Month: November 2016

Categories
их-уншсан туслах-ангилал

Солонгос дарга бөөтэй байсныхаа төлөө, монгол дарга бөөгүй байсныхаа төлөө балардаг гэнэ ээ

БНСУ-ын Ерөнхийлөгч Пак Гын Хэ хувьдаа бөөтэй байсныхаа төлөө огцрохдоо тулаад байна. Солонгосын ард түмэн бол тэрхүү нөхөр Чой Сүн Силь гэж эмэгтэйн мөнгө төгрөгтэй холбоотой асуудлыг нэг их тоохгүй байгаа юм байна. Харин Солонгосын төрийн ажил хэрэгт бөөгийн нөлөө орж, Ерөнхийлөгч нь мухар сүсгээр улс орныг удирдахыг оролдож байсных нь төлөө ард түмэн асар ихээр зэвүүцэж, асар ихээр эгдүүцэж байна. Ерөнхийлөгчийн хар багын найз, аав нь Солонгосын бөө нарын удирдагч байсан Чой Сүн Силийн хувийн компьютероос 200 гаруй албан бичгийн файл олдсоны ихэнх нь Пак Гын Хэгээс түүнд илгээсэн төрийн нууцад хамаарах бичиг баримтууд, хэлэх үгнүүд, зөрүүлээд Чойгоос түүн рүү явуулсан заавар зөвлөгөө, сэдэл санаа, ингэ тэг гэсэн шийдвэрүүд байсан нь солонгосчуудын уурыг дээд цэгт нь хүргэжээ. Өнөөдөр Ерөнхийлөгч Пак Гын Хэгийн нэр хүнд 14 хувиар унасан нь амиа хорлосон Ерөнхийлөгч Но Му Хёнгийнхоос хэд дахин илүү болжээ. Ерөнхийлөгч нь бөө удган, лам зайрангийн үгээр улсаа удирдаж залах гэвэл иргэний нийгэм төлөвшсөн улс орон ийм эмзэг, ийм мэдрэмтгий хүлээж авдгийг дэлхий ертөнц өнөөдөр харж байна.

Ингэхээс ч өөр аргагүйд хүрсэн бололтой. Өнөөдөр олон улсын шинжээчдийн бичиж байгаагаар бол Пак Гын Хэ эдгээр бөө удгануудынхаа нөлөө, тэднийхээ хэлсэн мэргэ төлгөнд итгэж Кэсоны аж үйлдвэрийн бүсийг хааж, эдийн засгийн хамтын ажиллагаанаас бүрэн татгалзсан байх магадлалтай гэнэ. Хоёр Солонгосын ойлголцлын хамгийн дээд шат бол энэхүү Кэсоны аж үйлдвэрийн бүс байсан юм. Умард Солонгосын нутагт ийм онцгой бүсийг БНСУ-ын зүгээс байгуулж, умардаасаа ажилчид авч ажиллуулж байсан нь бараг нэгдэж нийлэх мөрөөдлийнх нь эхлэл байсан гэж судлаачид үздэг юм билээ. Гэтэл Ерөнхийлөгч Пакад бөө найз нь “Ким Чен Ун эдгэшгүй өвчтэй болсон учир удахгүй болсон, хоёр жилийн дараа гэхэд хоёр Солонгос нэгдэх үйл явц эхэлнэ” хэмээн итгүүлснээр Кэсоны аж үйлдвэрийн бүсийг хаасан гэж үзжээ. Үнэхээр бөө нар Солонгосын Ерөнхийлөгчид ингэтлээ нөлөөлж байсан бол улс орноо мухар сүсгээр удирдаж байжээ гэдэгт нь итгэхээс өөр арга алга. Солонгосын ард түмний уур хилэн үүнд л багтраад байна. Өнөөдөр бөөтэй хамтран улс орноо удирдах гэсэн Ерөнхийлөгчөө эсэргүүцсэн жагсаал Солонгост хүрээгээ тэлж, жинхэнэ давалгаалж байна. Юунд хүрэхийг мэдэхгүй. Хэрэвзээ Пак хатагтай дан ганц авлигын хэргээр асуудал боссон бол эсэргүүцэгчдийн тоо ингэтлээ цаг минутаар өсөхгүй байсан байх. Иргэний нийгэм хэдийнэ төлөвшсөн Солонгосын ард түмэнд авлига, хээл хахуулийн гэмт хэргээс илүүтэй оюун санааны гэмт хэрэг аймшигтай хүндээр тусч байгааг дэлхий харж байна. Өнөөдрийн хүн төрөлхтөн шинжлэх ухаанжсан төр засагтай байхыг хүсч, тэмүүлж, итгэл найдвараа болгодог болгосныг эндээс харж болно.

Дэлхийн энэ хандлага тэгвэл өнөөдөр манайд ямар байна вэ. Улс орон удирдаж байгаа хүмүүс, улстөрчдийн хувьд бөө, ламгүй байгаанууд нь бараг баларлаа гэж дуулдах болсон. Улстөрч нэгэнд урагшгүй жаахан юм тохиолдвол л “Тэрийгээ тэгж аргалуулсангүйгээс боллоо, энийг ингэж бөөлүүлсэнгүйгээс боллоо, энэ удганы хэлснээр явсан бол Их хурлын гишүүн болчих байсан юм, тэр зайрангийн заавраар явсан бол төрийн сайд болчих байсан юм” гэж ярьдаг болжээ. Ингэтлээ цагаандаа гарчихаад байна. Их тэнгэрт байсан гурван айлаас сэжиг хүрмээр зүйлс олноороо дуулддаг байсан. Тэд бүгдээрээ л энэ улсад нэр дуулдсан бөө зайран, лам хар, мэргэч төлгөч, үзмэрч, хутагт хувилгаад, ирээдүйд иш үзүүлэгч… ер бүгдийг нь хамж аваачаад биесийнхээ эсрэг юм хийлгэж байна гэсэн яриа байсхийгээд л гардаг байсан нь гайхмаар юм биш. Тэр айлуудын өрхийн тэргүүнүүд дотор ном ёсоороо сургууль төгсөж, системтэй боловсрол эзэмшсэн хүн төгс байхгүй дээ. М.Энхсайхан, Н.Алтанхуяг нарыг эс тооцвол. Ийм л хүмүүс байсан болоод ч тэр юм уу, энэ улс орныг мухар сүсгийн хэмжээнд удирдах сургууль хийсэн байж магадгүй. Ер нь манай дарга нар, улстөрчид байсхийгээд л Түвд, Балба, Дарамсала… гээд энэ ертөнцийн хөгжлийн мухардмал газрууд руу явцгаадаг. Тэндээсээ баахан хутагт хувилгаад залж, ном уншлага болж, элдэв хараал жатгын эсрэг яриа хөөрөө болдог. Салтаагаараа баахан шороо цацаж, сор залж, бөө дуудаж, уул ус руугаа архи дарс цацаж ирсэн. Тэр байтугай нэгэн өрхийн тэргүүн нь зуурдаар өнгөрөхөд нөгөөгийнх нь бие тавирч, хөлс нь гарч байсан тухай яриа ч бий. Мэдэх хүмүүс нь мэднэ. Өмнөх УИХ-д лав “чанар” гэл үү юмаа авсан найман бөө байгаа тухай барин тавин яриа бий. Өнөөдрийн УИХ-д дуулдаж байгаа нь таван бөө байгаа гэх. Цаашдаа нэмэгдэх биз. Ер нь манай төр засгийн ажил, тушаал шийдвэр, ажлын хэмнэл нь огцом, гэв гэнэтийн байдгийг ард түмэн мэднэ. УИХ-ын дарга солигдох, Засгийн газар огцрох гээд цаад шалтаг, шалтгааныг нь хайхаар хүн үнэмшихээр, итгэл үнэмшил төрөхөөр юм байдаггүй. Одоо бодоход нөгөө л бөө зайран, лам хувилгаадынх нь “Үүнийг болохгүй” гэсэн айлдвар зарлигтай холбоотой байх. Сүүлийн жилүүдэд хутагт, хувилгаад, богдуудаа би ч тодруулна, чи ч тодруулна хэмээн маргаж, булаацалдаж байгаа дуулдах болсон. Бодвол тэднээрээ дамжуулан нийгэмд нөлөөлөх, нэр төрөө өсгөх, том бизнес болгох гэхчилэн хүчин зүйлүүдтэй байдаг байх. Энэ нь Монголын төр-шашин хоёр холион бантан болж хамаагаа алдсаны шинж. Уг нь бол Үндсэн хуульдаа шашин-төр хоёрыг салгасан заалттай.

