Month: September 2016

Өчигдөр нийслэлийн Онцгой байдлын газарт аврах ажиллагааны 3 дуудлага ирж дуудлагуудын дагуу аврах ангийн бүрэлдэхүүн шуурхай ажилласан байна. Тодруулбал, “Баянгол дүүргийн 3 дугаар хороо, Нарны хороолол, 4 дүгээр байрны айлд 9 сартай хүүхэд гэртээ цоожлогдсон цахилгаан зуух асаалттай байгаа хаалга онгойлгож өгнө үү” гэсэн дуудлагыг ирүүлснээр Аврах ангийн бүлгийг хүрэлцэн очиход 9 сартай, эмэгтэй хүүхэд гэртээ цоожлогдсон байсныг хаалгыг нь онгойлгож хүүхдийг ээжид нь эсэн мэнд хүлээлгэн өгч, цахилгаан зуух асаалттай байсныг аюулгүй болгожээ.

Мөн “Сүхбаатар дүүргийн 4 дүгээр хороо, 10 дугаар байрны айлд гэртээ ганцаараа байгаа өндөр настай хүн хаалгаа онгойлгохгүй байна онгойлгож өгнө үү” гэсэн дуудлагыг ирүүлснээр Аврах ангийн бүлэг очиж хаалгыг онгойлгоход 84 настай, эмэгтэй биеийн байдал муу орны хажууд хэвтэж байсныг эмнэлгийн анхан шатны тусламж үзүүлэн эмнэлэгт хүлээлгэн өгсөн байна. Бага насны хүүхэд болон өндөр настан, хөгжлийн бэрхшээлтэй иргэдийг харгалзах хүнгүй орхихгүй байхыг нийслэлийн Онцгой байдлын газраас сэрэмжлүүлж байна.

Есдүгээр сарын 01-нд цэцэрлэгт биш, гэртээ цоожлогдон үлдсэн 43 мянга орчим хүүхэд бий. Эдгээр хүүхдийн 3000 гаруйг нь улс хувьсах зардал, хоолны мөнгийг нь дааж, орон тоо нь гүйцээгүй хувийн цэцэрлэгүүдэд явуулах шийдвэрийг Засгийн газар гаргасан байна. Өөрөөр хэлбэл улсын төсвөөс 1.4 тэрбум төгрөг гаргаж, 3087 хүүхдийг цэцэрлэгт хамруулахаар болжээ. Хүүхэд нь харьяа хорооныхоо цэцэрлэгт явах сугалаа сугалж чадаагүй эцэг, эхчүүд өнөөдөр, маргааш хоёр өдөр ажлын цагаар дахин харьяа улсын цэцэрлэгтээ хандан бүртгүүлж, хувийн цэцэрлэгт нэг ч төгрөг төлөхгүйгээр хүүхдээ өгөх боломжтой болж байна. Цэцэрлэгт нэмэлтээр орох хүүхдүүдийн элсэлтийг төрийн өмчийн цэцэрлэгийн эрхлэгч болон хувийн цэцэрлэгийн төлөөлөл, багш, ажилтан, хорооны ажилтны баг бүртгэх юм. Мөн 3087 хүүхдийн 30 хувь хүртэл хүүхдийг зорилтот бүлгээс сонгоно. Энэхүү бүлэгт хүн амын амьжиргааны түвшнээс доогуур орлоготой, эцэг эхийн хэн нэг нь хөгжлийн бэрхшээлтэй, хагас буюу бүтэн өнчин эсвэл тусгай хэрэгцээт боловсрол шаардлагатай хүүхдүүд багтах юм.

