Month: November 2016

Categories
мэдээ улс-төр

Мөнгөний бодлогын үндсэн чиглэлийг дэмжив

“Төрөөс мөнгөний бодлогын талаар 2017 онд баримтлах
Үндсэн чиглэл батлах тухай” Улсын Их Хурлын тогтоолын төслийг
хэлэлцэж дэмжлээ.

Хэлэлцэж буй асуудалтай холбогдуулж “Оюутлогой” компанийн мөнгөн
урсгалыг Монголбанкаар дамжуулж хийх хүсэлтийг УИХ-ын гишүүн Т.Аюурсайхан
гаргасан. Түүний энэхүү саналыг мөнгөний бодлогод тусгах боломжгүй байна гэж
Эдийн засгийн байнгын хорооны дарга Д.Тэрбишдагва хэлсэн юм.

Мөнгөний бодлоготой холбоотой асуудлаар УИХ-ын гишүүн
Т.Аюурсайханаас өөр асуулт асууж, хариулт авах гишүүн байсангүй. Иймд Эдийн
засгийн байнгын хорооноос гаргасан зармын зөрүүтэй саналаар санал хураалт
явуулаад эцсийн хэлэлцүүлэгт бэлтгүүлэхээр холбогдох байнгын хороонд
шилжүүлснээр үдээс өмнөх чуулган завсарлалаа.

Categories
мэдээ нийгэм

П.Цагаанд “Хубилай хаан” медаль гардуулна

Монгол Улсын шинжлэх ухааны академийн дээд шагнал “Хубилай хаан” алтан медалийг Ерөнхийлөгчийн Тамгын газрын дарга асан П.Цагаанд гардуулна.

Энэ арга хэмжээ маргааш буюу арваннэгдүгээр сарын 11-ний 11:11 минутад Туушин зочид буудлын “Соёмбо” танхимд болох аж. П.Цагааны шинжлэх ухаанд оруулсан хувь нэмрийг үнэлж олгож буй энэхүү шагналыг ШУА-ийн ерөнхийлөгч, Төрийн шагналт, Академич Дүгэрийн Рэгдэл гардуулах юм байна.

Categories
мэдээ нийгэм

Зам тээврийн ослоор амь насаа алдаж байгаа хүүхдийн тоо гамшгийн хэмжээнд хүрчээ

Монголын нийгэмд зам тээврийн ослоор өдөр бүр хүний алтан амь эрсдэж дайны байдалтай байхад хэн ч тоохгүй байна. Сүүлийн таван жилд 5600 хүүхэд осолд өртөж 222 хүүхэд амь насаа алджээ. Хүн бүр энэ мэдээг хэвийн юм шиг хүлээн авдаг болжээ. Энэ талаар Замын цагдаагийн алба, Албан журмын даатгагчдын холбооноос мэдээлэл хийлээ.

Замын цагдаагийн албаны Урьдчилан сэргийлэх хэлтсийн дарга Э.Бөхбат “Сүүлийн таван жилийн байдлаар улсын хэмжээнд хүүхэд өртсөн зам тээврийн осолд 5611 хүүхэд өртсөнөөс 222 хүүхдийн амь нас хохирч, 5389 хүүхэд хүнд, хөнгөн гэмтсэн гэх албан ёсны тоо судалгаа бий. Эдгээрээс орон нутгийн замд зам тээврийн ослын улмаас 178 хүүхэд амь насаа алдсан нь улсын хэмжээнд амь насаа алдсан хүүхдийн 80 хувийг эзэлж байгаа юм. Насны хувьд 0-7 насныхан зонхилж байна. Дээрх авто ослуудын дийлэнхи шалтгаан нь Тээврийн хэрэгслийн аюулгүй байдал, ашиглалтын журам зөрчсөнөөс үүдэлтэй байдаг. Орон нутагт Сэлэнгэ, Архангай, Өвөрхангай, Ховд, Төв аймаг болон нийслэлийн Баянзүрх дүүрэгт хамгийн их хүүхэд амь насаа алсдан байдаг. Иймд хүүхдийг зам тээврийн ослоос хамгаалах чиглэлээр зөвхөн цагдаагийн байгууллага бус эцэг эх, багш сурган хүмүүжүүлэгчид маш чухал үүрэгтэй юм” гэлээ.

