Month: September 2016

Баян-Өлгий аймгийн Улаанхус сумын Билүү багийн нутагт 14 настай, эрэгтэй хоёр хүүхэд “Ховд” голын усанд осолджээ.

Ховд голын эрэг дээр юм угааж байгаад усанд живсэн гэсэн дуудлагыг энэ сарын 11-ний өдрийн 17:42 цагт хүлээн авчээ. Дуудлагын дагуу тус аймгийн Онцгой байдлын газрын эрэн хайх, аврах салбарын зургаан албан хаагч, нэг автомашин, Цагдаагийн таван албан хаагч, нэг автомашин, орон нутгаас арван хүн, гурван автомашин, нийт 21 хүн, таван техник хэрэгсэлтэйгээр эрэн хайх ажиллагааг зохион байгуулж байгаа ч эндсэн хүүхдүүд олдоогүй байна.

Өнгөрсөн онд Ус сувгийн удирдах газраас гэр хорооллын хэрэглэгчдийн усны хэрэглээг хүртээмжтэй, иргэдийг ус авахад хялбар болгох үүднээс нийслэлийн хэмжээнд зарим ус түгээх газруудыг ухаалаг болгох ажлыг эхлүүлсэн. Одоогоор нийслэлийн Баянгол, Баянзүрх, Чингэлтэй, Сүхбаатар дүүргийн нийт 20 худгийг “ухаалаг” болгоод байна.

“Ухаалаг” худаг ашиглагдаж эхэлснээр үйлчлэгчийн шаардлагагүй болж байгаа. Тиймээс хуучин ус түгээгүүрийн газар ажиллаж байсан үйлчлэгч нарыг дахин ажлын байраар хангах асуудал гарч байгаа юм. Энэ асуудлаас болоод “ухаалаг” худгийг дахин нэмэгдүүлэх ажлыг түр зогсоосон гэсэн мэдээлэл гараад байсан. Бид энэ талаар Ус сувгийн удирдах газраас тодруулахад, “Ухаалаг худгийг ашиглаж эхэлснээр үйлчлэгчийн хэрэггүй болж байгаа. Гэхдээ бид эхний ээлжинд шинэчилсэн 20 худгийнхаа үйлчлэгчийг оператороор ажиллуулж байна. Олон хүнийг ажлаас халаагүй” гэсэн тайлбарыг өглөө.

Түүнчлэн Ус сувгийн удирдах газраас өгсөн мэдээллээр нийслэлийн хэмжээнд “ухаалаг” болгох боломжтой нийт 320 гаруй худаг байгаа бөгөөд энэ онд багтааж 100 худгийг “ухаалаг” болгохоор төлөвлөж байгаа ажээ.

Ухаалаг худаг 24 цаг ажиллах ба иргэд тухайн худгаас картаа авч цаашид төхөөрөмжид картаа уншуулж усаа авах ба дансны үлдэгдлээ харж болох юм. Харин картан дахь мөнгө дуусвал Ус сувгийн удирдах газрын дансанд мөнгөө байршуулж үргэлжлүүлэн картаа ашиглана. Усны үнийн хувьд 1000 төгрөгөөр нэг тонн, 3000 төгрөгөөр гурван тонн, 5000 төгрөгөөр таван тонн, 10000 төгрөгөөр 10 тонн ус авах юм.

Баянзүрх дүүргийн ИТХ-ын 2016 оны сонгуульд 32 хүн бие даан нэр дэвшихээр хүсэлтээ дүүргийн сонгуулийн хороонд хүргүүлжээ. Хуулийн хугацаанд баримт бичгээ бүрдүүлж өгөөгүй гэдэг үндэслэлээр нэр дэвшигчдийг бүртгэхээс татгалзсан аж.Энэ талаар бие даагчдын төлөөлөл өнөөдөр сэтгүүлчдэд мэдээлэл өглөө.

Сонгуулийн хуулийн 154 дүгээр зүйлийн 154.2 дахь хэсэгт “Бие даан нэрээ дэвшүүлэх ажиллагааг санал авах өдрөөс 55 хоногийн өмнө эхлүүлж, долоо хоногийн хугацаанд дуусгана. Бие даан нэрээ дэвшүүлэгч нь нэр дэвшүүлэх ажиллагааны талаарх хуульд заасан хугацаа дууссан өдрөөс хойш гурав хоногт багтаан баримт бичгийг орон нутгийн цагаар 17 цаг 00 минутаас өмнө тухайн шатны сонгуулийн хороонд биечлэн ирүүлнэ” хэмээн заасан байдаг. Дүүргийн сонгуулийн хороо дээрх хуулийн заалтыг талаар дутуу мэдээлэл өгснөөс болж бие даагчид сонгогдох эрхээ эдэлж чадахгүйд хүрчээ.

