Month: November 2016

УИХ-ын гишүүн, хууль зүйн шинжлэх ухааны доктор, профессор, Монгол Улсын гавьяат хуульч Д.Лүндээжанцан “Хууль бүтээх ажиллагаа ба хууль зүйн техник” ном бичиж хэвлүүлжээ. Түүний номын нээлт өчигдөр боллоо. Эрхэм гишүүний шинэ номын нээлтэд УИХ-ын гишүүн, Хууль зүйн байнгын хорооны дарга Ш.Раднаасэд, УИХ-ын гишүүн Я.Содбаатар, Г.Занданшатар, Д.Тогтохсүрэн, Н.Учрал, Х.Нямбаатар, Хүний эрхийн үндэсний комиссын дарга Ж.Бямбадорж, УИХ-ын Тамгын газрын Ерөнхий нарийн бичгийн дарга Ц.Цолмон, Хууль зүй, дотоод хэргийн яамны Төрийн нарийн бичгийн дарга Г.Баясгалан болон хууль зүйн салбарын эрдэмтэн судлаачид, профессор, багш нар оролцсон байна.

УИХ-ын гишүүн Д.Лүндээжанцан Монголын төр ёс, хууль цааз, Үндсэн хуулийн эрх зүйтэй холбоотой эрдэм шинжилгээ, судалгааны 30 гаруй ном, сурах бичгийг дангаараа болон хамтран бүтээж хэвлүүлсэн ажээ. Тэрээр “Монгол Улс дахь төрийн эрх мэдлийн хуваарилалт” номоороо Монгол Улсын гавьяат хуульч, хөдөлмөрийн баатар Бяраагийн Чимидийн нэрэмжит “Монгол Улсын Их Хурлын шагнал”-ын анхны эзэн болсон юм.

Уншигчдын гар дээр дөнгөж очоод буй “Хууль бүтээх ажиллагаа ба хууль зүйн техник” ном нь түүний 38 дахь бүтээл аж. Шинэ ном нь хууль санаачлах, хэлэлцэж батлах, баталгаажуулах, хэвлэн нийтлэх үеийн техник, хууль тогтоомжийг системчлэх, тайлбарлах, эрх зүйг рецепцлэх болон хууль хэрэглэх техникийн асуудлыг багтаасан нийт 7 бүлэг, 17 зүйл бүхий 330 хуудастай юм.

БСШУ-ы сайд асан Л.Гантөмөрийн санаачилгаар зохион байгуулагдаж буй “Ардчилсан намыг шинэчлэх шийдэл” нээлттэй хэлэлцүүлэг өнөөдөр боллоо. Хэлэлцүүлэгт УИХ-ын гишүүн асан М.Батчимэг болоод АН-ын үе үеийн гишүүд дэмжигчид оролцсон юм.