Албан журмын даатгагчдын холбооны гүйцэтгэх захирал Д.Цэвээнжав “Дээрх тоо, судалгаагаар манай улс зам тээврийн ослоор амь насаа алдсан хүүхдийн тоогоор Ази тивийн хэмжээнд эхний тавдугаарт жагсаж байна. Энэ тоо бол гамшгийн хэмжээнд хүрсэн аюул болоод байна. Тиймээс энэ асуудалд төр засгийн анхаарлыг хандуулах цаг хэдийн болсон. Манай холбоо байгуулагдаад таван жил болж байгаа ба хуулийн өмнө хүлээсэн үүргийнхээ дагуу зам тээврийн ослоос сэргийлэх сургалт сурталчилгаа явуулж байна. Нэн түрүүнд хүүхдийг осол гэмтлээс хамгаалахад тээврийн хэрэгслийн бүрэн бүтэн байдал болон жолоочийн хариуцлага хэрэгтэй. Иймд манай байгууллагаас жолооч нарыг жолоочийн хариуцлагын даатгалд хамруулж, гэнэтийн осол аваараас үүдсэн эд хөрөнгө, эрүүл мэндийн хохирлыг шуурхай барагдуулах чиглэлд ажилладаг. Үүний үр дүнд өнөөдөр жолооч нарын хариуцлага дээшилсэн хэдий ч цаашдын гол зорилго бол бүх жолооч нарыг хариуцлагыг сайжруулах юм. Өнөөдрийн байдлаар 500 мянган жолооч жолоочийн хариуцлагын даатгалд хамрагдсанаас 15 мянган жолоочид ослын хохирол барагдуулах 8 тэрбум төгрөг олгоод байна. Замын хөдөлгөөнд жолооч бүхэн хариуцлагатай оролцвол осол гэмтэлд өртөж буй хүүхдийн тоог бууруулах боломж бидэнд бий” хэмээсэн юм.

Categories
мэдээ нийгэм

Их мастер С.Цогбадрах дээд амжилтыг шинэчиллээ

АНУ-ын Лас Вегас хотноо “Memoriad-2016” World Mental Olympics буюу дэлхийн оюуны олимп болж байгаа билээ. Дөрвөн жилд нэг удаа болдог энэхүү олимпийн наадам гурван өдөр үргэлжлэх бөгөөд нийт 27 орны 167 тамирчин ой тогтоолт, цээж бодолт, хурдан уншлага гэсэн 13 төрөлд өрсөлдөж байгаа юм. “Memoriad-2016” оюуны олимпт эх орноо төлөөлөн Монголын Оюун ухааны академийн 14 тамирчин (7-33 нас), багш дасгалжуулагч нарын хамт оролцож байгаа юм.

Тэднээс өчигдөр болсон “Flash Numbers” буюу харааны ой тогтоолтыг шалгасан эхний төрөлд Их мастер С.Цогбадрах олимпийн дээд амжилтыг шинэчилж алтын медалийн болзол хангасан бол ОУ-ын их мастер Э.Пүрэвжав хүрэл медалийн болзол хангалаа.

Энэ төрөлд 2012 онд манай тамирчин Их Мастер С.Цогбадрах 300 цифр тогтоон алдаагүй санаж алтан медаль хүртэн олимпийн дээд амжилтыг эзэмшиж байсан бол өчигдөр 486 цифр болгон дээд амжилтаа шинэчлэн алтан медаль хүртлээ. Ингэснээр Их Мастер С.Цогбадрах оюуны олимпийн хос алтан медальтай монголын анхны тамирчин боллоо.

Хоёр дахь өдрийн байдлаар манай тамирчид 2 алт, 3 мөнгө, 3 хүрэл медаль буюу нийт 8 медалийн болзол хангажээ.

Categories
мэдээ улс-төр

С.Бямбацогт: Оффшор бүсэд мөнгө байршуулсан нь илэрвэл улсын орлого болгоно

Засгийн газраас санаачлан төрийн болон улстөрийн албан хаагчид нийтийн албанд ажиллахдаа, оффшор бүсэд данс эзэмших тухай хуулийн төслийг УИХ-аар хэлэлцүүлэхээр өргөн бариад байгаа. Энэ хуулийн талаар Хууль зүй, дотоод хэргийн сайд С.Бямбацогтын байр суурийг сонирхлоо.

