Month: December 2016

Авлигын эсрэг хуулийн үйлчлэлд хамрагдах мэдүүлэг гаргагчид нь хуульд заасан үндэслэлийн дагуу хувийн ашиг сонирхлын мэдүүлэг болон хөрөнгө, орлогын мэдүүлгээ жил бүрийн хоёрдугаар сарын 15-ны дотор www.meduuleg.iaac.mn цахим хуудсаар шинэчлэн мэдүүлэх үүрэгтэй бөгөөд тус газраас цахим системийг шинэчлэх, нийтийн албанд томилогдохоор нэр дэвшсэн этгээдийн хувийн ашиг сонирхлын урьдчилсан мэдүүлгийг хянах үйл ажиллагааг цахимаар хэрэгжүүлэхээр ажиллаж байна.

Мөн тус газраас хөрөнгө, орлогын мэдүүлгийг улсын хэмжээнд бүртгэх, хүлээн авах үйл ажиллагааг зохион байгуулахтай холбогдуулан 2017 оны мэдүүлгийн бүрдүүлэлтийн үйл ажиллагааны бэлтгэл ажлыг ханган ажиллах чиглэлээр төрийн болон нутгийн захиргааны нийт 106 байгууллагын удирдлагуудад зөвлөмж, чиглэлийг боловсруулан хүргүүлсэн байна.

2016 оны Улсын Их Хурал, аймаг, нийслэлийн иргэдийн Төлөөлөгчдийн хурлын сонгуулийн дүн болон Монгол Улсын Их Хурлын 2016 оны 7 дугаар сарын 21-ний өдрийн 12 дугаар тогтоолоор Засгийн газрын бүтэц, зохион байгуулалт өөрчлөгдсөнтэй холбогдуулан төрийн байгууллагуудын мэдүүлгийг бүртгэх, хянах, хадгалах эрх бүхий албан тушаалтны 40 гаруй хувь нь шинээр томилогдон өөрчлөгдсөн тул Авлигатай тэмцэх газраас мэдүүлэг гаргагч болон мэдүүлгийг бүртгэх, хянах, хадгалах эрх бүхий албан тушаалтнуудыг арга зүйн удирдлагаар хангаж сургалт зохион байгуулан ажиллаж байна.

Дархан уул аймгийн Хонгор сумын Хар модтын гуу гэх газар нутаглаж буй Иргэн Ж-гийн хонь өвчилсөн мэдээлэл 12-р сарын 6-ны өдөр аймгийн ХХААГ-т ирсэн. Тус аймгийн Онцгой комисс шуурхай хуралдаж 72 цагийн дотор холбогдох арга хэмжээг мэргэжлийн байгууллагууд газар дээр нь авч ажилласан байна. Хонгор сумын хоёрдугаар багийн Зурамтай гэх газрын Хар модотын гуу орчимд хонь ямааны цэцэг өвчин гарсанд сумын Засаг даргын 2016 оны 12 дугаар сарын 07-ны өдрийн 243 дугаар захирамж гарч хорио цээрийн дэглэм тогтоосны дагуу 5 айлыг оролцуулан 4 км радиустай голомтын бүсийг тогтоож 255 бог малыг устгаж 396 бог малд вакцин хийжээ.

Хонгор сумын нэгдүгээр баг буурлын орчимд хонь ямааны цэцэг өвчин гарсантай холбогдуулан сумын Засаг даргын 2016 оны 12 дугаар сарын 08 өдрийн 246 дугаар захирамж гарч хорио цээрийн дэглэм тогтоосны дагуу 4 айлыг оролцуулан 200 метр радиустай голомтын бүсийг тогтоож 41 бог малыг устган 80-н бог малд вакцин хийсэн байна.

Нийслэлийн Газрын албанаас зөвшөөрөлгүй байрлуулж, үйл ажиллагаа эрхэлж буй нийт 757 түргэн үйлчилгээний цэг /ТҮЦ/-г буулгаж эхэлжээ. 757 ТҮЦ-ний цаана хагартлаа баяжсан иргэд байхгүй нь тодорхойсон. Гэхдээ буулгах нь зөв ч гэлээ анхнаасаа яагаад ард иргэдээрээ тоглон ийм олон үнэтэй ТҮЦ-үүдийг тараасан юм бэ.

ТҮЦ-үүдийг өндөр үнээр шахах үйл явц хэдэн жилийн өмнөөс эхэлсэн. Та нар өнгө үзэмжгүй хуучин ТҮЦ-нүүдийнхээ оронд 15-50 сая төгрөгийн орчин үеийн ТҮЦ худалдан авчих юм бол та нарыг ажлуулна гэж хулхин дээр нь цэцэг ургуулж харсаар байж өөрсдийн шахааг хийчихээд одоо болохоор ТӨРИЙН төмөр нүүр гаргаж өвлийн тэсгим хүйтнээр ад үзэн албадан буулгаж байгаа нь хүний мөс чанарыг харуулах шиг. Иргэд утаанд хордож урдах замаа харахгүй бүдчин явахад одоо бас орлого олох эх үүсвэрийг нь хаачихвал хэдэн өрх айл хямарлын салхинд сөхөрч унахыг манай хотын дарга тооцоолж суугаа болов уу.

