Зэвсэгт хүчинд Холбооны цэрэг үүсэн байгуулагдсаны 95 жилийн ойг тохиолдуулан Монгол Улсын Их хурлын гишүүн, ЗХЖШ-ын дарга агсан, хошууч генерал Р.Гаваагийн нэрэмжит Холбоочдын цогцолбор тэмцээнийг 2016 оны 09 дүгээр сарын 14-16-ны өдрүүдэд ЗХЖШ-аас зохион байгуулж байна.
Залуу үеийн холбоочдын мэргэжлийн болон спортын ур чадварыг дээшлүүлэх, компьютер мэдээллийн шинэ төрлийн програм техник хэрэгсэл ашиглах, мэдээлэл дамжуулах, мэдээллийн болон сүлжээний аюулгүй байдлаг хангах чиглэлд мэргэжилтнүүдийн мэдлэгийн цар хүрээ, дадлага, чадварыг нэмэгдүүлэх, харилцан туршлага солилцох зорилгоор зохион байгуулж буй цогцолбор тэмцээнд Зэвсэгт хүчний анги байгууллагууд, Монгол Улсын үндэсний аюулгүй байдлыг хангах тусгайлсан чиг үүрэг бүхий байгууллагуудын 200 гаруй тамирчид оролцож байна.
Цогцолбор тэмцээн хурдач радиотелеграфчин, цэргийн холбоочдын мэргэжлийн цогцолбор дасгал, кибер цэрэг, радио илрүүлэлтийн “үнэг агналт”, зүг чиглэл, байрлал олох, “Зэвсэгт хүчний холбоо мэдээллийн хөгжилд бидний оролцоо” эссе бичлэгийн уралдаан гэсэн төрлүүдээр зохион байгуулагдана. Мөн гар бөмбөг, ширээний теннис, шатар, дартсын тэмцээнээр хур, хүчээ сорьж байна.
Онцгой байдлын ерөнхий газраас Гамшгийн шуурхай удирдлагын Холбоо зарлан мэдээллийн чиглэлийн мэргэжилтнүүд, техникийн бэлэн байдал хариуцсан инженерүүд, холбоо, зарлан мэдээлэл хариуцсан операторууд, НОБГ-ын дүүргүүдийн Гал түймэр унтраах, аврах ангийн дуудлага хүлээн авагчид, Аврах тусгай ангийн Холбооны тусгай бүлгийн албан хаагчид оролцож байгаа юм.
Төр, нийгмийн нэрт зүтгэлтэн Маршал Юмжаагийн Цэдэнбалын мэндэлсний 100 жилийн ойд зориулсан “Алдар гавъяаны замнал” үзэсгэлэн Монголын Үндэсний музейд өнөөдөр нээлтээ хийлээ. Тус үзэсгэлэнгийн нээлтэд УИХ-ын гишүүн Ц.Нямдорж, УИХ-ын гишүүн Ж.Мөнхбат нарын албаны хүмүүс оролцов.
Түүнчлэн Монгол банкны Зах зээлийн газрын Эрдэнэсийн санд хадгалагдаж буй Ю.Цэдэнбалын БНМАУ-ын Улсын Баатарын “Алтан таван хошуу”, Хөдөлмөрийн Баатарын “Алтан соёмбо”, Маршал сэлэм, ном хэвлэл зэрэг эд өлгийг анх удаа олонд дэлгэн үзүүллээ.
Засгийн газар 2016-2020 оны үйл ажиллагааны хөтөлбөрөө боловсруулж, УИХ-аар батлуулсан гэдгийг Ерөнхий сайд Ж.Эрдэнэбат иргэдтэй хийсэн уулзалтын эхэнд хэлээд хөтөлбөрт тусгасан зарим төсөл, арга хэмжээний талаар танилцууллаа.
Хүндрэлтэй энэ үед бие биеэ дэмжих ёстой. Үндэсний үйлдвэрлэлээ дэмжиж дотооддоо үйлдвэрлэсэн бараа, бүтээгдэхүүнийг аль болох авч хэрэглэж байхыг уриална гэлээ. Жижиг, дунд үйлдвэрлэлийг дэмжих “Итгэлийн зээл” олгож, үйлдвэрлэл эрхлэх бололцоогоор хангана. Ахмад настнууддаа “Насны хишиг” тэтгэврийг олгохоор төлөвлөж байгаагаа ч тодотголоо.
Манай улсын 133 мянган аж ахуйн нэгжийн 60 гаруй мянга нь хаалгаа барьсан. Эдгээрийн үйл ажиллагааг сэргээх, хуулийн зөрчилтэй бол түүнийгээ шийдэх боломж олгох зэргээр тэдэнд хандсан арга хэмжээ авч байгааг дуулгалаа.