УИХ-ын чуулганаас 1.4 тэрбум төгрөгийг баталсан. Энэ нь хувийн цэцэрлэгт шинээр явах 3087 хүүхдийн хоолны, урсах зардлын 2016 он дуустал шаардагдах мөнгө. Үлдсэн зардлын хөрөнгийг ирэх оны төсвийн тодотголд салбарын яам нь суулгаж, хэлэлцүүлэн батлуулахаар тохирчээ. Цэцэрлэгийн хүүхдийн нэг жилийн хувьсах зардал 807800 төгрөг, нэг өдрийн хоолны мөнгө нь 1650 төгрөг, сарын хоолны төлбөр нь 36000 төгрөг.

2016 оны төсвийн тодотголыг УИХ-аар хэлэлцэж баталсан. Төсвийн тодотголд хүүхдийн 20 мянган төгрөгийг нийт хүүхдийн 60 хувьд олгох, 2019 оноос аваагүй үлдсэн хүүхдүүдэд нөхөж олгохоор тусгасан билээ. Мөн оюутны 70 мянган төгрөгийн тэтгэлгийг энэ оныг дуустал олгох ба шинэ оны эхнээс бүрэн зогсоохоор тусгаж төсвийн тодотголыг баталсан юм.

Оюутнуудад дээд боловсролын санхүүжилт, суралцагчдын нийгмийн баталгааны тухай хуулийн хүрээнд тэтгэлэг олгодог байсан юм. Өнгөрсөн хичээлийн жилд 61 мянган оюутан тэтгэлэгт хамрагдаж, улсын төсвөөс 15,9 тэрбум төгрөг зарцуулжээ.

Moнголын Хэвлэл мэдээллийн мөвлөлийн Сонин, сэтгүүл, сайтын Ёс зүйн хорооны гомдол хэлэлцэх ээлжит хуралдаан 2016 оны есдүгээр сарын 10-ны өдөр болж шинээр ирсэн нэг гомдол, түр түдгэлзүүлсэн байсан хоёр гомдлыг хэлэлцэж шийдвэрлэлээ.

“Mобиком Корпораци” ХХК-аас нийт есөн сайт, өдөр тутмын нэг сонины редакцид хандан хэт нэг талыг барьсан, үндэслэлгүй ташаа, хэрэглэгчдийг төөрөгдүүлсэн мэдээллээрээ байгууллагын нэр хүндэд халдсан хэмээн үзэж гомдол гаргажээ. Уг гомдлыг Сонин, сэтгүүл, сайтын Ёс зүйн хороо авч хэлэлцээд өдөр тутмын сонин болон нэг сайтын редакци нь “Мэдээлэл нь үнэнд нийцсэн эсэхийг баталгаажуулж, эх сурвалжийг нягталж, тодорхой дурдаагүй” хэмээн үзэж, Хэвлэл мэдээллийн ёс зүйн зарчмын 1.1 болон 1.2 дахь заалтыг, мөн 1.8 дахь заалтын “Буруутгагдсан, шүүмжлэгдсэн этгээдэд тайлбар өгөх боломж олгоно” гэснийг тус тус зөрчсөн гэж дүгнэв. Мөн бусад сайтыг Хэвлэл мэдээллийн ёс зүйн зарчмын 1.1 болон 1.2 дахь заалтыг зөрчсөн гэж дүгнээд эдгээр сайт болон сонины нэрийг нь дурьдахгүйгээр гаргасан зөрчлийн талаар олон нийтэд мэдээлэх шийдвэрийг гаргав.