О.ӨНӨР

Өмнөговь аймгийн Гурван тэс сумын нутаг дахь Тост, тосонбумбын нурууг улсын тусгай хамгаалалтад авах шийдвэр гарсан боловч өнөөг хүртэл хилийн заагийг тогтоох ажлыг хойшлуулж байгаа талаар тус сумын иргэн Ж.Батбаярын итгэмжлэгдсэн төлөөлөгч Гурвантэс сумын Иргэдийн төлөөлөгчдийн хурлын дарга асан Б.Дэжид, түүний өмгөөлөгч Г.Дашдэмбэрэл, “Ногоон сэтгүүлч” төрийн бус байгууллагын тэргүүн С.Ганболд нар өнөөдөр “Монгол ньюс” мэдээллийн төвд мэдээллээ.

Өмнөговь аймгийн Гурвантэс сумын нутаг Тост, Тосонбумбын нуруу орчмын бүс нутаг дахь тусгай лизензүүдийг цуцлахаар захиргааны хэргийн шүүхэд нэхэмжлэл гаргасан. Энэхүү шүүх хурал одоо тав дахь удаагаа хойшлогджээ. Б.Дэжид: Хайгуулын зургаан лицензээс болж хилийн зааг тогтоох ажил тодорхойгүй хугацаагаар хойшилж байна. Тост, Тосонбумбын нурууг 2015 оны арванхоёрдугаар сарын 21-нд Монгол Улсын Засгийн газрын тогтоол гаргаж, байгалийн нөөц газарт авсан. Ингэхдээ тусгай зөвшөөрлийн бүртгэлийг цэгцлэх зорилгоор гурван жилийн хугацаатай авсан байдаг. Үүний дараа Улсын их хурлаар 2016 оны дөрөвдүгээр сарын 14-ний өдөр 35 тоот тогтоолоор Улсын тусгай хамгаалалтад авч, байгалийн нөөц газрын ангилалд бүртгэсэн. Ингэхдээ хилийн заагийг тогтоох үүргийг Засгийн газарт өгсөн билээ. Гэвч өнөөг хүртэл хилийн заагийг тогтоогоогүй байна. Бид нийт 889 мянган га талбайг хамгаалалтад оруулж, хилийн заагийг тогтоох хүсэлтийг өгсөн байгаа. Үүнд Засгийн газрын зүгээс хоёр ашиглалтын тусгай зөвшөөрөл, 10 хайгуулын тусгай зөвшөөрөл байгаа бөгөөд албан бус мэдээллээр 40 орчим тэрбум төгрөгийн нөхөн төлбөрийн асуудал яригдаж байгаа гэсэн хариулт өгдөг. Ашигт малтмалын газарт өнгөрсөн дөрөвдүгээр сард эдгээр 10 хайгуулын тусгай зөвшөөрлийг цуцлах үндэслэлээр нийслэлийн захиргааны хэргийн шүүхэд нэхэмжлэл гаргасан. Энэ 10 тусгай зөвшөөрөл нь сүүлийн дөрвөн жилийн хугацаанд талбай дээрээ хайгуулын ажил хийгээгүй учраас Ашигт малтмалын газар хуулийн дагуу шалгаж, үйл ажиллагааг зогсоох ёстой. Гэтэл найман сарын хугацаа өнгөрч байхад шүүх хурал таван удаа хойшилж, ямар нэгэн шийдвэр гаргахгүй байсаар өдийг хүрлээ. Гэхдээ Ашигт малтмалын газраас хугацаа нь дууссан дөрвөн лизенцийн үйл ажиллагааг зогсоосон. Одоо зургаан компани үлдчихсэн бид шүүхэд хандаж байна гэлээ. Хамгийн сүүлийн шүүх хурал энэ сарын 8-нд болох үеэр зарим компаниуд нь Монголоос гарсан байх юм. Ийм сунжирсан асуудлыг цэцгцлэхийг дээрх иргэд хүссэн юм.

Улаанбаатар хотын цагдаагийн газраас Чингэлтэй дүүргийн Цагдаагийн нэгдүгээр хэлтэстэй хамтран өчигдөр ТҮЦ-үүдэд гэнэтийн шалгалт хийлээ. Уг шалгалтаар ТҮЦ ажиллуулах зөвшөөрөлгүй, зөвшөөрөгдсөн цэгээс бусад газарт зөвшөөрөлгүйгээр тамхи худалдан борлуулдаг зөрчил дийлэнх хувийг эзэлж байлаа.

Улаанбаатар хотын Цагдаагийн газрын ахлах мэргэжилтэн, Цагдаагийн хошууч Л.Ганбаатар “Улаанбаатар хотын цагдаагийн газраас харьяа дүүргүүд дэх цагдаагийн хэлтсүүдтэй хамтран түргэн үйлчилгээний цэгүүдэд хяналт шалгалт хийж байна. Өнөөдрийн хувьд Чингэлтэй дүүргийн цагдаагийн нэгдүгээр хэлтсийнхэнтэй хамтран тус дүүргийн нутаг дэвсгэрт байрлах ТҮЦ-үүдэд хяналт шалгалт хийлээ. Зөвшөөрөлгүйгээр үйл ажиллагаа явуулах, Тамхины хяналтын тухай хуулийг зөрчсөн нийтлэг зөрчил гарч байна” хэмээн ярилаа.

