Month: November 2016

Улаанбаатар хотын цагдаагийн газрын Хэвлэл мэдээллийн ажилтан Ё.Лхагвасүрэнгээс Түр хамгаалах байртай холбоотой зарим зүйлийг тодрууллаа.

-Гэр бүлийн хүчирхийлэлд өртсөн иргэдийг байлгах Түр хамгаалах байранд хамгаалалтад авдаг шүү дээ. Энэхүү байр байгуулагдаад хоёр жилийн хугацаа өнгөрсөн байна?

-2014 оны хоёрдугаар сард Гэр бүлийн хүчирхийлэл, хүүхдийн эсрэг гэмт хэргээс урьдчилан сэргийлэх хэлтсийн Түр хамгаалах байр байгуулагдаж, дөрөвдүгээр сарын 7-нд анхны үйлчлүүлэгчээ хүлээн авч байсан. Өнгөрсөн гурван жилийн хугацаанд манай байгууллага 617 гэр бүлийн 1,122 хүнийг хүлээн авч үйлчиллээ. Түр хамгаалах байранд ирж байгаа иргэдийн дийлэнх нь эмэгтэйчүүд, хүүхдүүд байдаг. Харин насанд хүрсэн найман эрэгтэй ирсэн.

Ер нь судалгаанаас харахад, 385 насанд хүрсэн эмэгтэй, 368 эрэгтэй хүүхэд, 361 эмэгтэй хүүхдийг түр хамгаалах байранд авч, гэр бүлийн хүчирхийллийн золиос болохоос урьдчилан сэргийлэх арга хэмжээ авлаа. Манай түр хамгаалах байраар үйлчлүүлж буй хүмүүс сэтгэл зүйч нартай ганцаарчилсан уулзалт, ярилцага хийж, өөрийн шийдэж чадахгүй байгаа асуудалдаа гарц олж, цагдаагийн алба хаагчдаас хууль, эрх зүйн зөвлөгөө авдаг.

-Танай байгууллагад хэрхэн хандах ёстой вэ?

-Түр хамгаалах байрны үйл ажиллагаа Цагдаагийн байгууллагын үйл ажиллагааны код журмаар зохицуулагддаг. Гэр бүлийн хүчирхийлэлд өртөж эрүүл мэнд, амь насанд нь аюул учирч болзошгүй, бие махбодод хохирол учруулсан, байнгын дарамтад байлгасан, айлган сүрдүүлж, дарамталсан, дагаж мөшгөсөн, хүчирхийллийн түвшин өндөр, дунд байгаа иргэдийг хүлээн авдаг.

Бүх дүүргийн цагдаагийн хэлтэс, албад, төрийн болон төрийн бус байгууллагаас манайд үйлчлүүлэгч нарыг холбон зуучилж ажиллаж байна. Манай байгууллагаас явуулж байгаа сурталчилгаа, үүрэн телефоны хэрэгслүүдээр дамжуулж буй мессэжийг аваад иргэд өөрсдөө ч манай байгууллагад хандаж ирэх тохиолдол ихэсч байна.

-Хоёр жилийн хугацаанд 1,000 гаруй хүний амь нас, эрүүл мэндийг хамгаалжээ. Тэгвэл гэр бүлийн хүчирхийллийн нөхцөл шалтгааныг судалж, урьдчилан сэргийлэх, асуудлыг шийдвэрлэхийн тулд ямар ажил хийж байна вэ?

-Гэр бүлийн хүчирхийллийн улмаас үйлдэгдэж байгаа гэмт хэрэг, зөрчил нь гэр бүлийн хүрээнд үйлдэгддэгээрээ онцлог юм. Гэр бүлийн хүчирхийлэл үйлдэгдэхэд нөлөөлж буй маш олон шалтгаан бий. Архидалт, ядуурал, ажилгүйдэл, хардалт зэргээс ихэвчлэн шалтгаалж байгаа хэдий ч цаад үндсэн шалтгаан нь хувь хүний суурь хүмүүжил, зан чанартай маш их холбоотой гэдэг нь олон улсын байгууллагуудын олон жилийн тандалт судалгаагаар тогтоогдсон байдаг.

