Month: September 2016

Categories
мэдээ улс-төр

Хоёр улсын парламентын эмэгтэй гишүүд уулзжээ

БНСУ-ын Үндэсний Ассамблейн гишүүн, До бүро минжү намын дэд дарга Ким Ён Жүгийн урилгаар УИХ-ын гишүүн, УИХ дахь Монгол-Солонгосын парламентын бүлгийн дэд дарга М.Оюунчимэг, УИХ-ын гишүүн Ц.Цогзолмаа, Б.Ундармаа, М.Билэгт, Н.Оюундарь, Г.Мөнхцэцэг нар энэ сарын 18-22-ны өдрүүдэд тус улсад айлчилж байна.

УИХ-ын эмэгтэй гишүүд өчигдөр /2016.09.20/ БНСУ-ын Үндэсний Ассамблейн эмэгтэй гишүүдтэй уулзалт хийлээ.

Уулзалтын үеэр талууд хоёр улсын улс төр, нийгэм, эдийн засгийн харилцааг өргөжүүлэн хөгжүүлэхэд парламентын эмэгтэй гишүүдийн оролцоо болон цаашдын хамтын ажиллагааны чиглэлийн талаар ярилцаж, санал солилцлоо.

Categories
гадаад мэдээ

Родриго Дутерте Европын холбооныхонд дунд хуруу үзүүлэв

Филиппиний Ерөнхиийлөгч Родриго Дутерте дахин сенсааци дэгдээлээ. Тэрбээр өчигдөр улсынхаа телевизээр шууд мэдэгдэл хийх үеэрээ Европын холбооныхонд хандан дунд хуруу гозойлгосон байна.

Хар тамхины бүлэглэлүүд, наймаачдын эсрэг ширүүн ажиллагаа явуулж буй Родриго Дутертег Европын холбооны парламентын зүгээс хүчтэй шүүмжилж, хүний эрхийг ноцтойгоор зөрчиж байна хэмээсэн юм.

Барууны холбоо Филиппиний Ерөнхиийлөгчийг энэ оны зургадугаар сараас хойш “хар тамхины эсрэг дайн” хийхдээ 3500 хүний амийг хөнөөсөнд буруутгаж, хяналтын байгууллага ажиллуулж, тайлан гаргахыг шаарджээ.

Родриго Дутерте өчигдөр өөрийн төрөлх хот Даваод хийсэн мэдэгдлийнхээ үеэр “Би Европын холбооны эсэргүүцсэн бичгийг уншсан. Би тэдэнд нэг зүйл хэлье. Fuck You” хэмээн дунд хуруугаа гозойлгосон байна. Тэрбээр энэ үгийг филиппин болон англи хэлээр хэлжээ.

Родриго Дутерте сар хүрэхгүй хугацааны өмнө нэгэн мэдэгдлийнхээ үеэр АНУ-ын Ерөнхийлөгч Барак Обамаг биеэ үнэлэгчийн зулбасаг хэмээн ярьж дуулиан тарьж байв. Тэрбээр удалгүй ийм үг хэлсэндээ уучлалт гуйсан билээ.

Categories
мэдээ нийгэм

Солонгос улс хууль бус цагаачдыг сайн дураар явбал таван жилийн хугацаанд нэвтрэх эрхийг нь хасахгүй гэв

Өчигдөр буюу Мягмар гарагт Өмнөд Солонгосын хууль зүйн яам мэдэгдэл гаргаж тус улсад хууль бусаар оршин сууж байгаа цагаачдыг сайн дураар Өмнөд Солонгосоос явбал шийтгэлээс чөлөөлөх хугацааг энэ оны төгсгөл хүртэл сунгажээ.

Дөрөвдүгээр сараас эхлэн энэ сарыг дуустал явагдахаар төлөвлөсөн уг арга хэмжээний үр дүн сайн байгаа тул ийнхүү хугацааг сунгасан байна.

Өнгөрсөн таван сарын хугацаанд 28,000 хууль бус цагаач сайн дураар тус улсаас явсан нь өнгөрсөн оны мөн үеэс хоёр дахин нэмэгдсэн тоо юм. Энэ хугацаанд нутаг буцсан хүмүүсийг торгуулиас чөлөөлж, дахин Өмнөд Солонгост ирэх эрхийг нь нээлттэй үлдээх юм байна.