Энэ үеэр Л.Гантөмөр: Өнөөдөр миний хувьд Ардчилсан намын энгийн нэг гишүүн. Энэ намд 18 жилийн турш намын гишүүн, ҮЗХ-ны гишүүн, энэ намаас сонгогдсон УИХ-ын гишүүнээр ажиллаж байсан түүхтэй. Намын жирийн нэг гишүүний хувьд, энэ намын төлөө санаа тавьдаг хүний хувьд, мөн та бүгдийн адил АН-ын маргаашийн ирээдүйн төлөө санаа зовдог нэг гишүүний хувьд энэхүү хэлэлцүүлгийг зохиож байна. Ер нь Ардчилсан намд шинэчлэл хэрэгтэй юу гэдэг нь том асуулт. Та бүхэн дотор эргэлзэж байгаа хүмүүсч бий. Нөгөө талдаа АН-д зайлшгүй шинэчлэл хэрэгтэй гэж үзэж байгаа гишүүд ч бий. Миний хувьд Ардчилсан нам шинэчлэгдэх шаардлагатай юу, үгүй юу гэдэг дээр нэг л асуулт тавьж байна. Ардчилсан намд асуудал байна уу? гэж. Эргээд харахад 2016 оны сонгуульд ард түмэн бидэнд итгэл үзүүлээгүй шалтгаан юу байв. Юуны өмнө би АН олон түмний итгэл авч чадаагүйн төлөө АН-ын жирийн гишүүдээсээ уучлал гуйх ёстой. Итгэл өгч дэмжиж байсан дэмжигчдээсээ бид нар бас уучлал гуйх ёстой. Ялалт байгуулсан цөөхөн хүмүүстэй баяр хүргэе. УИХ-ын болон түүний дараа болсон Орон нутгийн сонгуулийн дүр зургийг харахад, олон түмэн бидэнд итгээгүйн учир нь хэд хэдэн асуудалд байна. Олон түмнээс хэлж, шүүмжилж буй хамгийн гол асуудал нь АН эв нэгдэлгүй байна гэж. Яагаад бид эв нэгдэлгүй болсон бэ? гэдэг асуултууд тавигдаж байна. Тухайлбал, Монгол Улсын Ерөнхий сайд асан Ч.Сайханбилэг Таван толгой хөдөлнө гэж хэвлэлээр орон даяар зарлахад, маргааш өглөө нь УИХ-ын дарга асан З.Энхболд Таван толгойг хөдлөхгүй гэж мэдэгдэл хийж байх жишээтэй. Тэгэхээр монголчууд АН-ын бодлого яг аль нь юм бэ гэдгийг ойлгохоо больж байгаа юм. Таван толгойгоос урагшаа төмөр зам тавина гэж Ерөнхий сайд нь хэлэхэд Зам тээврийн сайд нь энэ замыг хувийн хэвшлээр хийлгэхгүй гэж хэлж байсан. Энэ эв нэгдэлгүй байдал нь үндсэндээ АН та нар Засаглаж чадахгүй гэдэг ойлголтыг өгсөн. Эв нэгдэлгүй байдал хаанаас урган гарч ирсэн гэхээр бид үзэл бодолдоо үнэнч байж чадаагүйгээс үүдэлтэй. Бидний үзэл бодол маш тодорхой байсан. Харин энэ үзэл бодолдоо үнэнч байж чадаагүй нь АН-ын гол асуудал оршиж байна.

Хэлэлцүүлгийн дэлгэрэнгүйг дараахь дүрс бичлэгээс үзнэ үү!

Э.МӨНХ

Засгийн газрын ээлжит хуралдаан өнөөдөр болж, дөнгөж сая хуралдаан өндөрлөлөө.

Хуралдааны эхэнд Ерөнхий сайд Ж.Эрдэнэбат зарим асуудлаар холбогдох сайд нарт үүрэг өгөв. Тухайлбал, Ерөнхий сайд өнгөрсөн амралтын өдрүүдэд Өмнөговь аймагт ажиллахдаа тэнд үйл ажиллагаа явуулж байгаа Оюутолгой, Эрдэнэс-Тавантолгой, Энержи ресурс, орон нутгийн Тавантолгой зэрэг компанийн удирдлагуудад тодорхой үүрэг өгсөн. Энэ үүргийн биелэлтийг хангах, хяналт тавих, мөн Гашуунсухатын боомтын талаар авах арга хэмэээний талаар санал боловсруулах үүрэг бүхий ажлын хэсэг байгуулж ажиллахыг холбогдох сайд нар үүрэг болголоо.

Түүнчлэн өвөлжилтийн бэлтгэлийг хангаж ажиллахыг Монгол Улсын Шадар сайдад, валютын ханшийн өсөлтийг барих талаар холбогдох байгууллагуудтай зөвшилцөн судалж засгийн газрын хуралдаанд танилцуулах, шаардлагатай бол холбогдох хуулийн төслийг боловсруулахыг Сангийн сайдад үүрэг болголоо. Тухайлбал:

• Улаанбаатарт үйл ажиллагаа явуулж байгаа гадаадын Элчин сайдын яамдыг визийн хураамжаа Монгол Улсын үндэсний мөнгөн тэмдэгтээр авдаг болох,
• Арилжааны банкуудыг Монголбанкны зарласан ханшаас өндөр үнээр валют арилжиж байгаад зохицуулалт хийж болох эсэхийг судлах,
• Валютын хадгаламж, валютын зээлийн үйл ажиллагаанд зохицуулалт хийж, Монгол Улсын үндэсний мөнгөн тэмдэгтийн ханшийг өсгөх ямар боломж байгааг судалж, шаардлагатай бол холбогдох шийдвэрийн төслийг боловсруулж танилцуулахыг Сангийн сайдад үүрэг болгов.

