Month: November 2016

Categories
мэдээ улс-төр

ОУВС-ийн төлөөлөгчид 12 сард ахин ирнэ

УИХ дахь МАН-ын бүлгийн хурал өндөрлөлөө. Хуралдаанаар хэлэлцсэн асуудлын талаар тус бүлгийн ахлагч Д.Хаянхярваа мэдээлэл хийсэн юм. Тэрбээр мэдээлэлдээ:

-Эдийн засгийн хүндрэлийг даван туулах хөтөлбөрийг хэлэлцлээ. Засгийн газраас виксель, концессийн гэрээгээр хийсэн ажлуудыг шалгаж цэгцлэх ажлын хэсэг байгуулагдсан. Энэ сардаа багтаад ажлын хэсэг шалгалт хийж, дүгнэлтээ гаргах үүргийг өгсөн. Мөн ОУВС-гийн Стэнд бай хөтөлбөрт хамрагдах асуудлыг Ерөнхий сайдыг томилолтоос ирсний дараа тодорхой асуухаар боллоо хэмээсэн юм. Тэрбээр мэдээлэл хийснийхээ дараа сэтгүүлчдийн сонирхсон асуултад хариуллаа.

-ОУВС-гийнхан манай улсад ямар шаардлага тавьсан бол?

-Бид энэ удаагийн төсвийг эдийн засгийн бодит боломжид тулгуурлаж хэлэлцээд явж байна. ОУВС-гийнхан байнгын хороодын дарга нартай уулзаад явсан байна лээ. ОУВС-гийн зүгээс 2008 онд тавьж байсан шаардлагуудаасаа нөхцөл нь хөнгөрсөн байна гэж гишүүд үзсэн. Энэ хөтөлбөрт хамрагдаад явах боломж байгаа юм байна. Тиймээс 12 дугаар сард дахин ирж хөтөлбөрүүдийнхээ ерөнхий нөхцөлийг хэлэлцэж болох юм гэсэн байна лээ. Санхүүгийн эх үүсвэрүүдийг бий болгох чиглэлд хамтарч ажиллах боломжтой гэсэн чиглэл өгчээ.

-Эрүүл мэндийн салбартай холбоотой мэдээлэл сонссон гэсэн. Улаанбаатарын утааг бууруулахад ямар арга хэмжээ авч ажиллах бол?

-Хүйтний энэ улиралд ханиад томуу ихэсдэг. Ялангуяа хүүхэд багачууд ханиад тусах нь их байдаг. Тиймээс энэ чиглэлд ямар арга хэмжээ авч байгаа талаар мэдээлэл сонссон.

-Ирэх оны төсөвт яамдын урсгал зардал нэмэгдсэн байна. Хямралын үеийн төсөв мөн үү?

-Энэ удаагийнх амаргүй төсөв. Урсгал зардал нэмэгдсэн нь бүтцийн өөрчлөлттэй холбоотой. Яамдыг нэгтгэсэн, 3 төсөвтэй явж ирсний нэг болгосон. Энэ бүхнийг нэг төсөвтэй болгосноор зарим нэг сайдуудын багц нэмэгдсэн. Бид ирэх онд шинээр барилга барихгүй гэж шийдсэн. Бид олон улсын хөнгөлөлттэй зээл, гаднын банк гээд ярихаар “Bank of China”-г ярьдаг. Гэтэл олон хувилбар яригдаж байгаа. Бид ойрын үед хөрөнгө оруулалтын банкны тухай хуулийг өөрчилж, хөрөнгө оруулалт татах тухай судалж байгаа. Эдийн засгийг сайжруулахын тулд нэлээн хатуу сахилга дэг журамтай байж санхүүгийн хямралаас гарна.

-Эдийн засгийн хямралыг даван туулах хөтөлбөрт казино байгуулах асуудал тусгагдсан. Үүнд та ямар байр суурьтай байна вэ?

