Япон улсаас Монгол Улсад суугаа Онц бөгөөд Бүрэн эрхт Элчин сайд Такэнори Шимизүгийн бүрэн эрхийн хугацаа дуусч нутаг буцахаар болоод байгаа. Тэгвэл Японы Засгийн газраас Монгол Улсад суух шинэ Элчин сайдын нэрийг зарласан байна.
“Kyodo” агентлагийн мэдээлж буйгаар Монгол Улсад суух шинэ Элчин сайдаар Масато Такаокаг томилжээ. Тэрбээр өмнө нь Ирак дахь Элчин сайдын яаманд болон Сиднейд суух Ерөнхий консулаар ажиллаж байсан туршлагатай аж.
Нийслэлийн иргэдийг гамшгаас хамгаалах сургалт арга зүйн төвийн үйл ажиллагааны нээлт өнөөдөр боллоо. Нээлтийн ажилалагаанд Улсын Онцгой комиссын дарга, Монгол Улсын шадар сайд У.Хүрэлсүх, нийслэлийн Онцгой комиссын дарга, нийслэлийн Засаг дарга бөгөөд Улаанбаатар хотын Захирагч С.Батболд, Дэлхийн зөн олон улсын байгууллагын төлөөлөл болон холбогдох албаны хүмүүс оролцлоо.
Тус төв болзошгүй гамшгийн аюулаас өөрийгөө болон бусдыг хэрхэн хамгаалах болон аврах мэдлэг, дадлыг иргэд, олон нийтэд олгож, сургалт, дадлагад хамруулах юм байна. Тухайлбал, газар хөдлөлтийн гамшгийн зарлан мэдээллийн дохиогоор ажиллаж, обьектыг орхин хэрхэн аюулгүй орчинд гарах, өөртөө болон бусдад эмнэлгийн анхны тусламж үзүүлэх, гал унтраах анхан шатны багаж хэрэгслийг ашиглаж сурах зэрэг иргэдийн мэдвэл зохих анхан шатны мэдлэг, дадлыг олгох аж. Тус төв жилдээ 750 мянган иргэнийг сургалтад хамруулах бүрэн боломжтой гэдгийг мэргэжлийн хүмүүс тодотгож байлаа.
Улсын Онцгой комиссын дарга, Монгол Улсын шадар сайд У.Хүрэлсүх “Ард иргэдээ болзошгүй гамшгаас урьдчилан сэргийлж хамгаалах, хэрэв гамшигт өртвөл сэргээн босгох ажлыг яаралтай зохион байгуулах зүй ёсны шаардлага бидний өмнө тавигдаж байгаа. Гамшин, зовлонгоос урьдчилан сэргийлнэ гэдэг бол улс орны тогтвортой хөгжилтэй шууд холбоотой асуудал байдаг. Тиймээс бид нийслэлийн иргэдийг гамшгаас хамгаалах сургалт арга зүйн төвийг байгуулж ашиглалтад оруулж байна. Тус төвийг байгуулахад ихээхэн хүчин чармайлт гарган ажиллаж байгаа нийслэлийн Засаг дарга С.Батболд болон нийслэлийн үе үеийн удирдлагуудад талархал илэрхийлж байна” гэлээ.