-ТӨРИЙН ӨМЧИТ ХОЁР ҮЙЛДВЭРИЙН ГАЗРЫГ НЭГТГЭЛЭЭ-

“Төрийн үйлчилгээ”, “Засгийн газрын байруудын нэгдсэн захиргаа” гэж төрийн өмчит аж ахуйн тооцоотой үйлдвэрийн газруудын үйл ажиллагааг тус тус зогсоож, тус хоёр үйлдвэрийн газрын гүйцэтгэж байсан чиг үүрэг, хөрөнгө санхүү, хүний нөөцийг нийлүүлэн “Засгийн газрын байруудын нийтлэг үйлчилгээний газар” төрийн өмчит аж ахуйн тооцоотой үйлдвэрийн газар болгон өөрчиллөө. Мөн тус газрын дүрмийг баталлаа.

-ИРЭХ ДӨРВӨН ЖИЛД 259 ХУУЛИЙГ ШИНЭЧИЛНЭ-

“Монгол Улсын хууль тогтоомжийг 2020 он хүртэл боловсронгуй болгох үндсэн чиглэл батлах тухай” УИХ-ын тогтоолын төслийг хэлэлцээд УИХ-д өргөн мэдүүлэхээр тогтов. Үндсэн чиглэлийн төсөлд ирэх дөрвөн жилд 259 хуулийн төсөл, УИХ-ын 16 тогтоолын төслийг боловсруулж өргөн мэдүүлэхээр тусгажээ. Холбогдох нийт 43 байгууллагаас ирүүлсэн саналыг үндэслэн уг үндсэн чиглэлд тусгах хууль тогтоомжийн жагсаалтыг гаргасан байна. Ирэх дөрвөн жилд өөрчлөх 260 хууль, тогтоолын төслийг санаачлагчаар нь үзвэл Засгийн газар 238, УИХ-ын гишүүд 17, Ерөнхийлөгч 4 хуулийн төслийг санаачлахаар тус тус тусгажээ.

-МОНГОЛЫН ХЭСГИЙГ ШАДАР САЙД АХАЛНА-

Эрдэс баялаг, эрчим хүч, дэд бүтцийн хамтын ажиллагааны Монгол, Хятадын хамтарсан зөвлөлийн Монголын хэсгийн бүрэлдэхүүнийг баталлаа. Зөвлөлийн бүрэлдэхүүний Монголын хэсгийн даргаар Монгол Улсын Шадар сайд ажиллана. Зөвлөлийн анхдугаар хуралдаан ирэх сард БНХАУ-ын Бээжин хотод болох юм. Уг хуралдаанд болон хэлэлцэх асуудалтай холбогдуулан Монголын талын төлөөлөгчдийн баримтлах удирдамжийг гаргаж Засгийн газрын хуралдаанд танилцуулахыг холбогдох сайд нарт үүрэг болголоо.

-ЖИЖИГ, ДУНД ҮЙЛДВЭРИЙН ЗЭЭЛИЙН ОЛГОЛТЫГ ЗОГСООХГҮЙ, “ТҮР ЖУРАМ”-ААР ЗОХИЦУУЛНА-

Засгийн газрын тусгай сангийн тухай хуульд нэмэлт өөрчлөлт оруулах хуулийн төслийг ирэх арваннэгдүгээр сард УИХ-аар хэлэлцэнэ. Гэхдээ эдийн засаг хүндрэлтэй өнөөгийн нөхцөлд жижиг, дунд үйлдвэрлэгчдэд олгодог хөнгөлөлттэй зээлийн дэмжлэг үзүүлэх үйл ажиллагааг саадгүй, тасралтгүй явуулах нь эдийн засгийн болон нийгмийн ач холбогдолтой гэж Засгийн газар үзэж байна. Тийм учраас уг хуулийн төслийг батлагдах хүртэлх хугацаанд үйлчлэх Жижиг, дунд үйлдвэрийг хөгжүүлэх сангаас санхүүжих хөнгөлөлттэй зээлийн төсөл сонгон шалгаруулах түр журмыг баталлаа. Уг түр журмаар 2016 онд олгогдох 35 тэрбум төгрөгийн хөнгөлөлттэй зээлийн төсөл сонгон шалгаруулах ажлыг зохион байгуулж, хяналт тавьж ажиллахыг Хүнс, хөдөө аж ахуй, хөнгөн үйлдвэрийн сайдад даалгалаа.

