Month: December 2016

Монгол Улсын Их Хурлын дарга М.Энхболд 2016 оны 12 дугаар сарын 20-21-нд Кувейт Улсад албан ёсны айлчлал хийв. Түүнийг Эль-Кувейт хотын нисэх онгоцны буудалд Кувейтийн Үндэсний Ассамблейн дарга ноён Марзук Али Аль-Ганим тэргүүтэй албаны хүмүүс угтан авав.

УИХ-ын дарга М.Энхболд Кувейт Улсад айлчлах үеэр тус улсын Эмир Шейх Сабах Аль-Ахмед Аль-Жабер Аль-Сабах, Үе залгамжлагч хунтайж Шейх Наваф Аль-Ахмед Аль-Жабер Аль-Сабах, Үндэсний Ассамблейн дарга Марзук Али Аль-Ганим, Шадар сайд бөгөөд Сангийн сайд Анас Халид Аль-Салех, Кувейтийн сангийн Ерөнхий захирал Абдулвахаб А.Аль-Бадер, Кувейтийн Хөрөнгө оруулалтын газрын Хөрөнгө оруулалт (Alternative Investment)-ын асуудал хариуцсан Гүйцэтгэх захирал Фарук Аль-Бастаки нартай уулзаж яриа хэлцээ хийв.

Яриа хэлцээний үеэр УИХ-ын дарга М.Энхболд хоёр орны хооронд тогтоосон хамтын ажиллагаа улс төр, эдийн засгийн бүхий л салбарт амжилттай хөгжиж байгааг дурдаад, Кувейтийн талын санхүүжилтээр барьж байгуулсан авто зам, Тайширын Усан цахилгаан станц зэрэг бүтээн байгуулалтад Монголын ард түмэн ямагт талархаж байдгийг онцлон тэмдэглэв.

Парламентын ордон барихад зориулан олгосон санхүүжилтийг ард түмний эрүүл мэндийг хамгаалах байгууллагад шилжүүлэхийг дэмжиж байгаагаа илэрхийлж, Шүрэнгийн УЦС-ын асуудлаар тодорхой шийдвэрийг Засгийн газраас гаргана гэдгийг мэдэгдэв.

Кувейтийн Эмирийн санаачлан байгуулсан Кувейт-Монголын судалгааны төв Улаанбаатар хотод үйл ажиллагаагаа явуулж, Өндөрхааны нисэх онгоцны буудлын өргөтгөл шинэчлэлтийн техник, эдийн засгийн үндэслэл хийгдэж байгааг мөн кувейтийн талд мэдэгдэв.

Яриа хэлцээний үеэр УИХ-ын дарга Монгол Улсын эдийн засгийн өнөөгийн байдал болон эдийн засгийн хямралаас гарах зорилтыг хэрэгжүүлэхэд Кувейт Улсаас Монголд хөрөнгө оруулалт хийх, хөнгөлөлттэй зээл, буцалтгүй тусламж олгохыг хүсч, санал тавив.

Түүнчлэн Кувейт Улс, Кувейтийн сантай уул уурхай, хөдөө аж ахуй, барилга, аялал жуулчлалын зэрэг салбарт хамтран ажиллах боломжтой гэж үзэж байгаагаа тэмдэглээд Кувейтийн сан, Кувейтийн Хөрөнгө оруулалтын газрын удирдлагыг Монголд айлчилж, хамтран ажиллах асуудлаар газар дээр нь танилцаж яриа хэлцээ хийхийг урив.

Кувейтийн Эмир энэ жилийн хувьд газрын тосны үнийн уналттай холбоотойгоор Кувейтийн санхүүгийн байдал амаргүй байгаа, гэхдээ Монгол Улсад боломжийнхоо хэрээр туслахыг зохих байгууллагуудад чиглэл болгоно гэж мэдэгдэв.