Нийслэлийн Онцгой комиссын дарга, нийслэлийн Засаг дарга бөгөөд Улаанбаатар хотын Захирагч С.Батболд “Монгол Улсын үндэсний аюулгүй байдлын чухал салбар болох Онцгой байдлын байгууллагыг бэхжүүлэх, хуулиар хүлээсэн үүргээ биелүүлэх нөхцөлөөр хангах, нийслэлийн хүн амд гамшгийн аюулаас урьдчилан сэргийлэх, гамшиг, осол тохиолдсон нөхцөлд өөрийгөө болон өрөөлийг хэрхэн авран хамгаалах талаар мэдлэг, дадлага олгох, Улаанбаатар хотын гамшгийн эрсдлийг бууруулах, гамшигтай тэмцэх чадвар олгох богино, дунд, урт хугацааны хөтөлбөрийг баталж хэрэгжүүлэхээр ажиллаж байна. Цаашид нийслэлийнхээ иргэдэд мэдлэг дадлага олгохоос гадна аюулгүй байдлыг хангахад нэн шаардлагатай олон улсын стандарт шаардлагыг хангасан багаж, техник хэрэгслээр хангахад хотын зүгээс дэмжлэг үзүүлэн ажиллах болно. Нийслэлийн удирдлагаас олон улсын байгууллагуудтай хамтран энэхүү төвийг түшиглэн сургалт дадлага, төсөл хөтөлбөрүүдийг хэрэгжүүлэн хамтран ажиллана гэдэгт итгэлтэй байна” хэмээн нээлтийн арга хэмжээний үеэр хэлсэн үгэндээ дурдлаа.
Сургалт арга зүйн төвийн барилга нь Газар хөдлөлтийн танхим, Өндрөөс аврах ажиллагаа үзүүлэх танхим, Утаат орчны дадлага хийх, Эмнэлгийн анхны тусламж үзүүлэх сургалтын танхим, 150 хүний багтаамж бүхий үзвэрийн 3D бичил кино театр, Нийслэлийн Онцгой комиссын хуралдааны танхим зэрэг нийт 52 өрөөтэй аж. Уг төв нь гамшгаас хамгаалах сургалт, дадлага зохион байгуулахаас гадна дуудлагаар ажиллах Аврах ангитай иж бүрэн цогцолбор байгууламж юм
Монгол Улсын Ерөнхий сайд Ж.Эрдэнэбат Өмнөговь аймагт ажиллах үеэрээ “Эрдэнэс Оюутолгой”, “Оюутолгой” компанийн ТУЗ болон удирдлагуудад дараахь үүргийг өглөө.
Үүнд:
1. Оюутолгойн 34 хувийг Монгол Улсын Засгийн газар эзэмшдэг. Иймд компанийн засаглал, гүйцэтгэх удирдлагын түвшинд 34 хувьдаа ногдох эрх мэдлийг Монголын талд эдлүүлэх боломжоор хангах,
2. Компанийн ашиг, алдагдлын алинд нь ч Монгол Улсын Засгийн газар 34 хувьдаа ногдох хариуцлагаа хүлээж байгаа. Компанийн гадаад, дотоод худалдан авалт болон ханган нийлүүлэлт ялангуяа, компанийн санхүүгийн үйл ажиллагаанд Монгол Улсын Засгийн газар 34 хувьдаа ногдох хяналтын эрх мэдлээ бодитой хэрэгжүүлж эхлэх,
3. Оюутолгой төслийн бүтээн байгуулалтад олон монгол залуусыг ажиллуулж гэрээний үүргээ биелүүлж байгаа нь сайн хэрэг. Гэхдээ үйлдвэр цаашдаа урт хугацаанд олон жил ажиллах учраас ажилчдынхаа нийгмийн асуудалд одооноос онцгой анхаарч эхлэх хэрэгтэй. Ажилчдаа олон жилийн турш онгоцоор нааш цааш нь зөөлөө. Үйлдвэр дагасан хот биш юмаа гэхэд Оюутолгойн ажилчдын орон сууцны хотхоныг орон нутагтаа байгуулж гэр бүлээрээ байнга орших суух орчныг бүрдүүлэх ёстой. Монгол Улсын хувьд Оюутолгойн ажилчид нь Оюутолгойн ашигт малтмалаасаа үнэ цэнэтэй баялаг гэдгийг хаана хаанаа ойлгох ёстой.
4. Оюутолгой бол дэлхийн хэмжээний том орд. Тийм ордын уурхай нь ч, үйлдвэр нь дэлхийн хэмжээний стандарт бүхий тохижилттой байх ёстой. Иймд уурхайн орчны тохижилтыг сайжруулах хэрэгтэй гэв.
