Month: November 2016

Хан-Уул дүүргийн 115-р сургуулийн сурагчид өнөөдөр 08:00, 13:00 цагт хичээл хаялт хийхээр болсон гэсэн мэдээллийн дагуу бид тус сургууль дээр очсон юм. Биднийг очиход ямар нэгэн хичээл хаялт, эцэг эхчүүдийн жагсаал, цуглаан болоогүй байв. Энэ талаар 115 дугаар сургуулийн Бага ангийн сургалтын менежер Н.Оюунчимэгээс тодрууллаа.

Тэрээр “Манай сургууль гурван ээлжээр хичээллээд хоёр жил болж байна. Тэр үеэс эхлээд эцэг, эхчүүдийн шүүмжлэлтэй тулгарсан. Үүнтэй холбоотойгоор бид холбогдох яамны удирдлагуудад албан бичиг хүргүүлж байсан. Харин энэ хичээлийн жил эхлэхээс өмнө яам хариу ирүүлсэн. Салбар яамнаас эхний улиралдаа гурван ээлжээр хичээллэж бай. Дараа улирлаас “Монгол тэмүүлэл” сургуулийг нүүлгэн шилжүүлнэ гэсэн мэдэгдэл өгсөн. Энэ дагуу бид хоёрдугаар улирлаас эхлээд хоёр ээлжээр хичээллэх тухай эцэг эхчүүдэд тайлбар өгсөн. Гэтэл хоёрдугаар улирал эхлэх болсон чинь Дүүргийн боловсролын хэлтсээр дамжуулаад хоёр ээлжинд орох боломжгүй. Энэ онд дээрх сургуулийг нүүлгэн шилжүүлэх боломж байхгүй гэж хэлсэн. Үүнээс шалтгаалж эцэг, эхчүүдээс гомдол тасрахгүй байна. Одоогийн байдлаар бид гурван ээлжээр хичээллэж байгаа ч гэсэн сургалтын үйл ажиллагаа тасалдахгүй хэвийн явагдаж байна.” гэлээ.

Мөн үндсэн сургуулийн сурагчдад анги танхим нь хүрэлцдэггүйгээс гурван ээлжээр хичээллэж сүүлийн ээлжийн сурагчид 19:50 цагт хичээл нь тардаг байна. Үүнээс болж хүүхдүүд дээрэмдүүлэх, хичээллэх эрч хүч сулрах гээд олон сөрөг үр дагаврууд гарч байгааг хэлж байлаа.

115-р сургуульд байрлах Боловсрол соёл шинжлэх ухаан спортын яамны харьяа “Монгол тэмүүлэл” сургууль нь байгуулагдаад 5 жил болж байгаа аж. Харин байгуулагдсан цагаасаа хойш 115-р сургуулийн 3 дугаар давхарт байрлан үйл ажиллагаагаа явуулж байгаа юм. Үүнээс болоод 115-р сургуулийн бага ангийн сурагчдын хичээлийн цагийн хуваарьт өөрчлөлт орж, үүнд эцэг эхчүүд бухимдаад байгаа юм байна. Жишээлбэл бага ангийн сурагч өдөр 15:00 цагаас эхлээд орой 19:00 цаг хүртэл сурдаг, анги кабинет жижигхэн нэг хүүхдэд оногдох мкв зэрэг асуудлууд ар араасаа ундарсаар байгаа ажээ.

Э.МӨНХТҮВШИН

Өнгөрсөн зургадугаар сарын 15-ны өдөр Малайзын Холбооны Улсад монгол эмэгтэй халдлагад өртсөн ноцтой хэрэг гарсан. Монгол улсын иргэн Н.Номин-Эрдэнийг машинд сууж байхад нь буудсан байдаг. Гэмт этгээдүүд Малайзын иргэн, бизнесменийг онилон буудсан боловч хажууд нь сууж байсан монгол эмэгтэй Н.Номин-Эрдэнэ суманд нь өртсөн хэмээн тус улсын цагдаагийн байгууллагаас мэдээллэж байсан билээ.

Улмаар, түүний биед байгаа хоёр ширхэг сумыг хагалгаа хийж авсан хэдий ч Н.Номин-Эрдэнийн биеийн байдал тааруу Малайзын эмнэлэгт эмчилгээ хийлгэж байжээ. Түүнтэй хамт машинд байсан гэх тус улсын бизнесмен “Монгол эмэгтэйтэй танилцаад удаагүй байгаа, Түүний талаар мэдэхгүй” хэмээн мэдүүлж байжээ. Уг хэргийн талаар Гадаад харилцааны яамны Консулын газраас тодруулахад “Малайзад 2015 оны зургадугаар сарын 15-ны өдөр буудуулсан иргэн Н-д холбогдох шүүх хурал өнгөрсөн оны арванхоёрдугаар сарын 10-ны өдөр болсон. Манай иргэн тус шүүх хуралд цорын ганц гэрч, хохирогчоор оролцсон. Иргэн Н ял шийтгэл, эдлээгүй. Эх орондоо ирсэн” хэмээв.

Өнөөдөр 11:00 цагийн үед Баянзүрх дүүргийн IV хороо Сэлэнгэ зочид буудал орчимд замын хөдөлгөөнд оролцож байсан Toyota “Mark II” маркийн автомашин шатжээ.