-Хямралаас гарах төлөвлөгөөнд казино, морин тойруулга барих асуудалд шүүмжлэлтэй хандаж байгаа. Дэлхий нийтийн хэрэгжүүлдэг зүйлийг Монголд ч хэрэгжүүлж болно. Гэхдээ хуулиар хязгаарлаж өгнө. Тухайлбал, казино байгууллаа гэхэд монголчууд орохгүй. Зөвхөн гадаадынхан ордог байхаар хуулийн зохицуулалт хийж болно.

Categories
мэдээ нийгэм

Ипотекийн зээлийг Арилжааны банкууд өөрийн хөрөнгөөр санхүүжүүлнэ

Ипотекийн зээлийн санхүүжилт өнгөрсөн долоо хоногоос эхлэн шинэ журмаар олгогдож эхэллээ. Монголбанкны Ерөнхийлөгчийн А-295 тоот тушаал энэ сарын 25-ны өдөр батлагдсан. Үүгээр орон сууцны ипотекийн зээлийн санхүүжилтийн журмыг шинээр баталсан байна. Шинэ журмаар голлох хоёр өөрчлөлт оруулжээ.

Нэгдүгээрт, ипотекийн зээлийн санхүүжилтийг Монголбанкны мэдэлд буй Ипотекийн зээлээр баталгаажсан бондын эргэн төлөлт, купоны төлбөрөөс санхүүжүүлнэ. Тухайн сардаа хэдий хэмжээ эргэн төлөлт хийгдэнэ, тэр хэмжээгээр санхүүжилт хийгдэх юм. Ингэхдээ Монголбанк тухайн сард олгох ипотекийн зээлийн эх үүсвэрийн дээд хэмжээг тухайлсан банк бүрт мэдэгдэнэ. Энэ дагуу банкууд зээлийн шийдвэрээ гаргаж, өөрийн эх үүсвэрээр ипотекийн зээлийг олгосны дараа Монголбанк санхүүжилтийг олгох юм.

Цаашдаа Монголбанк урьдчилж ямар нэгэн байдлаар санхүүжилт хийхгүй. Арилжааны банкууд эхлээд өөрийн хөрөнгөөр санхүүжүүлсний дараа Монголбанкнаас нөхөж олгох байдлаар явагдах аж.

Журамд орсон хоёр дахь гол өөрчлөлт юу гэхээр тухайн зээлдэгч ипотекийн ямар нэгэн хөнгөлөлттэй зээлийн үлдэгдэлгүй байх ёстой. Өнгөрсөн хугацаанд өндөр орлоготой иргэд өөрийн нэр дээр хэд хэдэн орон сууцыг ипотекийн 8 хувийн зээлээр авсан тохиолдол гарч байсан. Цаашдаа ийм байдлаар нэг зээлдэгч олон давхар зээлтэй байх боломжгүй гэсэн үг. Хэрэв өмнө нь ямар нэгэн ипотекийн зээлд хамрагдсан бол тэрхүү зээлийн үлдэгдлээ бүрэн төлсний дараа дараагийн зээлдээ хамрагдах боломжтой болох гэнэ.

Categories
мэдээ улс-төр

УИХ дахь намын бүлгүүд хуралдлаа

УИХ дахь АН-ын бүлэг 2017 оны төсвийн төслийг хэлэлцсэн ч сэтгүүлчдэд мэдээлэл хийгээгүй. Мөн УИХ-ын гишүүн Ж.Батзанданг намын гишүүнчлэлээс түдгэлзүүлнэ гэсэн мэдээлэл байсан ч бүлгийн хуралдаанаар энэ асуудал яригдаагүй, намын удирдлагын түвшинд ч тодорхой яригдаагүй байгаа гэх мэдээллийг өгч байна.

Харин МАН-ын бүлгийн хуралдаанаар Төрөөс мөнгөний бодлогын талаар 2017 онд баримтлах Үндсэн чиглэл батлах тухай тогтоолын төслийг хэлэлцэж байгаа гэх мэдээллийг гишүүд өгч байна. Мөн өнгөрсөн өдрүүдэд ОУВС-гийн төлөөлөгчид манай улсад ажиллаад буцсантай холбогдуулан “Стэнд бай” хөтөлбөрийн асуудлыг ч хэлэлцэж байгаа бололтой.