Ерөнхий сайд Ж.Эрдэнэбат эдгээр дөрвөн чиглэлийн үүргийг Оюутолгой компанийн ТУЗ болон гүйцэтгэх удирдлагуудад өгч, ямар арга хэмжээ авснаа болон хэрэгжилтийг жил бүр Ерөнхий сайдын төвшинд танилцуулж байхыг үүрэг болголоо
Нийслэлд үйл ажиллагаагаа явуулж буй аж ахуйн нэгж, байгууллагууд ойр орчмынхоо 50 метр талбайн замын цасыг цэвэрлэх үүрэгтэй байдаг. Нийслэлийн ИТХ-ын Тэргүүлэгчдийн 2012 оны 11 дүгээр сарын 13-ны өдрийн 61 дүгээр тогтоолоор Иргэн, Аж ахуйн нэгж байгууллагуудыг эзэмшил, ашиглалтад байгаа газар болон орчны 50 метр хүртэлх нийтийн эзэмшлийн зам талбайд ногоон байгууламж хийх, арчилгаа цэвэрлэгээг хариуцах, өвлийн улиралд байнгын хүн томилж цас, мөсийг тухай бүрт нь арилган, халтиргаа гулгаа үүсгэлгүйгээр, иргэдийн тав тухтай амьдрах орчин нөхцөлийг бүрдүүлж ажиллана гэсэн үүрэг байдаг.
Цаг агаарын урьдчилсан мэдээгээр ойрын өдрүүдэд цас үргэлжлэн орох төлөвтэй байгаа тул аж ахуйн нэгжүүд үүргээ биелүүлэн, орчныхоо 50 метр талбайн цас мөсийг цэвэрлэхийг анхааруулж байгаа аж. Энэхүү үүргээ биелүүлээгүйгээс иргэд гэмтэж бэртсэн тохиолдолд тухайн аж ахуйн нэгжээс нэхэмжлэл хүсэх эрхтэй байдаг аж.
Өнөөдөр Улаанбаатарын цагаар 13:00 цагт АНУ-ын Ерөнхийлөгчийн сонгууль албан ёсоор эхлэв. Хиллари Клинтон сонгуулийн санал хураалтаар Нью-Хэмпшир мужийн Диксвилл-Нотч хотод ялалт байгуулсан талаар ТАСС уламжиллаа. Уламжлал ёсоор, тус хотын оршин суугчдад орон нутгийн цагаар 08:00 цагт санал өгөх эрх нь нээгджээ. Дисквилл-Нотч хотын санал өгөх насны найман иргэний дөрөв нь Хиллари Клинтонд, хоёр нь Доналд Трампт, нэг нь Гарри Жонсонд, нэг нь Митт Ромнд саналаа өгчээ.
Ердөө 12 хүн амтай Диксвилл-Нотч хотын иргэд саналаа өгч, Ардчилсан намаас нэр дэвшигч Хиллари Клинтон ялсан талаар CNN агентлаг мэдээллэв. Диксвилл-Нотч хотын иргэд сүүлийн дөрвөн удаагийн Ерөнхийлөгчийн сонгуулийн гуравд нь зөв сонголт хийсэн байна. Тодруулбал, 2000 болон 2004 онуудад энэ хотод Жорж Буш, 2008 онд Барак Обама сонгогдож байсан аж.
Клинтон өчигдөр радиод ярилцлага өгөх үеэрээ хэрвээ тэр сонгуульд ялалт байгуулбал АНУ-ыг сэргээхэд Д.Трамп чухал үүрэг гүйцэтгэнэ гээд түүнийг урих хүсэлтэй байгаагаа хэлсэн байна. Харин Д.Трамп Мичиганд болсон хамгийн сүүлийн сунгааны үеэр үг хэлэхдээ “Бизнесмэнийхээ хувьд хэлэхэд Х.Клинтон бол авлигад хамгийн их өртсөн нэг дэвшигч” хэмээн үзэл бодлоо илэхрийлжээ.