Нутаг буцахаар шийдсэн гадаадын иргэд нь хүчинтэй паспорт, онгоцны тасалбартай байх ёстой ба буцах өдрөө цагаачлалын албанд мэдэгдэх ёстой гэнэ.

Харин өршөөлийн хугацаанд Өмнөд Солонгосоос яваагүй хууль бус цагаачид таван жилийн хугацаанд тус улсад нэвтрэх эрхээ хасуулна гэжээ.

Эх сурвалж: Korea Times

Categories
гадаад мэдээ

Тони Блэйр бизнесээ хааж, ашгийн бус үйл ажиллагаа явуулах болсноо зарлав

Их Британий ерөнхий сайдын суудлаас буусныхаа дараа эхлүүлсэн Тони Блэйрийн хувийн бизнес нэлээд хэл ам дагуулдаг.

Тэгвэл тэр энэхүү бизнесээ хааж, ашгийн бус үйл ажиллагаанд төвлөрч ажиллах болсноо өөрийн вэбсайтад өчигдөр зарлажээ.

Tony Blair Associates компанийн ихэнх хөрөнгийг ашгийн бус үйл ажиллагаанд зориулах ба өөрийн ажлын 80 хувийг мөн ийм үйлсэд зориулах гэнэ.

Харин цөөн тооны зөвлөх үйл ажиллагааг өөрийн хувийн орлогын эх үүсвэр болгож үлдээхээр шийдсэн байна. Ноён Блэйр Tony Blair Associates компанийхаа нэр дээр хэд хэдэн улс орнуудын засгийн газарт зөвлөх үйлчилгээ үзүүлдэг байсан юм.

Түүнийг Казахстаны эрх баригчдад энгийн ард иргэдэд хүч хэрэглэж, олон хүний амь үрэгдсэн хэрэг явдлаа гадаад ертөнцөд хэрхэн зөөлрүүлж харуулах талаар PR-ийн зөвлөгөө өгч байсныг нь шүүмжилдэг.

Мөн Блэйр нь Кувейт, Руанда, Албани, Азербайжан зэрэг орнуудын засгийн газарт өндөр үнэтэй зөвлөх үйлчилгээ үзүүлж байсан юм.

(Жич: Монгол улсын засгийн газар 2014 онд ийм үйлчилгээ авч байсан гэх мэдээлэл байдаг)

Ерөнхий сайд асан Блэйрийн гэр бүлийн хөрөнгийн хэмжээг 80 сая паунд орчим гэсэн тоо баримт байдаг ч тэр үүнийг няцааж байжээ.

Эх сурвалж: Independent

Categories
мэдээ нийгэм

Цэцэрлэгийн хүүхдийн нэмэлт бүртгэлийг улсын цэцэрлэгүүдэд зохион байгуулж байна

Ерөнхий Боловсролын Сургуулийн өмнөх насны хүүхдийн цэцэрлэгт хамрагдалтыг нэмэгдүүлэх зорилгоор хувийн цэцэрлэгт хүүхэд нэмэлтээр элсүүлэхээр болоод байгаа билээ.

Энэ ажлын хүрээнд 2016-2017 оны хичээлийн жилд цэцэрлэггүй үлдсэн 43 мянга гаруй хүүхдээс 3,087-г нь төрийн бус өмчийн цэцэрлэгт хамруулах боломжтой болоод байна. Энэхүү ажлыг анх удаа санаачлан зохион байгуулж байгаа бөгөөд есдүгээр сарын 20-21-ний хооронд бүртгэл явагдах юм.
Өөрөөр хэлбэл, улсын цэцэрлэгт орж чадаагүй хүүхдүүдийн заримыг хувийн цэцэрлэгт авч байгаа бөгөөд тухайн хүүхдээс төлбөр авахгүй, хоолны болон хувьсах зардлыг төрөөс даах юм.