Монгол улсын Хөгжлийн банкнаас өдөр тутмын нэгэн сонины редакцид хандан бодит баримт нотолгоогүй, нийгмийг төөрөгдүүлсэн, байгууллагын болон хувь хүний нэр төрд ноцтойгоор халдсан мэдээллийг түгээсэн хэмээн үзэж, Хэвлэл Мэдээллийн Зөвлөлд гомдол гаргасан. Энэхүү гомдлыг Сонин сэтгүүл, сайтын ёс зүйн хорооны 2015 оны арваннэгдүгээр сарын 03-ны өдрийн хуралдаанаар авч хэлэлцээд, шүүхэд нэхэмжлэл гаргасантай холбогдуулан түр түдгэлзүүлсэн байсан юм. Энэ удаагийн хуралдаанаар уг гомдлыг дахин авч хэлэлцээд тус сонины редакци нь Хэвлэл мэдээллийн ёс зүйн зарчмын 1 дэх заалтын “Олон түмэнд үнэнд нийцсэн мэдээлэл хүргэх, хүнлэг ёс, хүн чанарыг эрхэмлэх нь сэтгүүлзүйн эрхэм дээд үнэт зүйл мөн. Мэдээллийг нягтлах нь сэтгүүл зүйн нягт, нямбай үйл ажиллагааны үндсэн зарчим болно” гэснийг, 1.1 дэх заалтын “Мэдээлэл нь үнэнд нийцсэн эсэхийг баталгаажуулж, санамсаргүй алдаа гаргахаас зайлсхийнэ” гэснийг, 1.8 дахь заалтын “Буруутгагдсан, шүүмжлэгдсэн этгээдэд тайлбар өгөх боломж олгоно” гэснийг тус тус зөрчсөн байна гэж дүгнэлээ. Энэ дүгнэлтийг үндэслэн сонины редакцийн нэрийг дурдахгүйгээр гаргасан зөрчлийг нь олон нийтэд мэдээлэх шийдвэрийг гаргав.

Мөн иргэн Ц.П-ийн зургаан сайтын редакцид хандан гаргасан гомдлыг Сонин, сэтгүүл, сайтын Ёс зүйн хороо түр түдгэлзүүлсэн байсныг дахин хэлэлцлээ. Гомдол гаргагч нь сайтуудыг хэт нэг талын мэдээллийг дэвэргэн бичиж, хувь хүний нэр төрийг гэр бүл болон ажлын хамт олны дунд унагаасан ноцтой үйлдэл хэмээн үзэж, Монголын Хэвлэл мэдээллийн зөвлөлд хандсан юм. Нийтлэлд хохирогчоор дурдагдсан этгээд нь тухайн нийтлэлтэй холбоотой асуудлаар шүүхэд нэхэмжлэл гаргасан байсан ч, гомдол гаргагч хууль хяналтын байгууллагаар шийдэгдээгүй байхад өөрийг нь буруутан мэтээр бичсэнд гомдолтой байгаагаа илэрхийлсэн.

Сонин, сэтгүүл, сайтын Ёс зүйн хороо уг гомдлыг үндэслэлтэй гэж үзэн дахин авч хэлэлцээд дараах шийдвэрийг гаргалаа.

Cityinfo.mn, fact.mn, photonews.mn, shuurhai.mn, amidral.mn, dorgio.mn сайтын редакци нь Хэвлэл мэдээллийн ёс зүйн зарчмын 1 дэх заалтын “Олон түмэнд үнэнд нийцсэн мэдээлэл хүргэх, хүнлэг ёс, хүн чанарыг эрхэмлэх нь сэтгүүлзүйн эрхэм дээд үнэт зүйл мөн. Мэдээллийг нягтлах нь сэтгүүл зүйн нягт, нямбай үйл ажиллагааны үндсэн зарчим болно” гэснийг, 1.3 дахь заалтын “Бүтээлийн гарчиг, зураг, дүрс, дуу, график, ишлэл зэрэг нь агуулгыг буруугаар ойлгуулах, хэт хялбарчлах, мэдээллийг нөхцөл байдлаас салгаж мушгин гуйвуулах ёсгүйг үргэлж санаж, ийм зөрчил гаргахгүйн төлөө ажиллана” гэснийг, 1.8 дахь заалтын “Буруутгагдсан, шүүмжлэгдсэн этгээдэд тайлбар өгөх боломж олгоно” гэснийг, 4.2 дахь заалтын “Шүүх гэм буруутайг нь нотлоогүй бол хэнийг ч гэм буруутай гэж үзэхгүй” гэснийг тус тус зөрчсөн байна гэж дүгнэв. Энэ дүгнэлтийг үндэслэн Гомдол барагдуулах журмын 6.2.4 дахь заалтад зааснаар дээрхи сайтуудын рөдакцид энэ тухай мэдэгдэж, алдаагаа засах, гомдол гаргагч иргэнээс уучлал гуйхыг зөвлөмж болгон албан бичиг хүргүүлж, сityinfo.mn, fact.mn, photonews.mn, shuurhai.mn, amidral.mn, dorgio.mn сайтуудын редакцийн нэрийг нь дурьдаж гаргасан зөрчлийн талаар олон нийтэд мэдээлэх шийдвэр гаргалаа.

