Month: November 2016

ЦЕГ-ын тусгай ангийн алба хаагчдад холбогдох хэргийн давж заалдах шатны шүүх хурал өнөөдөр болох байсан ч прокурор ирээгүй гэх үндэслэлээр хойшилсон тухай эх сурвалж мэдээллээ.

Одоогоос нэг жилийн өмнө буюу 2015 оны аравдугаар сард ЦЕГ-ын тусгай хэлтсийн таван ажилтан архи уун согтуурхаж, хоорондоо зодолдон, улмаар нэгнийхээ аминд хүрсэн хэрэг гарсан байдаг.

Хохирогч болох Элитийн батальоны дэдахлагч н.Ууганбаатар зодооны үеэр амиа алдсан бол нэг цагдаагийн алба хаагч тухайн үед хүнд гэмтэл авч, эмнэлэгт хүргэгдэж байсан юм.

Уг хэргийг прокурорын байгууллагаас хянаж үзээд, шүүгдэгчдийг Эрүүгийн хуулийн тусгай ангид зааснаар буюу танхайн сэдэлтэйгээр, догшин авирлаж, бүлэглэн бусдад хохирол учруулсан гэж буруутган, яллах дүгнэлт үйлдэх саналаа Баянзүрх, Сүхбаатар, Чингэлтэй дүүргийн Эрүүгийн хэргийн анхан шатны шүүхэд хүргүүлсэн байна.

Анхан шатны шүүхээс нийт гурван хүнд буюу н.Цэрэнчимэдийг Эрүүгийн хуулийн 91.2.2-т заасан зүйл ангиар буруутгаж, чанга дэглэмтэй хорих ангид 20 жил, н.Төмөрбаатар, н.Батзориг нарыг жирийн дэглэмтэй хорих ангид тус бүр 3.1 жилийн ял эдлүүлэхээр шийдвэрлэжээ. Анхан шатны шүүх хурал нийтдээ арав гаруй удаа хойшлогдсоны дараа дээрх шийдвэрийг гаргасан. Гэвч шүүхийн шийдвэр хүндэдсэн гэх үндэслэлээр шүүгчдэгчид давж заалдахаар гомдол гаргасан тул өнөөдөр уг хурлыг зарлаад байсан юм.

Хууль зүй, дотоод хэргийн яамны Төрийн нарийн бичгийн дарга Г.Баясгалан БНХАУ-ын ӨМӨЗО-ны Нийгмийг аюулаас хамгаалах тэнхимийн орлогч дарга Лян Шяопин тэргүүтэй төлөөлөгчдийг өнөөдөр хүлээн авч уулзлаа.

Уулзалтын үеэр Төрийн нарийн бичгийн дарга Г.Баясгалан хоёр улсын цагдаагийн байгууллагын харилцаа жилээс жилд өргөжин тэлж байгааг онцолсон юм. Монголын цагдаагийн ерөнхий газар, ОМӨЗО-ны Нийгмийг аюулаас хамгаалах тэнхим хамтран 2015 онд терроризмтой тэмцэх чиглэлээр “Бүргэд 2015”, хар тамхи, мансууруулах бодистой тэмцэх хүрээнд хамтарсан дадлага сургалт зохион байгуулж байсан юм. Харин БНХАУ-ын ӨМӨЗО-ны Нийгмийг аюулаас хамгаалах тэнхимийн орлогч дарга Лян Шяопин энэ удаагийн айлчлалаар Цагдаагийн ерөнхий газар 8, ХЗДХЯ 2 ширхэг цагдаагийн машин бэлэглэж буйгаа хэлсэн юм. Түүнчлэн Хууль зүй, дотоод хэргийн яамны удирдлагуудыг БНХАУ-ын ӨМӨЗО-нд айлчлахыг урилаа.

Сум, дүүргийн 2016 оны ИТХ-ын сонгуулиар Баянзүрх дүүрэгт Ардчилсан нам 41 мандатаас 22 төлөөлөгч сонгогдсоноор олонхи болж ялалт байгуулсан билээ.

Өнөөдөр Дүүргийн ИТХ-ын анхдугаар хуралдаан болж, сонгогдсон төлөөлөгчдөд үнэмлэх, энгэрийн тэмдгийг нь гардууллаа. Мөн хуралдаанаар төлөөлөгч Ш.Ганчимэг дүүргийн ИТХ-ын даргаар олонхийн саналаар сонгогдсон байна. Харин дүүргийн Засаг даргад төлөөлөгчдийн 100 хувийн саналаар төлөөлөгч Д.Пүрэвдавааг дэмжин, Нийслэлийн Засаг даргад түүний нэрийг өргөн барихаар тогтжээ.