Кувейт Улсын Үндэсний Ассамблейн дарга ноён Марзук Али Аль-Ганим Монгол Улс хүнд хэцүү цагт ямагт Кувейттэй хамт байсан, Иракийн дайны үеэр хамгийн түрүүн Кувейт улсын тусгаар тогтнолыг дэмжиж, Иракийн эзлэн түрэмгийллийг буруушааж байсан улс орны нэг нь Монгол тул Монгол Улсад хүндэтгэлтэй хандсаар байх болно, Монгол Улс бол Кувейтийн Засгийн газар, ард түмэнд хамгийн ойр дотно улсуудын нэг гэдгийг онцлон тэмдэглэж, цаашид хоёр улсын хууль тогтоох дээд байгууллага Кувейтийн Үндэсний Ассамблей болон Монгол Улсын Их Хурлын хамтын ажиллагааг өргөжүүлэн хөгжүүлэх нь чухал гэж үзэж байгаагаа цохон тэмдэглэв.

Кувейт Улсын Шадар сайд бөгөөд Сангийн сайд Анас Халид Аль-Салех Монголын талаас бодитой төсөл, хөтөлбөр ирүүлбэл Кувейтийн сан, Хөрөнгө оруулалтын газар хүлээж авахад бэлэн гэж мэдэгдлээ.

Кувейтийн сангийн Ерөнхий захирал ноён Абдулвахаб Ахмед Аль-Бадер Кувейтийн сангийн шугамаар томоохон төсөл, хөтөлбөр хэрэгжүүлэх асуудлыг судалж үзэхээ мэдэгдэж, зээл тусламжийн асуудлыг Засгийн газрын түвшинд шийднэ, шийдвэр нааштай гарна гэдэгт итгэлтэй байна гэж онцлон тэмдэглэлээ.

АН энэ сарын 6-7-нд VI Их хурлаа хийж намынхаа Үндсэн дүрэмд өөрчлөлт оруулсан.Улс төрийн нам дүрэмдээ өөрчлөлт оруулсан тохиолдолд Дээд шүүхэд танилцуулж бүртгүүлдэг хуулийн зохицуулалттай. Үүний дагуу Дээд шүүх өнөөдөр АН-ын дүрмийн өөрчлөлтийг хэлэлцээд “Үндсэн хууль, Улс төрийн намын тухай болон бусад хуульд нийцэж байна” гэж үзэн бүртгэжээ.

Үндсэн хуульд нэмэлт, өөрчлөлт оруулах эсэхийг судлах, санал, дүгнэлт боловсруулах Ажлын хэсгийн ахлагч, гишүүдийг Монгол Улсын Ерөнхий сайд Ж.Эрдэнэбат өнөөдөр хүлээн авч уулзлаа.

Монгол Улсын Ерөнхий сайд Ж.Эрдэнэбат агаарын бохирдлыг бууруулах асуудлаар өнөөдөр товч мэдээлэл хийлээ.

Тэрээр Улаанбаатар хотын хэмжээнд агаарын бохирдлыг ингээд бууруулчих бололцоотой юм гэсэн баримт бичиг алга байна.

-Үе үеийн Засгийн газар агаарын бохирдлыг бууруулах чиглэлээр бодлого гаргаж ажилласан ч үр дүн нь хангалттай байсангүй. Агаарын бохирдлын эсрэг ямар ажил, арга хэмжээ зохион байгуулсан, ямар үр дүн гарсан, гадаадын ямар байгууллагатай хамтарч ажилласан зэрэг судалгааг гаргаж үзлээ. Огт ажил хийгээгүй гэж болохгүй ээ, хийж хэрэгжүүлсэн ажил нэлээд байна. Гэхдээ л Улаанбаатар хотын хэмжээнд агаарын бохирдлыг ингээд бууруулчих бололцоотой юм гэсэн баримт бичиг алга байна. Иймээс Шинжлэх ухааны академид хандаж, эрдэмтэн судлаачдаа энэ асуудалд оролцооч гэсэн хүсэлт тавилаа. Эрдэмтэд маань нааштай хүлээж авсан. Халаалтын системийг хэрхэн боловсронгуй болгох, хямд зардлаар дулаан үйлдвэрлэх ямар боломж байна судлаач гэсэн. Энэ чиглэлээр шинэ бүтээл гаргаж, зохиогчийн эрх авсан хувь хүн, аж ахуйн нэгж байна. Харамсалтай нь тэдний санаачилга огт хэрэгжиж байгаагүй юм байна. Утаа багатай зуух, утаа багатай түлш л үйлдвэрлэж байж. Зуух ч утаа гаргана, түлш ч утаа гаргана. Тийм учраас агаарын бохирдол буурахгүй байна. Ганц түлш, зуухтай ноцолдоод ямар ч үр дүн үзүүлэхгүй байна. Тиймээс өнөөдөр Улаанбаатарын утаа ийм хэмжээнд хүрч, нийгэмд бухимдал үүсээд байна.

