Month: September 2016

УИХ дахь МАН-ын бүлэг өнөөдөр буюу есдүгээр сарын 5-нд хуралдаж дууслаа. Бүлгийн хурлаар МАН-ын бүлгийн дэд дарга нарыг томилох тухай асуудлыг хэлэлцээд, Я.Содбаатар, Д.Саранчимэг нарыг томилсон байна. Мөн бүлгийн хуралдааны өмнө МАН-ын Удирдах зөвлөл хуралдаж, уг асуудлыг хэлэлцсэн юм. Төсвийн тодотгол, Ерөнхийлөгчийн хоригтой холбоотой асуудлыг хэлэлцжээ.

Нийслэлийн Засаг даргын Дэд бүтцийн хөгжлийн асуудал хариуцсан орлогч П.Баярхүү өнөөдөр буюу есдүгээр сарын 5-нд Европын сэргээн босголт, хөгжлийн банкны Лондонд суурьшсан зам тээвэр хариуцсан ахлах банкир болон дэд захирал Виталий Кузнецовтой уулзлаа.

Европын сэргээн босголт, хөгжлийн банк нь Монгол Улстай 20 гаруй жил хамтран ажиллаж, үйл ажиллагаа явуулж байгааг ноён Виталий Кузнецов онцлоод хоёр долоо хоногийн өмнө тус банкны хотын дэд бүтэц хариуцсан банкир Улаанбаатар хотод ирж, Монголын төлөөллүүдтэй уулзсныг хэллээ. Харин энэ удаад тээвэр хариуцсан банкирын хувьд ирсэн гэлээ.

Уулзалтын үеэр Улаанбаатар хотын урдуур тавихаар төлөвлөсөн “”Богд хаан” төмөр зам, Улаанбаатар ложистикийн төв болон хатуу хог хаягдлын менежментийг хэрэгжүүлэх төслийн талаар ярилцлаа.

Европын сэргээн босголт, хөгжлийн банкны Лондонд суурьшсан зам тээвэр хариуцсан ахлах банкир болон дэд захирал Виталий Кузнецов “Бидний хувьд Монгол Улсын Засгийн газар болон Улаанбаатар хотын зүгээс тэргүүлэх чиглэл болгож ирсэн “Богд хаан” төмөр зам, ложистикийн төв гэсэн хоёр төслийг хөгжлийн хувьд ч эдийн засгийн хувьд ч үр өгөөжтэй, хэрэгцээтэй төсөл гэж үзэж байгаа. Харин хэрэгжүүлэх том баг хэрэгтэй гэж харж байна. Танай хотын хувьд энэ төслүүдийг цааш нь хэрэгжүүлэх тал дээр ямар байр суурьтай байгааг сонсмоор байна” гэсэн юм.

Нийслэлийн Засаг даргын дэд бүтцийн хөгжлийн асуудал хариуцсан орлогч П.Баярхүү хэлэхдээ “”Богд хаан төмөр зам” төсөл эдийн засаг, стратегийн хувьд чухал учраас бид цааш үргэлжүүлэхийн төлөө ажиллана. Ложистикийн төвийн ажлыг ч ургашлуулна. Иргэдийн сайн сайхны төлөөх төсөл хөтөлбөрүүдийг бид үргэлжлүүлэх болно гэдгийг онцлон тэмдэглэлээ.

Энэ сарын сүүлээр Европын сэргээн босголт, хөгжлийн банкны дэд Ерөнхийлөгч Улаанбаатар хотод айлчлах болсныг ноён Виталий Кузнецов дуулгаад энэхүү уулзалт маш үр дүнтэй болсныг онцоллоо.

Өнөөдөр буюу есдүгээр сарын 5-нд Ерөнхийлөгч Ц.Элбэгдорж Бразил улсын Рио де Женеро хотноо зохиогдсон зуны олимпийн XXXI наадамд амжилттай оролцож медаль хүртсэн тамирчдыг хүлээн авч уулзлаа. Мөн “Рио-2016” олимпийн чөлөөт бөхийн эрэгтэйчүүдийн 65 кг жинд, хүрэл медалийн төлөө барилдсан Г.Мандахнаран болоод чөлөөт бөхийн дасгалжуулагч Б.Баяраа, Ц.Цогбаяр нарыг хүлээн авч уулзав.