Галын тухай дуудлага Нийслэлийн онцгой байдлын албаны шуурхайн удирдлагын төвд 11:08 цагийн үед ирсэн бөгөөд гал унтраах анги очиход замын хөдөлгөөнд оролцож байсан жолооч нар хор цацан галыг унтраасан байжээ.

Тус автомашинд жолоочоос гадна нэг зорчигч байсан бөгөөд азаар бэртэж, гэмтээгүй аж.

Гал гарсан шалтгаан одоогоор тогтоогоогүй байгаа юм байна.

Монголчуудын түгээмэл хэрэглэдэг “Биг ланч” бэлэн гоймонтой холбоотой гарсан зөрчлийн талаар НМХГ-аас өнөөдөр мэдээлэл өглөө. Үйлдвэрлэгдсэн хугацаа нь дууссан ч дээр нь хуурамч хугацаа бичиж бэлэн гоймонг зах зээлд гаргасан асуудлаар холбогдох мэргэжилтэн нь ийм хариулт өгөв.

НМХГ-ын Эрүүл ахуй, халдвар хамгааллын улсын байцаагч Ц.Идэрбат “ОХУ-д үйлдвэрлэгдсэн “Биг ланч” нэртэй, аягатай бэлэн гоймонгоос хамгийн сүүлд зөрчил илэрсэн. Энэ гоймонгийн хадгалах хугацааг будаг шингэлэгч бодисоор хусаж арилгаад, дээр нь өөр стикер нааж, савны ёроол хэсэгт хуурамч он сар тавьж худалдан борлуулж байсан зөрчлийг Мэргэжлийн хяналтын байгууллагаас илрүүлсэн.

Тухайн зөрчилтэй холбогдуулан зөрчил гаргасан ААН-д 5 сая 760 мянган төгрөгийн торгуулийн арга хэмжээ тооцсон. Мөн Аж Үйлдвэрийн сайдын тушаалаар батлагдсан татан авалтын журмын дагуу 584 ширхэг гоймонг зах зээлээс татаж, нийт агуулахад байсан 2,292 ширхэг гоймонг хурааж, улсын байцаагчийн актаар устгах комисст шилжүүлэн өгсөн байгаа. Тухайн гоймонг идсэн хүний биед ямар нэгэн сөрөг нөлөө үзүүлсэн тохиолдол бүртгэгдээгүй байна.

Энэхүү гоймонг “Бимэкс” компани Монголд оруулж ирдэг. Үйлдвэрийн нэг цувралын дугаар дээр ийм зөрчил илэрсэн бөгөөд бусад өдөр үйлдвэрлэгдсэн, зөрчилгүй байгаа ижил нэрийн гоймонгууд зах зээл дээр борлуулагдсан хэвээр байгаа” гэв.

Төв аймгийн Баянцагаан сумын төвд Монгол Улсын гавьяат жүжигчин, ерөөлч, магтаалч, Д.Жанцанчойн нэрэмжит “Соёлын төв”-ийн барилгын нээлт боллоо.

Соёлын төвийн нээлтэд УИХ-ын гишүүн Б.Саранчимэг, Төв аймгийн Засаг даргын Тамгын газрын Нийгмийн хөгжлийн хэлтсийн дарга Д.Мөнхцэцэг, сумын ИТХ-ын дарга Ц.Лувсандагва, Сумын Засаг дарга Ж.Жаргалбаяр болон албаны бусад хүмүүс, иргэдийн төлөөлөл оролцов.

Одоогоос гурван жилийн өмнө 60 гаруй жилийн түүхтэй тус сумын Соёлын төв шатсан байна. Үүнээс үүдээд сумын иргэд чөлөөт цагаа зөв боловсон өнгөрүүлэх, сумын хэмжээнд урлагийн тоглолт зохион байгуулах боломжгүй болсон. Иймд 2014 онд УИХ-ын дарга М.Энхболдыг Баянцагаан сумын иргэдтэй уулзалт хийх үеэр шинэ Соёлын төвийг барьж байгуулах хүсэлт гаргасан байна. Тэрээр иргэдийн хүсэлтийг хүлээн авч хөрөнгө оруулалтын асуудлыг шийдвэрлэн бүтээн байгуулалтын ажлыг эхлүүлснээр ийнхүү Баянцагаанчууд шинэ Соёлын төвтэй боллоо.

Нээлтийн үеэр УИХ-ын гишүүн Б.Саранчимэг хэлэхдээ, “Аливаа аймгуудын хөгжлийн гол үзүүлэлт бол сумдын хөгжил байдаг. Энэ ч үүднээсээ сүүлийн жилүүдэд төр, засгаас ихээхэн анхаарал хандуулж, сум бүрт Соёлын төвийг байгуулах ажлыг идэвхтэй өрнүүлж байна. Үүний нэг илрэл нь Баянцагаан сумын шинэ Соёлын төвийн барилга юм” хэмээн дурьдлаа.

Баянцагаан сумын шинэ Соёлын төв канад технологиор баригдсан бөгөөд орчин үеийн тоног төхөөрөмжөөр тоноглогджээ.