Төрийн бус өмчийн цэцэрлэгт нэмэлт бүртгэл явуулах ажил Чингэлтэй дүүрэгт өнөөдөр эхэлсэнбайна. БСШУСЯ-наас ирүүлсэн удирамжийн дагуу хувийн цэцэрлэгүүдийн нэмэлт бүртгэлийг улсын цэцэрлэгүүдэд зохион байгуулж байгаа. Энэ дагуу тус дүүрэгт үл ажиллагаа явуулдаг зарим хувийн цэцэрлэгийн бүртгэлийн 33 дугаар цэцэрлэгт явуулж байгаа аж.

Categories
мэдээ нийгэм

Баабар: Нийгмийн жоом

Баар, ресторан, цэнгээний газрын хаалгыг 12 цагт тас барьж байх хууль гарсан. Санаачлагч нь нас тогтсон нэгэн парламентч авгай. Хэрэгжүүлэгч нь хотын мээрмаа гэгдэх бас нэг авгай. Өөрснөө чадахаа байхаар бусдыг торгож байгаа ёр нь. Улаанбаатарын долоон мянган цагдаа жорлон дээр цугласан ялаа аятай хотын төвийн хэдэн баар, ресторанаар амьдралаа залгуулна. Нар далд ормогц хотын захаар архидалт, аллага, хулгай дээрэм, хүчирхийлэл, садар самуун буцална. Олз, орлого үгүй тийм газар зүглэдэг тэнэг цагдаа олдохгүй.

Мэргэжлийн хяналтынхан, татварынхан, гаалийнхан, цагдаагийнхан, хот дүүргийн захиргааныхан шинэ жил, цагаан сар, маарт, цэргийн баяраар аль үнэтэй ресторануудад шөнөжин нийлдэг. Дээд зэрэглэлийн ресторануудад жоом байдаггүй. Тэд л жоомны үүрэг гүйцэтгэнэ. Үнэгүй хоол ундааг тэд бүх нүх сүв рүүгээ чихэж гударна, бөөлжинө, зодолдоно, муухай орилолдно, агсам тавина. Хоолон дээгүүр гүйлдэх байгалийн жоомноос хавьгүй муухай, дотор давчдам, огиудас хүрэм.

Энэхүү нийтлэлийг бүрэн эхийг “Өдрийн сонин”-ы өнөөдрийн дугаараас уншина уу.

Categories
гадаад мэдээ

Эмма Уатсон НҮБ-ын индэрээс илтгэл тавив

НҮБ-ын Ерөнхий Ассамблейн 71 дэх чуулга уулзалтад “Харри Потер” цувралын од жүжигчин Эмма Уатсон оролцож, илтгэл тавьсан талаар “www.dailymail.co.uk” мэдээллээ. Жүжигчин бүсгүй эмэгтэйчүүдийн эрх чөлөө, жендерийн асуудлаар илтгэл тавьсан байна. Эмма Уатсон 2014 оноос НҮБ-ын Эмэгтэйчүүдийн зөвлөлийн элчээр сонгогдож, энэ хугацаанд НҮБ-ын уулзалтад оролцож иржээ.

Эмма “Жилээс жилд эмэгтэйчүүдийн эрх зөрчигдсөөр байна. Иргэний дайн, дотоод зөрчил мөргөлдөөний улмаас олон бүсгүйчүүд бие болон сэтгэл санааны хохирол амсаар байна. Дэлхий цэвэр ариун байх ёстой. Бид эрх тэгш амьдрах ёстой. Эмэгтэй гэх шалтгаанаар олон бүсгүй зовлон шаналлыг амссаар байна. НҮБ эмэгтэйчүүдийг эрхийг хамгаалан, тэднийг өмгөөлөх хэрэгтэй” гэж хэлжээ. Тэрбээр илтгэлийнхээ дараа НҮБ-ын ерөнхий нарийн бичгийн дарга Бан Ги Мүнтэй уулзсан байна.

Categories
мэдээ улс-төр

Хүүхдийн мөнгийг энэ сараас олгоно

Хүүхдийн мөнгийг энэ сараас олгоно зурган илэрцүүд

Засгийн газрын ээлжит хуралдаанаар хүүхдийн мөнгийг олгохтой холбоотой зарим журмыг баталжээ.

