Month: December 2016

Монгол Улсад олимпийн хөдөлгөөнийг сурталчлан дэлгэрүүлэх, шатрын спортыг хөгжүүлэх, биеийн тамир спортод оруулсан хувь нэмрийг нь үнэлж УИХ-ын гишүүн, шатрын зүтгэлтэн Д.Лүндээжанцанг Монголын Үндэсний Олимпийн Хорооны дээд шагнал “Алтан-Очир” одонгоор шагналаа. Энэ үеэр МҮОХ-ны дэд ерөнхийлөгч Ц.Дамдин УИХ-ын гишүүн Д.Лүндээжанцанд зөвхөн шатрын спортыг дэмжээд зогсохгүй бусад спортыг үргэлж дэмжиж байдагт нь талархлаа илэрхийлсэн юм.

Улаанбаатар хотын Цагдаагийн газрын Урьдчилан сэргийлэх, олон нийттэй харилцах хэлтсийн дарга, цагдаагийн дэд хурандаа Ү.Хосбаяр, Улаанбаатар хотын Цагдаагийн газрын Үйл ажиллагааны хэрэгжилтийг зохицуулах хэлтсийн тасгийн дарга, цагдаагийн дэд хурандаа Л.Амармөрөн нар өнөөдөр энэ онд үйлдэгдсэн онц хүнд гэмт хэргийн илрүүлэлтийн талаар мэдээлэл өглөө.

Баянзүрх дүүргийн 7 дугаар хорооны нутаг дэвсгэрт 2016 оны долоодугаар сард 7 сартай жирэмсэн иргэн “М” нь бусдад боолгуулж нас барсан эрүүгийн тоот хэргийг Сүхбаатар дүүргийн 13 дугаар хороонд оршин суух, эрхэлсэн тодорхой ажилгүй, 1982 онд төрсөн, эрэгтэй “М” гэгч үйлдсэнийг Улаанбаатар хотын цагдаагийн газрын онц хүнд гэмт хэрэг мөрдөх хэлтсийн алба хаагч нар 2016 оны 12 дугаар сард нөхөн илрүүлэн шалгаж байна.

Чингэлтэй дүүргийн 12 дугаар хорооны нутаг дэвсгэр “Акума” төвийн урд талын жалганд 2016 оны 12 дугаар сарын 17-18-нд шилжих шөнө 60 настай эмэгтэй “И”-нь эд зүйлээ дээрэмдүүлэн, зодуулж нас барсан эрүүгийн тоот хэргийг Баянхонгор аймгийн харьяат, эрхэлсэн тодорхой ажилгүй 1991 онд төрсөн, эрэгтэй “Т” гэгч үйлдсэнийг Улаанбаатар хотын цагдаагийн газрын онц хүнд гэмт хэрэг мөрдөх хэлтсийн алба хаагч нар илрүүлэн шалгаж байна.

2016 оны 12 дугаар сарын 24-ний өдөр Сонгинохайрхан дүүргийн 1-р хороо Нарангийн голын эцсийн буудлын орчим 27 настай, эрэгтэй “Г”-г хувийн машинтайгаа таксины үйлчилгээнд явах үед нь үл таних 160-170 см орчим өндөртэй, 20-25 орчим эрэгтэй хүн үйлчлүүлж явах үедээ араас боож “iPhone-4” маркын гар утас, 30 мянган төгрөг дээрэмдсэн хэргийг Б гэгч нь үйлдсэнийг Сонгинохайрхан дүүрэг дэх Цагдаагийн 1-р хэлтсийн алба хаагчид илрүүлэн шалгаж байна.

Баянзүрх, Сүхбаатар дүүргийн нутаг дэвсгэрт шөнийн цагаар ганцаараа явж байгаа иргэдийг араас нь боож унаган, бүлэглэн зодож айлган сүрдүүлэн, хүч хэрэглэн эд зүйлийг нь дээрэмддэг Г, Н, С, А, Э нарын 18-25 насны бүлэг этгээдүүдийг Баянзүрх дүүрэг дэх Цагдаагийн 1-р хэлтсийн эрүүгийн цагдаагийн тасгийн алба хаагчид 2016 оны 12 дугаар сарын 25-ны өдөр илрүүлэн баривчиллаа. Дээрхи этгээдүүд нь одоогоор Баянзүрх, Сүхбаатар дүүргийн нутаг дэсвгэрт дээрмийн 21 гэмт хэрэг үйлдсэн нь урьдчилсан байдлаар тогтоогдоод байна.

НӨАТ-ын 20 хувийн буцаан олголтыг ирэх оны гуравдугаар сарын 31-ний дотор хийнэ гэдгийг ТЕГ-ын Татварын орлогын газрын дарга Д.Цогтжаргал мэдээлэв.

ТЕГ-аас НӨАТ-ын буцаан олголт авах иргэдийн жагсаалтыг 15 хоногийн дотор гаргах бөгөөд ажлын ес хоногт дахин баталгаажуулах аж. Баталгаажсан мэдээллийг Сангийн яамны Төрийн сангийн газарт хүргүүлэх бөгөөд яамны зүгээс 45 хоногийн дотор буцаан олголтыг шийдвэрлэх юм. Ингэснээр ирэх оны 3 дугаар сарын 31-ны дотор буцаан олголтыг бүрэн хийх боломжтой гэлээ.

