Month: December 2016

Засгийн газрын хэрэг эрхлэх газрын дэд даргаар ажиллаж байсан Г.Дэнзэнг АТГ өнгөрсөн оноос эхлэн шалгаж эхэлсэн. Тэгвэл Г.Дэнзэн нарт холбогдох хэргийг шүүхэд шилжүүлжээ.

Уг хэрэгт Авилгатай тэмцэх газрын Мөрдөн шалгах хэлтсээс эрүүгийн хэрэг үүсгэн, мөрдөн байцаалтын ажиллагаа явуулж, Нийслэлийн прокурорын газраас яллах дүгнэлт үйлдэж, гэм буруугийн асуудлыг шийдвэрлүүлэхээр, харьяаллын дагуу Чингэлтэй дүүргийн Эрүүгийн хэргийн анхан шатны шүүхэд шилжүүлсэн байна.

Г.Дэнзэнг “Эрдэнэс Тавантолгой” компанийн ТУЗ-д ажиллаж байхдаа эрх мэдлээ хэтрүүлэн ашигласан, улмаар улсад их хэмжээний хохирол учруулсан гэх хэргээр шалгасан. Түүний энэ хэрэгт “Эрдэнэс Тавантолгой” компанийн Гүйцэтгэх захирал асан Я.Батсуурь ч холбогдон шалгагдсан юм.

Ардчилсан намын даргын сонгуульд өрсөлдөхийн тулд УИХ-ын гишүүн асан Л.Гантөмөр өнөөдөр Хандивын уулзалт зохиохоор болжээ. Тэрээр энэ тухайгаа өөрийн твитер хуудаснаа жиргэжээ.

Намын даргад нэр дэвшихийн тулд 250 сая төгрөг шаардлагатай байгаа. Тэгвэл энэ мөнгөний багахан хувийг ч болов босгоход энэ уулзалт үр дүнгээ өгнө гэж тэрээр тооцоолсон бололтой. Хандивын уулзалт 2016 оны 12 дугаар сарын 16-д 18:00 цагт Энх тайвны гүүрний баруун талд “Наран плаза”-н 5 давхарт болох аж.

О.ӨНӨР

Байгаль орчин, аялал жуулчлалын яам, Даян дэлхийн ногоон хөгжлийн байгууллага, нийслэлийн Байгаль орчны газар хамтран 2016 оны 12-р сарын 15-ны өдөр “Хүүхдийн цэцэрлэгийн загвар ногоон барилгын зураг төсөл, технологи болон хөрөнгө оруулалт” семинарыг зохион байгууллаа.

Семинараар Сонгинохайрхан дүүргийн 25-р хороонд баригдах 150 хүүхдийн жишиг ногоон цэцэрлэгийн барилгын зураг төсөлтэй оролцогч талууд танилцав. Орчин үеийн барилгын технологи маш олон төрлийн сонголт бий болгож байгаа бөгөөд удаан хугацааны судалгааны дүнд Монгол орны цаг агаар, байгалийн нөхцөлд таарсан хувилбарыг гаргасан гэж төсөл боловсруулагчид танилцуулж байв. Урьдчилсан зураг төсөл, технологийн шийдлийн үнэлгээг Даян дэлхийн ногоон хөгжлийн байгууллага (ДДНХБ) Солонгосын ногоон технологийн төв (СНТТ) хамтран боловсруулсан бол Монголын ногоон барилгын хүрээлэн болон “Бьюлдингс техноложи” ХХК хамтарсан консорциум барилгын технологийн сонголт, эдийн засаг, нийгэм, байгаль орчны үр ашгийн тооцоо, ногоон цэцэрлэгийн барилгын зураг төсөл, тавигдах шаардлага болон шалгуур үзүүлэлтүүдийг боловсруулсан байна.