Солонгосын энэхүү Ерөнхийлөгч нь хувьдаа бөөтэй байсан, түүнийгээ төрийн ажилд оролцуулдаг байсан явдал нь бидэнд сургамж болох ёстой. Манай төрийн ажлыг бөө зааварлаж ирсэн жишээ бий гэж бараг болно. Бөөгөөрөө гайхуулж шашны ёслолыг төрийн ордонд хийж, Монголын бүх л улстөрчдийг цуглуулан, тойруулж зогсоодог байсныг өнгөрсөн жилд өчнөөн харсан даа. Ийм л мухар сүсэг төрд орох тохиолдлыг одооноос эхлэн албан ёсоор хуульчлан хааж, таслан зогсоох хэрэгтэй. Монголчуудын шинэ үе асар ихээр баруунжиж, шинжлэх ухааныг шүтэж, өндөр соёлтой болж байна. Эд бол мухар сүсгийг үзэж чадахгүй, автахгүй, нөлөөлөх ч боломжгүй үеийнхэн. Ийм шинэ монголчууд олноороо бидний нүдэн дээр өсөн торниж, үржин тэлж байна. Эдэнд бууж өгөхөөс өөр сонголт байхгүй. Тэд ирээдүйд Монголыг авч явна. Өнөөдрийн Монголын төр дэх мухар сүсгийг анхааралтай ажиглаж, буурь суурьтай судалж байгаа эрдэмтэнд, судлаачид цөөнгүй байгаа юм билээ. Тэд удахгүй судалгаагаа эрдэм шинжилгээний бүтээлийн хэмжээнд ард түмний оюун санаанд хүргэх байх. Үүнд итгэлтэй байна. Тэр цагаас эхлэн төр шашны ялгаа, бөө, мухар сүсгийн зааг нийгмийн сэтгэл зүйд бодитой ойлгогдох биз ээ.

Харин өнөөдөр бодитой хэлж чадах, олон улсад батлагдсан нэг л үнэн байна. Улстөрчдийн мэдлэг чадвар дутаж, улс орноо удирдаж чадахгүйд хүрч, цөхрөнгөө барахаараа оюун санааны хувьд хамгийн ойр зүйл нь бөө, шашин, мухар сүсэг болдог гэсэн амьдралын үнэн. Тэгвэл дэлхийн их гүрэн ЗХУ задарч, замаа алдаж байх үед Ельцин нэг ч удаа сүмээр ороогүй байдаг юм шүү. Тэр өөрийнхөө бяраар л Орос орныг авч үлдсэн. Оросын католик шашны том зүтгэлтнүүд бүгдээрээ түүнтэй уулзахыг хүссэн байдаг юм. Хүчтэй удирдагч бол Үндсэн хуульдаа итгэдэг. Хүчтэй удирдагч бол өөртөө, улмаар хүчтэй залгамж үедээ итгэж найддаг. Үүнийг бид хоёр хөршөөсөө бэлхнээ харж байна даа, уг нь.

С.БАТБОЛД

Categories
мэдээ цаг-үе

Турк сургууль Монголд хаагдахгүй

Баянзүрх дүүргийн наймдугаар хороо, “УС-15”
-д байрлах “Улаанбаатар Эмпати” дунд сургууль

Баянзүрх дүүргийн наймдугаар хороо, “УС-15” -д байрлах “Улаанбаатар Эмпати” дунд сургууль

Туркийн Засгийн газар Монгол, Туркийн хамтарсан сургуулиудыг хаалгахын тулд нэлээд хүчин чармайлт гаргаж байгаа гэх мэдээлэл гадны болон дотоодын хэвлэлээр гарсан.

Монгол, Туркийн хамтарсан сургуулийн сурагчид эцэг эхчүүд гайхаж, ямар учиртай мэдээлэл гарсан эсэхийг сонирхож байгаа юм. Тиймээс манай улсад ямар, ямар турк сургууль үйл ажиллагаа явуулдаг, турк сургуулиудын үйл ажиллагаа ямар байгаа талаар сурвалжлахаар Баянзүрх дүүргийн наймдугаар хороо, “УС-15”-д байрлах “Улаанбаатар Эмпати” дунд сургуулиар өнгөрсөн баасан гаригийн 15:00 цагийн үед орлоо.

Биднийг очиход хэсэг хөвгүүд сургуулийнхаа хашаанд байх сагсан бөмбөгийн талбайд тоглож байсан бол ихэнх хүүхдүүд нь цүнхээ үүрээд, эцэг эхчүүд болон ах эгч, найз нөхдийнхөө хамт гарцгааж байв. Мөн сургуулийн гадаа нэлээд олон машин зогссон, хашаан дотор хүүхдийн автобуснууд хүртэл харагдлаа.

Харин үйлчлэгчид цэвэрлэгээгээ хийж, сургалтын албаныхан багш нар руугаа утсаар ярьж, эцэг эхийн хуралтай гэдгийг сануулах зуураа ирэх амралтын өдрүүдэд сурагчдын дунд спортын тэмцээн уралдаан болно, дараагийн долоо хоногийн амралтын өдрөөр багш, ажилчдын тэмцээн болно гээд гар бөмбөгийн тэмцээндээ хэрхэн бэлтгэх талаараа ярьцгааж байв. Учир нь энэ сарын 4-нд буюу өнгөрсөн баасан гаригт эдний сургуулийн нэгдүгээр улирлын амралт эхэлж, сурагчид улирлын шалгалтаа өгчихөөд, тарж байгаа нь энэ ажээ. Турк, Монголын хамтарсан “Эмпати” сургууль нийтдээ таван салбартай бөгөөд эднийх анх элсэн суралцаж байгаа сурагчдыг дотуур байрандаа байлгадаг. Мөн бусад сурагчид өөрсдийн хүсэлтээр төлбөрөө төлөөд, сургуулийн дотуур байранд амьдарч болдог юм байна.Сургуулийнхаа дэргэд байх дотуур байранд амьдардаг сурагчид биднийг очиход гэртээ харихаар тарцгааж байсан юм.