Тэрээр “Дэлхий нийт оффшор дансны эсрэг тэмцэж байгаа энэ үед хууль бусаар хөрөнгөжих, авлига авах, үүнийгээ оффшор дансанд нуух зэргийг хуульчлан хориглох ёстой гэж Засгийн газрын гишүүд үзэж байгаа. УИХ-ын гишүүд ч энэ агуулгыг, энэ төслийг дэмжинэ гэж найдаж байгаа. Хуулийн төслийн хувьд төрийн албан хаагчид, улстөрийн болон төрийн өндөр албан тушаалтнууд оффшор бүсэд данс эзэмшихийг хориглох, хэрвээ энэ хуулийг зөрчиж мөнгөө байршуулсан бол хураан авч улсын орлого болгох зохицуулалтыг тусгаад байгаа” гэлээ.

Categories
мэдээ улс-төр

Л.Болд: Орон нутгийн сонгуулиар амьд царцаа биш цаасан царцаа дүнг зассан

Л.Болд гишүүн чуулганы хуралдаан дээр саяхан болж өнгөрсөн Орон нутгийн сонгуулийн талаар өөрийн байр сууриа илэрхийлсэн юм. Тэрээр:

Бид сонгуульд нэг хүнээр ч илүү санал авсан бол хүлээн зөвшөөрөх соёлыг нэвтрүүлэх хэрэгтэй байна. Гэтэл орон нутгийн сонгуульд энэ хэрэгжсэнгүй. Өмнө нь амьд царцаа явсан бол сая цаасан царцаа явж дүнг нь зассан байна. Үүнийг ойлгомжтой болгох хэрэгтэй. Үүний горыг бид хангалттай амссан. Таван хүний амь эрсдэж МАН байраа шатаалгасан. Өнөөдөр болтол үүний учрыг олоогүй, тайлагдаагүй л байгаа. Энэ бол Монголын төрийг цэвэр болгох та бидний эрхэм зорилго шүү. Ардчилалд хүн бүр янз бүрээр ханддаг байх. Гэхдээ ард түмэндээ нэг байх ёстой шүү. Ард түмэн бүхний дээд бүрэн итгэлтэй байх ёстой гэдгийг л хэлмээр байна гэв.

Энэ тухай дэлгэрэнгүй сурвалжлагыг “Өдрийн сонин”-ы маргаашийн дугаараас уншаарай.

Categories
мэдээ эдийн-засаг

Долларын ханш тэнгэрт хадаж, 2495 төгрөгт хүрлээ

Долларын ханш 2495 төгрөгт хүрлээ зурган илэрцүүдМонголбанкны өнөөдрийн зарласан ханшаар нэг ам.доллар 2428 төгрөг 08 мөнгөтэй тэнцэж байгаа бол “Найман шарга” валют арилжааны төвд нэг ам.долларыг 2476 төгрөгөөр худалдан авч 2485 төгрөгөөр арилжиж байна. Харин арилжааны банкуудад ам.долларыг 2420-2475 төгрөгөөр худалдан авч, 2446-2485 төгрөгөөр арилжиж байна. Мөн “Номин карт” ББСБ 2475 төгрөгөөр авч, 2495 төгрөгөөр арилжиж байгаа аж.

Одоогоос нэг сарын өмнө буюу аравдугаар сард нэг ам.доллар 2260 төгрөгтэй тэнцэж байсан бол өнөөдөр даруй 200 төгрөгөөр чангарлаа.