-ГАДААДААС АВАХ АЖИЛЛАХ ХҮЧ, МЭРГЭЖИЛТНИЙ ТООГ БАТЛАВ-

Монгол Улсад 2017 онд үйл ажиллагаа явуулах аж ахуйн нэгж, байгууллагын нийт ажиллагсдын тоонд эзлэх гадаадын ажиллах хүч, мэргэжилтний хувийг Засгийн газрын тогтоолоор баталлаа.

Гадаад ажилчдын тоо нь тухайн байгуллагын нийт ажилчдын таван хувиас хэтрэхгүй байхаар тогтоолоо. Тогтоосон квотын 50 хүртэлх хувьтай тэнцэх гадаадаас авах ажиллах хүчний зөвшөөрлийг Хөдөлмөр, халамж үйлчилгээний газар, 50-иас дээш бол Засгийн газарт асуудал тавьж шийдвэрлүүлж байхыг Хөдөлмөр, нийгмийн хамгааллын сайдад үүрэг болголоо.

2016 оны аравдугаар сарын байдлаар 11072 гадаадын иргэн Монгол Улсад хөдөлмөр эрхэлж байгаа бөгөөд энэ нь өнгөрсөн оныхоос 33 хувиар буурсан үзүүлэлт юм байна. Хөдөлмөр эрхлэлтийг дэмжих санд 2015 онд 43 тэрбум төгрөг төвлөрч байсан бол 2016 онд 37.8 тэрбум төвлөрүүлэхээс энэ оны аравдугаар сарын байдлаар 12 тэрбум төгрөг төвлөрөөд байгаа юм байна.

ТОВЧ МЭДЭЭ

• Дипломат болон албан паспорт эзэмшигчдийг визийн шаардлагаас чөлөөлөх тухай Монгол Улсын Засгийн газар, Бүгд Найрамдах Литва Улсын Засгийн газар хоорондын хэлэлцээрийн төслийг дэмжив. Хэлэлцээрт гарын үсэг зурснаар дипломат болон албан паспорт эзэмшигч иргэд хоёр улсын нутаг дэвсгэрт 90 хүртэл хоногийн хугацаанд визгүй зорчих эрхтэй болох юм.

• Хөгжлийн бэрхшээлтэй иргэний эрхийг хангах орон тооны бус зөвлөлийн журмыг шинэчлэн баталлаа. Дүрмийн шинэчлэлийн гол зохицуулалт нь уг зөвлөл нь Монгол Улсын Ерөнхий сайдын дэргэд ажиллах юм.

• УИХ-ын гишүүн Ц.Гарамжав, Н.Оюундарь нарын санаачлан боловсруулсан Монгол Улсын иргэнд газар өмчлүүлэх тухай хуульд нэмэлт оруулах тухай хуулийн төслийг хэлэлцээд уг төсөл нь Монгол Улсын Үндсэн хууль болон бусад хэд хэдэн хуультай зөрчилдөж байгаа тул дэмжих боломжгүй гэж үзэв.

• УИХ-ын гишүүн С.Эрдэнийн санаачлан боловсруулсан Галт зэвсгийн тухай хуульд өөрчлөлт оруулах тухай, Жолоочийн даатгалын тухай хуульд өөрчлөлт оруулах тухай, Зөрчлийн тухай хуульд өөрчлөлт оруулах тухай, Монгол Улсын хилийн тухай хуульд өөрчлөлт оруулах тухай, Цагдаагийн албаны тухай хуулийг дагаж мөрдөх журмын тухай хуульд өөрчлөлт оруулах тухай хуулийн төслүүдийг хэлэлцэн хэд хэдэн саналыг хууль санаачлагчид уламжлахаар болов.