Барилга байгууламж эдийн засгийн хувьд үр ашигтай хэмнэлттэй, ашиглалтын хугацаа урт, тав тухтай байхаас гадна хүний эрүүл мэнд, байгаль орчинд ээлтэй байх зарчим нь ногоон барилгын гол шалгуур үзүүлэлт болсоор ирсэн. Дэлхий нийтийн хүлэмжийн хийн ялгаралын 39 хувийг барилгын салбар дангаараа эзэлдэг бөгөөд Монгол Улс жишиг ногоон барилгыг барьж ашиглалтад оруулснаар дунд, урт хугацаанд үр ашигтай, ухаалаг хөрөнгө оруулалтын боломжуудыг бий болгоно гэж олон улсын мэргэжилтнүүд зөвлөж байна. Түүнчлэн олон улсын өмнө хүлээсэн хүлэмжийн хийн ялгарлыг 2030 онд 14 хувиар бууруулах зорилтод чиглэсэн алхам болох юм.

Нийслэлийн Засаг дарга бөгөөд Улаанбаатар хотын Захирагчийн 2016-2020 оны үйл ажиллагааны хөтөлбөрийн нэг бүлэг бүхэлдээ байгаль орчин, ногоон хөгжлийн зорилтуудыг хангахад чиглэгдэж байгаа бөгөөд зорилтын хүрээнд уламжлалт хүрэн бизнес, бизнесийн практикийг алхам алхмаар халж, төсвийн худалдан авалт, хөрөнгө оруулалт, нийгмийн дэд бүтцийн бүтээн байгуулалтын ажлыг ногооруулах боломжийг эрэлхийлж байгаа юм гэж нийслэлийн Байгаль орчны газраас мэдээлэв.

Арванхоёрдугаар сарын 17-21-нийг хүртэлх цаг агаарын урьдчилсан төлөв:

19-нд баруун аймгуудын нутгийн зарим газар, төв, зүүн аймгуудын нутгийн хойд хэсгээр, 20-нд баруун болон төвийн аймгуудын зарим газраар цас орж, цасан шуурга шуурна. Бусад хугацаанд цас орохгүй. Салхи 18-нд Алтайн салбар уулсаар, 19,20-нд зарим газраар секундэд 12-14 метр хүрч ширүүснэ.

Дархадын хотгороор шөнөдөө 26-31 градус, өдөртөө 18-23 градус, Увс нуурын хотгор, Хүрэн бэлчир орчим болон Идэр, Тэс, Орхон-Сэлэнгэ, Хараа, Ерөө, Туул, Тэрэлж, Хэрлэн, Онон, Улз, Халх голын хөндийгөөр шөнөдөө 21-26 градус, өдөртөө 8-13 градус, говийн бүс нутгийн өмнөд хэсгээр шөнөдөө 6-11 градус хүйтэн, өдөртөө 1-6 градус дулаан, бусад нутгаар шөнөдөө 13-18 градус, өдөртөө 0-5 градус хүйтэн байна. 20-нд нутгийн хойд хэсгээр хүйтэрнэ хэмээн УЦУОШГ-аас мэдээллээ.

Оюутнууд сургалтын төлбөрөө зээлээр авах боломж бүрдсэн билээ. Энэхүү зээлийг арилжааны банкуудаар дамжуулан өнгөрсөн сарын сүүлээр олгоно гэж байсан ч өнөөдрийг хүртэл олгож эхлээгүй. Тэгвэл албаныхны мэдээллээр өнөөдрөөс эхэлж хоёр арилжааны банкаар дамжуулан олгох юм байна.

Боловсролын сайдын мэдээлснээр 2016-2017 оны хичээлийн жилд сургалтын төлбөрөө төлөх боломжгүй 74 мянган оюутан байна. Мөн хоёр болон түүнээс дээш хүүхэд нь зэрэг суралцаж буй өрхийн нэг хүүхдэд олгох сургалтын төлбөрийн буцалтгүй тусламжийг 1,500 орчим оюутанд олгох тооцоо гаргажээ.

Улсын хэмжээнд 164 мянган оюутан төрийн болон төрийн бус өмчийн их, дээд сургуульд суралцаж байгаагийн 125 мянга нь бакалаврын өдрийн ангид сурдаг гэх тооцоо гаргажээ.

Дашрамд дуулгахад оюутны сургалтын төлбөрийн зээлд хамрагдасан оюутнууд үндэсний тэтгэлэг болох 70000 төгрөгийг авах боломжгүй юм байна. Үүнийг албаныхан улс орны эдийн засгийн нөхцөл байдал хүнд байгаатай холбон тайлбарлаж байна.