Мөн үйлчлүүлэгчдийн сэтгэл санааны байдал, айдас түгшүүрийн түвшин зэргийг манай сэтгэл зүйчид судалдаг. Гэмт хэрэг, зөрчлийн мэдээлэл судалгаанаас харахад, хүчирхийлэл үйлдэгчдийн дийлэнх нь эрчүүд, тэр дотроо нөхөр, хамтран амьдрагч, хойд эцэг, хүргэн нь байдаг. Хувь хүнийхээ үүднээс харахад, манай эрчүүд, залуучууд ухамсар, ухаан муутай, багахан зэргийн амьдралын бэрхшээлийг даван туулах сэтгэлийн хатгүй, бэлэнчлэх сэтгэлгээтэй, сэтгэл зүйн хувьд гутранги байдалд орсон нь харагддаг. Энэ байдлаасаа болж бухимддаг, архи ууж сатаардаг, тэр чинээгээрээ гэр бүлдээ сөрөг хандлагыг бий болгож байгаа юм. Хэн нэгэнд найдаж хүлээх бус өөрөө эхнэр хүүхэд, ар амьдралаа өөд нь татаж явах ёстой эр хүн гэдгээ ойлгох хэрэгтэй гэж бодогддог.

Гэр бүлийн хүчирхийллийг зөвхөн эхнэр, нөхөр, хамтран амьдрагчийн хоорондын асуудал гэж ойлгох нь учир дутагдалтай юм. Төрсөн болон хойд, хадам эцэг, эх, төрсөн ах эгч, дүү нарын хооронд ч бас хүчирхийлэл үйлдэгдэж байдаг. Гэр бүлийн хүчирхийлэл нь хэн нэгэн хүний ганц нэг удаагийн санамсаргүй, тохиолдлын үйлдэл бус, харин тодорхой зорилгод хүрэх үүднээс төлөвлөгдсөн хэрэг.

Хохирогч нь хүчирхийлэл үйлдэгчийн хяналтад байдгаас ихэнх тохиолдолд давтагдан үйлдэгдэж, улам даамжирч байдаг онцлогтой. Олон улсын эрх зүйн актад гэр бүлийн хүчирхийллийг эрүүгийн талаас нь ойлгож, энэ хэрэг дээр илүү анхаарал хүч тавьж, идэвхтэй үйл ажиллагаа явуулдаг жишиг байдаг. Нийгмийн үзэгдлийнх нь хувьд ангилж үзэх юм бол энэ төрлийн гэмт хэрэг хамгийн хүнд, хор уршигтай нь. Гэмт хэрэг үйлдэгдэж байгаа нь тухайн гэр бүл дэх хүчирхийлэл туйлдаа хүрч байна гэсэн үг юм.

-Танай байгууллага ямар утсаар дуудлага хүлээн авч үйлчилж байна вэ. Орон нутгаас хандах тохиолдол байдаг болов уу?

-Хууль зүйн яамны дэмжлэгтэйгээр түр хамгаалах байранд тусгай дугаарын 107 утсыг 2014 оны аравдугаар сараас эхлэн 24 цагаар ажиллуулж байна. Ингэснээр тусламж үйлчилгээ шаардлагатай байгаа иргэд маань үнэ төлбөргүй утсаар холбогдон хамгаалах байрны тухай болон хүчирхийллийн талаарх мэдээлэл, зөвлөгөө авдаг болсон.

Манай байгууллагад энэ гурван жилд биеэр болон утсаар хандан зөвлөгөө, мэдээлэл авсан нийт 5,317 иргэн байгаагаас 107 тусгай дугаарын утас руу 4,800 хүн холбогдсон байдаг. Зөвхөн Улаанбаатар хотоос ч бус хөдөө орон нутгаас ч бас хүмүүс ярьж зөвлөгөө авдаг.

“Малын бэлчээр дээрээсээ ярьж байна. Хадам эцэг, эх дарамтлаад байна. Ийм асуудал гарлаа, би хаана хандаж болох вэ” гэх мэтээр холбогддог. Зарим тохиолдолд үйлчлүүлэгч маань овог, нэр, хаяг, байршлаа хэлэхгүйгээр бидэнтэй холбогдож зөвлөгөө авдаг. Үйлчлүүлэгч зөвшөөрвөл бид харьяа аймгийн цагдаагийн газар, хэлтэстэй нь холбогдож мэдээллийг дамжуулж, холбон зуучилж ажиллаж байна.