Сонирхуулахад, энэхүү хамгийн сүүлийн сунгаанд Хилларигийн нөхөр Билл Клинтон болон АНУ-ын Ерөнхийлөгч Барак Обама болон тэргүүн хатагтай Мишель Обама нар оролцжээ. Сунгаанд Хиллари Клинтон өрсөлдөгчөө дөрвөн хувиар тэргүүлсэн байна.
Улаанбаатар, Дархан, Эрдэнэт хотод эко гэрэлтүүлэг буюу нарны зайн гэрэл суурилуулан туршиж эхэллээ. Энэхүү гэрэл нь цахилгаан шаардахгүйгээр нартай үед өөртөө эрчим хүч хуримтлуулж, харанхуй болмогц гэрэлтүүлэг асч, гэрэлтэй үед унтардаг аж. Дээрх эко гэрэлтүүлгийг цаашид гэр хорооллын гудамж талбай болон алслагдсан бүсэд суулгавал тог цахилгаан хэмнэх боломжтой ба эрчим хүчинд холбогдоогүй алслагдсан газруудыг гэрэлтүүлэх боломжтой аж.
Монгол Улсын Ерөнхий сайд Ж.Эрдэнэбат энэ сарын 7-ны өдөр Дорноговь аймгийн Мандах сумын “Цагаан суваргын” зэсийн орд газар болон Мандах, Хатанбулаг сумыг төвлөрсөн эрчим хүчээр холбох агаарын шугамын ажил байдалтай танилцсан байна.
Тэрээр “21 дүгээр зуун гарчихаад байхад манай улсад байнгын эрчим хүчний сүлжээнд холбогдоогүй хоёр сум байна. Ойрын хугацаанд эдгээр сумыг төвийн эрчим хүчинд холбох ажлыг эрчимжүүлж, шийдвэрлэх хэрэгтэй” гээд энэ асуудлаар эрчим хүч хариуцсан холбогдох албаныхан болон энэ төслийг хэрэгжүүлж байгаа “МАК”-ийн удирдлагуудад үүрэг, чиглэл өгсөн байна.
Цагаан суваргаас Хатанбулаг сум руу чиглэсэн 120 км-ийн 35 квт-ын хүчин чадалтай агаарын шугамын барилгын ажлыг Багануурын “ЗӨБЦТС” төрийн өмчит компани дуусгаж хүлээлгэн өгсөн. Цагаан суваргаас Мандах сум хүртэлх эрчим хүчний агаарын шугамыг гүйцэтгэгч компани мөн л дуусгаж хүлээлгэн өгсөн бол одоо зөвхөн “МАК” ХХК-ийн Оюу толгойгоос Цагаа суварга руу чиглэсэн 220 квт-ын 160 км агаарын шугамын ажил хүлээгдэж байгаа ажээ. “МАК” ХХК нь тус сумын нутагт байх Цагаан суваргын зэсийн орд газрыг ашиглаж зэсийн баяжмалын томоохон үйлдвэр байгуулахаар ажиллаж байгаа юм. .
Гирийн ДАШТ Казахстан улсад үргэлжилж байна. Тус тэмцээнд манай улсаас эх орноо төлөөлөн оролцож буйС.Амантай толчак төрөлд II, рывок төрөлд IV, нийлбэр дүнгээр IV байрт тус тус шалгарлаа. Ийнхүүтэрээр дэлхийд IV байрт эрэмбэлэгдэхийн сацуу Олон улсын хэмжээний мастер цолны болзол хангав.
