Month: September 2016

Санхүүгийн зохицуулах хороо /СЗХ/-ны ээлжит хуралдаан өчигдөр болж, дараах асуудлыг хэлэлцэн шийдвэрлэжээ.

СЗХ-ны энэ оны зургадугаар сарын 15-ны өдрийн 233 дугаар тогтоолоор нэмж бүртгэсэн “Багануур” ХК-ийн нэг бүр нь 100 төгрөгийн нэрлэсэн үнэ бүхий нийт 9,870,287 ширхэг энгийн хувьцаа болон нэгдүгээр сарын 29-ний өдрийн 20 дугаар тогтоолоор бүртгэсэн “Айтүүлс” ХХК-ийн нийтэд санал болгон анх удаа гаргасан нэг бүр нь 1,000.00 төгрөгийн нэрлэсэн үнэ бүхий нийт 4,324,263 ширхэг энгийн хувьцааг тус, тус үнэт цаасны бүртгэлээс хассан байна.

Багануурын уурхайн техникийн шинэчлэлд хөрөнгө босгох зорилгоор нэмж гаргасан хувьцаагаар нийт 26,1 тэрбум төгрөг босгохоор төлөвлөсөн боловч хангалттай хөрөнгө босгож чадаагүй. Ингэснээр Үнэт цаасны зах зээлийн тухай хуулийн болон СЗХ-ноос тогтоосон шаардлага хангагдаагүй, анхдагч зах зээлийн арилжааг “амжилтгүй” болсон гэж үзэх үндэслэл болж буй аж. Амжилтгүй арилжигдсан хувьцаагҮнэт цаасны зах зээлийн тухай хуульд заасныг дагуу бүртгэлээс хасдаг.

“Багануур” ХК-д андеррайтерийн үйлчилгээ үзүүлэгч “Ти Ди Бикапитал ҮЦК” ХХК нь хөрөнгө оруулалтын орчны нөхцөл байдлын талаарх судалгаа, цаг хугацааны тооцооллыг оновчгүй гаргасан гэж СЗХ дүгнэжээ. Үүний зэрэгцээ тус компани “Багануур” ХК-тай байгуулсан “Андеррайтерийн болон зөвлөх үйлчилгээний гэрээ’-гээр бүхий л хүчин чадлаа дайчлан ажиллах болон “нийтэд санал болгосон үнэт цаас нь бүрэн зарагдаагүй нөхцөлд тухайн үнэт цаасыг гэрээгээр тохиролцсон үнээр худалдан авах” баталгаа өгч, үүрэг хүлээсэн боловч энэ үүргээ хэрэгжүүлээгүй байна.

Тиймээс СЗХ үнэт цаас гаргагч “Багануур” ХК болон“Ти Ди Бикапитал ҮЦК” ХХК-д хууль тогтоомжоор хүлээсэн үүргээ биелүүлж ажиллахыг хатуу анхааруулахаар болжээ. Нэмж гаргасан үнэт цаасыг бүртгэлээс хассантай холбоотойгоор дараа дараагийн арга хэмжээг зохих дүрэм, журмын дагуу авч хэрэгжүүлэхээр тогтов.

Харин программ хангамжийн үйл ажиллагаа эрхэлдэг “Айтүүлс” ХКолон нийтээс 1.9 тэрбум төгрөгийн мөнгөн хөрөнгө татан, уг хөрөнгөөр Дархан хотод модулярдата төв барихаар төлөвлөж, үнэт цаас бүртгүүлсэн боловч хуульд заасан хугацаанд арилжаагаа явуулж чадаагүй байна. Тиймээс, Үнэт цаасны зах зээлийн тухай хуулийн 12.10-т “Хороо үнэт цаасыг нийтэд санал болгохыг зөвшөөрч бүртгэснээс хойш зургаан сарын дотор тухайн үнэт цаасыг анхдагч зах зээлд гаргаагүй тохиолдолд” бүртгэлийг хүчингүй болгохоор заасны дагуу хасчээ.

Жил бүрийн есдүгээр сарын дунд үеэс ханиад, томуу идэвхжиж эхэлдэг. Хүйтэн сэрүүний улирал эхэлж байгаатай холбоотойгоор улаанбурхан өвчин дэгдэх магадлал өндөр байгааг эмч мэргэжилтнүүд анхааруулсаар байна.

Эцэг, эхчүүдийн анхааралд хүргэхэд ирэх аравдугаар сарын 3-наас эхлэн зургаан сар хүрсэн хүүхдүүдэд улаанбурхны вакцин хийж эхлэхээр болжээ. Улаанбурхны вакцинжуулалтыг өмнө нь есөн сартайд нэг тунгаар, хоёр настайд хоёр тунгаар хийдэг байсан бол энэ удаа урьдчилан сэргийлэх үүднээс “0” тунгаар хийнэ гэдгийг Халдварт өвчин судлалын үндэсний төвийн вакцинжуулалтын албанаас мэдэгдлээ.