Categories
мэдээ нийгэм

Ой хээрийн түймэр унтраах нэгдсэн дадлага сургууль боллоо

Нийслэлийн Онцгой байдлын газрын даргын шийдвэрээр гал түймэр унтраах штабын нэгдсэн дадлага сургууль боллоо. Ой, хээрийн түймрийг унтраах дадлага сургуулийг БЗД-ийн 20 дугаар хороо Буянгийн аманд 2016 оны арваннэгдүгээр сарын 4-ний өдөр зохион байгууллаа. Уг сургуулиар ой, хээрийн түймэр унтраах зориулаллттай Rosenbauer MAN тусгай албаны автомашинаар ажиллах, ус дутагдалтай нөхцөлд зөөврийн усны савнаас дамжуулан шахах, үүргийн ус цацагч, үлээгч төхөөрөмж, цуравдагч, гал унтраах гар багаж зэвсэглэмжээр ажиллах дадлагыг хийлээ.

Хээрийн нөхцөлд явганаар хөдөлгөөн үйлдэх, аранзан дахь хүнсээрээ хоол бэлтгэх, өгөгдсөн солбилцлоос биет хайх /GPS-ээр/, ой хээрийн түймрийн үеийн цагийн байдалд үнэлэлт өгч, хүч хэрэгсэл, унтраах аргыг сонгох, газрын зураг дээр ажиллах зэрэг үйлдүүдийг хийж гүйцэтгэсэн. Дадлага сургуульд нийслэлийн Байгаль орчны газрын Ойн хэлтсийн мэргэжилтнүүд, Гачуурт,Налайх хэсгийн байгаль хамгаалагчид, нийслэлийн Онцгой байдлын газрын Гал түймэр унтраах хэлтэс, дүүргүүдийн Онцгой байдлын хэлтсийн Гал түймэр унтраах, аврах ангийн албан хаагчид мөн Хууль сахиулахын их сургуулийн Онцгой байдлын сургуулийн 4-р дамжааны сонсогчид, оролцов.

Categories
гадаад мэдээ

Хятадуудын бүтээсэн “Маtte 9” гар утас дэлхийн зах зээлд гуравт явж байна

Хятадын “Huawei Technologies” компани дэлхийд тэргүүлэх “Apple” болон “Самсунг”-ын араас маш хурдацтайгаар нэхэж байна. Тус группийн гүйцэтгэх захирал Ричард Ю “Reuters”-т өгсөн ярилцлагадаа хоёр жилийн дотор дэлхийн ухаалаг утасны зах зээлд хоёр дахь хамгийн том нийлүүлэгч болох зорилго тавьснаа дурджээ.

Харилцаа холбооны “Huawei” компани нь хэрэглээний төхөөрөмжүүдийн зах зээлд нэвтэрч ороод хэдхэн жил болж байгаа ч ухаалаг утасны зах зээлд дэлхийд гуравт эрэмбэлэгдэхээр том нийлүүлэгч болж чаджээ.

“Huawei” өнгөрсөн мягмар гарагт дээд зэрэглэлийн шинэ утсаа танилцуулсан бөгөөд нэг бүр нь 699 еврогийн үнэтэй бол “Porsche” загвараар зохион бүтээсэн хувилбар нь 1395 еврогийн үнэтэй аж. Уг гар утас нь шинэ хиймэл оюун ухаантайгаараа онцлог гэнэ. Тодруулбал, уг гар утас нь хэрэглэгчийн дадал зуршлыг мэддэгээс гадна хамгийн их ашигладаг аппликейшнуудыг автоматаар сонгох горимд шилждэг байна.

Судалгааны “Strategy Analytics” гэдэг байгууллагын мэдээлснээр, “Huawei” компани энэ оны гуравдугаар улиралд гэхэд зах зээлд 33.6 сая ширхэг гар утас нийлүүлснээр зах зээлийн 9 хувийг эзэлж байна. Энэ үзүүлэлтээрээ тус компани дэлхийн гурав дахь том нийлүүлэгч болсноо баталжээ.