2017 оны төсвийн хүрээний мэдэгдэл, 2018-2019 оны төсвийн төсөөллийн тухай хуулийн төслийн анхны хэлэлцүүлгийг хийв
УИХ-ын Төсвийн байнгын хорооны өнөөдрийн /2016.11.08/ хуралдаан 10 цаг 07 минутад гишүүдийн 52.6 хувийн ирцтэйгээр эхэллээ. Хуралдааны эхэнд Монгол Улсын нэгдсэн төсвийн 2017 оны төсвийн хүрээний мэдэгдэл, 2018-2019 оны төсвийн төсөөллийн тухай хуулийн төслийн анхны хэлэлцүүлгийг хийсэн юм. Хуулийн төслийн талаар асуулт асууж, санал хэлэх гишүүн байгаагүй учир ажлын хэсгээс гаргасан зарчмын зөрүүтэй саналын томьёоллоор санал хураалт явуулсан юм.
Тухайлбал, Эдийн засгийн үндсэн үзүүлэлт дэх нэгдсэн төсвийн тэнцвэржүүлсэн орлогын хэмжээг 2017 онд 5,974.8 гэснийг 6,160.2 гэж, ДНБ-д эзлэх хувь 22.8 гэснийг 23.3, 2018 онд 6,681.0 гэснийг 6,822.6, ДНБ-д эзлэх хувь 23.4 гэснийг 23.8, 2019 онд 2019 онд 7,211.6 гэснийг 7,561.3, ДНБ-д эзлэх хувь 22.7 гэснийг 23.7 гэж өөрчлөх саналыг гишүүдийн 90.0 хувь нь дэмжлээ.
Мөн эдийн засгийн үндсэн үзүүлэлт дэх нэгдсэн төсвийн нийт зарлагын дээд хэмжээ 2017 онд 8,564.0 гэснийг 8,568.9, ДНБ-д эзлэх хувь 32.7 гэснийг 32.3, 2018 онд 8,821.8 гэснийг 8,971.2, ДНБ-д эзлэх хувь 30.9 гэснийг 31.3, 2019 онд 8,961.4 гэснийг 9,316.5, ДНБ-д эзлэх хувь 28.2 гэснийг 29.2 гэж өөрчлөх саналыг хуралдаанд оролцсон гишүүдийн 80 хувь нь дэмжив.
Түүнчлэн нэгдсэн төсвийн нийт зарлагын өсөлтийн хэмжээ 2017 онд -1.130.4 гэснийг -1,125.5, ДНБ-д эзлэх хувь -4.3 гэснийг -4.2, 2018 онд 257.8 гэснийг 402.3, ДНБ-д эзлэх хувь 0.9 гэснийг 1.4, 2019 онд 139.5 гэснийг 345.3, ДНБ-д эзлэх хувь 0.4 гэснийг 1.1 гэж өөрчлөхийг хуралдаанд оролцсон гишүүдийн 90 хувь нь дэмжив.
Ажлынх хэсгээс гаргасан нэгдсэн төсвийн тэнцвэржүүлсэн тэнцэл 2017 онд -2,589.2 гэснийг -2,408.7, ДНБ-д эзлэх хувь -9.9 гэснийг -9.1, 2018 онд -2,140.8 гэснийг -2,148.6, 2019 онд -1,749.8 гэснийг -1,755.2 хувь гэж өөрчлөх, нэгдсэн төсвийн хөрөнгийн зардлын хэмжээг 2017 онд 1,494.2 гэснийг 1,483.9 гэж ДНБ-д эзлэх хувь 5.7 гэснийг 5.6, Засгийн газрын өрийн нийт хэмжээ, өнөөгийн үнэ цэнээр 2017 онд 22,197.4 гэснийг 22,363.7, ДНБ-д эзлэх хувь 84.8 гэснийг 84.4, 2018 онд 22,818.0 гэснийг 22,889.5, 2019 онд 23,798.9 гэснийг 23,903.1, ДНБ-д эзлэх хувь 74.8 гэснийг 74.9 гэж өөрчлөхийг гишүүдийн олонхи нь дэмжих нь зүйтэй гэж үзлээ. Анхны хэлэлцүүлэг хийсэн талаархи байнгын хорооны санал, дүгнэлтийг УИХ-ын чуулганы нэгдсэн хуралдаанд УИХ-ын гишүүн Б.Баттөмөр танилцуулахаар болсон юм.