Categories
мэдээ соёл-урлаг

Н.Жанцанноров, Т.Галсан, Л.Дашням нар “Номын жор”-оо хуваалцана

“Номын жор” клуб, “Book cafе Mongolia”-гийн залуусын хамтран зохион байгуулдаг “Номын жор” өдөрлөг энэ сарын 27-нд болно. Тус өдөрлөгт төрийн хошой шагналт, ардын жүжигчин, хөгжмийн зохиолч Н.Жанцанноров, ардын уран зохиолч, соёлын гавьяат зүтгэлтэн, яруу найрагч Т.Галсан, соёлын гавьяат зүтгэлтэн, доктор, профессор Л.Дашням нар оролцон лекц унших юм байна. “Эдгээр гурван эрхэм нь утга зохиол, урлаг соёл, шинжлэх ухаан гэсэн гурван салбарын ноён оргил гэж хэлж болохоор хүмүүс. Тиймээс залуучуудынхаа энэ гурван салбарын тухай ойлголтыг нэмэгдүүлэх зорилготой” хэмээн зохион байгуулагчид ярилаа. Энэхүү өдөрлөгт очсоноор азтай үзэгчээр шалгарч, гарын бэлэгний эзэн болно гэдгийг тэд бас онцоллоо.

Categories
мэдээ улс-төр

Т.Аюурсайхан: Төрийн өмчийг хувьчлахдаа ШӨХТГ-аас санал дүгнэлт авах шаардлагатай

УИХ-ын чуулган эхэллээ. Өнөөдрийн хуралдаанаар Монгол Улсын нэгдсэн төсвийн 2017 оны төсвийн хүрээний мэдэгдэл, 2018-2019 оны төсвийн төсөөллийн тухай хуулийн төсөл /Засгийн газар 2016.09.30-ны өдөр өргөн мэдүүлсэн, анхны хэлэлцүүлгийг хэлэлцэх юм.

“Төрийн өмчийг 2015-2016 онд хувьчлах, өөрчлөн байгуулах үндсэн чиглэл батлах тухай Монгол Улсын 2015 оны 70 дугаар тогтоолын хавсралтад нэмэлт, өөрчлөлт оруулж, үргэлжлүүлэн хэрэгжүүлэх тухай” Улсын Их Хурлын тогтоолын төслүүд /Монгол Улсын 2017 оны төсвийн тухай хуулийн хоёр дахь хэлэлцүүлэгтэй холбогдсон, эцсийн хэлэлцүүлэг/-ийг хэлэлцэж байна. Энэ үеэр УИХ-ын гишүүд асуулт асууж Төсвийн байнгын хорооны дарга Ч.Хүрэлбаатар хариулт өглөө.

УИХ-ын гишүүн: Т.Аюурсайхан: Эдийн засагт хохирол учруулж, ард түмний төрөө дээдлэх үзэлд нь сэв суулгасан. Төрийн болон орон нутгийн хуулийн 44.1-р зүйлийн заалт байна. Өрсөлдөөний тухай заалтууд байна. Төрийн өмчит хөрөнгийг хувьчлах шийдвэр гаргахдаа Шударга өрсөлдөөн хэрэглэгчийн төлөө газраас санал дүгнэлтийг нь Засгийн газар авсан байх шаардлагатай. Энэ бол төрийн өмчлөлтэй маш их холбоотой. Гэрээний заалтад юу тусгах вэ, зах зээлд ямар нөлөө үзүүлэх вэ гэдэгтэй хамаатай хоёр чухал заалт байгаа юм. Эдгээр заалтуудыг зөрчих явдал үүсээд байна.

Байнгын хорооны дарга Ч.Хүрэлбаатар: Саяхан Төсвийн байнгын хорооноос хувийн хэвшлүүдийн санхүүгийн байдлыг шалгасан. Зээлийн хэмжээ нь өсөөд 3.5 их наядаас 5 наяд хүрсэн. 187 тэрбумын ашигтай ажиллаж байсан төрийн өмчийн хороонууд 11 тэрбум төгрөгний алдагдалтай ажиллаж байгаа дүн гарсан. Орон тоо нь 5000-р нэмэгдсэн. Шинээр захирлаар очиж байгаа хүн дөрвөн жил феодал суух гээд оролдоод байгаа юм. 20-г хувьчилна гэхэд нэгийг хагас дутуу хийх жишээтэй. Харилцаа холбооны технологи өндөр нэвтэрч чадах салбар бол шуудангийн салбар. Засгийн газар ажлаа сайн зохион байгуулж ажиллах хэрэгтэй байгаа юм.