Агаарын бохирдлыг бууруулах асуудлыг ганц нэгхэн ажлаар шийдвэрлэж чадахгүй. Тиймээс Засгийн газраас хэд хэдэн чиглэл барьж, бодитой арга хэмжээ авч ажиллана.

Нэгдүгээрт, Гэр хорооллыг орон сууцжуулна. Богино хугацаанд орон сууцжуулахад хүнд. БНХАУ-ын Төрийн зөвлөлийн Ерөнхий сайдын Монголд айлчлах үеэр яригдсан тусламжийн хөрөнгөөр орон сууц барих газрыг чөлөөлөх ажлыг зохион байгуулна.

Хоёрдугаарт, Өнөөдөр манайд хийн түлш алга. Тиймээс бидэнд байгаа гарц бол цахилгаанаар дулаан үйлдвэрлэх. Агаарын бохирдлыг бууруулах Үндэсний зөвлөлийн хурлаар гэр хорооллын айл өрхийн шөнийн цахилгааны үнийг тэглэх шийдвэр гаргасан. Цахилгаанаар дулаан үйлдвэрлэхэд одоогийн байгаа технологи, тоног төхөөрөмж хангалтгүй. Ийм учраас эрдэмтдэдээ хандсан, хямд өртөгтэй цахилгаанаар дулаан үйлдвэрлээч гэсэн хүсэлт тавьсан. Монгол толгойгоо, нөөц бололцоогоо ашиглая.

Гуравдугаарт, Орон нутагт амьдарч буй иргэдийн амьжиргааны эх үүсвэр алдагдсанаас Улаанбаатарын хүн ам нэмэгдсэн. Тухайлбал, агаарын бохирдлыг бууруулахад 130-140 тэрбум төгрөг зарцуулсан байна. Энэ хөрөнгөөр иргэдээ малжуулж, орон нутагт амьдрах боломж нөхцөлийг бий болгосон бол өнөөдөр олон мянган иргэн орон нутагт амьдрах эх үүсвэртэй, Улаанбаатарт ачаалал нэмэхгүй боломж байсан. Энэ ажлыг төвлөрлийг сааруулах хүрээнд шийдэж болох байсан юм болов уу. Ядуурал, агаарын бохирдлыг бууруулах зэрэг асуудлын хүрээнд иргэдийг малжуулж, орон нутагт амьдрах нөхцөл боломжоор хангах ажлыг хийнэ.

Дөрөвдүгээрт, агаарын бохирдлыг бууруулахад иргэдийн хяналт, тэдний санаачилга чухал гэж Ерөнхий сайд Ж.Эрдэнэбат ярилаа.

-2017 онд агаарын бохирдлыг бууруулахад 4 тэрбум орчим төгрөг төсөвлөсөн. Утаагүй зуух нэлээдийг захиалаад үйлдвэрлүүлсэн байна. Захиалаад хийлгэсэн учраас тухайн аж ахуйн нэгжээс зуухыг худалдаж авахаас аргагүй. Харин цаашид Засгийн газар зуух, түлш шинэчилж агаарын бохирдлыг бууруулах ажил хийхгүй. Цахилгаанаар, хийгээр дулаан үйлдвэрлэдэг технологид шилжинэ. Эхний ээлжинд гэр хорооллын өрхийн шөнийн тарифыг тэглэнэ. Агаарын бохирдлыг бууруулах төсвийн 80 орчим хувь нь шөнийн тарифыг тэглэх, алдагдлыг санхүүжүүлэх зэрэгт зарцуулагдана гэж Ерөнхий сайд Ж.Эрдэнэбат сэтгүүлчдийн асуултад хариулахдаа хэллээ Засгийн газрын Хэвлэл мэдээлэл, олон нийттэй харилцах хэлтсээс мэдээллээ.