Энэ талаар бие даан нэр дэвшигч Б.Батбаяр хэлэхдээ “Нэр дэвшүүлэх ажиллагаа наймдугаар сарын 31-ээр дуусгавар болно гэж хуульд заасан байгаа. Нэр дэвшүүлэх ажиллагаанд юу байх ёстой вэ? гэдгийг дүүргийн сонгуулийн хороо анхнаасаа тайлбарлах ёстой байсан. Гэсэн ч тодорхой мэдээлэл өгөөгүй” гэлээ.

ХААН Банк, Хавдар судлалын үндэсний төв/ХСҮТ/, МҮОНРТ-ээс 6 дахь жилдээ хамтран хэрэгжүүлж буй “Хавдрын эсрэг үндэсний аян ”-ы орон нутаг дахь үзлэг оношилгоо Ховд аймагт өндөрлөж, Хөвсгөл аймагт үргэлжилж байна.

Эмч нарын баг Ховд аймагт 5 хоног ажиллаж нийт 2585 иргэнийг үзлэг оношилгоонд хамруулж, 17 яаралтай мэс ажилбарыг хийж, нийт 100 эмч мэргэжилтэнд “Зонхилон тохиолдох хорт хавдрын эрт илрүүлэлт, оношилгоо, эмчилгээ”, “Хорт хавдрын хими, хөнгөвчлөх эмчилгээний үеийн сувилахуйн тусламж” сэдэвт сургалт, дадлага зохион байгууллаа.

“Хавдрын эсрэг үндэсний аян ” энэ жил 8 аймагт хүрч ажиллаж байгаа бөгөөд 5,6-р сард Дархан-Уул, Архангай, Өмнөговь, Дорнод аймгуудад ажилласан байна.

Мөн хорт хавдрын эрт илрүүлгийн хөтөлбөрийг эрчимжүүлэх, эрт илрүүлэг үзлэгийг орон нутагт хэрэгжүүлдэг эмч, мэргэжилтнүүдийг чадавхижуулах зорилгоор сургагч багш бэлтгэх “Бүсчилсэн сургалт”-ыг зохион байгуулж, Ховд, Увс, Баян-өлгий аймгийн нийт 20 эмч, мэргэжилтэн бүсчилсэн сургалтад хамрагдлаа.

Аяны эмч нарын баг Завхан, Сэлэнгэ аймгуудад үргэлжлэн ажиллаж, ард иргэдийг хавдрын нарийн мэргэжлийн үзлэг оношилгоонд хамруулна.

Б.Мөнгөнсор

Ерөнхийлөгчийн 158 дугаар зарлиг ёсоор улс орон даяар жил бүр зохион байгуулагддаг ‘’Номын баяр’’ энэ сарын 16, 17-нд төв талбайд зохион байгуулхаар болжээ.

Уг номын баярт хэвлэлийн газрууд ,номын дэлгүүрүүд зэрэг байгуулгууд оролцдог ба энэхүү арга хэмжээнд нэр хүндтэй зохиолчидын гарын үсэгтэй номын худалдаа явуулж, уншигч зохиолчдын уулзалт, шинэ номын нээлт болдог уламжлалтай .

Б.УЯНГА

“Монголын самрын бизнес эрхлэгч, бүтээгдэхүүн үйлдвэрлэгчдийн эрхийг хамгаалах холбоо” ТББ-аас өнөөдөр БОАЖЯ-нд иж бүрэн тоноглол бүхий мотоциклуудыг хүлээлгэж өглөө.

БОАЖ-ын дэд сайд Ц.Батбаяр, тус яамны Хүрээлэн буй орчин, байгалийн нөөцийн удирдлагын газрын дарга Д.Даваасамба нарт ТББ-ын тэргүүн Ж.Нямдаваа хүлээлгэн өгөв.

Байгаль хамгаалагчдад унах унаа нь хамгийн тулгамдсан асуудал байдаг. Үүнийг шийдвэрлэж иж бүрэн тоноглосон мотоцикль хүлээлгэн өгч байгаад БОАЖ-ын дэд сайд Ц.Батбаяр талархаж буйгаа илэрхийлсэн. Мөн тэрээр “Мотоциклуудыг байгаль хамгаалагч нарт хүлээлгэн өгнө. Байгаль хамгаалах үйлсэд иргэн бүрийн оролцоо чухал үүрэгтэй”-г онцоллоо.

Тус ТББ нь үйл ажиллагаагаа явуулаад удаагүй байгаа ч нийгмийн үүрэг хариуцлагаа ухамсарлаж байгаль хамгаалах үйлсэд зориулан, нэг нь сая 600 мянган төгрөгийн үнэ бүхий 20 ширхэг мотоциклийг зориулалтын малгай, нүдний шил, галын хор, галын бүтээлэг зэрэг хэрэгслүүдийн хамт дагалдуулж өгчээ.