Эх сурвалж: Монголын Хэвлэл мэдээллийн зөвлөл

Өнөөдөр Цагаатгах ажлын удирдан зохион байгуулах нийслэлийн салбар комисс хуралдлаа. Комиссын нарийн бичгийн дарга М.Халтар “Монгол Улсын Нийтээр тэмдэглэх баярын болон тэмдэглэлт өдрүүдийн тухай хуулийн 5 дугаар зүйлийн 5.1.7, Улсын Их Хурлын 1996 оны 33 дугаар тогтоолыг үндэслэн цагаатгах ажлыг зохион байгуулах нийслэлийн салбар комиссоос энэ жилийн улс төрийн хилс хэрэгт хэлмэгдэгсдийн өдрөөр нийт зургаан үндсэн ажил төлөвлөж бүгд хууль дүрмийн дагуу амжилттай хийгдсэн” гэдгийг хэллээ.

Мөн өнөөдрийн хурлаар Монгол Улсын Улс төрийн хилс хэрэгт хэлмэгдэгсдийг цагаатгах, тэдэнд нөхөн олговор олгох тухай хуулийн 23 дугаар зүйлийн 23.1 дэх заалт, Монгол Улсын Цагаатгах ажлыг удирдан зохион байгуулах улсын комиссын дарга, Сангийн сайдын хамтарсан 2012 оны 04 дүгээр тушаалаар батлагдсан “Улс төрийн хилс хэрэгт хэлмэгдсэн иргэдэд орон сууц худалдан авахад зориулан мөнгөн олговор бэлнээр олгох тухай журам”-ыг үндэслэн Улс төрийн хилс хэрэгт өөрөө хэлмэгдэгч дөрвөн иргэнд орон сууцны оронд мөнгөн олговор олгохоор боллоо.

Нийслэлийн Засаг дарга С. Батболд 14 хоног тутмын мягмар гарагт иргэдтэй тогтмол уулзалт хийдэг. Энэ удаагийн уулзалт Нийслэлийн үйлчилгээний нэгдсэн төвийн “Мишээл” дэхь салбарт боллоо.

Уулзалтын эхэнд өмнөх уулзалтуудын үеэр хотын даргатай газрын маргааны асуудлаа шийдүүлэхээр ирж байсан хоёр иргэний асуудлыг шийдвэрлэснээ танилцуулав.

Чингэлтэй дүүргийн иргэн Т.Чинболорын өмчлөл бүхий газарт 2012 онд 110 квт-ийн трансформатр тавихаар газрыг нь чөлөөлсөн ч ч нөхөн олговорыг өнөөдрийг хүртэл олоогүй байсан байна. Энэ асуудлыг шийднэ гэдгээ хотын дарга хэлж байсан бөгөөд өнөөдөр түүнд газрын нөхөн олговор өгөхөөр захирамж гаргаснаа танилцуулаа. Мөн СХД-ийн иргэн П.Энхтуяа 11 жилийн өмнө үйлчилгээний зориулалтаар газар эзэмших зөвшөөрөл авсан ч аюулгүйн тойрогт газар нь орсон гэсэн үндэслэлээр буцааж эзэмших эрхийг нь хүчингүй болгосон байна. Тэрээр 11 жилийн турш энэ асуудлыг шийдвэрлүүлэхээр шат шатны байгуулагад хандсаар иржээ. Харин өнөөдөр тэрээр нийслэлийн Засаг дарга С.Батболдоос газар эзэмшүүлэх захирамж гардан авлаа. Тэрээр 11 жил хөөцөлдөж байсан ажлыг минь 2 сар ч хүрэхгүй хугацаанд шийдэж өгсөнд баяртай байна гэсэн юм.