О.ӨНӨР

Categories
гадаад мэдээ

АНУ-ын Ерөнхийлөгчийн сонгуульд Д.Трамп ялалт байгууллаа

Д.Трамп гэр бүлийн хамт

АНУ-д өнгөрсөн мягмар гарагт болж өндөрлөсөн Ерөнхийлөгчийн сонгуулийн эцсийн дүнгээр Бүгд найрамдах намаас нэр дэвшин өрсөлдсөн Д.Трамп ялалт байгуулснаар тус улсын 45 дахь Ерөнхийлөгчөөр ажиллах нь тодорхой болов. Тэрбээр ялалт байгуулахад шаардлагатай 270 саналаас илүү буюу 276 санал авснаар тус улсыг ирэх дөрвөн жил удирдахаар болж байна. Харин гол өрсөлдөгч Ардчилсан намаас нэр дэвшин өрсөлдсөн АНУ-ын Төрийн нарийн бичгийн дарга асан Х.Клинтон 218 санал авсан юм. Тэрбээр Д.Трамптай утсаар холбогдон ялалт байгуулсанд нь баяр хүргэжээ. Д.Трампын мөрийн хөтөлбөртөө тусгасан гол асуудлуудын нэг нь цагаачлалын бодлогыг шинэчилж, цагаач иргэдийн тоог хумих юм. Мөн терроризмтой тэмцэх, тэр дундаа “Лалын улс”, “Аль Кайда” зэрэг алан хядах бүлэглэлүүдийн эсрэг хатуу тэмцэнэ гэдгээ мэдэгдээд байгаа. Бүгд найрамдах нам татварыг багасгана гэсэн амлалт өгдөг ч тус намаас нэр дэвшигч Трамп уг бодлогыг сөрж, татварыг нэмэгдүүлнэ гэж мэдэгдсэн юм.

Д.ТРАМП ГЭГЧ ХЭН БЭ?

Тэрбээр 1946 оны долдугаар сарын 14-нд АНУ-ын Нью-Йорк хотноо мэндэлжээ. Үл хөдлөх хөрөнгийн магнат, дэлхийн 324 тэрбумтан, АНУ-ын 133 дахь тэрбумтан. Түүний нийт хөрөнгө есөн тэрбум ам.доллар аж. Телевизийн реалити шоуны од тэрбээр 2000 онд АНУ-ын Ерөнхийлөгчийн сонгуульд нэр дэвшиж байсан удаатай. Д.Трампын эцгийн тал герман гаралтай хүмүүс, харин ээж нь Шотланд гаралтай. Трампын амьдралд хамгийн хүчтэй нөлөөлсөн хүн нь эцэг Фред. Дональд Трампыг зан аашийн хувьд аавыгаа дуурайсан гэдэг. Эцэг нь сахилгагүй, хэл ам таталдаг хүүгээ 13 настайд нь Нью-Йоркийн цэргийн академид оруулж байж. Чухам энэ үеэс Дональд өрсөлдөөн гэж юу болох, хүссэндээ хүрэхийн тулд бага зэрэг догшин авиртай байх нь илүүдэхгүй гэдгийг ойлгосон юм. Хар багын спортод дуртай тэрбээр бейсбол, сагсан бөмбөг, хөлбөмбөгөөр хичээллэдэг байжээ. Трампын хөлбөмбөгийн багийн дасгалжуулагч нь Теодор Добиас бөгөөд хожмоо түүнийг “Тэр тамирчин болох байсан юм” гэж дурссан удаатай. Д.Трамп 1964 онд Фордхэмийн их сургуульд элсэн оржээ. Хоёр жилийн дараа Пенсилвань мужийн Санхүү худалдааны их сургуульд шилжин суралцсан байна. Трамп 1968 онд Уортоны их сургуулийг эдийн засагч мэргэжлээр бакалавр зэрэгтэй дүүргэжээ. Оюутан Трамп онц сурлагатан биш ч архи, тамхи хэрэглэдэггүй, амбицтай залуу байж. Хожим нэлээд баяжсан хойноо л хүүхэмсэг зангаараа алдаршсан гэдэг. Эцгийнхээ эрхэлдэг үл хөдлөх хөрөнгийн наймааг сонирхож, хэзээ нэгэн цагт эцгээсээ илүү том гарын бизнесмэн болно гэж мөрөөддөг байжээ. Оюутан байх үеэс нь эцэг нь үл хөдлөх хөрөнгийн бизнестээ туслуулах болжээ. Охайо мужийн Цинцинати хотын дампуурсан компанийн 1200 айлын орон сууцны цогцолборыг худалдаж авсан Трамп, зургаан саяар авсан цогцолбороо улсаар засуулж, 12 сая ам.доллараар эргүүлэн зарж байжээ. Энэ амжилттай наймаа нь урам хайрласан талаар хожмоо дурссан байдаг. Тэрбээр анхны сая ам.доллараа олсон даруйдаа Манхеттанд амьдрах болжээ. Даруухан орон сууцанд амьдран Нью-Йорк хэмээх мөнгөний уурхайг судлах болж. 28 насандаа Манхэттений баруун хэсэгт бизнес төв барьжээ. Мөн “Commodore” хэмээх тансаг зэрэглэлийн зочид буудлыг завсарлах тендерт ялав. “Коммодор” зочид буудлын шинэ сүлжээ болох Гранд Хаяатыг дампуурлаас аварсан талаар нь хэвлэлээр шуугьсанаас хойш олны хараанд орж, Нью-Йорк хотын барилгын салбарт нөлөөгөө тогтоож эхэлжээ. Өөрийн нэрээр нэрлэсэн цамхаг нь түүнийг барилгын магнат болгосон гэдэг. Трамп цамхагт Саудын Арабын хаан, Софи Лорен зэрэг алдартнууд байртай болсон нь энэхүү төсөлд маш том сурталчилгаа болсон байдаг. Энэ үеэс хойш Д.Трампын барьсан байшинд амьдрах нь нэр төрийн баталгаа гэсэн ойлголт хэвшиж эхэлсэн юм.