Казакстан улс өөрийн үндэсний эв нэгдлийг илэрхийлэх үүднээс бусад улсаас өөрийн үндэсний иргэдээ хүлээж авдаг. Энэ хүрээнд 1990-ээд оны эхээр Монгол Улсад оршин суудаг казах иргэдийн зарим нь Казахстан улс руу шилжсэн юм.
Замын цагдаагийн газар, зөрчил гаргасан жолооч нарыг мэдээллийг цахимаар хүлээн авч хариуцлага тооцож эхэллээ. Тодруулбал, Замын цагдаагийн цахим хуудаст иргэдээс ирүүлсэн гэрэл зураг бичлэгийг үндэслэн, харьяа дүүргийн замын цагдаагийн тасагт шалгаж, тухайн зөрчил гаргасан нь тогтоогдвол холбогдох хуулийн дагуу торгуулийн арга хэмжээ авч байна. Уг цахим хуудаст, замын хөдөлгөөний дүрэм, аюулгүй байдлын тухай хууль зөрчиж буй жолооч нарын зөрчлийг баримтжууулсан гэрэл зураг олноор нийтлэгдэх болсон. Тиймээс иргэдийн саналын дагуу зөрчлийг бүртгэлжүүлж хариуцлага тооцохоор болжээ.
Өнөөдөр БСШУСЯ-нд Хэлний бодлогын үндэсний зөвлөлөөс орон тооны бус салбар зөвлөл болон “Улсын нэр томьёоны комисс”-ыг сэргээн байгуулахаар болсон тухай мэдээллээ.
Хүнс хөдөө аж ахуйн яам, Нийслэлийн Засаг даргын Тамгын газартай хамтран зохион байгуулж байгаа “Намрын ногоон өдрүүд” үзэсгэлэн худалдаа өнөөдөр “Мишээл” экспо төвд нээлтээ хийлээ. Үзэсгэлэн худалдааны нээлтийн ажиллагаанд УИХ-ын дарга М.Энхболд, Хүнс хөдөө аж ахуйн сайд П.Сэргэлэн, Нийслэлийн Засаг дарга бөгөөд Улаанбаатар хотын Захирагч С.Батболд болон үндэсний үйлдвэрлэгчид, иргэд оролцлоо.
УИХ-ын дарга М.Энхболд “Малчид, тариаланчид, үйлдвэрлэгчид энэ өдрүүдэд нийслэл хотын иргэдэд хөдөлмөрийнхөө үр шимээр Монгол эх орон, газар шороонд ургасан төмс , хүнсний ногоогоо худалдаалж, хүнсний шинэ технологиудыг таниулж, туршлага судалж, иргэддээ экологийн цэвэр хүнсээр хангах зорилт тавьж байгааг дэмжиж байдгаа илэрхийлсэн. “ Намрын ногоон өдрүүд “ үзэсгэлэн зөвхөн ногооны худалдаа биш хөдөө аж ахуй, хөнгөн үйлдвэрийн салбарынхан жилдээ энд хуран чуулж, туршлагаа хуваалцаж, шинэ сортын, шинэ төрлийн бүтээгдхүүнийг иргэддээ таниулж, өргөн утгаараа Монгол улс дотоодынхоо хүнсний хэрэгцээг хангаж чадах улс болохоор тавьж байгаа зорилтыг хэрэгжүүлж байгааг тодотгосон юм. УИХ -аас ч хөдөө аж ахуй, хөнгөн үйлдвэр, хүнсний салбарт онцгойлон анхаарч байгааг дурьдаад хаалтаа хийгээд удаагүй байгаа УИХ-ын ээлжит бус чуулганаар малын гаралтай түүхий эдийн экспортыг өсгөх, малчин өрхийн орлогын түвшинг нэмэгдүүлэх чухал шийдвэр гаргасан. Экспортын татварыг тэглэж, энэ салбараа дэмжснийг онцолсон юм.