Нярай хүүхдийн ванцинжуулалтыг Орхон, Сэлэнгэ, Дархан-Уул, Булган, Хөвсгөл аймгуудад болон Нийслэлийн есөн дүүргийн харьяа эмнэлгүүдэд хийхнэ.

Сүхбаатар дүүргийн Засаг даргын Тамгын газрын Худалдаа, үйлчилгээний хэлтсээс зохион байгуулж байгаа “Ургацын баяр-2016” өдөрлөгийн арга хэмжээ маргааш 12:00 цагт нээлтээ хийнэ. Сүхбаатарын талбайд зохион байгуулагдах уг арга хэмжээний үеэр эх орны хөрсөнд ургасан төмс, хүнсний ногоо, жимс жимсгэний үзэсгэлэн худалдаа болох юм. Үзэсгэлэн худалдаанд дүүргийн өрхийн тариалан эрхлэгчдээс гадна Дархан, Сэлэнгэ, Төв, Булган, Ховд, Увс, Өмнөговь аймгийн ногоочид оролцоно.”Ургацын баяр” худалдаа аравдугаар сарын 05-ны өдрийг хүртэл үргэлжлэх юм.

Нийслэлийн хэмжээнд шаардлага хангахгүй, хууль дүрэм зөрчиж барьсан барилгуудыг буулгахаар болсон байна. Нийслэлийн Мэргэжлийн хяналтын газраас эхний ээлжинд 27 барилгын жагсаалтыг гаргасан бөгөөд эдгээр 27 барилга нь Барилгын тухай хууль, Хот байгуулалтын тухай хуулийг илтэд зөрчсөн, мэргэжлийн хяналтын байцаагч нарын удаа дараагийн актыг үл хайхарсан гэх асуудалтай. Тухайлбал, дэргэдэх орон сууцтай хаяа дэрлэсэн, эсвэл нар тусах боломжгүй болгон, цонх таглаж барьсан, зураг төслийн дагуу бариагүй зэрэг зөрчилтэй аж. Гэхдээ одоогоор барилгуудыг хэзээнээс нурааж, стандартад нийцүүлэн барих эсэх нь тодорхойгүй байгаа бөгөөд нийслэлийн Засаг даргын эцсийн шийдвэрийг хүлээж байгаа аж. Үүний дараа барилгуудыг үе шаттайгаар буулгаж, дахин барих компанийг шалгаруулах замаар ажлыг явуулна гэж албаныхан хэллээ.

Сүхбаатар аймгийн Аудитын газар УИХ болон аймгийн ИТХ-ын сонгуулийн санхүүжилтэд аудитын шалгалт хийж, урьдчилсан дүгнэлт гаргажээ. Шалгалтаар төсвийн зарцуулалтыг тулган баталгаажуулахад мөнгөн урамшууллыг илүү бодож олгосон, зориулалтын бус зүйлд зарцуулсан анхан шатны баримтгүй ажил гүйлгээнд олгосон зэрэг нийт 7 сая төгрөгийн, мөн сонгуулийн зардлын төсвийн гүйцэтгэлийг тайлагнахдаа 6,2 сая төгрөг дутуу тайлагнасан гээд нийт 13,2 сая төгрөгийн зөрчил илэрчээ.

Тиймээс аймгийн аудитын газраас гарсан зөрчлүүдийг арилгуулахын тулд холбогдох заавар, зөвлөмжүүдийг аймаг, сумдын сонгуулийн хороодод хүргүүлжээ. Аймгийн Аудитын газрын дарга, тэргүүлэх аудитор М.Нарантуяа “Шалгалтын эцсийн дүгнэлт гараагүй байгаа. Улсын хэмжээнд нэгдсэн журмаар гарах учиртай. Гэхдээ манай аймгийн тухайд урьдчилсан байдлаар СЕХ-ноос баталсан төсвийг аргачлал, зөвлөмжийн дагуу аймаг, сумдын сонгуулийн хороодод хуваарилсан боловч аймгийн сонгуулийн хороо сумдынхаа сонгуулийн хорооны санхүүгийн зарцуулалтанд хяналт тавьж ажиллаагүй гэсэн дүгнэлтэнд хүрээд байна” гэжээ.

Сонгуулийн ерөнхий хорооноос 2016 оны УИХ болон аймгийн ИТХ-ын сонгуулийн зардалд нийт 267 сая төгрөгийн санхүүжилтийг Сүхбаатар аймагт олгосон бөгөөд үүнийг аймгийн сонгуулийн хороонд 72 сая төгрөг, 13 сумын сонгуулийн хороодод 195,7 сая төгрөгийг тус тус хуваарилжээ. Олгосон санхүүжилтийг ихэнх хороод 100 хувь ашигласан бол аймгийн сонгуулийн хороо, Онгон, Уулбаян сумдын хороодоос нийт 17 сая төгрөг үлдсэнийг СЕХ-ны дансанд буцаан төвлөрүүлжээ.