Эдний сургуулийнхан олон цагаар англи хэл, математик зэрэг хичээлийг гүнзгийрүүлэн судалж, суралцдаг учраас сурагчдыг хичээл хийх боломж нөхцөлөөр бүрэн хангаж, чанартай амин дэмтэй хоол хүнсээр үйлчилж, тухтай байлгах зэрэг вакум орчин үүсгэх ач холбогдолтой учраас дотуур байр зайлшгүй шаардлагатай байдаг аж. Сурагчид таван өдөр хичээлдээ сууж, дотуур байрандаа амьдарчихаад, бямба, ням гаригт болон улирлын амралтаар гэртээ харьцгаадаг байна. Харин хөдөө орон нутгаас ирсэн хол гэртэй, эсвэл амралтын өдрүүдэд байрандаа байх сонирхолтой хүүхдүүд харихгүй байж болдог аж. Ингээд хүүхдээ авахаар ирсэн эцэг, эхчүүдийн төлөөлөл болох О.Эрхэмзаяагаас зарим зүйлийг тодруулахад “Турк, Монголын хамтарсан сургуулиудын үйл ажиллагааг хаана гэдэг мэдээлэл цахим сайтад гарсан байсан. Тэгэхээр нь гайхаад сургуулийн захирал руу залгаж асуулаа. Гэтэл захирал тийм зүйл байхгүй, худал мэдээлэл. Манай сургуулийг хаана гэсэн мэдээлэл, албан бичиг огт ирээгүй. Хаагдах үндэслэл ч байхгүй шүү дээ. Та бүхэн хүүхдийнхээ хичээлийг сайн хийлгээд, санаа амар тайван бай гэж байсан. Фэйсбүүк, твиттер, зарим сайтаар худал мэдээлэл гарч байдаг болохоор бид ч бас энэ мэдээлэлд итгээгүй” гэж ярилаа. Харин тус сургуулийн сурагчид ярихдаа “Сургууль хаагдана гэж мэдээлэл сонсоогүй. Бид энэ сургуульд хоёр дахь жилдээ суралцаж байна. Манай сургуулийн багш нар их чадварлаг. Хүүхэд болгон англи хэлний өндөр мэдлэгтэй болдог. Манай ихэнх хичээл англи хэлээр ордог. Мөн гадаадын өндөр хөгжилтэй орнуудын их, дээд сургуульд элсэн суралцах боломжтой гэдгээрээ давуу талтай. Би 12 дугаар ангиа төгсөөд, Америкт сурах бодолтой байгаа. Манай сургуулийнхан элсэлтийн шалгалтанд өндөр оноо авдаг, олон уралдаан тэмцээн, олимпиадуудад тогтмол нэг, хоёрдугаар байр эзэлж байдаг шүү дээ” гэцгээж байлаа. Турк, Монголын хамтарсан энэ сургууль 1994 онд байгуулагджээ. Сургуулийн математик, хими, физик, компьютерийн хичээлийг англи хэлээр турк багш нар зааж, нийгмийн ухааны хичээлүүдийг монгол багш заадаг юм байна. Өөрөөр хэлбэл, энэ сургуулийн хичээлүүд монгол, англи хэлээр явагддаг гэсэн үг. Турк, Монголын хамтарсан “Эмпати” сургууль хотод хоёр, хөдөө орон нутагт гурван салбартай аж. Тухайлбал, “Орхон Эмпати”, “Баян-Өлгий Эмпати”, “Дархан Эмпати” “Улаанбаатар Эмпати”, “Улаанбаатар элит” салбартай юм байна. Улаанбаатар элит нь Кембриджийн хөтөлбөрөөр хичээллэдэг бага сургуультай аж.

Ингээд “Улаанбаатар-Эмпати” сургуулийн захирал Д.Ганбаатартай ярилцлаа.

-Танай сургууль ямар онцлогтой, төгсөгчид нь ихэвчлэн хаана их, дээд сургуульд суралцдаг вэ?

-Манай сургууль Монгол Улсын ерөнхий боловсролын сургуулийн программ, хууль дүрмийн дагуу үйл ажиллагаагаа явуулдаг. Гол ялгаатай тал нь зарим хичээлийг англи хэл дээр заадаг, англи хэлний хичээлийг гүнзгийрүүлэн судалдаг. Математик, хими, физик , англи хэл зэрэг хичээлүүдийн улсын олимпиад, улмаар олон улсын олимпиад, уралдаан тэмцээнүүдэд манай сурагчид тогтмол түрүүлдэг юм. Үүнээс гадна боловсролын системд ямар шинэчлэл хийгдэж байна, тэр бүхнийг тэргүүлж, бусад бүх л төрлийн уралдаан тэмцээн, сургалтын чанарын үзүүлэлтээр улсад тогтмол тэргүүлдэг.

Сургуулийн чанарын баталгааны нэг үзүүлэлт нь элсэлтийн ерөнхий шалгалт юм. 2006 оноос ЭЕШ өгч ирсэн бүх хичээлийн хэмжээст онооны дундаж үзүүлэлтээрээ улсын хэмжээнд тогтмол эхний гурван байрыг эзэлж ирсэн байдаг.

1994 оноос хойш манай сургуулийг 1229 хүүхэд төгссөн байдаг юм. Үүний 60 орчим хувь нь гадаадын их, дээд сургуульд суралцаж, 40 орчим хувь нь дотоодын хамгийн шилдэг их, дээд сургуулиудад суралцаж, амжилттай төгссөн. ЭЕШ-д орохдоо манай сурагчид аз сорьсон байдлаар хэзээ ч шалгалт өгдөггүй, эртнээс мэргэжлээ сонгочихсон байдгаараа онцлогтой. Инженер болно гэсэн л бол яг тэр чиглэлийн хичээлийн шалтгалтаа л өгөөд, хамгийн дээд оноог авдаг.

-Танай сургууль хэддүгээр ангид элсэлт авдаг юм. Хүүхдүүдээ хэрхэн элсүүлдэг вэ?

-Өмнө нь наймдугаар анги төгссөн хүүхдүүдийг сургуульдаа элсүүлдэг байсан. Өөрөөр хэлбэл, ахлах сургуулийн статустай. Харин сүүлийн нэг хоёр жилд долдугаар анги, наймдугаар анги төгссөн хүүхдүүдийг хоёр ангид элсэлт авч байна. Ингээд сурагчид XII анги төгсдөг юм. Ингэхдээ математик, монгол хэлний мэдлэг өндөртэй хүүхдийг шалгаж авна. Тухайлбал, “IQ”, математик, монгол хэлний шалгалт авна, шалгалтанд тэнцвэл манай сургуульд суралцах боломжтой. Шалгалтын тухайд монгол хэлний маш өндөр мэдлэгтэй байх шаардлага тавьдаг.

-Сургуулийн үйл ажиллагааны өртөг зардлын эх үүсвэр нь юу байна, танайх хаанаас санхүүждэг, жилд сурагчдаас хэдэн төгрөгийн төлбөр авдаг юм бэ?