2016 оны төсвийн тодотголын дагуу нийгмийн зорилтот бүлэг буюу нийт 660 гаруй мянган хүүхдэд хүүхдийн мөнгө олгох юм. Энэ нь мөнгө авах ёстой нийт хүүхдийн 60 хувь бөгөөд үүнд 79.2 тэрбум төгрөг төсөвлөжээ. Хүүхдийн мөнгийг 2016 оны долоодугаар сарын 1-нээс тооцож 2016 оны есдүгээр сард багтааж олгох юм.

Харин үлдэгдэл 40 хувьд хүүхдийн мөнгийг хүүгүйгээр, хугацаатай хадгаламжийн хэлбэрээр банкинд байруулж тодорхой хугацааны дараа нөхөж олгох юм байна.

Categories
мэдээ соёл-урлаг

Э.Урангоо дэлхийд тавдугаарт эрэмблэгддэг миссийн тэмцээнд монголоо төлөөлнө

Э.Урангоо зурган илэрцүүдДэлхийн хэмжээнд зохиогддог гоо бүсгүйн тэмцээнүүдээс эрэмбээрээ тавдугаарт бичигддэг “Face of beauty international” миссийн тэмцээн тав дахь жилдээ манай улсад зохион байгуулагдах гэж байна. Тус тэмцээнд Монгол улсаа төлөөлөн Э.Урангоо гэх бүсгүй оролцохоор болжээ.

Тэрбээр Мисс Н.Ану, Т.Батцэцэг, И.Төгсөө, жүжигчин А.Туяа нартай өрсөлдөн ялагч болж, 60 орны мисстэй өрсөлдөхөөр болжээ.

Энхтайваны Урангоо нь “Сити” дээд сургуулийг Маркетинг, менежментийн чиглэлээр дүүргэсэн.

Бүрэн хэмжээний уран сайхны кинонд дөрвөн удаа тоглосон өдгөө тав дахь кинондоо тоглож байгаа. Жүжиглэх авъяастайгаас гадна дуулдаг, бүжиглэдэг аж.

Тус тэмцээнд оролцохоор

дэлхийн 60 гаруй улсын гоо бүсгүй, тэдний гэр бүл, ойр дотныхон болон тэмцээний ерөнхий зохион байгуулагч Мила Мануел, “Missosology” сайтын тэргүүлэгч Павее Винтура, загварын агентлагын захирал, шүүгч гээд нийт 200-300 хүн манай улсад ирэх ажээ.

Миссийн тэмцээн 14 хоногийн хугацаанд Улаанбаатар хоотноо үргэлжлэнэ. Энэ хугацаанд олон улсын гоо бүсгүйчүүдийг Монголын түүхэн дурсгалт газруудаар болон Улаанбаатар хот дахь музейгээр аялуулах ажээ. Мөн авьяаслаг мисс, спортлог мисс, усны хувцастай хамгийн сайхан харагддаг бүсгүй гэх мэтчилэн урьдчилан шалгаруулалтыг зохион байгуулахаар төлөвлөсөн байна.

Тэмцээн энэ сарын 27-ноос аравдугаар сарын 9-ны өдрүүдэд Монгол улсад зохиогдоно.

Categories
мэдээ улс-төр

ШШГЕГ-ын даргаар Ц.Амгаланбаярыг томилжээ

Засгийн газрын хуралдаанаар зарим яамдын Төрийн нарийн бичгийн дарга нарыг томилсон байна. Д.Даваасүрэнг Гадаад харилцааны яамны, Г.Баясгаланг ХЗДХЯ-ны, Г.Өнөрбаярыг ХНХЯ-ны, Л. Баяртулгыг ХХААХҮЯ-ны, Г.Нандинжаргалыг УУХҮЯ-ны Төрийн нарийн бичгийн даргаар тус тус томилжээ.

Мөн Б.Билэгтийг ШШГЕГ-ийн даргын үүрэгт ажлаас чөлөөлжээ. Түүний оронд Ц.Амгаланбаярыг ШШГЕГ-ын даргаар томилсон байна. Түүнлчлэн Шударга өрсөлдөөн хэрэглэгчийн төлөө газрын орон тооны болон орон тооны бус зарим гишүүнийг чөлөөлж, нөхөн томилжээ.