-Сэтгэл зүйн шинэлэг үйлчилгээг нэвтрүүлэх тал дээр ямар ажил хийж байгаа вэ. Мөн ээжийгээ дагаад Түр хамгаалах байранд ирсэн хүүхдүүдийн хичээл, сургуулийг хэрхэн зохицуулж байна?

-Сэтгэл зүйчид маань утсаар болон биеэр тусламж үзүүлж байгаа. Ирсэн үйлчлүүлэгчдийг сэтгэл зүйн сорилд оруулж, тайвшруулах дасгал, трейнинг хийлгэж байна. Манайд сэтгэл заслын үйлчилгээ зайлшгүй шаардлагатай байгаа учир Монгол Улсын Боловсролын их сургуулийн Сургалтын албанаас үнэ төлбөргүй сургалтад хамруулахаар болсон.

Мөн Улаанбаатар их сургуулийн болон Хууль сахиулахын их сургуулийн багш нар манай үйлчлүүлэгчдэд сэтгэлзүйн болоод хууль, эрх зүйн зөвлөгөө өгч байгаа. Манайд ээжийгээ дагаад давхар хүчирхийлэлд өртсөн хүүхдүүд их ирдэг. Бэлгийн хүчирхийлэлд өртсөн 10 орчим хүүхэд ирж байсан.

Хамгаалалтад авагдсан ерөнхий боловсролын сургуулийн сурагчдын хичээл нь орхигдох гээд байдаг тул бид үйлчлүүлэгч зөвшөөрвөл сургуулийнх нь нийгмийн ажилтан, багш нартай холбогдож хичээл, даалгаврыг нь авч хийлгэдэг. Мөн Хан- Уул дүүргийн Насан туршийн боловсролын төвтэй хамтран ажиллах гэрээ байгуулан, хүүхэд, эмэгтэйчүүдийг төрөл бүрийн сэдвээр сургалтад хамруулж байна.

Үндсэн хуулийн цэцийн есдүгээр сарын 28-ны өдрийн дунд суудлын хуралдаанаар Монгол Улсын шүүхийн тухай хуулийн холбогдох заалт Үндсэн хууль зөрчсөн эсэх тухай маргааныг хянан хэлэлцсэн.

Уг хуулийн 31 дүгээр зүйлийн 31.6 дахь хэсэгт хяналтын шатны шүүх хуралдаанд олонхтой санал нийлээгүй шүүгч өөрийн саналаа тусгай санал болгон шүүхийн шийдвэрт хавсаргах, тусгай саналыг заавал нийтлэхээр үүрэгжүүлэн хуульчилсан юм. Энэ нь Үндсэн хуулийн шүүгч хараат бус байж, гагцхүү хуульд захирагдах; шүүх хэрэг, маргааныг хамтын зарчмаар хянан шийдвэрлэх талаарх заалтыг зөрчсөн гэж үзэж, аравдугаар дүгнэлт гаргасан юм.

Үндсэн хуулийн цэцийн дээрх дүгнэлтийг Улсын Их Хурал хэлэлцээд хүлээн зөвшөөрөх боломжгүй гэж үзэж, аравдугаар сарын 6-ны өдөр 50 дугаар тогтоол гаргасан байна.

Иймд уг маргааныг эцэслэн шийдвэрлэх Үндсэн хуулийн цэцийн их суудлын хуралдаан маргааш 9.30 цагаас Үндсэн хуулийн цэцийн хуралдааны танхимд нээлттэй болох юм байна.

Улсын онцгой комисс өнөөдөр хуралдлаа. Улсын онцгой комиссын хуралдаанд ХХААХҮ-ийн сайд П.Сэргэлэн мэдээлэл хийсэн юм. Тэрбээр мэдээлэлдээ:

-Мал аж ахуйн салбарын өвөлжилт, хаваржилтын бэлтгэл хангах хүрээнд Засгийн газрын тогтоол, ХХААХҮ-ийн сайдын албан даалгавар, түүнийг хэрэгжүүлэх бүх аймгийн Засаг даргын захирамж, аймгийн Онцгой комиссын захирамж, бэлтгэл хангуулах төлөвлөгөө боловсруулан ажиллаж улсын хэмжээнд дүн, тайлан нэгтгэгдэн гарлаа.