Түүнчлэн Баянзүрх дүүргийн анхдугаар хуралдаанаар дүүргийн ИТХ-ын тэргүүлэгчээр төлөөлөгч Ш.Ганчимэг, Ц.Батхүү, Э.Эрдэнэ, Х.Эрдэнэсайхан, М.Далайцэрэн, Э.Хатанбаатар, Л.Батдэлгэр нарыг сонгон олонхийн саналаар баталгаажуулсан байна.

Дашрамд мэдээлэхэд, тус дүүргийн ИТХ-ын анхдугаар хуралдаан өчигдөр буюу 2016.11.02 өдөр зарлагдсан боловч МАН-ын 19 төлөөлөгч болон тус намыг дэмжигч нарын дэгдээсэн үймээн, эмх замбараагүй байдлаас үүдэн хойшилсон аж. Харин өнөөдөр 15.00 цагт зарлагдсан анхдугаар хуралдаанд МАН-аас сонгогдсон 19 төлөөлөгч ирээгүй учир олонхийн буюу 53,6 хувийн ирцтэйгээр хуралдаанаа хийж, дээрх шийдвэрүүдийг гаргасан байна.

Улсын Их Хурлын гишүүн,
Төрийн байгуулалтын байнгын хорооны дарга Н.Энхболд, УИХ дахь Монгол-Буриадын
парламентын бүлгийн дарга Н.Оюундарь нар өнөөдөр /2016.11.03/ ОХУ-ын Бүгд
Найрамдах Буриад Улсын Засгийн газрын сайд, Буриад Улсаас Монгол Улсад суугаа Төлөөлөгчийн
газрын дарга Будажапов Сергей Пурбуевичийг хүлээн авч уулзлаа.

Уулзалтаар эхэнд ОХУ-ын
Буриад Улсын Засгийн газрын сайд, Буриад Улсаас Монгол Улсад суугаа
Төлөөлөгчийн газрын дарга Будажапов Сергей Пурбуевич хоёр улсын хамтын
ажиллагааг эрчимжүүлэхэд парламент хоорондын харилцаа чухал болохыг онцлов.

УИХ дахь Монгол-Буриадын
парламентын бүлгийн дарга Н.Оюундарь Орос, Монголын харилцаа, хамтын ажиллагаа
улам бүр өргөжин хөгжиж байгаад сэтгэл өндөр байдгаа тэмдэглээд хоёр орны
энэхүү уламжлалт харилцаанд Монгол, Буриадын хамтын ажиллагаа ихээхэн үүрэг
гүйцэтгэсээр ирснийг дурдав.

Мөн хоёр улсын парламент дахь найрамдлын бүлгийн гишүүдийн уулзалт тогтмолжиж ажлын арга туршлага, санал бодлоо байнга солилцдог болж идэвхтэй хамтран ажиллаж байгаа, түүнчлэн хил орчмын бүс нутгийн худалдаа, хамтын ажиллагаа улам өргөжиж байгаа, тэр дундаа Монгол, Буриадын ард түмний уламжлалт нөхөрсөг харилцаа шинэ агуулга, арга хэлбэрээр баяжиж буйг Улсын Их Хурлын гишүүн, Төрийн байгуулалтын байнгын хорооны дарга Н.Энхболд тэмдэглэлээ.

Уулзалтын үеэр талууд хоёр орны улс төр, эрүүл мэнд, боловсрол, аялал жуулчлал, соёл, урлаг, худалдаа, бизнесийн салбарын хамтын ажиллагааны талаар болон цаг үеийн бусад асуудлаар ярилцаж, санал солилцлоо.

ОБЕГ-т Ховд аймагт хүн алга болсон тухай шуурхай дуудлага ирсэн байна. Өнгөрсөн сарын 27-нд гэрээсээ гараад одоо хүртэл сураггүй болсон залууг ар гэрийнхэн нь хайгаад олоогүй байгаа аж. Иймд тус аймгийн онцгой байдлын аврагчдад ханджээ.

Ховд аймгийн Зэрэг сумын Бургас багийн нутаг дахь Хөдөө нуур гэдэг газарт өвөлжиж буй малчин айлын 22 настай залуу алга болсон тул аймгийн цагдаагийн газарт мэдэгдсэн байна. Тус аймгийн Онцгой байдлын газрын 20 албан хаагч, орон нутгийн 44 иргэн оролцсон эрэн хайх ажиллагаа хийснээр алга болсон залуугийн малгайг Хөдөө нуурын эргээс 200-300 метр зайнаас олжээ.

Одоогийн байдлаар тус нуурын ойр орчмыг нь самнан хайж, нууранд 25-30 цооног гаргаж, усны камер тавьж, эрлийг үргэлжлүүлж байгаа аж.