Month: November 2016

Нийслэлийн Засаг даргын захирамжаар байгуулагдсан Нийслэлийн онцгой комисс өнөөдөр хуралдаж, Улаанбаатар хотын гамшгийн нөхцөл байдалтай танилцлаа.

НОБГ-ын дарга, Нийслэлийн онцгой комиссын орлогч дарга Н.Уламбаярын танилцуулснаар Улаанбаатар хотод 2016 оны эхний 10 сарын байдлаар 2525 удаагийн аюулт үзэгдэл, ахуйн болон техникийн холбогдолтой осол гарчээ. Үүнээс 2115 удаагийн дуудлага буюу 83 хувийг обьектын гал түймэр, 0.3 хувийг ой хээрийн түймэр, 16 хувийг ахуйн болон техникийн холбогдолтой осол эзэлж байна. Осол болон гал түймрийн улмаас 24 хүн амь насаа алдаж, 15 хүн түлэгдэж, 126 хүн бэртэж гэмтсэнээс гадна 3.3 тэрбум төгрөгийн хохирол учирчээ. Гэр хороололд зонхилон обьектын гал гарсан байна. Ой хээрийн түймрийн хувьд энэ онд 3 удаа түймэр гарсан нь өмнөх оны мөн үеэс 88.8 хувиар буурчээ.

Үерийн аюулт үзэгдлийн хэмжээнд хүрсэн аадар бороо энэ онд 11 удаа орсон байна. Өнөөдрийн байдлаар үерийн аюултай бүсэд 2500 гаруй өрх зөвшөөрөлгүй суурьшиж байгаа юм. Урин дулаан цагт усны ослын дуудлага нэмэгддэг. Энэ онд гэхэд 28 удаагийн усны осол бүртгэгдсэн байна.

Өнөөдрийн байдлаар нийслэл хотод гамшгийн нөхцөл байдал тайван байгаа ч цаг агаар хүйтэрч, галлагааны улирал эхэлсэнтэй холбоотойгоор гал түймрийн дуудлага нэмэгдэх хандлагатай байгааг онцгой комиссын даргад дуулгалаа.

Нийслэлийн Засаг дарга бөгөөд Улаанбаатар хотын захирагч, Нийслэлийн онцгой комиссын дарга С.Батболд онцгой комиссын гишүүдэд шуурхай байдлыг хангаж ажиллах, шаардлагатай үед хариуцсан алба, салбараа нэгдсэн удирдлагаар хангаж ажиллахыг үүрэг болголоо

Нийслэлийн Засаг дарга бөгөөд Улаанбаатар хотын захирагч С.Батболд “Нийслэлийн иргэдийг гамшгаас хамгаалах сургалт, арга зүйн төв”-ийн үйл ажиллагаатай танилцлаа.

Нийслэлийн төсвийн хөрөнгө оруулалтаар барьж, 2016 оны 6 дугаар сарын 20-нд ашиглалтад хүлээн авсан энэ төв нийслэлийн хүүхэд багачууд, оюутан залуус, иргэдэд гамшиг ослын үед хэрхэн өөрийгөө болон бусдыгаа авран хамгаалах мэдлэг мэдээлэл олгох зорилготой юм.

Сургалт, арга зүйн төвийн барилга нь хичээлийн 7 танхимтай, эмнэлгийн анхны тусламж үзүүлэх, утаат орчноос аврах ажиллагааны дадлага хийх, өндрөөс аврах үйл ажиллагааны танхим, гал унтраах багаж хэрэгсэл ашиглах танхим, хүүхдүүдэд зориулсан аюул, ослоос хамгаалах танхим, газар хөдлөлтийн тусгай тоноглол бүхий танхим, үзвэрийн ЗD бичил кино театр, номын сан, нийслэлийн Онцгой комиссын хуралдааны танхим, бага хурлын танхимтай. Мөн албаны бэлтгэл бэлэн байдлыг хангуулах зориулалттай 7 айлын албаны орон сууц, дуудлагын автомашины тавиулан бүхий гамшгаас хамгаалах сургалт, дадлага зохион байгуулах Сургалт арга зүйн төв болон гамшиг, ослын дуудлагаар ажиллах Аврах анги хосолсон иж бүрэн цогцолбор байгууламж юм.

Нийслэлийн Засаг дарга бөгөөд Улаанбаатар хотын захирагч С.Батболд “Олон улсын стандартад нийцсэн энэ төв газар хөдлөлт, гал түймэр, ахуйн ослын үед хэрхэн ажиллах мэдлэгийг иргэдэд олгох зориулалттай. Ирэх оны эхээр нийслэлийн Ерөнхий боловсролын болон их дээд сургуулиуд, албан байгууллагуудтай гэрээ хийгээд, байнгын сургалт зохион байгуулна. Гамшиг осол байнга дэргэд байдаг гэдгийг манай иргэд санаж явах хэрэгтэй. Ялангуяа хүн ам ихээр төвлөрсөн том хотын хувьд гамшиг ослын бэлэн байдлыг үргэлж хангах шаардлагатай. Гамшиг ослын үед гарах хохирлыг бууруулахад иргэдийн мэдлэг чухал. Тиймээс энэ төв байгуулагдсанаар гамшгийн хор хохирлыг бууруулах ач холбогдолтой гэж харж байна” гэлээ.