Харин “Apple” компани 45.5 сая ширхэг гар утас нийлүүлснээр зах зээлийн 12 хувийг эзлэн 2 дугаарт жагсч байгаа бол “Samsung” компани 75.3 сая ширхэг гар утас нийлүүлэн зах зээлийн 20.1 хувийг эзэлснээр дэлхийд тэргүүлж байна.

“Matte 9” гэдэг шинэ гар утас нь Герман, Франц болон Их Британи зэрэг Европын томоохон зах зээлүүдэд тэсрэлт хийж чадна гэж тэд найдаж байгаа бөгөөд Финландад бид аль хэдийн борлуулалтаараа тэргүүлж байгаа аж.

“Apple” шинэ бөгөөд гайхмаар загвартай гар утас гаргаж ирж чадахгүй байгаа бол “Samsung”-ийн нэрийн хуудас болсон гар утас нь ихээхэн хэл ам дагуулж байгаа зэрэг нь “Huawei”-д том боломж олгосон байна.

Categories
мэдээ нийгэм

Британийн хамгийн өргөн цар хүрээтэй “InspireMe Festival” энэ сарын 11-нд Монголд эхэлнэ

Британийн ЭСЯ-наас тус улсын соёл, боловсрол, технологи, инновацийг таниулах “InspireMe Festival” арга хэмжээг Шангри-ла Моллд энэ сарын 11, 12-нд зохион явуулах гэж байна.

Британи нь дэлхийн инновацийн индекст инновацийн чанарын үзүүлэлтээр, мөн боловсролын экспортын хэмжээгээр дэлхийд хоёрт жагсаж буй улс юм. Сүүлийн жилүүдэд Монгол улс Британи улсын хооронд нөхөрсөг харилцаа, эдийн засгийн хамтын ажиллагаа тогтвортой өсч байгаагийн дээр хоёр улсын бизнес, олон улсын байгууллагууд, иргэд хоорондын хамтын ажиллагаа хөдөө аж ахуй, шуудан харилцаа, худалдаа, соёл урлаг, спорт, аялал жуулчлал, байгаль орчин хамгаалал, хүмүүнлэгийн үйлс, боловсрол гэх мэт олон чиглэлд өргөжин тэлж байна.

Британийн “InspireMe Festival” өдөрлөг нь энэхүү хамтын ажиллагаанд гарч буй ололтуудыг онцлон таниулахаас гадна Улаанбаатарчуудад амралтын өдрүүдээ гэр бүлээрээ хөгжилтэй өнгөрүүлэх онц сонирхолтой, бүтээлч хэв маяг бүхий цогц арга хэмжээ болох юм.

Монголд зохиогдож буй Британийн хамгийн өргөн цар хүрээтэй “InspireMe Festival”-н талаар Британийн Элчин сайд хатагтай Катерин Арнолд хэлэхдээ “Монгол Улс олон тулгуурт эдийн засаг бүхий тогтвортой хөгжлийг эрэлхийлж, олон улс дахь түншүүдийнхээ хүрээг тэлэхийн зэрэгцээ, дипломат харилцаа, эдийн засгийн хамтын ажиллагаагаа эрчимжүүлж буйг бид дэмжин ажиллахыг зорьж байна. Бид Монгол Улсын ирээдүйн хөгжилд түлхэц үзүүлэх мэргэшсэн мэдлэг, боловсрол, технологи, инженерчлэл, олон улсын төвшинд ажиллах арга туршлагаа Монгол түмэнтэй хуваалцахдаа баяртай байх болно” хэмээн онцлов.