-Сургуулийн санхүүгийн эх үүсвэр нэгдүгээрт, хүүхдийн сургалтын төлбөр, хоёрдугаарт, төрөөс өгдөг хувьсах зардал. Энэ жилийн тухайд анх элсэн суралцаж байгаа сурагчдын нэг жилийн сургалтын төлбөр 7,5 сая төгрөг гэж байгаа. Анги ахих тусам төлбөрийн хэмжээ багасдаг, дээд тал нь 4,6 сая, дунджаар 5,1 сая төгрөгийн төлбөртэй байгаа. Жишээлбэл, англи хэлний хичээл гэхэд л долоо хоногт 18-20 цаг ордог. Ингээд дараа жилээс нь байгалийн ухааны хичээлүүд англи хэл дээр явагддаг. Мөн ерөнхий эрдмийн хичээлүүдийг англи хэлээр заадаг. Тиймээс манай сургуулийг төгссөн сурагчид аль ч улс орны их, дээд сургуульд элсэн суралцах бүрэн боломжтой.

-Турк, Монголын хамтарсан сургууль төгссөн тохиолдолд Америкийн виз авахад төвөггүй байдаг гэж сонссон?

-Сурагчид XII анги төгсөөд, бүрэн дунд сургууль төгссөн гэрчилгээ авна. Дээр нь англи хэл, математикийн гүнзгийрүүлсэн сургалттай учраас Туркийн лицей сургуулийн шалгалт өгдөг. Энэ шалгалтанд тэнцвэл олон улсад хүлээн зөвшөөрөгдсөн сертификат олгодог. Тиймээс энэ сертификаттай байхад, олон улсад суралцахаар явахад бэрхшээл гарахгүй гэсэн үг. Мөн манай сурагчид XI ангиасаа эхлээд л тофелын шалгалтанд бэлдэж, ордог.

-Танай сургуулийн сурагчид гадны аль, аль улсад ямар мэргэжлээр суралцаж байна, мөн хэр амжилттай ажиллаж байна вэ?

-Төгсөгчдөөс нийтдээ 700-гаад хүүхэд гадаадад суралцаад байна. Япон, Америк болон нийт таван тивийн 30-аад оронд суралцсан. Банк, уул уурхай, эдийн засгийн салбаруудад гадаад болон дотоодод ажиллацгааж байна. Бид сурагчдаа төгсгөөд орхидоггүй, ажиллаж байна уу, амьдрал нь сайн байна уу гэдэгт үргэлж хяналт тавьж байдаг. Сургуулиа төгсөөд эх орондоо ирсэн хойно нь ажил олтол нь сургуулиасаа зохих хэмжээний тэтгэлэг олгож, ажилд зуучилж өгдөг. Гадаадын сургуульд орсон хүүхдээ байгаа газар нь очиж, хүүхдээ эргэж байгаа эцэг эх шиг эргэж, сургалтын төлбөрийн бэрхшээл, ажил амьдралын зовлон жаргал юу байна гэдгийг анхаарч, зарим тохиолдолд сургалтын тэтгэлэгт хамруулж өгдөг. Мөн эцэг эх, багш сурагчийн харилцаа тасралтгүй үргэлжилдэг. Бид ар гэрийг нь судалж хамтарч ажилладаг. Баяр ёслол, төрсөн өдөр, цагаан сараар хүүхдүүдийнхээрээ зочилж, ах дүү, төрөл садан шиг золгож, сайхан холбоотой байцгаадаг.

-Сургуулийн чанарт багш нарын үүрэг оролцоо их. Танайх багш нараа хэрхэн сонгож ажилд авдаг вэ. Турк багш нар олон бий юү?

-Бусад сургуулийн адил сонгон шалгаруулах замаар ажилд авдаг. Эрч хүчтэй зорилготой, ажилдаа дуртай залуу багш нарыг сонгож авдаг юм. Турк багш нар байгалийн ухааны хичээлийг англи хэл дээр заадаг.

-Танай сургууль 20 гаруй жилийн түүхтэй юм байна. Турк, Монголын хамтарсан Эмпати сургууль анх хэзээ, хаана, хэрхэн үүсэн байгуулагдаж байсан юм бэ?

-1994 онд Монгол, Туркийн тав, зургаан хүн нийлээд сургууль байгуулсан байдаг юм. Одоо удирдах зөвлөлийн гол бүрэлдэхүүнд үүсгэн байгуулагчид бий. Тэд хувьцаат компани шиг тал, талаасаа хөрөнгөө нийлүүлээд байгуулсан. Анх МУИС-ийн дэргэдэх байгалийн ухааны лицей сургууль нэртэйгээр байж байгаад, тэндээсээ бие дааж гарсан. Хувийн дунд сургуулийг яаж үүсгэн байгуулдаг билээ, яг тэр зарчмаар байгуулагдсан, хувь хүмүүсийн хөрөнгө оруулалттай сургууль.

-Турк, Монголын хамтарсан сургуулиудыг хаана гэх яриа гарч байна. Энэ танай сургуультай холбоотой асуудал мөн үү?

-Туркт өнгөрсөн долдугаар сарын 15-нд төрийн эргэлт хийх оролдого болсон. Тэрний дараагаас эхлээд, гадны улсад байгаа байгууллагууд Туркийн байдалд оролцлоо гэж яриад, шашны номлогч гадаадад байгаа байгууллагуудыг ашиглаад, дотоодын цэргийн эргэлт хийхийг оролдсон гэж таамагладаг юм байна. Дэлхийн 173 оронд турк сургуулиуд байдаг. Дээрх сургуулиудад тэрс үзэлтэн байж болзошгүй учир турк сургуулиудыг хаах хэрэгтэй гэдэг яриа гадны улсуудад их гарчээ. Зарим улс руу Элчин сайдын яамаар нь дамжуулаад хаах мэдэгдэл өгсөн явдал байгаа юм байна лээ. Ингэхдээ ганцхан сургууль ч биш, ер нь л Туркийн байгууллагуудыг хаах хэрэгтэй гэж байгаа бололтой. Бидэнд Засгийн газар, БСШУС-ын яам, Элчин сайдын яам зэрэг холбогдох байгууллагаас энэ талаар мэдэгдсэн зүйл алга. Бид хэвлэлээр гарсан мэдээллээс илүүг мэдэхгүй байна. Монгол Улсын хууль тогтоомжийн дагуу, Монголд үйл ажиллагаа явуулж байгаа сургуулийг хаа хамаагүй Туркийн Засгийн газраас хаах үндэслэл байхгүй. Харин манай улсын Засгийн газартай энэ талаар ярилцаж байгаа бол Засгийн газар бидэнд мэдэгдэх ёстой. Хэрэв энэ сургуулийг Туркийн Засгийн газрын хөрөнгөөр байгуулсан бол хаах эсэх нь Туркийн мэдэх хэрэг. Туркийн талаас манайх хөрөнгөө эргүүлэн татлаа гэвэл болно. Гэтэл тийм биш, хувь хүмүүсийн байгуулсан, хувийн сургууль шүү дээ. Харин Туркийн Засгийн газрын хөрөнгөөр байгуулагдаагүй шүү дээ.