Энэ жил улсын хэмжээнд нийт 153.1 мянган малчин өрхөд 60.8 сая, хонин толгойд шилжүүлснээр 100.4сая толгой малыг өвөлжүүлэх бэлтгэл ажлын зохион байгуулалт хийгдлээ. Өвөл хаврын бэлчээрийн даацын судалгаагаар нийт нутгийн 80.0 хувь нь бэлчээр хүрэлцээтэй, 20.0 хувь нь хүрэлцээ муутайгаас орон нутгийн ЗДТГ отор хийж өвөлжих өрх, малын тоог тохиролцон гэрээ байгуулан сум дундын отрын бүс нутаг, аймаг, дундын тусгай хэрэгцээний отрын бүс нутаг, хилийн зурвас газар, улсын тусгай хамгаалалттай бүс нутагт нийт 16460 өрхийн 6.9 сая мал отроор өвөлжиж, хаваржихаар байна.

Энэ жилийн хадлан бэлтгэх ажилд 7101 дугуйт трактор, 5806 бага оврын тракторууд дагалдах хэрэгслийн хамт, 621 хаман боогч, 1000 морин хадуур, 5000 гар болон хөдөлгөөнт хадуур, тармуур ажиллаж Малчдын түвшиндөвс 1.1 сая тн, сүрэл 35.8 мянган тн, ногоон тэжээл 22.3 мянган тн, үйлдвэрийн тэжээл 27.1 мянган тн, гар тэжээл 38.1 мянган тн, дарш 8.0 мянган тн, давс, хужир 105.6 мянган тн бэлтгэгдлээ.

Засгийн газрын тогтоолоор аймаг, нийслэл, сум, дүүргийн өвс, тэжээлийн аюулгүйн нөөцөд 32.0 мянган тн өвс, 13.1 мянган тн тэжээл бэлтгэх үүрэг даалгавар өгснөөс 20.4 мянган тн өвс, 4.5 мянган тн тэжээл бэлтгэсэн нь аймгийн түвшинд 75.9 хувь, сумдын түвшинд 50.7 хувиар биелүүлсэн хангалтгүй байгаа бөгөөд аюулгүйн нөөц бэлтгэх хөрөнгөгүй байгаатай холбон тайлбарлаж байна хэмээлээ.

Энэ онд улсын төсвийн 745.1 сая төгрөгөөр 42, гадаадын төсөл, хөтөлбөрийн 371.3 сая төгрөгөөр 27, орон нутгийн төсвийн 2.8 тэрбум төгрөгөөр 259 инженерийн хийцтэй худаг хийжээ. Мөн малчдын санаачлагаар 354 гар худаг, нийт 682 худаг гаргасан нь 775.2 мянган га бэлчээр, 2.7 мянган малчин өрх, 1.9 сая малын усан хангамжийг нэмэгдүүлсэн байна. Энэ онд бодын 1157, богийн 2042 хашаа саравч шинээр барьж, улсын хэмжээнд бодын 57353 хашаа, богийн 125807 хашаа байгаа нь хашааны хангамж 97.1 хувьтай байгаа аж.

Бэлчээрийн ургамлыг хамгаалах арга хэмжээний хүрээнд хөнөөлт царцаатай тэмцэх ажлыг хоёр аймагт 45.1 мянган га талбайд, үлийн цагаан оготнотой тэмцэх ажлыг 10 аймгийн 525.0 мянган га бэлчээрийн талбайд байгаль орчинд халгүй энгийн механик аргаар зохион байгуулжээ. Энэ ажлын үр дүнд бэлчээрийн даац багтаамжийг нийт 570.1 мянган га-аар нэмэгдүүлэх боломжийг бүрдүүлсэн байна. Мал аж ахуйн салбарын өвөлжилт, хаваржилтын бэлтгэл ажлыг малчдын өвс, тэжээл бэлтгэл, аймаг, сумын өвс, тэжээлийн аюулгүйн нөөц бүрдүүлэлт, ус, хашааны хүрэлцээ хангамж, малчин өрхийн бэлтгэл зэрэг үндсэн үзүүлэлтүүдээр дүгнэхэд улсын хэмжээнд 82.8 хувьтай хангажээ.