Үргэлжлүүлэн Монгол Улсын 2017 оны төсвийн тухай, Нийгмийн даатгалын сангийн 2017 оны төсвийн тухай хуулийн хамт өргөн мэдүүлсэн хууль, УИХ-ын тогтоолын төслүүдийн эцсийн хэлэлцүүлгийг хийхэд асуулт асууж, санал, байр сууриа илэрхийлэх гишүүн байсангүй.
Төсвийн тухай хуульд нэмэлт, өөрчлөлт оруулах тухай, Ирээдүйн тэтгэврийн нөөц сангийн тухай хуульд өөрчлөлт оруулах тухай, Засгийн газрын тусгай сангийн тухай хуульд нэмэлт, өөрчлөлт оруулах тухай, Эрүүл мэндийн даатгалын тухай хуульд нэмэлт, өөрчлөлт оруулах тухай, Ахмад настны нийгмийн хамгааллын тухай хуульд нэмэлт оруулах тухай, Нийгмийн халамжийн тухай хуульд нэмэлт оруулах тухай, Нийгмийн даатгалын тухай хуульд өөрчлөлт оруулах тухай, Хөдөлмөрийн тухай хуульд нэмэлт оруулах тухай, Хөгжлийн бэрхшээлтэй хүний эрхийн тухай хуульд нэмэлт оруулах тухай хуулийн төсөл болон “Хүүхдийн мөнгө олгох талаар авах зарим арга хэмжээний тухай Улсын Их Хурлын тогтоолын талаархи байнгын хорооны санал, дүгнэлтийг УИХ-ын гишүүн Д.Тогтохсүрэн УИХ-ын чуулганы нэгдсэн хуралдаанд танилцуулахаар болов.
10 хууль, гурван тогтоолын төслийн эцсийн хэлэлцүүлгийг хийлээ
Үүний дараа Хүүхэд харах үйлчилгээний тухай хуульд өөрчлөлт оруулах тухай, Засгийн газрын тусгай сангийн тухай хуульд нэмэлт оруулах тухай, Шүүхийн захиргааны тухай хуульд нэмэлт оруулах тухай, Ашигт малтмалын тухай хуульд нэмэлт, өөрчлөлт оруулах тухай, Аж ахуйн үйл ажилллагааны тусгай зөвшөөрлийн тухай хуульд нэмэлт оруулах тухай, Улсын тэмдэгтийн хураамжийн тухай хуульд нэмэлт оруулах тухай, Төсвийн тухай хуульд нэмэлт оруулах тухай, Ирээдүйн өв сангийн тухай хуульд нэмэлт оруулах тухай, Хөрөнгө оруулалтын тухай хуульд нэмэлт оруулах тухай, Төрийн албаны тухай хуульд нэмэлт оруулах тухай хуулийн төсөл болон Монгол Улсын Үндсэн хуулийн цэцийн дарга, гишүүдийн албан тушаалын цалингийн хэмжээг шинэчлэн тогтоох тухай, Прокурорын байгууллагын албан тушаалын цалингийн хэмжээг шинэчлэн тогтоох тухай, Төрийн өмчийг 2015-2016 онд хувьчлах, өөрчлөн байгуулах үндсэн чиглэлийг үргэлжлүүлэн хэрэгжүүлэх тухай” Улсын Их Хурлын тогтоолын төслийн эцсийн хэлэлцүүлгийг хийсэн юм. Хууль болон тогтоолын төслүүдтэй холбогдуулж УИХ-ын гишүүн Х.Баделхан гишүүн асуулт асууж, байр сууриа илэрхийлэв. Тэрбээр прокурорын байгууллагын албан тушаалын цалингийн хэмжээг шинэчлэн тогтоох тухай УИХ-ын тогтоолын төсөл батлагдвал прокуроруудын одоо авч байгаа цалин нь хэдэн хувиар нэмэгдэхийг тодруулсан юм. Ажлын хэсгээс прокурорууд шүүгчдээс гурав дахин бага цалин авдаг байсан бол УИХ-ын шинэчилсэн тогтоолоор шат, шатны шүүхийн цалингийнхны 65 хувьд хүрсэн гэж хариулсан юм.
