Зэвсэгт хүчинд Холбооны цэрэг үүсэн байгуулагдсаны 95 жилийн ойг тохиолдуулан Монгол Улсын Их хурлын гишүүн, ЗХЖШ-ын дарга агсан, хошууч генерал Р.Гаваагийн нэрэмжит Холбоочдын цогцолбор тэмцээн энэ сарын 14-нөөс 16-ны өдрүүдэд боллоо.
Залуу үеийн холбоочдын мэргэжлийн болон спортын ур чадварыг дээшлүүлэх, мэргэжилтнүүдийн мэдлэгийн цар хүрээ, дадлага, чадварыг нэмэгдүүлэх, харилцан туршлага солилцох зорилгоор зохион байгуулсан уг тэмцээнд Зэвсэгт хүчний анги байгууллагууд, Монгол Улсын үндэсний аюулгүй байдлыг хангах тусгайлсан чиг үүрэг бүхий байгууллагуудын 200 гаруй тамирчид хурд хүчээ сорив.
Онцгой байдлын ерөнхий газраас Гамшгийн шуурхай удирдлагын Холбоо зарлан мэдээллийн чиглэлийн мэргэжилтнүүд, техникийн бэлэн байдал хариуцсан инженерүүд, холбоо, зарлан мэдээлэл хариуцсан операторууд, НОБГ-ын дүүргүүдийн Гал түймэр унтраах, аврах ангийн дуудлага хүлээн авагчид, Аврах тусгай ангийн Холбооны тусгай бүлгийн албан хаагчид амжилттай оролцлоо.
Онцгой байдлын ерөнхий газрын баг тамирчид хурдач радиотелеграфчин, цэргийн холбоочдын мэргэжлийн цогцолбор дасгал, кибер цэрэг, радио илрүүлэлтийн “үнэг агналт”, зүг чиглэл, байрлал олох, “Зэвсэгт хүчний холбоо мэдээллийн хөгжилд бидний оролцоо” эссе бичлэгийн уралдаан гэсэн төрлүүдэд нийт 15 багаас наймдугаар байрт, гар бөмбөг, ширээний теннис, шатар, дартсын тэмцээнд гуравдугаар байр эзлэн багийн дүнгээр гуравдугаар байрт шалгарлаа.
Тэмцээний хурдач радиотелеграфчины төрөлд Онцгой байдлын ерөнхий газрын Аврах тусгай ангийн Холбооны тусгай бүлгийн аврагч холбоочин, онцгой байдлын дэд ахлагч Н.Хүсэл, онцгой байдлын ахлагч М.Эрдэнэбаатар нар амжилттай оролцож спортын гуравдугаар зэрэг авсан юм.Холбоочдын цогцолбор тэмцээний нэгдүгээр байрт Зэвсэгт хүчний 013 дугаар анги, хоёрдугаар байрт Зэвсэгт хүчний 124 дүгээр анги шалгарчээ.
Онцгой байдлын ерөнхий газраас АНУ-ын Элчин сайдын яам, Аляскийн үндэсний гвард, Номхон далайн тусгай ажиллагааны командтай хамтран зохион байгуулж байгаа Гамшгийн удирдлага сургалт, дадлага сургууль өнөөдөр Хууль сахиулах их сургууль дээр эхэллээ.
Оросын төрийн Думын доод танхимын сонгууль болж өндөрлөлөө. Саналын 50 хувийг тоолсны дараа 53.54 хувийн саналыг Нэгдсэн Оросын нам авлаа гэж Оросын сонгуулийн төв хорооноос мэдээлж байсан юм. Коммунист нам 14 хувийн санал, Либерал ардчилсан нам 13.9 хувийн санал авчээ. Бусад намуудын авсан санал 5 хувиас хэтрээгүй байна. Оросын төрийн думын доод танхимын энэхүү сонгууль есдүгээр сарын 18-д холимог тогтолцоогоор явагдсан юм.
Нийслэлийн Засаг даргын зөвлөлийн хурал өнөөдөр болж, Улаанбаатар хотын өвөлжилтийн бэлтгэл ажлын явцтай танилцлаа. Улаанбаатар хотын Ерөнхий менежер бөгөөд Нийслэлийн Захирагчийн ажлын албаны дарга Т.Гантөмөрийн танилцуулснаар өвөлжилтийн бэлтгэл ажил 87,6 хувьтай байна. Инженерийн хангамжийн байгууллагуудын 2016-2017 оны өвөлжилтийн бэлтгэлийн хувьд “Улаанбаатар дулааны сүлжээ” ТӨХК 100 хувь хангасан бол Нийслэлийн тээврийн газар 69,2 хувьтай буюу хамгийн бага хувийн биелэлттэй байгаа юм. Үүнд анхаарч, ажлаа эрчимжүүлэхийг хотын дарга С.Батболд үүрэг болголоо.
Өвлийн улирал хаяанд ирж, нэг л өглөө нийслэл хот цасан бүрхүүлтэй болохыг хотын дарга сануулаад халтиргаа гулгааг арилгах зорилгоор бэлтгэж байгаа давс, бодисны нөөцийг асуулаа. Өнөөдрийн байдлаар 542,1 тогнн давс, 639,3 тонн зориулалтын бодис нөөцөлжээ.
Хурлын төгсгөлд Нийслэлийн Засаг дарга бөгөөд Улаанбаатар хотын захирагч С.Батболд Өвөлжилтийн бэлтгэл ажлын төлөвлөгөөний хэрэгжилтийг хангаж, дутуу хэрэгжилттэй ажлуудыг яаралтай дуусгах, үүсч болзошгүй гэмтэл, хүндрэлтэй асуудлыг тухай бүр яаралтай шийдвэрлэж, дээд шатны удирдлагад мэдээлж, зохион байгуулалтын арга хэмжээ авч ажиллахыг Инженерийн хангамжийн байгууллагын удирдлагуудад, Хэрэгжилтэд хяналт тавьж, тайлагнаж ажиллахыг Улаанбаатар хотын Ерөнхий менежер бөгөөд НЗАА-ны дарга Т.Гантөмөрт тус тус даалгалаа.