Арга хэмжээний үеэр,

· Британи улсын инновацийг таниулах булан

· Хувцас хэрэглэл болон өдөр тутмын бүтээгдэхүүний булан

· Хүүхдийн номын уншлага, Британи номын үзэсгэлэн

· Англи цайны өдөрлөг

· Британи машины парад

· Британийн хөл бөмбөгийн тухай кино үзүүлбэр

· Шекспирийн 400 жилийн ойн тэмдэглэлт үйл ажиллагаа

· Британийн телевизийн франчайз “Авьяаслаг Монголчууд” нэвтрүүлэгт оролцогчдын тоглолт

· Британийн хүмүүнлэгийн байгууллагуудын фото үзэсгэлэн

· Британи Монголын спорт дахь хамтын ажиллагааны танилцуулга

· Британийн орчин үеийн урлагийн тухай танилцуулга зэрэг төрөл бүрийн үйл ажиллагаа 10:00-19:00 цагуудын хооронд хоёр өдрийн турш тасралтгүй үргэлжлэнэ.

Мөн уг арга хэмжээнд Монгол Британийн хамтарсан бизнес, боловсрол, хүмүүнлэгийн 50 гаруй байгууллагууд оролцоно. Түүнчлэн арга хэмжээнд Британийн дунд болон дээд боловсролын үзэсгэлэн дэлгэх бөгөөд London City University, BPP University зэрэг Британийн 15 их, дээд сургуулийн төлөөлөгчид мэргэжлийн зөвлөгөө хүргэхээр зэхэж байна.

Categories
мэдээ спорт

Жудаггүй зан гаргасан бөхийн барилдах эрхийг 1-3 сар хүртэл хасна

Монголын үндэсний бөхийн холбооны Тэргүүлэгчдийн хуралдаанаар МҮБ-ийн барилдааны дүрмийн зарим заалтыг хэлэлцэж, мөрдөхөд илүү ойлгомжтой болгох зорилгоор холбогдох журмыг батлан гаргасан байна. Тухайлбал, Үндэсний бөхийн барилдааны дүрмийн долоодугаар зүйл буюу “Бөхийн цээр, зэм шийтгэл” хэсгийг онцлон хэлэлцэж, 7.3-ийн “Г” заалтыг хэрэгжүүлэх зорилгоор дараахь журмыг гаргажээ.

Шинээр баталсан журамд Дүрмийн 7.3-ийн “Г”-д бөхийн цээрлэх хэсэгт заасан “Олон нийтийн өмнө жудаггүй зан авир гаргах” гэдэгт дараахь зүйлийг тооцохоор нарийвчилжээ.

Үүнд, заал танхимд, үзэгчдийн дунд өмсгөлөө өмсөж, соёлгүй байдал гаргах, барилдааны эхэнд үзэгчид бөхчүүдээ үл хүндэтгэн жагсаж гарахгүй байх, цолтой бөхчүүд зориулалтын суудалд суухгүй байх, өрсөлдөгч бөхдөө болон засуул цэцдийн шаардлагын эсрэг заналхийлсэн үг, үйлдэл үзүүлэх гэх мэт, бөхийн дэвжээ, наадмын талбайд болон олон нийтийн өмнө бүдүүлэг үг, хараал хэлэх, барилдаан захалсан үед учраа бөхөө илэрхий элдэн хөөж, хашлага болон саад болох зүйл рүү зориуд мөргүүлэх, өмсгөлөө бүрэн гүйцэд хэрэглээгүй буюу өмсгөлийн стандарт хангаагүй байх, энэ талаар тавьсан шаардлагыг хэрэгжүүлэхгүй байх, барилдааныг түр зогсоох үед зориуд мэх хийх, шаардлагагүй үед эмч рүү дахин дахин очих, зөвшөөрөлгүйгээр барилдаанаас завсарлага авах гэх мэт үйлдлийг гаргасан бөхчүүдийг олон нийтийн өмнө жудаггүй зан авир үзүүлсэн гэж үзэх ба тухайн бөхийг дүрмийн дагуу хөлийн цэцийн шийдвэрээр барилдаанаас хасах бөгөөд ноцтой гэж үзвэл Тэргүүлэгчдийн хурлын шийдвэрээр барилдах эрхийг нь 1-3 сар хүртэл хугацаагаар түдгэлзүүлэх ажээ.