Нийслэлийн иргэдийг гамшгаас хамгаалах сургалт, арга зүйн төв өнөөдрийн байдлаар 750 мянган гаруй иргэнийг сургалт, дадлагад хамруулсан байна.

Дархан-Уул аймгийн Хонгор сумын хоёрдугаар багийн нутаг Зулзагийн голд намаржиж буй тус багийн малчин Г.Батсүх нь “Хөшөөтэй толгой” хэмээх газарт малаа хариулж яваад палеонтологийн олдвор олсон тухай тус аймгийн ЗДТГ-аас мэдээллээ.

Тэрбээр энэ тухайгаа аймгийн Музейн захиргаанд мэдээллэж, тус музейн Эрдэм шинжилгээний ажилтан Б.Уранцэцэг, Байгалын музейн санч Г.Энхбаяр, Улаанбаатар хотын Палентологийн Хүрээлэнгийн мэргэжилтэн С.Өлзийцэрэн, Д.Жаргалсайхан, Хонгор сумын хэсгийн төлөөлөгч С.Уламбадрах нарын бүрэлдэхүүнтэй ажлын хэсэг олдвор олдсон газарт ажиллажээ.

Уг олдвор нь: 80 см урт, 35 см өргөн Хирс хэлбэртэн эртний мөхсөн хөхтөн амьтан-Rhinocerotoidae амьтны толгойн яс, тухайн толгойн яснаас салсан найман ширхэг шүд, долоон ширхэг ясны хэсэг болон өөр хирс хэлбэртэн амьтаны дагзны ясны хэсэг байсан байна. Олдворыг газар дээр нь бэхжүүлж судалгаа хийж сэргээн засварлуулахаар палеонтологийн хүрээлэн рүү хүргүүллээ гэж аймгийн Музейн ЭША Б.Уранцэцэг ярилаа.

Төрийн Өмчийн Бодлого Зохицуулалтын Газраас мэдээлэл хийлээ.

“Эрдэнэт” -ийн шинэ хувьцаа эзэмшигч буюу Mongolian Copper Corporation-н талаас ТУЗ-ийн гишүүнээр Да.Ганболд, О.Орхон, М.Мөнхбаатар нарыг томилжээ.

ТУЗ-ын даргаар ЗГХЭГ-ын дэд дарга Бямбасүрэнг томилжээ.

Харин “Эрдэнэт” үйлдвэрийн Ерөнхий захирлыг Төрөөс томилох аж.

Засгийн газрын буюу нийт хувьцааны 51 хувийг эзэмшигч талын У.Бямбасүрэн, Г.Нандинжаргал, Д.Дэмбэрэл, Н.Доржсэмбэд нарын дөрвөн хүн төлөөлж байгаа юм. Ингэснээр “Эрдэнэт Үйлдвэр” ХХК-ийн ТУЗ долоон гишүүний бүрэлдэхүүнтэй болж байна.

Өндөрхаан-Чойбалсан чиглэлийн 78 км автозамыг ашиглалтад орууллаа. Тус чиглэлийн 143 км хатуу хучилттай автозамыг нийт зургаан компани өнгөрсөн оноос эхлэн хэсэгчлэн гүйцэтгэж байгаа юм. Эхний ээлжинд “Бадрах Ойл” ХХК, “Арж капитал” ХХК-ийн хийж гүйцэтгэсэн зам ашиглалтад орсон байна. Харин үлдсэн замын ажлыг гүйцэтгэх шатандаа явж байгаа аж. Тодруулбал, “Өвөр залаат” ХХК-ийн 23 км болон “Насны зам” ХХК-ийн 27 км автозамын хучилтын ажил дуусах шатандаа явж байгаа бөгөөд удахгүй хүлээлгэн өгөхөөр төлөвлөгдөж байгаа аж. Харин “Хансуун зам” ХХК-ийн барьж буй 14 км автозам суурийн ажлын шатандаа явж байгаа юм байна.

Энэ сарын эхний 10 хоногийн сүүлч болон хоёрдугаар 10 хоногт хүйтэрнэ. Цаашлаад хугацааны сүүл хэсгээр хүйтний эрч чангарч Алтай, Хангай уулархаг нутгаар шөнөдөө -31-360, өдөртөө 19-24 хэмийн хүйтэн байна. Алтайн өвөр говь болон говийн аймгуудын нутгаар шөнө 19-20, өдөртөө 8-13, бусад нутгаар шөнөдөө 15-20, өдөртөө 10-15 хэм хүйтэрнэ.

Ирэх бямба гарагаас буюу 5,6-ны өдрүүдэд ихэнх нутгаар цастай. Зарим газарт салхи ширүүсэж, цас болон шороогоор шуурна. Энэ сард ихэнх нутгаар олон жилийн дунджаас бага болон дунджийн орчим цас орно.