Тэрбээр, Он гарсаар 618 мянга 862 иргэн www.ebarimt.mn цахим хуудсанд хэрэглэгчээр бүртгүүлж, нийт 30.2 тэрбум төгрөгийн буцаан олголт авах эрхтэй болсон. Үүнээс 476 мянга 592 иргэн овог нэр, утас болон дансны дугаар зэрэг мэдээллээ бүрэн оруулсан байна. Үлдсэн иргэдийг энэ ондоо багтан цахим хуудсан дахь хувийн мэдээллээ бүрэн оруулахыг уриалж байна. Одоогоор 130 мянга гаруй иргэнд гар утсаар нь дамжуулан ирэх сарын 07-ны дотор хувийн мэдээллээ бүрэн оруулахыг анхааруулсан мессеж илгээсэн. Энэ хугацаанд иргэд мэдээллээ баталгаажуулаагүй бол дансанд нь мөнгө орох боломжгүй” гэв.

Эдийн засаг хүндрэлтэй байгаа үед НӨАТ-ын буцаан олголт хийх боломж байгаа эсэхийг тодруулсан сэтгүүлчийн асуултад 2017 оны төсөвт буцаан олголтын зардлыг бүрэн тусгасан гэсэн хариулт өглөө.

Монгол Улсын Их Хурлын дарга Миеэгомбын Энхболдод өнөөдөр /2016.12.27/ Донорын тухай хуулийн шинэчилсэн найруулгын төсөл болон Нялх балчир хүүхдийн хоол, хүнсний бүтээгдэхүүний тухай хуулийн төслүүдийг Засгийн газрын гишүүн, Эрүүл мэндийн сайд А.Цогцэцэг өргөн мэдүүлэв.

Анагаах ухааны практикт эрхтэн шилжүүлэн суулгах мэс заслын шинэ технологи нэвтэрсэн, сүүлийн жилүүдэд хүн амын өвчлөл нэмэгдэж, нас баралтын тэргүүлэх шалтгаанд хорт хавдар, гадны шалтгаант осол гэмтэл эзэлж, жилээс жилд төрөлт нэмэгдэж, төрөлтийн хүндрэл буурахгүй, олдмол болон төрөлхийн цусны өвчлөл нэмэгдэж байгаа өнөөгийн нөхцөлд одоогийн мөрдөж байгаа хууль нь цаг үеийн шаардлагыг бүрэн хангахгүй байгаа нь Донорын тухай хуулийг шинэчлэн найруулах үндэслэл болсон талаар А.Цогцэцэг сайд Улсын Их Хурлын даргад танилцууллаа.

Иймд иргэдэд учирч байгаа санхүүгийн дарамтыг багасгах, донорын үйл ажиллагааны удирдлага, зохион байгуулалтыг сайжруулах, амьгүй донороос эрхтэн шилжүүлэн суулгах эрх зүйн орчинг улам боловсронгуй болгох, донороос өвчтөнд цусны үүдэл эс шилжүүлэн суулгах, хүйн цусны донорын банк болон цусны үүдэл эсийн банк байгуулах, цус, цусан бүтээгдэхүүн, тэдгээрийг орлох бэлдмэлийн нөөцийн нөхөн хангалт, нөөцийн хяналтын зохицуулалт, цусны донор элсүүлэх, алдаршуулах, урамшуулахтай холбоотой зохицуулалтыг нарийвчлан зохицуулахаар Донорын тухай хуулийн шинэчилсэн найруулгын төслийг боловсруулжээ.

Түүнчлэн Нялх, балчир хүүхдийн хоол, хүнсний бүтээгдэхүүний тухай хуулийн төслийг өргөн мэдүүлсэн юм. Эрүүл мэндийн сайд А.Цогцэцэг “Сүүлийн жилүүдэд эхийн сүүг орлох бүтээгдэхүүний хэрэглээ өсч байгаа. Энэ хэрээр хүүхдийг эхийн сүүгээр хооллох нь багасаж 60 хувь байсан үзүүлэлт 40 хувьд хүрч буураад байгаа. Түүнчлэн эрх зүйн орчныг өөрчлөх шаардлагын үүднээс Эхийн сүү орлуулагч бүтээгдэхүүний тухай хуулийг шинэчлэн найруулж, 5 бүлэг, 20 зүйл, 56 заалт, 94 хэсэг бүхий хуулийн төсөл боловсрууллаа” гэв.

Хуулийн төсөлд эхийн сүүний оронд хүүхдэд өгөх зориулалттай үйлдвэрлэсэн хүнсний бүтээгдэхүүнийг хооллох хэрэгслийн хамт багцалж “зориулалтын бүтээгдэхүүн” гэж нэрлэх болсон бөгөөд эдгээрийн сав, баглаа боодолд тавих нийтлэг шаардлагыг оруулжээ. Мөн энэ төрлийн бүтээгдэхүүний зар сурталчилгааны зохицуулалт, хуулийг мөрдөх, хэрэгжүүлэхэд оролцогч талуудын үүрэг, хариуцлагын талаар болон хуулийн хэрэгжилтэд тавих хяналт, зөрчигчдөд хүлээлгэх хариуцлагатай холбоотой зохицуулалтыг тусгасан байна хэмээн Улсын Их Хурлын Тамгын газрын Хэвлэл мэдээлэл, олон нийттэй харилцах хэлтсээс мэдээлэв.