Уулзалтын үеэр Ерөнхийлөгч Ц.Элбэгдорж олимпийн мөнгөн медаль хүртсэн Д.Сумъяа, хүрэл медаль хүртсэн Отгондалай нарт баяр хүргэж цаашдын спортын тэмцээнүүдэд нь амжилт хүслээ. Мөн олимпийн медальтангуудад Ерөнхийлөгчийн зүгээс дурсгалын бугуйн цаг зүүж өглөө.

Үүний дараа Ерөнхийлөгч Ц.Элбэгдорж чөлөөт бөхийн ОУХМ Г.Мандахнаран болоод дасгалжуулагч Б.Баяраа, Ц.Цогтбаяр нарыг хүлээн авч уулзлаа.

Уулзалтын эхэнд Ерөхийлөгч Ц.Элбэгдорж “Та гурвын болсон үйл явдлыг бүгд мэдэж байгаа. Тийм учраас тайлбар хийх шаардлагагүй. Миний хувьд шудрага бус зүйл, хуйвалдаан, авлигалтай монгол хүн хаана ч тэмцэх хэрэгтэй. Монгол Улсын нэр төрийг хамгаалж, нэрийг нь сайнаар гаргахын төлөө тэмцэх хэрэгтэй. Хоёр дасгалжуулагчийн тэр үед гаргасан үйлдэл шудрага бус зүйлийн төлөө тэмцсэн гэж харж байгаа. Та бүхний үйлдэлийг зөв гэж бодож байна. Цаашдаа бөхийн шүүлт, шудрага бус зүйлээс салж спорт хөгжинө. Үнэхээр л ялсан нь ялдаг, ялагдсан нь ялагддаг л байх хэрэгтэй. Олимп гэдэг бол хүн төрөлхтний маш том ололт юм. Ийм учраас энэ ололт муу зүйлээс хол байх ёстой. Хоёр дасгалжуулагчийн тэмцэл биш энэ бол Монгол Улсын тэмцэл байсан. Цаашдаа Г.Мандахнаран маань чөлөөт бөхийн спортоор илүү сайн амжилт гаргахыг ерөөе” гэлээ.

Ерөнхийлөгч Ц.Элбэгдорж олимпийн тамирчид, дасгалжуулагч нарыг хүлээн авч, уулзсан бичлэгийг хүргэж байна.

УИХ дахь МАН-ын бүлгийн хурал өнөөдөр 10.00 цагт товлогдсон боловч хуралдахгүй байсаар дөнгөж сая эхэлжээ. Өнөөдрийн хурлаар төсвийн тодотгол болоод Ерөнхийлөгч УИХ-ын 26 дугаар тогтоолд хориг тавьсан талаар хэлэлцэх юм. Тодруулбал, Ерөнхийлөгчийн хориг тавьсан УИХ-ын 26-р тогтоолд, Эрүүгийн хэрэг хянан шийдвэрлэх тухай, Хууль сахиулах ажиллагааны тухай, Прокурорын байгуллагын тухай, Шүүхийн шийдвэр гүйцэтгэх тухай, Гэр бүлийн хүчирхийлэлтэй тэмцэх тухай хуулиудыг буцаах тухай асуудал багтаж байгаа юм. МАН-ын бүлгийн хурал оройтож эхэлсэн шалтгаан нь өнөөдөр өглөө тус намын Удирдах зөвлөл хуралдаж, төсвийн тодотгол, бүлгийн дэд даргын асуудал зэргийг хэлэлцсэнтэй холбоотой ажээ.

УИХ-ын дарга М.Энхболд өнөөдөр буюу есдүгээр сарын 5-нд Итали улсын Сенатын танхимын гишүүн Антонио Рацци тэргүүтэй төлөөлөгчдийг хүлээн авч уулзлаа.