Нийслэлийн Засаг дарга бөгөөд Улаанбаатар хотын Захирагч С.Батболд, “Нийслэлийн иргэдэд эрүүл монгол хүнсийг олон дамжлаггүйгээр шууд хүргэх боломжийг олгож байгаагаараа энэхүү үзэсгэлэн худалдаа чухал ач холбогдолтой юм. Би нийслэлийн Засаг даргын хувьд үйлдвэрлэгчдээс шууд нийслэлийн иргэдэд хүрэх ийм төрлийн худалдаа, зах, дэлгүүрүүдийг нэмэгдүүлж, чанартай, эрүүл монгол хүнсээр нийслэлийн иргэдээ хангах болдого баримтлан ажиллах болно.Энэ өдрүүдэд нийслэлчүүд та бүхэн үзэсгэлэн худалдааг зорин ирж өвлийн бэлтгэлээ базаагаарай гэж хүсч байна” гэлээ. “Эрүүл хүнс-Эрүүл монгол хүн” уриатайгаар зохион байгуулж байгаа “Намрын ногоон өдрүүд” нэгдсэн арга хэмжээ энэ сарын 20-ны өдөр хүртэл үргэлжилнэ. Энэ удаагийн үзэсгэлэнд үндэсний 20 гаруй аж нэгж оролцож бүтээгдэхүүнээ танилцуулж байгаагаас гадна 14 аймгийн 13 сум, нийслэлийн 5 дүүргээс нийт 300 орчим аж ахуйн нэгж, хоршоо, иргэд оролцож байна. Тодруубал, Үндэсний манлай үйлдвэрлэгч “Мах импекс”, “Талх чихэр”, “Атар өргөө”, “Сүү”, “Батбайгаль” зэрэг томоохон аж ахуйн нэгжүүд 10 дэхь жилдээ оролцож байгаа бол Ховдын ааруул, тарвас, Өмнөговийн ингэний сүүтэй зайрмаг, Увсын чацаргана, Хөвсгөлийн цагаан загас, жимс зэрэг орон нутгийн “брэнд” бүтээгдэхүүн үйлдвэрлэгчид ч оролцож байна. “Намрын ногоон өдрүүд” үзэсгэлэн худалдаа “Мишээл экспо” төвөөс гадна нийслэлийн 6 дүүргийн 43 байршилд 434 хүнсний ногоо борлуулах цэгийг 2 сарын хугацаатайггаар өргөжүүлэн ажилуулах ажээ. 
Нийслэлээс УИХ-д сонгогдсон гишүүдтэй хийсэн “Зөвлөлдөх уулзалт”-ын үеэр Улаанбаатар хотын өмнө тулгамдаж буй асуудал болон цаашид хэрэгжүүлэх шаардлагатай байгаа ажлуудын талаар гишүүд саналаа хэллээ.
УИХ-ын гишүүн Ж.Батзандан: Газрын харилцаанаас нийслэлийн орлогыг нэмэгдүүлэх бололцоо маш их байгаа. Орлогын томоохон эх үүсвэрийг бий болгож, нийслэлийн хөгжилд хувь нэмрээ оруулах бүрэн боломжтой. ТЭЗҮ хийсэн томоохон төсөл, хөтөлбөрүүдээ яаралтай хэрэгжүүлж эхлэх хэрэгтэй. Бүх өрхийн эмнэлгийг цэргийн технологиор бага зардлаар өргөтгөх боломжтой. Та бүхэн үүнийг судалж үзээрэй. Гэр хорооллын дахин төлөвлөлтөд ороод гацчихсан олон өрх байна. Эдгээр иргэний асуудлыг яаралтай шийдвэрлэхийг хүсч байна. Цаашид хамтран ажиллахдаа бэлэн байх болно.
Нийслэлийн Засаг дарга С.Батболд нийслэлээс УИХ-д сонгогдсон төрийн түшээдтэй “Зөвлөлдөх уулзалт” хийж, Улаанбаатар хотын өнөөгийн байдал, ирээдүйн хөгжлийн чиг хандлагыг танилцууллаа. Хотын удирдлагуудын зүгээс гишүүдэд хандан нийслэлийн иргэдийн амьдрал ахуй, амьдрах орчин нөхцөлийг сайжруулах хууль, эрх зүйн орчныг бүрдүүлэхэд байнга хамтран ажиллахыг хүссэн юм.
Харин төсвийн талаар “Улаанбаатар хот улсын төсөвт 70 орчим тэрбум төгрөг төвлөрүүлдэг. Улсад төвлөрүүлэх орлогын дийлэнхийг ХХОАТ-аас бүрдүүлдэг. 2016 оны 7 дугаар сарын байдлаар хотын төсөв 78,4 тэрбумаар тасраад байна. Оны эцэст 100 орчим тэрбум төгрөгөөр тасалдах дүр зураг харагдаж байна. Гэхдээ эдийн засгийн хямрал гээд зовлон тоочихоос илүүтэй хотын удирдлагууд хөрөнгө оруулалт, бүтээн байгуулалтын ажлыг тасралтгүй хийж, ажлын байр нэмэгдүүлэх зорилтоо хэрэгжүүлнэ” гэлээ. Нийслэлийн төсвөөс энэ онд 221,8 тэрбум төгрөгийн хөрөнгө оруулалт хийсэн байна. Үүнийг салбараар авч үзвэл хамгийн их буюу 104,6 тэрбум төгрөгийг хот байгуулалтын салбарт, 60,4 тэрбум төгрөгийг авто замын салбарт, 33,9 тэрбум төгрөгийг нийгмийн салбарт, 7,5 тэрбум төгрөгийг хот тохижилтын салбарт гэх мэтээр хөрөнгө оруулалт хийжээ.