Month: September 2016

“Ахилис Монгол” байгууллагын зохион байгуулдаг “Итгэл, найдвар, боломж-Улаанбаатар-2016” бүх нийтийн гүйлт Үндэсний цэцэрлэгт хүрээлэнд амжилттай болж өндөрлөлөө

Жил бүр уламжлал болгон зохион байгуулж буй бүх нийтийн гүйлтэд 10-аас дээш насныхан оролцох боломжтой юм байна. Оролцогчид гурав, тав, 10, 21, 42 км зайд гүйх юм. Энэ гүйлт нь нийтийн спорт хүмүүсийн эрүүл мэнд, амжилтын үндэс гэдгийг сурталчлах бөгөөд хөгжлийн бэрхшээлтэй иргэдийг дэмжих, тэдний талаарх ухамсар, ойлголтыг дээшлүүлэх зорилготойг зохион байгуулагчид онцолж байна. Энэхүү марафон нь хандивын гүйлт бөгөөд гүйлтийн хураамжийг хөгжлийн бэрхшээлтэй иргэдэд зориулах юм.

Бүх нийтийн гүйлтийг зохион байгуулж буй “Ахилис Монгол” байгууллагын үүсгэн байгуулагч, гүйцэтгэх захирал О.Саранчулуун “Энэхүү үйл ажиллагааны хүрээнд цугларсан хандивыг бид хөгжлийн бэрхшээлтэй хүмүүсийн спортоор хичээллэх боломж бололцоог хангахад зориулна. Мөн эдгээр хүмүүсийг олон улсын тэмцээнд оролцох боломжоор хангахад хэрэглэнэ. Энэ жилийн хувьд найман хөгжлийн бэрхшээлтэй тамирчин Нью-Йорк хотыг зорино. Үүний зардал болон хөгжлийн бэрхшээлтэй хүүхдийг дэмжих бусад үйл ажиллагаанд ч зарцуулна” гэлээ.

Жил бүр төв талбайд зохион байгуулдаг
“Номын баяр” энэ сарын 16, 17-нд болох гэж байна. Уламжлалт номын баярт
“Мөнхийн үсэг”, ‘Тагтаа паблишинг” зэрэг хэвлэлийн газрууд “Азхур”, “Мир”,
“Номон” зэрэг номын дэлгүүрүүд оролцдог. Ерөнхийлөгчийн 158 дугаар зарлиг ёсоор
улс орон даяар тэмдэглэж буй номын баярт нэр хүндтэй зохиолчид ирж гарын
үсэгтэй номын худалдаа явуулж, уншигч зохиолчдын уулзалт, шинэ номын нээлт
болдог уламжлалтай.

Энэхүү
баярын үеэр оролцогчид номоо 5-50 хувь хямдруулсан байдаг тул уншигчид
сонирхсон номоо хямд үнээр, зохиолчийн гарын үсэгтэй нь авах таатай боломж
бүрддэг билээ.

Монголд кино бүтээгчид өдөр бүр шинээр
мэндэлж байна. Эдгээр дэлгэцийн уран бүтээлүүдийн цаашдын хөгжилд хувь
нэмэр оруулахын тулд кино урлагийн зөвлөл клуб байгуулагдлаа. Судалгаанаас харахад
үзэгчдийн 80 хувь нь гадаад контент, холливудын киног Монголын дэлгэцийн
бүтээлүүдээс илүү сонирхож байгаа юм. Иймээс Монголын кино бүтээгчдийг дэмжих,
хойч үеийн залуусын боловсролд кино урлагаар дамжуулан хөрөнгө оруулалт хийх
зорилготойгоор Монголын нэр нөлөө бүхий эрхмүүд энэхүү клубт гишүүнээр орсон
байна.

Монголын кино
урлагийн зөвлөл клубт Төрийн хошой шагналт, Ардын жүжигчин, хөгжмийн зохиолч Н.
Жанцанноров, Төрийн соёрхолт, ардын жүжигчин, Зууны манлай дуурийн дуучин
Х.Уртнасан,Төрийн шагналт, Ардын уран зохиолч Б.Догмид, Гандантэгчилэн хийдийн
тэргүүн хамба Д.Чойжамц, Монголын Бурханы Шашны Их Сургуулийн захирал, гавж лам
Ш.Сонинбаяр, Геологич, Доктор, Байгаль орчны сайд асан Ч.Хурц, Соёлын гавьяат
зүтгэлтэн, яруу найрагч Ц.Хулан, Үндсэн хуулийн цэцийн гишүүн, Монгол Улсын
Гавьяат хуульч Д.Сугар, Нийслэлийн Засаг даргын орлогч Ш.Анхмаа, МҮОНРТ-ийн
Үндэсний зөвлөлийн гишүүн, зохиолч Б.Золбаяр, ANDRA агентлагийн захирал, топ
модель Х.Бадамгэрэл, Анагаах Ухааны доктор, АУШУИС-ийн Дархлаа судлалын
тэнхимийн багш Б.Азжаргал, ДБЭТ-ын гоцлол бүжигчин, балетын бүжигчин Б.
Энхтуул, Эдийн засагч, нийтлэлч Д.Жаргалсайхан, Я.Гантөмөр, Х.Чинбат нар
багтсан байна. Тэд анхны хурлаа энэ сарын 09-ний өдөр хийж, дүрмээ баталж,
журмаа ярилцан, дарга, орлогч дарга, нарийн бичгийн даргаа сонгосон байна.

