийн Засаг даргын орлогч Д.Энхтөр, нийслэлийн Хүнс, хөдөө аж ахуйн газрын дарга Д.Баянбат, нийслэлийн Мал эмнэлгийн газрын дарга А.Нарантуяа, Багануур дүүргийн ИТХ-н дарга С.Даваасүрэн, Засаг дарга Ц.Сандаг-Очир, Төв аймгийн Баяндэлгэр сумын ИТХ-н дарга Б.Байгалмаа, Засаг дарга Г.Баасанжав болон бусад албаныхан оролцсон юм.

Зөвлөгөөнийг нээж нийслэлийн Засаг даргын орлогч Д.Энхтөр “Монгол түмний нандин шүтээн буянт мал сүргийнхээ ашиг шимийг нь арвижуулан сайжруулж, тодорхой чиглэлтэйгээр өсгөн үржүүлж, нийслэлийн хүн амын хүнсний хэрэгцээг ханган улс орон, нийслэл, дүүргийнхээ хөгжилд хувь нэмрээ оруулж байгаа малчид та бүхэндээ нийслэлийн Засаг даргын нэрийн өмнөөс энэ өдрийн мэндийг дэвшүүлж байна.

Нийслэлд эрчимжсэн мал аж ахуйг хөгжүүлэхэд шаардлагатай бодлогын баримт бичгүүдийг боловсруулж, батлуулан хэрэгжилтийг ханган ажиллаж байгаа. Мал аж ахуйн салбарын өвөлжилт, хаваржилтын бэлтгэл хангах, дүүргүүдэд өвс, тэжээлийн аюулгүйн нөөц бүрдүүлэх чиглэлээр нийслэлийн төсвөөс гарсан санхүүжилтээс 49 сая төгрөгийг Багануур дүүрэгт өвс, тэжээл хадгалах агуулах бариулж, бэлчээрийн усан хангамжийг сайжруулах чиглэлээр 2013-2015 онд тус дүүрэгт 71.4 сая төгрөгийн санхүүжилтээр 4 худгийг шинээр гаргасан байна.

Арьс, ширний урамшуулалд Багануур дүүргээс 2016 онд 109 малчны 1076 ширхэг арьс, ширний 27.1 сая төгрөгийн урамшуулал олгогдсон. Мал аж ахуйн салбарын цаашдын хөгжил, дэвшил малчид, ферм эрхлэгчид бүхний мэдлэг чадвар, хичээл зүтгэлээс ихээхэн шалтгаалах нь ойлгомжтой. Монгол орныг малгүйгээр төсөөлөх аргагүй. Мал сүрэг бол шавхагдашгүй баялаг. Энэ баялгийг бүтээгчид нь малчид, фермер эрхлэгчид та бүхэн билээ. Мал сүргийнхээ ашиг шимийг нь улам ихээр нэмэгдүүлэн, энэ их үйлсдээ төр, хувийн хэвшил, малчдын оролцоог ханган ажиллаж, мал аж ахуйн салбарын хөгжлийг орчин цагийн дэлхийн чиг хандлагад нийцүүлэн ажиллахыг хүсье” хэмээлээ.

Багануур дүүрэг нь нийт 178.774 мянган толгой малтай үүнээс тэмээ 209, адуу 14198, үхэр 14198, хонь 91271, ямаа 59053, малын тоогоорой нийслэлд хамгийн олон малтай дүүрэгт орж байна гэж нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээллээ.

Татварын ерөнхий газар болон Сангийн яам хамтран өнөөдөр Нэмэгдсэн өртгийн албан татварын буцаан олголтын талаар мэдээлэл хийлээ.

Өнгөрсөн хугацаанд баримтаа бүртгүүлсэн 620 гаруй мянган иргэнд 35.5 тэрбум төгрөгийг буцаан олгохоор баталгаажсан байна. Үүнээс 484 мянган татвар төлөгч иргэнд 34.4 тэрбум төгрөгийг одоогийн байдлаар олгоод байгаа гэнэ. Харин хувийн мэдээлэл нь бүрэн бус 113 мянга, гүйлгээ буцсан 19 мянган иргэний мөнгийг хувийн мэдээллээ бүрэн залруулсны дараа олгоно гэж албаныхан мэдэгдлээ. НӨАТ-ын буцаан олголтоо авч чадаагүй иргэд өөрт хамгийн ойр татварын албанд хандах, татварын албаны 1800-1288 гэсэн тусгай дугаарт хандаж, хувийн мэдээллээ бүрдүүлэх. Мөн 131313 дугаарт хувийн мэдээллээ ирүүлсэн иргэд дахин энэ дугаарт мэдээллээ илгээхийг албаныхан хүслээ.