Дараа нь Монгол Улсын Үндсэн хуулийн цэцийн дарга, гишүүний албан тушаалын цалингийн хэмжээг шинэчлэн тогтоох тухай УИХ-ын тогтоолын төслийн талаархи зарчмын зөрүүтэй саналын томьёоллоор санал хураалт явууллаа. Энэ нь Үндсэн хуулийн цэцийн гишүүнд УИХ-ын 2001 оны 74 дүгээр тогтоолын дагуу төрийн алба хаасан хугацааны нэмэгдлийн хэмжээг түүний албан тушаалын сарын цалингаас төрийн алба хаасан хугацааг харгалзан 5-25 хувиар тооцож олгодог байсныг өөрчилж, жигд 10 хувиар тооцож олгох нь зүйтэй гэсэн санал байв. Үүнийг хуралдаанд оролцсон гишүүдийн 90.9 хувь нь дэмжив. 10 хууль, гурван тогтоолын төслийн эцсийн хэлэлцүүлгийг хийсэн талаархи байнгын хорооны санал, дүгнэлтийг УИХ-ын гишүүн Д.Тогтохсүрэн чуулганы нэгдсэн хуралдаанд танилцуулахаар боллоо.
Төсвийн тухай хуулийн төслүүдийн гурав дахь хэлэлцүүлгийг хийлээ
Хуралдаанаар үргэлжлүүлэн Монгол Улсын 2017 оны төсвийн тухай хууль батлагдсантай холбогдуулан авах арга хэмжээний тухай Улсын Их Хурлын тогтоолын төслийн анхны хэлэлцүүлгийг хийсэн юм. Тогтоолын төсөлтэй холбогдуулж УИХ-ын гишүүн Х.Баделхан, Ц.Даваасүрэн, Н.Амарзаяа, Д.Тогтохсүрэн нар асуулт асууж байр сууриа илэрхийллээ. УИХ-ын гишүүн Д.Тогтохсүрэн тогтоолын төслийг бүтцийн хувьд цэгцлэх, УИХ-ын гишүүн Н.Амарзаяа төрийн өмчит хувьцаат компанийн төлөөлөн удирдах зөвлөлийн бүрэлдэхүүнд орон нутгийн төлөөлөл оролцуулах шаардлагатай байгаа талаар саналаа хэлсэн юм. Үүний дараа байнгын хорооны гишүүдээс гаргасан зарчмын зөрүүтэй саналын томьёоллоор санал хураалт явуулж, байнгын хорооноос гаргасан санал, дүгнэлтийг УИХ-ын гишүүн Н.Амарзаяа УИХ-ын чуулганы нэгдсэн хуралдаанд танилцуулахаар болов.
Байнгын хорооны хуралдаанаар хэлэлцсэн тав дахь асуудал нь Монгол Улсын 2017 оны төсвийн тухай, Нийгмийн даатгалын сангийн 2017 оны төсвийн тухай хуулийн төслүүдийн гурав дахь хэлэлцүүлэг байв. Уг хэлэлцүүлэгтэй холбогдуулж УИХ-ын гишүүн Н.Амарзаяа, Ц.Даваасүрэн нар асуулт асууж, байр сууриа илэрхийлэв. Ингээд төслийн гурав дахь хэлэлцүүлэг хийсэн талаархи байнгын хорооны санал, дүгнэлтийг Төсвийн байнгын хорооны дарга Ч.Хүрэлбаатар УИХ-ын чуулганы нэгдсэн хуралдаанд танилцуулахаар боллоо.