Хөвсгөл аймгийн Түмэн сумын
Цэнгэл нууранд шатахуун тээвэрлэх зориулалттай машин осолдсон байна. Осол
өнөөдөр өглөө 09.00 цагийн үед гарчээ.

Осолдсон машин 5 тонн шатахуун ачих боломжтой бөгөөд осол гарах
үед шатахуун тээвэрлээгүй явжээ. Хэргийн газарт хүний амь эрсдээгүй болохыг
Улсын онцгой комиссоос мэдээллээ.

Хөвсгөл аймгийн Онцгой байдлын газраас осол болсон хэсэгт
аврагчдыг томилон ажиллуулж, арга хэмжээ авсан байна.

Эх орны аюулгүй байдлыг сахин хамгаалахад хүн нэг бүрийн оролцооноос эхлээд аюулгүй байдлыг хангах тусгайлсан чиг үүрэг бүхий байгууллагуудын оролцоо чухал. Тэгвэл тэдгээр байгууллагуудын удирдах ажилтан, аюулгүй байдлын судлаач нарт тусгайлан зориулсан “Аюулгүй байдал-стратеги”-ийн сургалт 2016-2017 оны сургуулийн жилд хичээллэхээр өчигдөр /11.14/ нээлтээ хийлээ.

Нээлтийн ажиллагаанд БХЯ-ныТЗУГ-ын газрын дарга хошууч генерал З.Болдбаатар болон БХИС-ийн Эрдэм шинжилгээ нийгмийн түншлэл хариуцсан дэд захирал хурандаа П.Жаргалан, Батлан хамгаалах Удирдлагын академийн захирал бригадын генерал Н.Энхбаялаг, Боловсрол, сургалтын хэлтсийн дарга хурандаа Н.Наранжамц нар оролцлоо.

Батлан Хамгаалахын Их Сургуулийн Батлан Хамгаалах Удирдлагын Академийг түшиглэн явуулдаг тус дамжаа энэ жил шинэчлэн боловсруулсан сургалтын хөтөлбөрийн дагуу хичээллэнэ. Түүнчлэн сургалтын хөтөлбөрт УИХ-ын Аюулгүй байдал, гадаад бодлогын байнгын хороо, БХЯ, ХХЕГ, ОБЕГ зэрэг аюулгүй байдлыг хангах тусгайлсан чиг үүрэг бүхий байгууллагуудын үйл ажиллагаатай танилцах стратегийн аялал зохион байгуулагдана.

Өрхийн нийгэм эдийн засгийн энэ оны гуравдугаар улирлын судалгаагаар нэг өрхийн сарын дундаж мөнгөн орлого 853.3 мянган төгрөг болжээ. Энэ нь өмнөх оны мөн үеэс 84 мянган төгрөгөөр буюу 9 хувиар буурсан үзүүлэлт юм. Үүнд цалин хөлсний орлого 28 мянган төгрөгөөр, хөдөө аж ахуйн үйлдвэрлэлийн орлого 37.7 мянган төгрөгөөр буурсан нь голлох үзүүлэлт болжээ.

Энэ оны 3 дугаар улиралд өрхийг мөнгөн орлого, зарлагаар бүлэглэн авч үзвэл:

300 мянган төгрөгөөс доош орлоготой өрх – 124 мянга

300-500 мянган төгрөгийн орлоготой өрх- 153.3 мянга

500-900 мянган төгрөгийн орлогото өрх- 273 мянга

Үүнээс дээш орлоготой өрх- 31.9 мянга байна.

2015 оны энэ үетэй харьцуулахад манай улсад 500 мянган төгрөгөөс доош орлоготой өрхийн тоо 33 мянгаар нэмэгджээ.

Энэ сарын 13-нд Шинэ Зеландад 10 км-ийн гүнд 7.8 баллын хүчтэй газар хөдлөлт болж, Өмнөд арлын зүүн эрэг дагуу аврах ажиллагаа явуулж, оршин суугчдыг нүүлгэн шилжүүлсэн байна. Харин тус улсад амьдарч буй монголчууд уг газар хөдлөлтөд өртсөн эсэх талаар ГХЯ-наас тодруулахад “Шинэ Зеланд Улсад 2016 оны 11 дүгээр сарын 13-нд болсон газар хөдлөлт болон газар хөдлөлтийн дараах чичиргээнд тус улсад сурч, ажиллаж, амьдарч буй монгол иргэд өртөөгүй болохыг Канберра дахь ЭСЯ-наас мэдэгдэв” гэлээ.