Улаанбаатар хотын хэмжээнд агаарын бохирдол тулгамдсан асуудал болсон тул Ерөнхий сайд Ж.Эрдэнэбат өнөөдөр /2016.12.23/ мэдээлэл хийлээ.

Тэрбээр мэдээллийн эхэнд “Агаарын бохирдлыг зөвхөн түлш, зуухтай ноцолдсоноор бууруулж, үр дүн гаргах боломжгүй байгаа. Тийм учраас эрдэмтдийг энэ чиглэлд ажиллаач ээ гэсэн хүсэлт тавьсан. Эрдэмтэд маань хүлээж авсан.

Засгийн газраас хэд хэдэн арга хэмжээ авах ёстой гэж харж байгаа. Эхнийх нь орон сууцжуулах асуудал. Гэвч хотын бүх гэр хорооллыг орон сууцжуулна гэдэг хүнд. БНХАУ-ын Ерөнхий сайд манай улсад айлчлах үеэрээ 50 сая ам.доллар амалсан, түүгээр орон сууц барих асуудлыг эхний ээлжинд шийдье гэж Засгийн газар үзсэн.

Хоёрдугаарт, хийн болон цахилгаанаар дулааны эрчим хүч үйлдвэрлэж утааны асуудлыг шийдсэн улс орнууд бий. Манай нөхцөлд хийгээр дулаан үйлдвэрлэх боломжгүй учир цахилгаанаар дулаан үйлдвэрлэх боломж бололцоог судлах шаардлагатай байна. Саяхан Агаарын бохирдлыг бууруулах үндэсний зөвлөл хуралдаж гэр хорооллын айл өрхүүдийн шөнийн цахилгааны тарифыг тэглэхээр болсон. Гэхдээ цахилгаанаар дулааны эрчим хүч үйлдвэрлэхэд одоогийн байгаа технологи, тоног төхөөрөмж маань хэрэглээгээ хангаж дийлэхгүй учраас хямд өртөгтэй цахилгаанаар дулаан бий болгодог технологийн бий болгож санаачлаач гэдэг саналыг эрдэмтэддээ тавьсан” гэлээ.

Ерөнхий сайдын тэмдэглэснээр агаарын бохирдолтой тэмцэхийн тулд өнгөрсөн хугацанд 130-140 тэрбум төгрөг зарцуулжээ. Гэвч үр дүн бага байгаа тул Засгийн газар утаагүй зуух, утаагүй түлш үйлдвэрлэж хэрэглээнд нэвтрүүлэх бодлого барихгүй юм байна.

УИХ-ын чуулганы үдээс өмнөх хуралдаан завсарлалаа. Үдээс өмнө Хөгжлийн банкны талаар авах зарим арга хэмжээний тухай УИХ-ын тогтоолын төслийг хэлэлцэв.Хуралдаанд оролцсон гишүүдийн олонхи нь уг тогтоолын төслийг хэлэлцэх нь зүйтэй гэж үзэн анхны хэлэлцүүлэгт бэлтгүүлэхээр Байнгын хороонд шилжүүллээ. Эдийн засаг, Төсвийн байнгын хороо хамтран дээрх тогтоолын төслийг хэлэлцэж анхны хэлэлцүүлэгт бэлтгэх юм. Чуулганы нэгдсэн хуралдаан үдээс хойш 15:00 цагт үргэлжилж Хэрэглэгчийн эрхийг хамгаалах тухай хуулийн шинэчилсэн найруулга, Х.Нямбаатар гишүүнээс Хууль тогтоомжийн тухай хууль 2017 оны нэгдүгээр сарын 01-нээс эхлэн хэрэгжих нөхцөл байдал хангагдсан эсэх талаар Хууль зүй, дотоод хэргийн сайдад тавьсан асуулгын хариуг сонсно.