-Туркт бослого гарснаас хойш манай улсад анхааруулга ирсэн гэж байсан. Энэ талаар танайх сонссон уу?

-Энэ талаар телевизээр Туркээс Монголд суугаа Элчин сайд ярьж байхыг харсан. Туркийн Засгийн газраас өгсөн чиглэл гэсэн утгаар ярьж байсан шүү. Тэр анхааруулгад төрийн эргэлт хийхэд оролцсон байж болзошгүй тэрс үзэлтнүүд Монголд үйл ажиллагаа явуулж буй Туркийн байгууллагуудад байж болзошгүй гэсэн юм билээ. Манайд албан ёсоор тийм мэдэгдэл ирээгүй. Боловсролын яам ч гэсэн энэ ярианд анхаарал тавьж, худал үнэн нь мэдэгдэхгүй мэдээлэлд нэг хариулт хэлчихвэл зүгээр байх. Эцэг, эхчүүдэд ч гэсэн тайван байхад хэрэгтэй.

-Манай улсад Туркийн Засгийн газраас санхүүждэг байгууллагууд бий юу. Ер нь ямар чиглэлээр үйл ажиллагаа явуулдаг, хичнээн байгуулага байна вэ?

-Миний мэдэж байгаагаар Туркийн 20 гаруй байгууллага Монголд үйл ажиллагаа явуулдаг юм билээ. Тухайлбал, Туркийн Засгийн газраас санхүүждэг “ТИКА” гэж олон улсын байгууллага байдгийг сайн санаж байна. Энэ нь Боловсрол, хүмүүнлэг, бүтээн байгуулалт, хандив, тусламж зэрэг салбарт үйл ажиллагаа явуулдаг юм билээ гэв.

Дээрх асуудалтай холбогдуулан зарим зүйлийг Боловсрол, соёл шинжлэх ухаан, спортын яамнаас тодруулахад “Манайд үүнтэй холбоотой мэдээлэл албан бичиг ирээгүй. Сургуулийн асуудал ч гэсэн энэ бол хоёр орны найрамдалт харилцаатай холбоотой зүйл учраас энэ талаар Гадаад харилцааны яам мэдэх байх” гэлээ. Харин Гадаад харилцааны яамнаас асуудлыг тодруулахад “Манайд албан бичиг ирээгүй. Аливаа боловсролын байгууллагын үйл ажиллаагаатай холбоотой асуудлыг чиг үүргийнхээ дагуу БСШУСЯ хариуцах учиртай. Монгол Улсад үйл ажиллагаа явуулж байгаа аливаа байгууллагатай холбоотой зохицуулах асуудлыг дотоодын хууль журмын дагуу зохицуулах учиртай. Монгол Улс Турк улсын хооронд иж бүрэн түншлэлийн харилцаатай. Сүүлийн жилүүдэд энэхүү харилцаа хоёр улсын эрх ашигт нийцэж, өргөжин хөгжиж байна” гэсэн юм.

Н.ГАНЧИМЭГ

Categories
мэдээ улс-төр

Ж.Эрдэнэбат: Газрын тос боловсруулах, зэс хайлуулах, нүүрс боловсруулах үйлдвэр байгуулна

Ерөнхий сайд Ж.Эрдэнэбат Европын холбоо болон түүний гишүүн орнуудаас Монгол Улсад суугаа, хавсран суугаа Элчин сайд нарыг өчигдөр хүлээн авч уулзлаа. Уулзалтад 30 орчим Элчин сайд оролцож, Ерөнхий сайдаас сонирхсон асуултдаа хариулт авлаа.

Монгол Улс 1990-ээд оны эхээр бие даасан гадаад бодлого хэрэгжүүлж эхэлснээсээ хойш хоёр хөршөөсөө гадна бусад улс орнуудтай идэвхтэй харилцаа, хамтын ажиллагаа хөгжүүлэхийг зорьж ирсэн. Энэ зорилтын хүрээнд Монгол Улс “гуравдагч хөрш”-ийн бодлогыг хэрэгжүүлж, Европын холбоо болон гишүүн орнуудтай харилцаа, хамтын ажиллагааг боломжтой бүхий л салбарт эрчимжүүлэн хөгжүүлэхийн төлөө байдаг гэж Ерөнхий сайд уулзалтын өмнө хэлээд Европын холбоо нь Монгол Улсын хувьд гадаад худалдааны том түнш, хамгийн том хөрөнгө оруулагч юм гэлээ.

Засгийн газар улс орныхоо эдийн засгийг богино хугацаанд тогтворжуулж, цаашид өсөлтийг бий болгон нийгмийн салбаруудыг дэмжих, улмаар иргэдийнхээ амьдралыг сайжруулан Монгол Улсад үүсээд буй эдийн засаг, санхүүгийн хүнд байдлаас гарахыг зорьж байна. Үүнтэй холбогдуулан “Эдийн засгийн хүндрэлийг даван туулах, тогтворжуулах тухай хөтөлбөр” боловсруулан УИХ-аар батлуулахаар ажиллаж байна. Мөн гадаадын түнш орнууд болон ОУВС зэрэг байгууллагатай хамтран ажиллахаар хэлэлцээ хийж байна гэж Ерөнхий сайд ярилаа.

Гадаадын хөрөнгө оруулалт буурсан нь дэлхийн зах зээл дээр уул уурхайн бүтээгдэхүүний үнэ унасантай холбоотой ч манай дотоод хүчин зүйл их нөлөөлсөн. Засаглалын тогтворгүй байдал, төрийн байгууллагын хүнд сурталтай холбоотойгоор хөрөнгө оруулалт буурсан гэж үзэж байгаа. Засгийн газар энэ алдааг засахын төлөө, хөрөнгө оруулагчдын итгэлийг сэргээх тодорхой арга хэмжээнүүдийг авч хэрэгжүүлж байна. Иймд Монгол Улсад хөрөнгө оруулалт хийж, харилцан ашигтай хамтын ажиллагаа өрнүүлэхийг сурталчилж, зуучилж өгөхийг Ерөнхий сайд Элчин сайд нараас хүслээ.

Засгийн газрын Хэрэг эрхлэх газрын бүтцэд Хөрөнгө оруулагчдын эрх ашгийг хамгаалах Зөвлөл байгуулсан. Энэ зөвлөл хөрөнгө оруулагчдын эрх ашгийг хамгаалах, хуулийн хүрээнд хамтарч ажиллах таатай нөхцөлийг бүрдүүлэх, учирч болзошгүй эрсдэлээс сэргийлэх арга хэмжээг авна гэдгийг хэллээ.

Газрын тос боловсруулах, зэс хайлуулах, нүүрс боловсруулах зэрэг үйлдвэр байгуулна. Эдгээр томоохон төслүүдэд гадаадын хөрөнгө оруулалт татахаар ажиллаж байгаа гэж Ерөнхий сайд Ж.Эрдэнэбат Элчин сайд нарын асуултад хариулахдаа хэллээ.