Хуралдааны төгсгөлд Монгол Улсын эдийн засаг, нийгмийг 2017 онд хөгжүүлэх үндсэн чиглэл батлах тухай тогтоолын төслийг хэлэлцэв. Тогтоолын төсөлтэй холбогдуулж УИХ-ын гишүүн Ч.Хүрэлбаатар “Оюутолгой” төслийн далд уурхай, “Тавантолгой”, “Тавантолгой цахилгаан станц”, “ДЦС-3”-ын өргөтгөл, “Гацуурт” зэрэг томоохон төслийн бүтээн байгуулалтын ажлыг эрчимжүүлэх замаар төсвийн орлогыг нэмэгдүүлнэ гэж байгаа ч хугацааны талаар тодорхой хариу хэлэхийг, УИХ-ын гишүүн Б.Баттөмөр татварын хөнгөлөлт чөлөөлөлтийн асуудлыг нэг мөр цэгцэлж, 2008 онд батлагдсан Татварын багц хуулиудыг хэдийд шинэчлэхийг тодруулж байлаа. Сангийн сайд Б.Чойжилсүрэн Монгол Улсын эдийн засаг, нийгмийг 2017 онд хөгжүүлэх үндсэн чиглэл, Засгийн газрын мөрийн хөтөлбөр, 2017 оны төсвийн төсөлд Оюутолгой” төслийн далд уурхай, “Тавантолгой”, “Тавантолгой цахилгаан станц”, “ДЦС-3”-ын өргөтгөл, “Гацуурт” зэрэг томоохон төслийн бүтээн байгуулалтын ажлыг эрчимжүүлэхээр тусгагдсан байгаа. 2017 онд эдгээр томоохон бүтээн байгуулалтын ажлуудыг эхлүүлэхээр төлөвлөсөн. Харин татварын хөнгөлөлтийг багасгах, нэг мөр болгох, Татварын багц хуулиудыг шинэчлэх талаар бид ажиллаж байгаа гэж хариуллаа.
Гишүүд санал хэлж, байр сууриа илэрхийлсний дараа төсөвтэй холбогдуулж нэгдсэн төсвийн тэнцвэржүүлсэн тэнцэл 2017 онд ДНБ-д эзлэх хувь -9.9 гэснийг -9.1 гэж өөрчлөх зарчмын зөрүүтэй саналын томьёоллоор санал хураалт явуулахад хуралдаанд оролцсон гишүүдийн 83.3 хувь нь дэмжлээ.
Гамшгийн шуурхай удирдлагууд Дорноговь, Дундговь, Өмнөговь, Сэлэнгэ аймгийн онцгой байдлын газрын удирдах бүрэлдэхүүнтэй видео хурал хийлээ.
Хурлаар “Хонины цэцэг” өвчний нөхцөл байдал, авч хэрэгжүүлж буй арга хэмжээний талаарх мэдээллийг сонсож, цаашид авч хэрэгжүүлэх арга хэмжээний талаар зөвлөмж өгсөн юм. Дорноговь, Дундговь аймгуудад энэ оны долоо, наймдугаар сард “Хонины цэцэг” өвчнөөс урьдчилан сэргийлэх вакцинжуулалтын ажлыг зохион байгуулсан. Гэвч тус аймгуудын нутаг дэвсгэрт уг өвчин дахин гарч байгаа нь малын шилжилт хөдөлгөөнд тавих хяналт сул, хорио цээрийн дэглэм муу байгаагийнх гэж дүгнэжээ.
Мөн дээрх орон нутгийн Онцгой байдлын газрын Төлөвлөлт, бэлэн байдал хариуцсан мэргэжилтнүүдэд Гамшгаас хамгаалах төлөвлөгөөнд тодотгол хийж, өвчний голомтод офицер бүрэлдэхүүнийг ажиллуулах хуваарь гаргаж ажиллахыг үүрэг болголоо. Өгсөн үүргийн биелэлтийг 11 дүгээр сарын 09-ний өдрийн дотор Онцгой байдлын ерөнхий газрын Гамшгийн шуурхай удирдлагын газарт ирүүлэхийг мэдэгдлээ.