Уулзалтын эхэнд УИХ-ын дарга М.Энхболд төлөөлөгчдийг Монгол Улсад тавтай зочлохыг хүсээд өнгөрөгч наймдугаар сард Итали улсын төв хэсэгт хүчтэй газар хөдлөлт болж, олон хүний эрдэнэт амь нас хохирсонд хувиасаа болон парламентын нэрийн өмнөөс эмгэнэл илэрхийлэв.

Мөн тэрээр, “Итали улстай тогтоосон харилцаанд манай улс өндөр ач холбогдол өгч, гуравдагч хөршийн нэг хэмээн үздэг. Манай хоёр улсын харилцаа, хамтын ажиллагаа сүүлийн жилүүдэд идэвхтэй хөгжиж байна. Монгол Улсын Ерөнхийлөгчийн Итали улсад хийсэн айлчлал, мөн Италийн Сенатын Ерөнхийлөгч Пиерто Грассогийн Монгол Улсад хийсэн албан ёсны айлчлал үүний тод илэрхийлэл болсон төдийгүй хоёр улсын харилцааг гүнзгийрүүлэхэд өндөр ач холбогдолтой байсан. Хоёр талын харилцаа, хамтын ажиллагааг бүхий л салбарт эрчимтэй хөгжүүлэхэд хууль тогтоох байгууллагуудын уялдаа холбоо чухал үүрэгтэй” хэмээн онцлоод УИХ-ын зүгээс дэмжиж ажиллана гэв.

Итали улсын Элчин сайдын яам Монгол Улсад шинээр нээгдсэн нь хоёр талын харилцааг шинэ түвшинд гаргахад чухал ач холбогдолтой болсон бөгөөд Монгол, Италийн Засгийн газар хоорондын холимог комиссын ээлжит хуралдааныг ойрын үед хийх чиглэлээр ажиллах, энэ хүрээнд хэрэгжүүлэхээр тохирсон асуудлуудыг ажил хэрэг болгох хэрэгтэй байгааг УИХ-ын дарга хэлсэн үгэндээ онцолсон. Мөн хоёр талын харилцааг эдийн засгийн агуулгаар баяжуулах боломжтой хэмээгээд бизнес эрхлэгчдийг дэмжих, тухайлбал, хөнгөн үйлдвэр, арьс шир боловсруулах үйлдвэрлэл, дэд бүтэц зэрэг салбарт хамтын ажиллагааг өргөжүүлэх тал дээр анхаарал хандуулж ажиллахыг төлөөлөгчдөөс хүслээ.

Итали улсын Сенатын танхимын гишүүн Антонио Рацци УИХ-ын даргыг найрсаг дотноор хүлээн авч уулзаж буйд талархал илэрхийлээд Итали улс өөрийн Элчин сайдын яамаа Монгол Улсад нээхийг олон жил хүссэн хэмээгээд хоёр орны харилцааг хөгжүүлэх өргөн боломж байгааг онцлов. Тэрээр, Монгол Улсын хөгжил дэвшил хурдацтай байгаагийн зэрэгцээ бүтээн байгуулалтын ид үедээ явж байгааг дурдаад Монгол, ОХУ, БНХАУ-ын хооронд байгуулах эдийн засгийн коридор, дэд бүтцийн салбарт Итали Улс хамтран ажиллах боломжтой хэмээн хэлэв. Мөн Итали улс арьс шир боловсруулах технологиороо дэлхийд тэргүүлэгч улс бөгөөд Монгол Улстай энэ салбарт хамтран ажиллах сонирхол байгааг тэмдэглэсэн.

Энэхүү уулзалтад УИХ-ын гишүүн, Монгол-Италийн парламентын бүлгийн гишүүн Н.Оюундарь, УИХ-ын Тамгын газрын Ерөнхий нарийн бичгийн дарга Ц.Цолмон, ГХЯ-ны Бодлого төлөвлөлтийн газрын дарга Ш.Одонбаатар, УИХ-ын Тамгын газрын Гадаад харилцааны хэлтсийн дарга Ц.Нарантунгалаг, Итали Улсын Сенатын танхимын гишүүн Бартоломео Пепе, Итали Улсын Сенатын танхимын гишүүн асан Даниел Тото, Гианфранко Конте болон албаны бусад хүмүүс оролцлоо.