Categories
мэдээ улс-төр

Гурван байнгын хороо хуралдана

Байнгын хороод хуралдана зурган илэрцүүдУИХ-ын байнгын хороод өнөөдөр хуралдах хуваарьтай байна. Төсвийн байнгын хорооны хуралдаан “Монгол Улсын 2017 оны төсвийн тухай хууль батлагдсантай холбогдуулан авах арга хэмжээний тухай” УИХ-ын тогтоолын эцсийн хэлэлцүүлгийг хийх юм. Байгаль орчин, хүнс, хөдөө аж ахуйн байнгын хорооны хуралдааны хуралдаанаар “Хог хаягдлын тухай хууль болон холбогдох бусад хуульд нэмэлт, өөрчлөлт оруулах тухай хуулийг буцаах тухай УИХ-ын тогтоолын төслийг хэлэлцэнэ.

Харин Аюулгүй байдал, гадаад бодлогын байнгын хорооны хуралдаанаар Монгол Улс Ази, Номхон далайн худалдааны хэлэлцээрт нэгдэн орох тухай асуудлыг зөвшилцөж, Монгол Улсын олон улсын гэрээний тухай хуулийн шинэчилсэн найруулгын төсөл, Төрийн болон албаны нууцын тухай хуулийн төслүүдийн анхны хэлэлцүүлгийг явуулна. Агаарын бохирдлыг бууруулах асуудлын дэд хорооны хуралдаанаар “Нийслэл хот болон томоохон суурин газрын агаарын бохирдлын тулгамдсан асуудал, шийдвэрлэх арга зам” сэдвээр Агаарын бохирдлыг бууруулах үндэсний хорооны мэдээллийг сонсох юм байна.

Categories
мэдээ нийгэм

Б.Шаравын нэрэмжит мэргэжлийн дуучид, үндэсний хөгжимчдийн ОУ-ын уралдааны нээлт болно

Б.Шаравын нэрэмжит хөгжимчдийн ОУ-ын уралдаан зурган илэрцүүд09.00 цагт МҮХАҮТ-д “Үндэсний чанарын чуулган 2016” арга хэмжээ болно.

09.00 цагт Хими, химийн технологийн хүрээлэнд жил бүр уламжлал болгон зохион байгуулдаг “Chemistry-2016” эрдэм шинжилгээний бага хурал болно.

10.00 цагт ШӨХТГ-т “Антибиотикийн талаар мэдлэг сайжруулах” дэлхийн 7 хоногийн хүрээнд ЭМЯ, ХХААЯ, МХЕГ, НЗАА, НЭМХ зөвлөлдөх уулзалт зохион байгуулна.

10.00 цагт ГХЯ-нд сар бүр зохион байгуулдаг “Мэдээллийн цаг” хэвлэлийн бага хурал болно.

10.00 цагт НЗДТГ-т Нийслэлийн Засаг дарга С.Батболд нийслэлийн иргэдтэй уулзана.

11.30 цагт Улаанбаатар хотын Цагдаагийн газарт энэ оны эхний 10 сард үйлдэгдсэн гэмт хэргийн үзүүлэлтийн талаар мэдээлэл хийнэ.

12.00 цагт “Үндэсний мэдээллийн төв”-д “Нээлттэй АН шинэчлэлийн нэгдсэн хөдөлгөөн”-өөс Ардчилсан намын шинэчлэлийн мэдээлнэ.

12.00 цагт Хөгжим бүжгийн коллежид Төрийн соёрхолт, УГЗ, Чингисийн одонт, хөгжмийн зохиолч Б.Шаравын нэрэмжит мэргэжлийн дуучид, үндэсний хөгжимчдийн Олон улсын хоёрдугаар уралдааны нээлт болно.

Төрийн ордонд

09.00 цагт “Их эзэн Чингис хаан” танхимд Төсвийн байнгын хороо хуралдана.

10.00 цагт Улсын онцгой комиссын ээлжит хуралдаан Монгол Улсын Шадар сайдын өрөөнд болно.

11.30 цагт Монгол Улсын Ерөнхийлөгч Ц.Элбэгдоржид Элчин сайдууд итгэмжлэх жуух бичиг өргөн барина.

14.00 цагт “Жанжин Д.Сүхбаатар” танхимд Байгаль орчин, хүнс, хөдөө аж ахуйн байнгын хороо хуралдана.

14.00 цагт “Их эзэн Чингис хаан” танхимд Аюулгүй байдал, гадаад бодлогын байнгын хороо хуралдана.

“Монгол ньюс” мэдээллийн төвд

11.00 цагт СХД-ийн 9 болон 17 дугаар тойрогт нэр дэвшсэн нэр дэвшигчид сонгуулийн үеэр гарсан хууль бус үйл ажиллагааны талаар мэдээлэл хийнэ.

11.30 цагт Чингэлтэй дүүргийн АН-ын гишүүд цаг үеийн асуудлаар мэдээлэл хийнэ.

12.30 цагт Хаврын тэргүүн сарын шинийн нэгэн нь 2017 оны нэгдүгээр сарын 28-нд эхлэх талаар Монголын Үндэсний Чөлөөт Зурхайчдын Нэгдсэн Холбооноос мэдээлэл хийнэ.

Categories
мэдээ нийгэм

Улаанбаатарт 7 хэм хүйтэн байна

Улаанбаатарт 7 хэм хүйтэн зурган илэрцүүдУЛААНБААТАР ХОТ: Үүлшинэ. Цас орохгүй. Салхи баруунаас секундэд 6-11 метр. Шөнөдөө 18-20 градус, өдөртөө 6-8 градус хүйтэн байна.

БАРУУН АЙМГУУДЫН НУТГААР: Үүлэрхэг. Зарим газраар цас орж, зөөлөн цасан шуурга шуурна. Салхи баруунаас секундэд 7-12 метр, Алтайн салбар уулсаар секундэд түр зуур 18-20 метр хүрч ширүүснэ. Шөнөдөө Завхан, Баянхонгорын хойд хэсгээр 23-28 градус, Говь-Алтай, Баянхонгорын өмнөд хэсгээр 3-8 градус, бусад нутгаар 11-16 градус, өдөртөө Ховдын өмнөд, Увс, Завхан, Баянхонгорын хойд хэсгээр 5-10 градус хүйтэн, бусад нутгаар 2 градус хүйтнээс 3градус дулаан байна.

Хөдөө цастай зурган илэрцүүдТӨВИЙН АЙМГУУДЫН НУТГААР: Үүлшинэ. Нутгийн хойд хэсгээр цас орно. Салхи баруунаас секундэд 6-11 метр. Дархадын хотгороор шөнөдөө 23-28 градус, өдөртөө 13-18 градус, Хангай, Хөвсгөл, Хэнтэйн уулархаг нутаг, Сэлэнгэ, Хараа, Ерөө, Туул, Тэрэлж голын хөндийгөөр шөнөдөө 18-23 градус, өдөртөө 6-11 градус, бусад нутгаар шөнөдөө 13-18 градус, өдөртөө 1-6 градус хүйтэн байна.

ЗҮҮН АЙМГУУДЫН НУТГААР: Үүлшинэ. Шөнөдөө цас орохгүй. Өдөртөө нутгийн хойд хэсгээр цас орно. Салхи баруунаас секундэд 7-12 метр. Хэрлэн, Онон, Улз, Халх голын хөндийгөөр шөнөдөө 23-28 градус, өдөртөө 9-14 градус, бусад нутгаар шөнөдөө 17-22 градус, өдөртөө 4-9 градус хүйтэн байна.