Д.ТРАМПЫН ГЭР БҮЛ

Түүний эхнэр Меланья Трамп өдгөө 46 настай. Словени гаралтай. Загварын шоу бизнест 16 настайдаа хөл тавьсан гэдэг. Тэд 2005 онд албан ёсоор гэрлэлтээ батлуулжээ. Словенийн их сургуулийг загвар зохион бүтээгч мэргэжлээр дүүргэсэн тэрээр 1996 оноос хойш Нью-Йорк хотод амьдарч байна. Тэрээр загвар өмсөгчийн хувиар зар сурталчилгааны топ компаниудад ажиллаж байсан нэгэн. Мөн “Vogue”, “Harper s Bazaar”, “GQ”, “In Style” зэрэг алдарт сэтгүүлийн нүүрийг чимж байсан тэрээр буяны үйлстэн гэдгээрээ алдартай. 2005 онд Улаан Загалмайн нийгэмлэгийн Америк дахь салбарын сайн дурын элч болж байв. Харин түүнээс таван жилийн дараа “QVC” брэнд бүхий үнэт эдлэлийн хувийн цуглуулгыг бүтээжээ. Меланья Трамп эр нөхрийнхөө сонгуулийн өмнөх кампанит ажилд оролцсон нь бас дуулиангүй өнгөрсөнгүй. Охайо муж улсын Кливлендэд өнгөрсөн долдугаар сард болсон Бүгд найрамдах намын их хурлын үеэр үг хэлж байжээ. Тэрбээр энэ үеэр АНУ-ын тэргүүн хатагтай Мишель Обамаг 2008 онд болсон Ардчилсан намын их хурал дээр үг хэлэхдээ бусдын хэлсэн үгийг ашигласан гэж буруутгасан удаатай. Д.Трамп ч этгээд ааш үйлдлээрээ ч алдартай нэгэн. Гурвантаа гэрлэж, таван хүүхэд, найман ачийн өвөө болоод байна. Анхны эхнэр нь Ивана Зельничкова. Тэд 1977 онд гэрлэж байжээ. Чехословакийн цаначин, хожмоо фото модель, амжилттай бизнес эмэгтэй болсон тэрээр Дональд, Иванка, Эрика гэсэн гурван хүүхэд төрүүлж өгчээ. Гэвч 1993 онд тэд салцгаасан байна. Хоёр дахь эхнэрээрээ Д.Трамп жүжигчин, продюсер Марла Мейплзийг сонгожээ. Гэрлээд зургаан жил болсон бөгөөд 1999 онд салжээ. Тэрээр энэ тухай ярихдаа ажлаас нь үүдсэн элдэв өрсөлдөөнийг эхнэр нь давж чадаагүй гэсэн байдаг. Тэдний дундаас Тиффани Ариана охин нь мэндэлжээ. Харин 2005 онд Д.Трамп өөрөөсөө 24 дүү Меланье Кнаус бүсгүйтэй гэрлэсэн аж. Тэдний дундаас хүү Бэррон Уильям мэндэлсэн юм.