Өнөөдрийн уулзалтад хотын даргад асуудал, бэрхшээлээ ярьж шийдвэрлүүлэхээс гадна шинэ санал санаачилгаа танилцуухараар ирсэн иргэд ч цөөнгүй байлаа. Тэдний нэг нь Баянзүрх дүүргийн иргэн Ц.Мөнхбаатар юм. Тэрээр агаарын бохирдлыг бууруулах зорилгоор хийжүүлэгч зуух зохион бүтээсэн байна. Түүний зохион бүтээсэн “Нүүдэлчин” хийжүүлэгч зуух нь монгол улсад мөрдөгддөг стандартуудыг бүрэн хангасан төдийгүй түлшний 50-60 хувийн хэмнэлттэй нь судалгаагаар тогтоогджээ. Хотын дарга С.Батолд түүний энэ санаачилгыг дэмжин хамтрач ажиллахаа илэрхийллээ.

Мөн Сүхбаатар дүүргийн иргэн Ц.Гал-Эрдэнэ шинэ цэцэрлэг барьснаа танилцуулаад үйл ажиллагааг нь дэмжин зохих зөвшөөрөл олгохыг хүслээ.

Хотын дарга С.Батболд, цэцэрлэгийн хүрэлцээ хангамж муу байгаа учраас нийслэлийн зүгээс аль болох төрийн бус цэцэрлэг байгуулах иргэдийн хүсэлтийг уян хатан нөхцөлтэйгээр хүлээн авч шийдвэрлэж байгаа. Та бүхэн барилгын норм, дүрэм стандартын дагуу барилгаа барьж аюулгүй байдлыг бүрэн хангасан бол зөвшөөрөл олгоход бэлэн гэлээ.

Баянгол дүүргийн иргэн Д.Эрдэнэсайхан, “Хонхор” нуурын ойролцоо ажиллаж байгаа хар тугалганы үйлдвэрийг хаалгуулах хүсэлтийг тухайн хорооны иргэд гаргаж байгааг уламжиллаа. Энэ үйлдвэр нь 3 жилийн өмнө байгуулагдсан, хуучин акумляторыг шатаах зууханд хийж хар тугалаг гаргаж авдаг байна. Энэ нь байгаль орчинд маш их хор нөлөө үзүүлж байгаа тэрээр хэллээ. Мэргэжлийн хяналтын байцаагчийн дүгнэлтээр байгаль орчинд хоргүй гэсэн дүгнэлт гарч байгаа ч тухайн орчинд байгаа мал зүй бусаар хорогдож байна гэсэн юм. Нийслэлийн мал эмнэлэгийн газрын дарга Л.Нарантуяа тухайн бүсийн малаас 3 удаагийн шинжилгээ хийхэд цусанд хортой бодис илэрсэн гэдгийг хэллээ.

Хотын дарга энэ үйлдвэрийг шалгах эрх бүхий ажлын хэсгийг холбогдох байгууллагуудын бүрэлдэхүүнтэй байгуулж, ойрын хугацаанд асуудлыг шийдвэрлэхээр болов.

Иргэд нийслэлийн Засаг даргатай уулзах хүсэлтээ Нийслэлийн үйлчилгээний нэгдсэн төвөөр дамжуулан гаргах ёстой бөгөөд өнгөрсөн хугацаанд хотын дарга 40 орчим иргэнтэй нүүр тулан уулзаж, өргөдөл хүсэлтийг нь хуулийн дагуу шийдвэрлэжээ.