Дорнодын тал цастай зурган илэрцүүдОТРЫН НУТАГ ХЭРЛЭНБАЯН-УЛААН ОРЧМООР: Багавтар үүлтэй. Цас орохгүй. Салхи баруун өмнөөс секундэд 4-9 метр. Шөнөдөө 20-22 градус, өдөртөө 7-9 градус хүйтэн байна.

ГОВИЙН АЙМГУУДЫН НУТГААР: Багавтар үүлтэй. Цас орохгүй. Салхи баруунаас секундэд 6-11 метр, өдөртөө Арц-Богдын өвөр хоолойгоор секундэд 15-17 метр хүрч ширүүснэ. Дундговийн нутгаар шөнөдөө 8-13 градус хүйтэн, өдөртөө 1 градус хүйтнээс 4 градус дулаан, бусад нутгаар шөнөдөө 3-8 градус хүйтэн, өдөртөө 4-9 градус дулаан байна.

2016 оны 11 дүгээр сарын 16-наас 11 дүгээр сарын 20-ныг хүртэлх цаг агаарын урьдчилсан төлөв

16-нд баруун зүгийн нутаг, төвийн нутгийн хойд хэсгээр, 17-18-нд ихэнх нутгаар, 19-нд зарим газраар цас орно. Салхи 16-нд баруун аймгуудын нутгаар түр зуур 18-20 метр, 17-19-нд нутгийн өмнөд хэсгээр секундэд 15-17 метр хүрч цасан болон шороон шуурга шуурна. 17-нд нутгийн хойд хэсгээр, цаашдаа ихэнх нутгаар хүйтний эрч чангарч Дархадын хотгор, Идэр, Тэс голын хөндийгөөр шөнөдөө 34-39 градус, өдөртөө 20-25 градус, Увс нуур болон Алтай, Хангай, Хэнтэйн уулархаг нутаг, Сэлэнгэ, Хараа, Ерөө, Туул, Тэрэлж, Хэрлэн, Онон, Улз, Халх голын хөндийгөөр шөнөдөө 26-31 градус, өдөртөө 15-20 градус, говийн бүс нутгийн өмнөд хэсгээр шөнөдөө 10-15 градус, өдөртөө 3-8 градус, бусад нутгаар шөнөдөө 23-28 градус, өдөртөө 10-15 градус хүйтэн байна.

Categories
мэдээ нийгэм

“С.Чинзориг гишүүнийг өвөл идэштэй, зун айрагтай байлгах гэж үр хүүхдээ битгий золиослоосой?” нийтлэл хэвлэгдлээ

“Өдрийн сонин”-ы мягмар гаригийн дугаар 16 нүүрээр хэвлэгдэн, захиалагчдадаа хүрлээ. Энэ өдрийн дугаарт гарсан нийтлэл, сурвалжлага, ярилцлага, мэдээ мэдээллээс онцолж, тоймлон хүргэж байна.

Нэгдүгээр Нэгдүгээр нүүрт Г.Тэмүүлэн: Австрид манайхаас 20 сарлаг аваачаад сарлагийн махан стейкний ресторан нээчихэж” ярилцлага нийтлэгдлээ. Тухайлбал, “ …Хөдөө аж ахуйтай холбоотой, монгол малыг эрүүлжүүлэхтэй холбоотой хуулийн төсөл санаачлаад боловсруулаад явж байна. Бидэнд мал аж ахуйд суурилсан асар том нөөц бололцоо бий” хэмээн ярилцлагадаа дурджээ. Үргэлжлэлийг нь 2, 5-р нүүрээс уншаарай.

Баримт, үйл явдлын гуравдугаар нүүрт “С.Чинзориг гишүүнийг өвөл идэштэй, зун айрагтай байлгах гэж үр хүүхдээ битгий золиослоосой?” нийтлэл хэвлэгдлээ. Тухайлбал, “Нэг ёсондоо манай эрхэм гишүүн Чинзориг малчдын тэтгэвэрт гаргах насыг таван насаар урагшлуулах төсөл барисан нь өөрөө өвөл идэштэй, зун намрын цагт айрагтай байхыг нь бэлдэх хүмүүс цаашдаа дутагдаж магадгүй хэмээн тэвдэж сандарсандаа малчдыг эрхлүүлэх ээлжит аргаа ийн сэдсэн хэрэг л дээ…” хэмээжээ.

Дөрөвдүгээр нүүрт Н.Удвал: “Эрүүл мэндийн салбар дандаа үлдэгдлээр санхүүждэг” ярилцлага нийтлэгдлээ.

Эдийн засгийн нүүрт “Монгол” Эдийн засгийн ахлах сургуулийн захирал, доктор, гавьяат эдийн засагч Н.Дашзэвэгтай хийсэн “Монголбанкны хэнэггүй, мэдлэггүй удирдлагыг солихгүй бол төгрөгөөс зугтах хандлага ихэснэ үү гэхээс багасахгүй” ярилцлага хэвлэгдлээ. Энэхүү ярилцлагадаа тэрээр “…Үнэнийг хэлэхэд Хятад, Орос хоёр Монголоос цемент авахгүй. Валютын тогтмол, уул уурхайн бус эх сурвалж, нөөцтэй болохгүй бол Монгол Улс 5-10 жилийн дараа газар нутгаасаа өгөхөд тулах эрсдэл байна. Энэ удаа ч яахав, ОУВС, Хятадын зээл гэх мэт түр аргалах хэрэгсэл олдож болох байх. Арван жилийн дараа арван талаас зэрэг “архирвал” бид яах болж байна вэ гэдгээ санаж ажилламаар юм даа” хэмээн сануулжээ.

Сонины арын нүүрт Хүмүүс санаж, сэрж нэгийг бодоосой гэсэн үүднээс бага хэмжээний бичлэгийг нийтэлдэг уламжлалтай билээ. Тэгвэл энэ удаад сэтгүүлч Я.Баярбаатарын “Иогийн хэт хүнд үзүүлбэрийг ТВ-ээр үзүүлэхгүй байх хэрэгтэй юм байна” бичлэг нийтлэгджээ. Тухайлбал “Авьяаслаг Монголчууд” шоунд хүүхэд дуурайж хийж магадгүй хүнд үзүүлбэрүүд орсон байдаг. Тэгвэл энэ нь хүүхдүүдэд муугаар үлгэрлэж магадгүй юм хэмээн сануулжээ.

Эдгээр болон бусад цаг үеийн мэдээ мэдээлэл, ярилцлагуудыг “Өдрийн сонин”-ы мягмар гаригийн дугаараас уншаарай.

Эрхэм уншигч та, манай сонины өнөөдрийн дугаарыг “Монгол шуудан” компанийн нийслэл Улаанбаатар дахь 35 салбар, “Түгээмэл” шуудан, “Улаанбаатар”, “Скай” шуудангийн салбаруудаас очиж авч болох ба сонин борлуулах бүхий л цэгүүд, Хэвлэлийн биржээс худалдан авах боломжтой юм. Мөн “Мөнгөн завъяа” дахь сонин борлуулах цэг, Сансрын үйлчилгээний төв дэх сонин борлуулах цэг, Хан-Уул дүүргийн 19 дүгээр хорооллын үйлчилгээний төвд байрлах сонин борлуулах цэг, Саппорогийн “Миний дэлгүүр” дэх сонин борлуулах гол гол цэгүүдээс худалдах авч болохыг дуулгая. “Өдрийн сонин”-ы өөрийн байранд ирж худалдан авч бас болно.