“Ойрхи дорнод болон Азид уур амьсгалын өөрчлөлтөөс үүдсэн аюулгүй байдалд тулгарч буй сорил” сэдэвт чуулга уулзалт боллоо

Франц улсын Парис хотноо энэ сарын 01-11-ний өдрүүдэд “Ойрхи дорнод болон Азид уур амьсгалын өөрчлөлтөөс үүдсэн аюулгүй байдалд тулгарч буй сорил” сэдэвт 12 дахь удаагийн чуулга уулзалт боллоо.

Афганистан, Саудын Араб, Бахрин, Бруней, Канбож, БНХАУ, Өмнөд Солонгос, Арабын Нэгдсэн Эмират, Энэтхэг, Индонез, Иран, Ирак, Япон, Кувэйт, Филлипин, Сингапур, Вьетнам, Йемен зэрэг 24 орны 30 гаруй төлөөлөгч оролцсон уг чуулга уулзалтад Монгол Улсаа төлөөлөн Батлан хамгаалахын яамны Гадаад харилцааны хэлтсийн дарга, бригадын генерал Ч.Сосорбарам, ОБЕГ-ын тэргүүн дэд дарга бөгөөд штабын дарга, онцгой байдлын хурандаа П.Баттогтох нар оролцоод ирлээ.

Тус чуулганд Францын Батлан хамгаалах яам, Гадаад хэргийн яам, Европын Холбоо, Европын комиссын Уур амьсгалын асуудал хариуцсан голлох мэргэжилтнүүд, Парисын Их сургуулийн тэргүүлэх судлаачид, Эрдэм шинжилгээний хүрээлэнгийн захирлууд, Парис хотын Сенаторууд оролцож мэдээлэл хийсэн байна.

Түүнчлэн чуулганы төлөөлөгчид өдөрт 1-2 удаагийн мэдээллийг онолын хэлбэрээр сонсож, “Уур амьсгалаас үүдэлтэй шилжилт хөдөлгөөн, байгалийн баялаг, газар нутгийн төлөөх өрсөлдөөн нь бодит уу? Хэтрүүлэг үү?”, “Бэлэн байдлын хүчин чадалд үзүүлэх нөлөө, аюулгүй байдлын стратегийг хэрхэн зохицуулах тухай”, “Уур амьсгалын өөрчлөлтийг тогтворгүйжүүлж буй хүчин зүйлсийн эсрэг бүс нутаг болон олон улс хамтран ажиллах нь” гэсэн ажлын гурван хэсэгт хуваагдан өөр, өөрийн улс орон, бүс нутагт уур амьсгалын өөрчлөлтөөс үүдэн гарч буй асуудлуудаар харилцан мэдээлэл хийж ажилласан аж.

ОБЕГ-ын тэргүүн дэд дарга бөгөөд штабын дарга, онцгой байдлын хурандаа П.Баттогтохын хувьд “Уур амьсгалаас үүдэлтэй шилжилт хөдөлгөөн, байгалийн баялаг, газар нутгийн төлөөх өрсөлдөөн нь бодит уу? Хэтрүүлэг үү?” гэсэн ажлын нэгдүгээр хэсэгт, Батлан хамгаалахын яамны Гадаад харилцааны хэлтсийн дарга, бригадын генерал Ч.Сосорбарам “Уур амьсгалын өөрчлөлтийг тогтворгүйжүүлж буй хүчин зүйлсийн эсрэг бүс нутаг болон олон улс хамтран ажиллах нь” гэсэн ажлын гуравдугаар хэсэгт орж ажиллаж, мэдээлэл хийжээ.

Мөн ОБЕГ-ын тэргүүн дэд дарга бөгөөд штабын дарга, онцгой байдлын хурандаа П.Баттогтох чуулганд оролцох явцдаа Францад суугаа элчин сайд М.Батсайхан, Элчин сайдын яамны зөвлөх У.Нямхүү нартай уулзаж, Онцгой байдлын албаны талаар мэдээлэл хийж, цаашдын хамтын ажиллагааг өргөжүүлэх талаар санал солилцлоо.