Зарим нэг үйлчилгээний байгууллага “Е баримт” олгохгүй байна, хойрго хандаж байна гэсэн шүүмжлэл дээрх байгууллагуудад ирсээр байгаа аж. Тиймээс гуравдугаар сараас эхлэн баримт олгохгүй байгаа болон кассын машинтай болов ч түүнийг ашигладаггүй, янз бүрийн шалтаг гарган, хууль дагаж мөрдөхгүй байгаа хувь хүн, албан байгууллагуудад хатуу шаардлага хүргүүлж, арга хэмжээ авах ба цаашлаад хуулийн дагуу хариуцлага хүлээлгэнэ гэж мэдэгдлээ.

Мэдээллийн хурлын үеэр Татварын ерөнхий газран дарга Л.Зориг “Иргэдийн хамгийн ихээр үйлчлүүлдэг томоохон зах худалдааны төвүүдэд баримт олгох кассын машин байрлуулах ажлыг нийслэлийн Засаг дарга, нийслэлийн Мэргэжлийн хяналтын газар, Үйлдвэр үйлчилгээний газартай хамтран хэлэлцэж байгаа. Ингэхдээ аж ахуй нэгжүүдэд кассын машиныг хөнгөлөлттэй олгохоор ажиллаж байна. Энэ оны эхний хагаст томоохон зах, худалдааны төвүүдийг кассын машинжуулж дуусна” гэв.

Ирэх амралтын өдрүүдэд буюу маргааш, нөгөөдөр дугаарын хязгаарлалт үйлчлэхгүй. Мөн шинийн 1, 2, 3-ны өдрүүдэд тээврийн хэрэгслийн улсын дугаарын хязгаарлалт үйлчлэхгүй юм байна.

Өмнөх жилүүдийн баярын өдрүүдэд Замын Цагдаагийн Алба нэмэлтээр хэв журмын алба хаагчдыг замын хөдөлгөөнийг зохицуулах үйл ажиллагаанд татан оролцуулдаг байсан. Тэгвэл, энэ жил ч мөн адил Хууль Сахиулахын Их Сургуулийн сонсогчид гэх мэт бусад цагдаагийн албатай хамтран ажилладаг байгууллагуудыг татан оролцуулж замын хөдөлгөөнийг зохицуулж, замын ачааллыг бууруулах учраас ямар нэг дугаарын хязгаарлалт хийгдэхгүй юм байна.

МУИС-ийн багш нар ажил хаях шийдвэрт хүрч магадгүй байгаа тухайгаа хэвлэлийн хурал хийж мэдээллээ. Тодруулбал, тус сургуулийн Үйлдвэрчний хэвлэл хороо, МУИС-ийн багш нарын холбооноос МУИС-ийн удирдлагуудад шаардлага хүргүүлж, ирэх гуравдугаар сарын 6-ны өдрийн дотор шаардлагыг шийдвэрлэхгүй бол ажил хаях гэнэ.

Учир нь өнгөрсөн хугацаанд боловсролын салбарыг шинэчлэхээр болж, улмаар олон төрлийн бодлого хэрэгжүүлсэн нь сургалтын чанар муудах, хэвийн үйл ажиллагаа алдагдахад хүргэсэн. Үүнд сургуулийн удирдлагууд буруутай гэж багш нар үзэж байгаа юм байна. Тиймээс салбарын яам, Засгийн газарт шаардлага хүргүүлж, МУИС-ийн удирдлагуудыг нэн даруй шинэчилж өгөхийг шаарджээ. Хэрэв ажил хаялт болсон тохиолдолд оюутнуудыг хохироохгүй байдлаар, хичээлийн нөхөх төлөвлөгөө боловсруулж байгаа гэж багш нарын холбооны зүгээс мэдээлэв.