“Өдрийн сонин”-той холбоотой бүхий л мэдээллийг Мэдээлэх эрхийн утас 19001987-гоос лавлаж болох ба захиалга өгөхийг хүсвэл 9911-2954, 8811-1375 дугаарт холбогдоно уу. Хэрэв цахим хэлбэрээр нь захиалахыг хүсвэл 88071920 дугаарт холбогдож дэлгэрэнгүй мэдээллийг лавлаарай.

“ӨДРИЙН СОНИН” ӨГЛӨӨ БҮХЭН ТАНТАЙ ХАМТ

Categories
гадаад мэдээ

Түүхий эдийн гадаад зах зээлийн төлөв байдал

Түүхий эдийн гадаад зах зээлийн төлөв байдалМонгол улс он удаан жил уул уурхайн түүхий эд, тэр дундаа зэсийн баяжмалын экспортын орлогоос өндөр хамааралтай байсаар ирсэн. Харин 2011 оноос зөвхөн зэсийн баяжмалаар зогсохгүй нүүрсний экспорт нэмэгдэж тухайн ондоо 2.3 тэрбум ам.доллар буюу нийт экспортын 47 хувийг эзэлж, улмаар эдийн засгийн өсөлт тухайн жилдээ 17.3 хувьтай болсон нь дэлхийд хамгийн өндөр өсөлт байв. Тэгвэл үүнээс хойш түүхий эдийн гол худалдан авагч болох БНХАУ-ын эдийн засгийн өсөлт саарсантай холбоотойгоор дэлхийн зах зээл дээрх түүхий эдийн үнэ буурсан.

Үүний дээр Монгол улс нүүрсний олборлолтын өртөг өндөр байснаас шалтгаалан өрсөлдөх чадвараа алдаж 2011 онд Хятадын нийт нүүрсний импортын 26 хувийг дангаараа нийлүүлж байсан бол 2016 оны 9 дүгээр сарын байдлаар дөнгөж 11 хувийг нийлүүлж байна.

Харин 2016 оны 3 дугаар улиралд БНХАУ чанарын шаардлага хангахгүй нүүрсний уурхайнуудыг хаах шийдвэр гаргасан, АНУ-ын шинэ ерөнхийлөгч Д.Трампын дэвшүүлж буй дэд бүтцийн бүтээн байгуулалттай холбоотойгоор дэлхийн зах зээлд түүхий эдийн эрэлт өсөх хүлээлттэй байна. 2016 оны 11 дүгээр сарын 11-ний өдрийн байдлаар нүүрсний үнэ өнгөрсөн оны мөн үеэс 2 дахин өсч, нэг тонн нүүрсний үнэ 103.7 ам.доллар, цэвэршүүлсэн зэсийн үнэ 20 хувиар өсч, нэг тонн зэсийн үнэ Лондонгийн металлын бирж дээр 5900 ам.долларт хүрээд байна.

Түүхий эдийн гадаад зах зээлийн төлөв байдал

Categories
мэдээ нийгэм

Шилдэг 800 сурагч Төрийн ордонд иргэний андгай өргөнө

Тусгаар тогтнолын өдрөөр Төрийн ордны Их танхимд нийслэлийн шилдэг 800 сурагчийн иргэний андгай өргөх ёслол болно. Тус арга хэмжээ нь Ерөнхий сайдын ивээл дор 14 дэх жилдээ уламжлал болон зохиогдох гэж байна.

Монгол Улсын иргэний андгай өргөх ёслолыг иргэн хүний хувьд эх оронч үзэлтэй, ёс суртахууны өндөр соёлтой, хөдөлмөрч, хууль, ёс заншлаа эрхэмлэн дээдэлдэг түүх соёлоороо бахархах үзлийг төлөвшүүлэхэд зорилгоор зохион байгуулдаг. Тусгаар тогтнолын баярын иргэний тангараг өргөх 800 сурагч нь сургууль хамт олноосоо шалгарсан тэргүүний шилдэг сурагчид бөгөөд Боловсрол, соёл, шинжлэх ухаан, спортын яам, нийслэлийн боловсролын газар хамтран нэрсийг тодруулж, зохион байгуулагч тал болох Монголын залуучуудыын холбоонд маргаашийн дотор хүлээлгэн өгөх аж.

Шилдэг 800 сурагч Төрийн ордонд иргэний андгай өргөнөАймаг, сумын хэмжээнд 16 нас хүрч, иргэний үнэмлэхээ гардан авах гэж буй шилдэг тэргүүний сурагчдад тухайн шатны Засаг даргын Тамгын газрын удирдлагууд иргэний үнэмлэхийг нь гардуулна.

Categories
мэдээ нийгэм

Сонгинохайрхан дүүрэгт жишиг эмнэлэг барина

Манай улсад эрүүл мэндийн тусламж үйлчилгээг иргэдэд ойртуулах тухай олон жил ярьж байна. Бэртэж гэмтэх, төрөх, мэс засал гээд нарийн мэргэжлийн үйлчилгээг авахдаа иргэд найман чиглэлийн эмнэлэгт иргэд хандаж болдог байна. Тиймээс 2 болон 3 дугаар шатлалын эмнэлгийн нарийн мэргэжлийн үйлчилгээг дүүргийн эмнэлэгүүд үзүүлэх боломжтой. Үүний тулд нарийн шинжилгээ оношилгоо, хийж шаардлагатай тохиолдолд мэс засал хийдэг болох шаардлага дүүргийн эмнэлгүүдэд бий.

Тиймээс Азийн хөгжлийн банкны ЭМСХХ-4 төслийн хүрээнд мөн ДЭМБ-ын техник туслалцаатай Сонгинохайрхан дүүрэгт олон улсын стандарт шаардлагыг хангасан жишиг эмнэлэг барихаар болсон байна. Эмнэлгийн барилгын ажлын ерөнхий төлөвлөгөөг Нидерланд улсын Симед компани хийж гүйцэтгэсэн. Жишиг эмнэлэг нь эмнэлзүйн долоогоос доошгүй үндсэн мэргэжлийн тусламж үйлчилгээг хэвтүүлэн эмчлэх болон амбулаториор үзүүлэх 200 хүртэлх ор бүхий, жилд дунджаар 10.000 гаруй өвчтөнг хэвтүүлэн эмчлэх, 47.000 гаруй хүнд амбулаторийн тусламж үйлчилгээ үзүүлэх хүчин чадалтай байхаар тооцохын зэрэгцээ оношилгоо эмчилгээний шинэлэг арга хэлбэрүүд, өдрийн эмчилгээ, мэс засал, бөөрний диализын тусламж үйлчилгээг үзүүлэх юм. Эхний ээлжинд Сонгинохайрхан дүүргийн нэгдсэн эмнэлэгийг өргөтгөх, шинэчлэх ажил эхэлсэн байна.