Month: September 2016

Монголын төр, нийгэм, цэргийн нэрт зүтгэлтэн, Монгол Улсын баатар, Хөдөлмөрийн баатар, маршал Ю.Цэдэнбалын мэндэлсний 100 жилийн ойд зориулсан “Алдар гавьяаны замнал” нэртэй үзэсгэлэн Үндэсний музейд гарч байна. 1990 оны есдүгээр сард Улсын прокурорын ерөнхий газраас Монголын үндэсний музейн сан хөмрөгт шилжиж ирсэн 700 гаруй эд өлгийн зүйлээс 150 гаруйг нь энэ удаагийн үзэсгэлэнгийн танхимд байрлуулжээ. Тус үзэсгэлэн нь 10 дугаар сарын 15 хүртэл гарах юм байна.

Тэрбээр Төрийн тэргүүн, АИХ-ын Тэргүүлэгчдийн дарга, Ерөнхий сайд, Сайд нарын Зөвлөлийн дарга, эрх баригч намын Ерөнхий нарийн бичгийн дарга, намын даргын албыг хашсан, Монгол Улсын баатар, Хөдөлмөрийн баатар, төр, цэргийн түүхэн дэх маршалын нэг юм. XX зуунд Монгол Улсыг хөгжин дэвжиж, цэцэглэн мандсан бүхий л үйл хэргийг энэ эрхэм хүн удирдан жолоодсон. Ю.Цэдэнбалын алдрыг мөнхжүүлэх арга хэмжээг энэ оныг дуустал үе шаттайгаар зохион байгуулахаар төлөвлөсөн байна. Мөн Монголбанкинд хадгалагдаж байгаа Ю.Цэдэнбалын БНМАУ-ын баатрын алтан таван хошуу, Хөдөлмөрийн баатарын алтан соёмбо, маршал сэлэм зэргийг анх удаа нийтэд толилуулж байгаа ажээ.

О.ӨНӨР

Нийгмийн бодлого, боловсрол, соёл, шинжлэх ухааны байнгын хороо, БСШУСЯ, МАБХолбоо хамтран “Монголын ахмад багш нарын хүндэтгэлийн дурсамж уулзалт”-ыг Төрийн ордны Их танхимд өнөөдөр зохион байгууллаа.

Монгол Улсад орчин цагийн боловсролын байгууллага үүсч, хөгжсөний 95 жил, олон улсын багш нарын өдрийг тохиолдуулан зохион байгуулсан тус арга хэмжээнд монгол орны өнцөг булан бүрт ажиллаж, амьдарч буй 30 гаруй ахмад багшийн төлөөлөл оролцсон юм. Уулзалтыг нээж БСШУС-ын сайд Ж.Батсуурь үг хэллээ.

Тэрбээр “Монгол Улсад 30 гаруй мянган ахмад багш бий. Тэдний төлөөлөл өнөөдөр энд хуран цуглаж, дурсамжаа ярилцаж сууна. Монгол Улсын хөгжлийг түүчээлсэн үе, үеийн төлөөлөл болсон та бүхэндээ баярын мэнд хүргэе. Эрдэм, номын буян дэлгэрэх болтугай” гэв.

Үүний дараа ахмад багш М.Тунгалаг, Ц.Чулуунцэцэг нарыг Боловсролын тэргүүний ажилтан цол тэмдгээр, н.Оюунцэцэг, н.Цэндсүрэн нарын багш нарыг “Бүтээлч багш”-аар шалгаруулж, өргөмжлөл, мөнгөн шагналыг гардууллаа.

Мөн энэхүү арга хэмжээний үеэр төр, нийгмийн зүтгэлтнүүд багшдаа хүндэтгэл үзүүлсэн юм.

Дашрамд дурдахад, 10 гаруй жилийн түүхтэй “Монголын ахмад багш нарын холбоо”-г Монгол Улсын Гавьяат багш, профессор Д.Амар тэргүүлдэг бөгөөд тэд удахгүй “Бүтээлч багш нарын III зөвлөгөөн”-ийг зохион байгуулахаар төлөвлөжээ.

Монголдоо үйлдвэрлэсэн бүтээгдэхүүнийг худалдан авч, үндэсний үйлдвэрлэлээ дэмжихийг Засгийн газраас ард иргэд, аж ахуйн нэгж, төрийн болон төрийн бус байгууллага, хөрөнгө оруулагч, хувийн хэвшил, үйлдвэрлэгчдэд уриаллаа.

Уриалгад: “Улс орны эдийн засаг хүнд байгаа өнөө цагт Та бид үндэсний үйлдвэрлэлээ дэмжсэн сонголт хийх нь хүндрэлээс гарч, өсөлтийг дэмжихэд ихээхэн хувь нэмэр болно.

Үндэсний үйлдвэрлэгчид олон жилийн турш хүчин чармайлт гарган ажиллаж, техник, технологио шинэчлэн сайжруулсны дүнд импортыг орлох бүтээгдэхүүний нэр, төрөл нэмэгдэж, чанар нь дээшлэн, дотоод, гадаад зах зээлд өрсөлдөх чадвар, нөөц, боломж бүрдлээ. Иймд өрх гэрийн болон байгууллагынхаа хэрэгцээнд шаардлагатай бараа, бүтээгдэхүүнийг сонгохдоо Монголдоо үйлдвэрлэснийг худалдан авч, хэрэглэн улс орныхоо эдийн засагт өөрийн хувь нэмрээ оруулахыг уриалж байна” гэжээ.