Дашрамд дурдахад, өнгөрсөн мягмар гарагт болж өндөрлөсөн сонгуулийн үеэр том хүүхдүүд нь голлох зөвлөхөөр нь ажиллаж байж. Трампын ууган хүүг мөн Дональд гэнэ. Түүнийг 12 настай байхад нь эцэг, эх нь хоёр тийш болсон гэдэг. Өөрөөр мөн түүнийг “Бага Дональд” гэж дууддаг бөгөөд “Trump Organisation” байгууллагад гүйцэтгэх дэд ерөнхийлөгчийн ажилтай. Тэрбээр загвар зохион бүтээгч Ванесса Хейдонтай гэрлэсэн бөгөөд таван хүүхэдтэй. Д.Трамп ярихдаа “Карьерт хүрэхэд олон арга байдаг. Гэвч эдгээрийн хамгийн гол нь хэрэгтэй гэр бүлд төрөх” гэсэн удаатай. Анхны гэрлэлтээс нь мэндэлсэн хүү Эрик Трамп нь олон жил сүүдэрт байжээ. Тэрбээр Жоржтауны их сургуулийг дүүргэсний дараа эцгийнхээ компанид ажиллах болсон юм. Мөн ууган ахынхаа адил гүйцэтгэх дэд ерөнхийлөгчийн алба хашдаг. Эрик Трамп 2014 онд хуучин найз, телевизийн продюсер Лара Юнаскатай гэрлэжээ. Харин Д.Трампын отгон охин Тиффани Ариана нь хоёр дахь гэрлэлтээс нь мэндэлсэн юм. Эцэг, эх нь охиныг таван настай байхад нь хоёр тийш болжээ. Тэрээр бага нас, өсвөр насаа ээж дээрээ өнгөрүүлсэн аж. Тиффани нь эдүгээ интернэтийн од нэгэн. Инстаграмд түүнийг дагалдагчдын тоо 170 мянгад хүрчээ. 2016 онд Пенсильванийн их сургуулийг дүүргэжээ. Харин Д.Трампын гурав дахь эхнэрээс мэндэлсэн хүү Бэррон нь ах, эгчээ бодвол эцгээ илүү өвчсөн гэх. Хүүгийнхээ талаар Меланья Трамп ярихдаа “Бэррон ямар нэг зүйлийг барьж угсрах дуртай. Дараа нь буулгаж, эргээд шинээр барьдаг. Зарим үед би түүнийг “бяцхан Дональд” гэж нэрлэдэг гэжээ. Ирээдүйн өв залгамжлагчийн гол хувцас нь костюм. Манхэттэний төвд байрлах тавдугаар өргөн чөлөөнд байрлах “Трамп цамхаг” -т эцэг, эхийнх нь пентхаусын нэг давхар нь бүхэлдээ түүний мэдлийнх. Мөн тус газарт сонгуулийн штаб болох “Trump Organisa­tion” хэмээх гэр бүлийнх нь төв байр байрлаж байжээ.

Тэрбумтан нэгэн удаа “Би эцгээсээ баян. Гэхдээ би юмаа тэгээс эхлүүлээгүй. Бизнесээ эхлүүлэхийн өмнө надад сайн суурь байсан. Үүний зэрэгцээ эцэг маань миний хувьд бизнесмэн хүний томоохон жишээ байлаа. Би түүний хажууд хүү нь төдийгүй, бизнесмэн болж өссөн. Гэвч манай гэр бүлийн гишүүд хэзээ ч өөр хоорондоо өрсөлдөж байгаагүй. Бид хэзээ ч ийм байдалд хүрэхгүй гэж бодож байна” гэж онцолж байв.

Д.ЦЭРЭНДОЛГОР