Э.МӨНХ

Categories
мэдээ нийгэм

Уул уурхай, Эрчим хүчний салбарын оролцоо чухал байхыг онцлов

Эдийн засагт үүссэн хүндрэлүүдийг богино хугацаанд шийдвэрлэх зорилгоор “Эдийн засгийн хүндрэлийг даван туулах, тогтворжуулах” хөтөлбөрийг Засгийн газар боловсруулсан. Хөтөлбөр нь Макро эдийн засгийг тогтворжуулах бодлого хэрэгжүүлэх, Дунд хугацаанд эдийн засагт бүтцийн өөрчлөлт хийж, тогтвортой өсөлтийг хангах гэсэн хоёр үндсэн стратегитэй. Энэ хүрээнд нийт 60 гаруй бодлогын арга хэмжээг хэрэгжүүлэхээр төлөвлөжээ. Энэ дунд уул уурхай, эрчим хүч, хөдөө аж ахуй, боловсруулах үйлдвэрлэлийн салбарт хэрэгжүүлэхээр тусгагдсан томоохон төсөл хөтөлбөрүүдийн нөлөөгөөр экспорт нэмэгдэж, гадаад худалдааны бараа эргэлт өснө гэсэн тооцоолол бий.

Энэ хүрээнд УИХ-ын гишүүн Д.Дамба-Очир,Я.Содбаатар, Л.Энхболд нар Эрчим хүчний яамны удирдлагуудтай уулзаж, салбараас тусгагдсан төсөл хөтөлбөрийн талаар мэдээлэл сонслоо. Монгол Улсын Засгийн газраас боловсруулсан “Эдийн засгийн хүндрэлийг даван туулах, тогтворжуулах хөтөлбөрт”-т эрчим хүчний салбараас тодорхой хэд хэдэн төсөл, арга хэмжээ тусгахаар төлөвлөсөн байна. Тухайлбал, Дулааны 3-р цахилгаан станцын 250 МВт болон Чойбалсангийн дулааны цахилгаан станцын 50 МВт-ын өргөтгөл, Тавантолгойн 450 МВТ-ын цахилгаан станц, Эгийн голын 315 МВт-ын усан цахилгаан станц зэрэг төсөл багтаж байна.

Монгол Улсын Засгийн газар, Эрчим хүчний яамнаас эдийн засгийн хүндрэлийг даван туулах хүрээнд 3-4 төсөлд ач холбогдол өгч байгааг салбарын сайд П.Ганхүү онцоллоо. Улс орны хөгжлийн тулгуур энэ салбарыг дэмжих нь эдийн засгийн хүндрэлээс гарах гол гарц болох учраас дээрх томоохон төсөл хөтөлбөрүүдийг хөдөлгөх нь зүйтэй гэдгийг УИХ-ын гишүүд тодотгосон юм.

Categories
мэдээ нийгэм

Сураггүй болсон таван иргэнийг олжээ

zamӨнгөрсөн бямба гаригийн 19:00 цагт Сэлэнгэ аймгийн Сайхан сумын Номгон багийн Хийдийн өвөр газар /Сумын төвөөс зүүн зүгт 25 километрт/ “PRADO” загварын автомашинтай иргэн Д (37 настай, эрэгтэй), О (38 настай, эмэгтэй), Б (68 настай, эрэгтэй), Б (65 настай, эмэгтэй), Т (19 настай, эмэгтэй) нарын таван хүн Дархан-Уул аймаг руу гараад сураггүй болсон гэх дуудлага ирэн, эрлийн ажил явуулж буй талаар бид өмнө нь мэдээллэсэн билээ. Тус дуудлагын дагуу Онцгой байдлын газрын эрлийн баг хоёр хоног шуурхай ажиллаж, алга болсон таван иргэнийг эсэн мэнд олсон байна. Тухайн иргэдийн биеийн байдал тогтвортой, гэмтэл бэртэл аваагүй тухай албаныхан мэдээллэв.