Монгол Улсынхаа
хөгжилд үнэтэй хувь нэмрээ оруулж яваа дээрх эрхмүүдийг кино бүтээгчдэд хамгийн
бодитой зөвлөгөө, дэмжлэг өгч, киноны агуулга, хэлзүй, гоозүй, киноны хөг,
аялгуу гээд бүхий л талаас нь дэмжин ажиллах, шүүмж бичих чадвартай хэмээн
онцлон үзжээ. Энэхүү зөвлөлийн гишүүд нь ашиг сонирхлын зөрчилгүй,
хараат бус, бие даасан шийдвэр гаргах чадвар, чадамж бүхий, эх орныхоо хөгжилд
үнэтэй хувь нэмэр оруулсаар яваа салбар бүрийн төлөөлөл гэдэгтэй хэн ч маргахгүй
биз ээ.

Анхдугаар хурлын
үеэр зөвлөлд багтсан гишүүд кино урлагийн өнөөгийн байдлын талаар санал бодлоо
хуваалцан, зөвлөлийн ажлын үр дүн, уран бүтээлчидтэй хэрхэн хамтран ажиллах,
хэрхэн дэмжих, уран бүтээлийн чанарыг хэрхэн сайжруулах, сайн уран бүтээлийг
хэрхэн дэмжих талаар ярилцсан байна. Зөвлөлийн гишүүд “Хүний хийсэн бүтээлийг
яаж сайжруулах талаар тусалж, чин сэтгэлийн үнэн үгээ хэлж, зөвлөдөг байя.
Кино урлаг бол ёс суртахуун, хүмүүжлийн онцгой зэвсэг учир Монголын хойч
ирээдүйд тус дэм болох үүднээс бид энэ зөвлөлд чин сэтгэлээ зориулан ажиллах
болно” хэмээн хэлж байлаа.

Ингээд Монголын
дэлгэцийн бүтээлийн агуу их түүхийг түүчээлэн, үргэлжлүүлэн яваа уран
бүтээлчдээ дэмжих, дэлгэцийн бүтээлийн агуулгыг сайжруулах, монголын кино
бүтээлээр дамжуулан хойч үе, залуу үеийнхэнд боловсрол олгох, оюуны хөрөнгө
оруулалт хийх чиглэлээр ажиллах дээрх зөвлөл клубын эрхэм гишүүд их зүйлийг
бүтээнэ гэдэгт зөвхөн кино сонирхогчид төдийгүй, монголын ард түмэн итгэл
хүлээлгэж байгаа юм.

Монгол улс 1960 онд анх “цаг урагшлуулах”
зохицуулалт хийж байсан бөгөөд үүнийг 1999 онд хүчингүй болгож, 2001 онд дахин
сэргэж байжээ. Энэ зохицуулалт мөн 2005 онд хүчингүй болсон
бөгөөд өнгөрсөн оны гуравдугаар сард сэргээн “цаг урагшлуулах, ухраах
горим”-д шилжсэн юм.

Өдөр уртсаж
байгаатай холбогдуулан нарны эртийг ашиглаж ажлаа амжуулах,
цахилгааны хэмнэлт гаргах зорилгоор өнгөрөгч гуравдугаар сарын
25-26-нд шилжих шөнө 02:00 цагт цагийг урагшлуулаад байсан юм.
Тэгвэл энэ сарын 25-26-нд шилжих шөнө өвлийн цагийн хуваарьт шилжин
цагийг нэг цагаар ухраах аж.

Баян-Өлгий аймгийн Булган суманд энэ сарын 9-ний өдрийн байдлаар ямааны тахал шинжтэй халдварт өвчнөөр өвчилсөн малын тоо 893-д хүрчээ. Иймд Улаанхус, Цүнхэл багийн нутагт тогтоогдсон хорио цээрийн дэглэмд хүч нэмэгдүүлж хорио цээрийн дэглэмийг чангатгах шийдвэрийг орон нутгийн захиргаанаас гаргасан байна. Хорио цээрийн дэглэмийг чангатгасантай холбоотойгорр олон нийтийг хамарсан үйл ажиллагаа, уулзалт зохион байгуулахыг түр хугацаагаар хоригложээ.

Сүүлийн үед транс тосны хэрэглээ хэтэрлээ гэсэн шүүмжлэл нийгэмд гараад байгаа. Яагаад гэвэл зүрх судасны өвчин хүн амын нас баралтын тэргүүн шалтгаан болоод удаж байна. Тэгэхээр транс тосны хэрэглээг бууруулах нь хамгийн эхний алхам байх ёстой гэдгийг мэргэжлийн эмч нар хэлж ярьж байгаа юм.

Гэтэл манай үндэсний 127 хүнсний үйлдвэр транс тостой бүтээгдэхүүн үйлдвэрлэж, импортоор жилд 2749 тонн транс тос оруулж ирж хүнсэнд хэрэглэж байна. Хүнс хөдөө аж ахуйн яам, хил гааль, засаг төр яагаад арга хэмжээ авахгүй байна. Цус харвалт, даралт ихсэлт, зүрхний шигдээс, дутагдлаар олон хүн хар залуугаараа хорвоог орхиж байна. Хэзээ болтол бид ХОР идэж амьдрах болж байна. Иргэд нь хортой хүнс, буруу хэрэглээнээс болж хүн ам үхэж үрэгдээд дуусахыг хүлээх ёстой юмуу. Харин хүнсний үйлдвэрүүд транс тосоо нуугаад шошгон дээрээ “цөцгийн тос” гэж улаан цайм худлаа бичээд эхэлсэн бололтой.

Юу идэж ууж, хэрэглэж байгаагаа ард түмэн мэдэх эрх байхгүй гэж үү. Түүнээс гадна сургууль, цэцэрлэгүүд хүртэл хүүхдүүдэд транс тос өгч байна. Хэрвээ энэ асуудалд анхаарахгүй бол тэмцлийн хурц хэлбэрт шилжинэ гэдгийг Эрүүл мэнд спортын дэд сайд асан Ж.Амарсанаа албан ёсоор мэдэгджээ.