Өнгөрсөн амралтын өдрүүдэд Замын цагдаагийн газрын Жижүүрийн шуурхай удирдлагын хэлтэст 612 дуудлага ирснээс зам тээврийн ослын 457 дуудлага бүртгэгдэсний гэмт хэргийн шинжтэй гомдол мэдээлэл 26 бүртгэгдэж нэг хүний амь нас хохирч, 33 хүн хөнгөн болон хүнд гэмтсэн байна.Зам тээврийн осолд сургуулийн өмнөх насны 2 хүүхэд, сургуулийн насны 7 хүүхэд өртсөн байна. Мөн согтууруулах ундааны зүйл хэрэглэсэн үедээ хөдөлгөөнд оролцсон жолооч 2, явган зорчигч 3 бүртгэгдсэн бол согтуугаар тээврийн хэрэгсэл жолоодсон 109 жолоочийг илрүүлжээ. ЗЦГ-аас согтуугаар тээврийн хэрэгсэл жолоодсон жолоочийн тоо харьцангуй өндөр гарсан нь өнгөрөгч амралтын өдрүүдэд хурим найр их болсонтой холбогдуулан тайлбарлаж байна. Замын хөдөлгөөний аюулгүй байдлын тухай хуульд зааснаар согтуугаар тээврийн хэрэгсэл жолоодвол хамгийн багадаа 384 мянган төгрөгөөр торгуулж, 6-24 сарын хугацаагаар эрхээ хасуулна. Цаашлаад 30 хоног баривчлагдаж, 768 мянган төгрөгөөр торгуулах хуультай ажээ. 
“Монгол HD” телевизээс хоёр дахь жилдээ үзэгч түмэндээ хүргэж байгаа “Авьяаслаг Монголчууд” шоуг ирэх жил хийхгүй гэж эх сурвалж мэдээллээ. Тодруулбал, энэ мэдээллийг Монгол HD телевизийн дэд захирал, ерөнхий продюсер Г.Бат-Эрдэнэ өөрийн жиргээ хуудсаараа дамжуулан хийсэн байна. Дахин хийгдэхгүй болсон шалтгаан нь эдийн засгийн байдал хүнд байгаатай холбоотой ажээ.
Монгол Улсын Засгийн газрын 2016-2020 оны үйл ажиллагааны хөтөлбөрийн гол зорилт нь улс орны эдийн засгийг богино хугацаанд сэргээж, өсөлтийг бий болгон нийгмийн салбаруудыг дэмжиж, иргэдийнхээ аж амьдралыг сайжруулахаас гадна төрийн үйлчилгээг хөнгөн шуурхай, чирэгдэлгүй бөгөөд ил тод, нээлттэй үзүүлэх, нийгмийн итгэлцлийг бэхжүүлэн, улс үндэстний аюулгүй байдлыг баталгаажуулахад чиглэсэн тодорхой зорилтуудыг дэвшүүлснийг мөн тэрээр онцоллоо.
Тайландын төв хэсэгт оршдог Аюутаяад хүн зөөдөг завь гүүр мөргөн осолдож 13 хүн нас барсан байна. Хоёр тавцант завь орон нутгийн цагаар 16:00-д Чао Праяа голд явж байжээ. Зорчигчид нийслэл Ванкок хотын зах Аюутаяад ислам шашны ёслолд оролцоод Нонтабурируу буцаж явсан байна. Завин дээр зорчиж явсан 100 гаруй муслим шашинтай мөргөлчдөөс 30 гаруй нь шархдаж олон тооны хүн алга болсон байна. Энэхүү осол жуулчид хамгийн их цуглардаг Ват Сахам сүмийн ойролцоо гарчээ.
ХНХЯ-наас хүүхэд бүрт олгодог 20 мянган төгрөгийг энэ есдүгээр сарын сүүлээр олгохоор болсон тухай мэдээллээ. Ингэхдээ олгогдоогүй байсан долоо, наймдугаар сарын мөнгөтэй хамтад нь олгоно гэж албаны эх сурвалж хэлж байна. Хүүхдийн мөнгө хөтөлбөрт 2016 оны эхний хагас жилийн гүйцэтгэлээр улсын хэмжээнд 1,021,000 мянган хүүхэд хамрагдаж сар бүр 20,000 мянган төгрөг аваад байсан юм. Харин эдийн засгийн нөхцөл байдлаас шалтгаалан зургаадугаар сараас хойш олгоогүй байгаа. Улмаар төсөвт тодотгол хийж ялгавартайгаар хүүхдийн мөнгийг олгохоор болсон. Энэ дагуу амьжиргааны түвшингээр нь 1-20 хүртэл ангилалд хамруулж, 1-10 дугаар бүлэгт багтсан хүүхдүүдэд мөнгийг сар бүр олгохоор болсон. Харин 10-20 дугаар бүлэгт багтсан хүүхдүүдийн мөнгийг 2019 оноос эдийн засаг сайжирхаар бөөнд нь олгох ажээ.
Өнгөрсөн наймдугаар сарын 31-нд Англи улсын иргэн Стивен Нэйш гэх уулчин Монгол улсын нутаг дэвсгэрт амиа алдсан хэрэг гарсан. Талийгаачийн дурсгалыг хүндэтгэн зул өргөх ёслол өнгөрсөн өдөр Үндэсний цэцэрлэгт хүрээлэнд боллоо.