Нийслэлийн
Засаг дарга бөгөөд Улаанбаатар хотын дарга С.Батболдын
санаачилгаар 9 дүгээр сарын 30-ны өдөр Жанжин
Д.Сүхбаатарын талбайд “Улаанбаатарын намар“ нэгдсэн арга хэмжээ болно. Энэ зуны
хаалт, намар цагийн эхлэл болох тус арга хэмжээний зорилго нь үндэсний
үйлдвэрлэгчид, үйлчилгээ эрхлэгчид дэмжих зорилготой юм.

Энэ
өдөр үйлдвэрлэл, үйлчилгээ эрхэлдэг үндэсний компаниуд халуун хоол,
хүйтэн ундаа, амтат бүтээгдхүүнээр үйлчилгээ эрхэлж, төв талбайд түргэн
хоолны газрууд ажиллана. Мөн “Никитон”, “Камертон” хамтлагууд анх удаа
нэгэн тайзнаа тоглож, рок попын одод ая дуугаа өргөнө.

“Улаанбаатарын
намар” тоглолтын ерөнхий найруулагчаар Төрийн соёрхолт,
дуучин Д.Болд ажиллаж байна. Түүнчлэн нийслэлийн Засаг дарга бөгөөд
Улаанбаатар хотын захирагч С.Батболд ирэх дөрвөн жил их хотоо
хөгжүүлэхийн тулд ямар ажил хийхээр зорьж, төлөвлөж, үйл ажиллагааны
хөтөлбөртөө оруулснаа Нийслэлийн иргэд, төр захиргааны албан хаагчдад
танилцуулна.

Анх
удаа зохион байгуулагдаж байгаа “Улаанбаатарын намар“ арга хэмжээнд
нийслэлийн иргэд өргөнөөр оролцох боломжтой юм.

Монгол
улсын баатар, гавьяат нисгэгч Д.Гунгаа агсны 100 жилийн ой энэ оны 9 сард
тохиож байгаатай холбогдуулан түүний дурсгалыг хүндэтгэх баатарлаг үйлсийг
мөнхжүүлэх ёслолын ажиллагаа энэ сарын 23-24ны өдрүүдэд баатар Д.Гунгаагийн
нэрэмжит Хөвсгөл аймгийн Мөрөн нисэх буудал болон төрлөх Төмөрбулаг суманд
боллоо.

Дугарын
Гунгаа агсан Монголын Иргэний агаарын тээврийг үүсгэн хөгжүүлэхэд үнэтэй хувь
нэмэр оруулсан юм. Тодруулбал Монголын нисэх хүчнээс улс ардын аж ахуйн нэг
салбар болох иргэний агаарын тээврийг үүсгэн байгуулж, хөгжүүлэх бэхжүүлэх
ажлыг нэр төртэй гүйцэтгэж, 1939 онд халх голын, 1945 оны чөлөөлөх дайн, 1944,
1947 оны баруун хязгаарын зэвсэгт мөргөлдөөн зэрэг 3 удаагийн дайнд оролцсон
түүхэн хүний нэг билээ. Түүний гавьяа зүтгэлийг төр засаг өндөр үнэлэн 1965 онд
гавьяат нисгэгч цол, 2009 онд Монгол улсын баатар цол олгосон байдаг.

2015 онд
түүний төрлөх сумын 90 жилийн ойгоор Төмөрбулаг сумын ЕБС-ийг Монгол Улсын
баатар, гавъяат нисгэгч Дугарын Гунгаа агсны нэрэмжит болгох шийдвэр
гарч, түүний хүү гавъяат нисгэгч Г. Жаргалсайхан сургуулийн өмнөх талбайд
Монгол Улсын баатар, гавъяат нисгэгч Дугарын Гунгаа агсны хүрэл хөшөөг
санаачилан бүтээн босгосон билээ. Тэгвэл энэ жил Д.Гунгаа агсны мэндэлсний 100
жилийн ой тохиож энэ хүрээнд Хөвсгөл аймгийн Төмөрбулаг сумын ЕБС-ын урд
талбайд орших түүний хөшөөнд хүндэтгэл үзүүлэх ёслолын ажиллагаа өнгөрсөн
амралтын өдрүүдэд боллоо. Хүндэтгэлийн ёслолын ажиллагаа сумын ЕБС–ийн сурагчдийн
хүндэтгэлийн шугам жагсаалаар эхэлж , дурсгалын хөшөөнд цэцэг өргөн , уран
зураг, нисэх загвар, эссе бичлэгийн уралдаан, сурагчдын бөхийн барилдаан, ,
шагайн харваа, хурдан дааганы уралдаан, гар бөмбөгийн тэмцээн зэргийг зохион
байгуулж намрын налгар өдрүүдэд дурсамж , дурдатгалтай өнгөрлөө.

Мөн энэ
жил Д.Гунгаа баатарын нэрэмжит Хөвсгөл аймгийн Мөрөн нисэх буудлын 60 жил
ой тохиож байгаа бөгөөд нисэх буудлын захиргааны зүгээс ойн ёслолын үйл
ажиллагааг Д.Гунгаа агсны 100 жилийн ойтой мөн хамт тэмдэглэн өнгөрүүлж иргэний
агаарын тээврийн анхны АН2 онгоцны хөшөөний нээлтийг хийсэн юм. Дээрх ёслолын
үйл ажиллагаанд Д.Гунгаа агсны үр хүүхэд, төрөл садан, Хөвсгөл аймаг,
Төмөрбулаг сумын удирдлагууд, ИНЕГ, МИАТ ХК-ийн удирдлагууд оролцсон байна.

Дашрамд
дурдахад Монгол Улсын баатар, гавъяат нисгэгч Дугарын Гунгаа агсны төрсөн ах нь
Монгол Улсын Хөдөлмөрийн баатар Д.Дарамжав агсан бөгөөд нэг сумаас ах дүү хоёр
баатар төрсөн гэдгээр нь Төмөрбулаг сумын ард олон бахархдаг юм билээ.