Чингэлтэй дүүргийн Засаг дарга Ж.Эрдэнэбат

ЧИНГЭЛТЭЙ, БАГАНУУР, НАЛАЙХ, СОНГИНОХАЙРХАН ДҮҮРГИЙН ЗАСАГ ДАРГА НАРЫГ БАТЛАМЖИЛЛАА

Нийслэлийн Засаг дарга бөгөөд Улаанбаатар хотын захирагч С.Батболд хуульд заасан эрхийнхээ хүрээнд захирамж гаргаж, нийслэлийн Багануур дүүргийн Засаг даргаар Цэндийн Сандаг-Очир, Чингэлтэй дүүргийн Засаг даргаар Жамсрангийн Эрдэнэбат, Налайх дүүргийн Засаг даргаар Чойжинсамбуугийн Раднаабазар, Сонгинохайрхан дүүргийн Засаг даргаар Жигжидсүрэнгийн Сандагсүрэн нарыг батламжиллаа.

Нийслэлийн засаг дарга бөгөөд Улаанбаатар хотын захирагч С. Батболд хэлэхдээ “Өнгөрсөн 10 дугаар сард явагдсан Дүүргийн Иргэдийн төлөөлөгчдийн сонгуулийн үр дүнгээр байгуулагдсан дүүргүүдийн иргэдийн төлөөлөгчдийн шинэ хурал анхдугаар хуралдаанаа хийж, Засаг даргаар томилогдохоор төлөөлөгчдийн олонхийн санал авсан нэр дэвшигчийнхээ мэдээллийг ирүүлсэн билээ. Хуулиараа дүүргийн Засаг даргын томилохдоо Нийслэлийн засаг дарга бөгөөд Улаанбаатар хотын захирагчтай зөвшилцдөг. Мөн Авилгатай тэмцэх газарт хөрөнгө орлогын урьдчилсан мэдүүлгээ өгч, хуулийнхан судалж, хариулт ирүүлдэг заалттай. Үүнийг НЗДТГ судалж үзээд, өнөөдөр эхний 4 дүүргийн Засаг даргын батламжинд гарын үсэг зурлаа. Шат шатны Засаг дарга нар бол “Монгол төрийн төлөөлөгч“ байдаг. Гол үүрэг нь хууль, тогтоомжийг тухайн нутаг дэвсгэртээ хэрэгжүүлэх явдал юм. Тиймээс өнөөдөр батламжаа авч байгаа Засаг дарга нар Монгол Улсын Засгийн газрын болон хотын даргын үйл ажиллагааны хөтөлбөрийг орон нутагтаа хэрэгжүүлэх ажлыг зохион байгуулах бүрэн чадвартай, хуульд заасан болзлыг бүрэн хангасан, иргэдийнхээ сонголтоо эрхээ авсан, мэргэшсэн албан хаагчид гэж бид үзэж байна. Тиймээс та бүхнийхээ ажилд амжилт хүсье. Үлдсэн 5 дүүргийн Засаг дарга нарын томилгоог энэ 7 хоногтоо багтаад хийхээр ажиллаж байна.” гэлээ.

Багануур дүүргийн Засаг дарга Ц.Сандаг-Очир “Багануур дүүргийн Засаг даргаар 2 дахь удаагаа ажиллахаар батламжаа авлаа.Өмнөх туршлагадаа тулгуурлан, ирэх 4 жилд дэвшүүлсэн мөрийн хөтөлбөрөө хэрэгжүүлэхийн төлөө ажиллана. Төсөв, санхүүгийн хүнд нөхцөл бий болох төлөвтэй байгаа учраас төрийн албыг цомхон чадварлаг болгож, ард иргэддээ ил тод , нээлттэй хүргэж ажиллах хэрэгцээ шаардлага бий. Тиймээс гадна, дотны хөрөнгө оруулалтыг татах, ажлын байрыг нэмэгдүүлэхэд анхаарч ажиллахаар төлөвлөж байна.” гэсэн юм.

Налайх дүүргийн Засаг дарга Ч.Раднаабазар “Итгэл хүлээж, дүүргийн Засаг даргаар томилогдсондоо баяртай байна. Бидний өмнө байгаль орчинд ээлтэй эко орчин бүрдүүлж, Налайхыг жишиг хот болгох олон асуудал тулгарч байна. Энэ бүгдийг ээлж дараатайгаар зохион байгуулж, ажлаа шуурхай эхлүүлэх бодолтой байна.

Багануур дүүргийн Засаг дарга Ц.Сандаг-Очир

Сонгинохайрхан дүүргийн Засаг дарга Ж.Сандагсүрэн

Налайх дүүргийн Засаг дарга Ч.Раднаабазар