Нийслэлийн төвийн зургаан дүүргийн хэмжээнд нийт 1100 гаруй түргэн үйлчилгээний цэг /ТҮЦ/ үйл ажиллагаа явуулж байна. Улаанбаатар хотын Ерөнхий менежер бөгөөд Захирагчийн ажлын албаны даргын А/103 тоот тушаалын хэрэгжилтэд гүйцэтгэлийн хяналт шалгалтыг өнгөрсөн сард хийсэн. Шалгалтаар ТҮЦ эрхлэгчдийн 1.7 хувь нь ариун цэврийн өрөөтэй боловч зориулалтын дагуу ашигладаггүй, 98.3 хувь нь ариун цэврийн өрөө байх хэсгийг агуулах, амралтын өрөө болон үйлчилгээний талбай болгон засч ашигласан, шаардлага хангасан хогийн савгүй, хаана бие засч, гараа угааж, хувийн ариун цэвэр сахидаг нь тодорхойгүй, орчны 5м хүртэлх талбайг тохижуулаагүй, орчноо бохирдуулж, бохир ус, хогоо ногоон байгууламж руу асгадаг гэх мэт нийтлэг зөрчил гаргадаг нь илэрсэн юм гэж нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээлэв.

Баянзүрх дүүргийн Засаг дарга томилогдохгүй байгаа асуудлаар Нийслэлийн Засаг даргын зөвлөх Д.Мөнх-Эрдэнэ өнөөдөр мэдээлэл хийлээ.

Баянзүрх дүүрэг нь 41 төлөөлөгчтэй байх ёстой. Зургаан төлөөлөгчийг сонгуулийн хууль тогтоомж зөрчсөн гэж дүүргийн сонгуулийн хороо жагсаалтаас хасчээ. Энэ шийдвэр шүүхийн шатанд явагдаж байгаа.

Д.Мөнх-Эрдэнэ хэлэхдээ, “Нийслэлийн Засаг дарга дүүргийн засаг даргын томилгоог хийхдээ дүүргийн ИТХ-ын шийдвэрт үндэслэх учиртай. Өнөөдрийн байдлаар БЗД-ийн ИТХ-ын хүчин төгөлдөр шийдвэр ирээгүй байна. Дүүргийн сонгуулийн хорооноос одоогоор 35 төлөөлөгчийн бүрэн эрхийг хүлээн зөвшөөрсөн шийдвэрийг ирүүлсэн байгаа.

Өчигдөр Баянзүрх дүүргийн АН-ынхан хэвлэлийн бага хурал хийж, шүүхийн шийдвэр эцэслэн гарсан гэж мэдээлсэн байна лээ. Захиргааны хэргийн анхан шатны шүүхийн шийдвэр гарсан боловч Давж заалдах шатны шүүхэд эцэслэн шийдвэрлэгдээгүй байгаа. Хуулийн дагуу 21 хоногийн дотор шийдвэрлэгдэх ёстой.

Ийм нөхцөл байдалтай байгаа учраас Нийслэлийн Засаг дарга БЗД-ийн засаг даргын томилгоог хийх боломжгүй байна. Төрийн үйл ажиллагаанд хууль дээдлэх зарчим үйлчилдэг” гэв.

Ийнхүү шүүхийн шийдвэр гараагүй учраас тус дүүрэгт аль нам олонх болсон нь тодорхой бус байна.Одоогоор Баянзүрх дүүргийн хуучин засаг дарга Д.Пүрэвдаваа ажлаа үргэлжлүүлэн хийж байгаа гэж Д.Мөнх-Эрдэнэ мэдээллээ.

“Авьяаслаг Монголчууд” шоуны ялагч О.Энх-Эрдэнэ шагналын 100 сая төгрөгөө гардан авлаа. Түүнд Гацуурт компанийн Ерөнхий захирал Л.Чинбат 100 сая төгрөгийг гардуулан өгсөн байна. Л.Чинбат “Үзүүлсэн амжилтаа бататган олон сайхан уран бүтээл туурвиж, монголчууд биднийхээ сонорыг он удаан жил мялааж яваарай. Даруу тайван зангаа үл гээн олон түмнийхээ хайр хүндэтгэлийг даадаг нэрт урлагийн зүтгэлтэн болохыг хүсэн ерөөе” гэжээ.

“Авьяаслаг Монголчууд” шоуны шилдэг наймд үлдээд байсан О.Энх-Эрдэнэ үзэгчдийн саналаар 2016 оны ялагч болсон юм. Тус шоу нэвтрүүлгийн шүүгч СГЗ Ц.Чулуунбат О.Энх-Эрдэнийг алтан хоолойтой хэмээн тодорхойлж, Монголын рок попын урлагт түүний орон буйг тодотгосон билээ.