Categories
мэдээ улс-төр

Ж.Эрдэнэбат: Оюу толгой ил тод байх ёстой

Ерөнхий сайд Ж.Эрдэнэбат Өмнөговь аймагт ажиллаж, Оюу толгойн аюулгүй ажиллагааны зөвлөмж, бүтээн байгуулалтын явцтай энэ амралтын өдрүүдэд танилцав. Энэ нь түүний томилогдсоноос хойших найм дахь аймаг юм.

Доройтсон эдийн засгийг сэргээх хөшүүрэг болох уул уурхайн салбараа ашиглах амлалтаа биелүүлэхэд туслах зэс, алтны томоохон орд “Оюу толгой”-н ажлыг эрчимжүүлэх чухал ажилтай Ерөнхий сайд танилцаж, өөрийн санаа бодлоо илэрхийллээ.

“Оюу толгой компанийн Монголд үзүүлэх хувь нэмрийг зөвхөн татварын орлогоор хэмжихгүй. Та бүхэн худалдан авалт, ханган нийлүүлэлтээ Монгол Улсаас хангаж, монгол ажилчдыг ажлын байраар хангаад зогсохгүй мэдлэг мэргэжлийг нь дээшлүүлж, илүү нарийн мэргэшүүлэхэд анхаарах хэрэгтэй” хэмээн Ерөнхий сайд Ж.Эрдэнэбат хэллээ.

“Оюу толгой” төсөл Монголын эдийн засгийн өсөлтийг эрчимтэй нэмэгдүүлэх, эдийн засагт эерэг нөлөө үзүүлэх төсөл төдийгүй 1600 хүнийг ажлын байраар хангаж, орон нутгийн компаниудтай хамтран ажилласнаар бизнесийн хүрээг нь тэлэх юм. Энэ нь тус төслийн ашиг орлогыг гурав дахин нэмэгдүүлэхийн зэрэгцээ дотоодын нийт бүтээгдэхүүн, гадаад валют, макро эдийн засгийн өсөлтөд нөлөөлөх юм.

“Оюу толгой” ХХК-ийн гүйцэтгэх захирал Б.Мөнхбаатар “Оюу толгойн ордын нөөцийн 80 хувийг эзэлдэг далд уурхайн ажлыг оны эхний улирлын байдлаар нийт 1600 ажилчид гүйцэтгэж байгаа бөгөөд нийт ажиллагсдын 90 гаруй хувь нь монгол ажилчид байна. Мөн 2016 оны гуравдугаар улирлын байдлаар 852 ханган нийлүүлэгч компанитай хамтран ажилласан бөгөөд тэдний 60 гаруй хувийг дотоодын компаниуд эзэлж байна. Оюу толгойн гүний уурхайн олборлолт 2020 онд эхэлнэ. Уурхай ашиглалтад орсноор өдөрт одоогийн 100 мянган тонн ил уурхайн олборлолт дээр дахин 100 орчим мянган тонн зэсийн баяжмал олборлох боломж бүрдэнэ” гэлээ.

“Оюу толгой” төслийн гэрээ, үйл ажиллагаа тогтвортой байдал чухал. Гэхдээ аливаа үйл ажиллагаа нь нээлттэй, ил тод, тодорхой байх ёстой. Монголын газар нутаг, ард иргэд, Монголын талд юу үлдэж байна гэдгийг ил тод тайлагнаж байхыг Ерөнхий сайд Ж.Эрдэнэбат анхаарууллаа.

Мөн “2017 он гэхэд үйлдвэрийн 2 босоо ам, агааржуулалтын 5 босоо амыг дуусгах төлөвлөгөөтэй ажиллаж байна. Манай компани 2016 оны эхний 9 сард 226.3 сая долларын борлуулалт хийсэн нь өмнөх улирлаас 30 гаруй хувиар буурсан үзүүлэлттэй байна” гэж “Оюу толгой” ХХК-ийн Гүний уурхайн төслийн захирал Марко Пирес яриандаа дурдлаа гэж Засгийн газрын Хэвлэл мэдээлэл, олон нийттэй харилцах хэлтсээс мэдээлэв.