Month: September 2016

Уулзалтаар ОУВС-ын зүгээс улс орнуудад хэрэгжүүлдэг төсөл хөтөлбөрүүдийн талаар болон өнгөрсөн жилүүдэд ОУВС-аас хэрэгжүүлж хөтөлбөрүүдийн нөхцөл ихээхэн уян хатан болж өөрчлөгдсөн, хөтөлбөрийг хэрэгжүүлэгч улс орны өөрийн авч хэрэгжүүлэх макроэдийн засгийн бодлого голлох үүрэг гүйцэтгэдэг болохыг танилцуулав. Монгол Улсын Ерөнхий сайд хэлэхдээ Эдийн засгийн хүндрэлийг даван туулахын төлөө Засгийн газар ихээхэн анхаарал хандуулж, тусгай хөтөлбөр боловсруулан ажиллаж байгааг дурьдаад Засгийн газрын зүгээс эдийн засгийн хүндрэлийг даван туулах чиглэлээр ОУВС-тай цаашид хамтран ажиллахад бэлэн байгаагаа илэрхийллээ.

УИХ-ын дарга М.Энхболд өнөөдөр захирамж гаргаж, 2016 оны УИХ-ын намрын чуулганы цагийг тогтоожээ. Уг захирамжаар нэгдсэн хуралдааныг долоо хоног бүрийн пүрэв, баасан гаригт 10:00 цагаас эхэлж, үдээс хойш 15:00 цагаас үргэлжлүүлж байхаар тогтоожээ.

Хуулиараа УИХ-ын намрын чуулганыг жил бүрийн аравдугаар сарын 1-нд нээдэг ч энэ удаад амралтын өдөр буюу бямба гариг таарсан тул аравдугаар сарын 3-нд намрын чуулганыг нээхээр болоод байгаа юм.

Монгол Улсын Их Хурлын дарга Миеэгомбын Энхболд өнөөдөр /2016.09.26/ Олон улсын Улаан загалмай, Улаан хавирган сар нийгэмлэгүүдийн холбооны Ерөнхий нарийн бичгийн дарга Элхаж Эс Сю-г хүлээн авч уулзав.

Уулзалтын эхэнд УИХ-ын дарга М.Энхболд ноён Элхаж Эс Сю-тэй уулзаж байгаадаа баяртай байна гээд байгалийн гамшиг, гэнэтийн осол, аюул болсон дэлхийн өнцөг булан бүрт хүмүүнлэгийн тусламжийг хамгийн түрүүнд хүргэж, хүний амь нас, эрүүл мэнд, амьжиргааг хамгаалж байдаг Олон улсын Улаан загалмай, Улаан хавирган сар нийгэмлэгүүдийн холбоо нь МУЗН-ийг дэмжин ажиллаж байгаа нь цаашид үйл ажиллагааны цар хүрээг нь нэмэгдүүлэх олон боломж нээж өгч байгааг тэмдэглэн хэллээ.

Монгол Улсын хүн амын тодорхой хувийн амьжиргааны эх үүсвэр нь мал аж ахуй болон газар тариалан байдаг онцлогтойг Улсын Их Хурлын дарга онцлон хэллээ. Тэрээр “2009 онд Монгол Улсад сүүлийн 40 жил тохиож байгаагүй зуд болж, 30.000 гаруй өрхөд ядуурал нүүрлэж байв. Энэ үеэр хүмүүнлэгийн үйл ажиллагаа явуулдаг олон улсын байгууллагуудад хандан, хамтарч ажилласан юм. Тухайн үед НҮБ-ын зүгээс “Монголын зуд” гэдэг ойлголтыг тус байгууллагын үйл ажиллагааны үгсийн санд тусган, онцгойлон анхаарч байх шаардлагатай юм байна хэмээн онцолж байсан” хэмээн дурдав. Монгол орны хувьд зуны цагт ган, өвлийн улиралд зуд тохиох жил байдаг бөгөөд байгалийн эдгээр гамшгийн эрсдэлийг бууруулах, гамшигт өртсөн ард иргэдийн амьжиргааг дэмжихэд Олон улсын Улаан загалмай, Улаан хавирган сар нийгэмлэгүүдийн холбоо анхаарлаа хандуулж, хүмүүнлэгийн тусламж үзүүлж ирсэнд УИХ-ын нэрийн өмнөөс болон хувиасаа талархаж буйгаа илэрхийлсэн юм.

МУЗН нь төр, засагтайгаа ихээхэн өндөр үр дүнтэй хамтарч ажилладаг болохыг УИХ-ын дарга онцлон тэмдэглээд энэ сайн туршлагыг бусад оронд танилцуулан, сурталчлах тал дээр ноён Элхаж Эс Сю-г анхаарал хандуулна хэмээн найдаж байна гэв. Түүнчлэн УИХ-аас Монголын улаан загалмай нийгэмлэгийн эрх зүйн байдлын тухай хуулийг шинэчлэн найруулж, тус нийгэмлэгийн статусыг Үндэсний хүмүүнлэгийн байгууллага болгон өөрчилж, төрдөө нэмэлт хүч болж хүмүүнлэгийн чиглэлээр ажиллах чиг үүргийг нь хуульчилсан болохыг танилцуулсан юм.

Олон улсын Улаан загалмай, Улаан хавирган сар нийгэмлэгүүдийн холбооны Ерөнхий нарийн бичгийн дарга Элхаж Эс Сю, УИХ-ын даргыг цаг гарган хүлээн авч уулзсанд талархал илэрхийллээ. МУЗН нь бүс нутгийнхаа хэмжээнд жишиг болсон байгууллага болохыг тэрээр тэмдэглээд “МУЗН нь эрх зүйн байдлаа өөрчилсөн явдал нь бусад орны хувьд үлгэр дуурайл болсон үйл явдал байв. Түүнчлэн төр засагтайгаа өндөр үр дүнтэй хамтран ажиллахын зэрэгцээ олон улсын хэмжээнд хариуцлагатай, итгэл даах үзүүлэлтээрээ тэргүүлдэг. Энэ удаа Улаанбаатар хотноо болж буй Олон улсын түншлэл уулзалтад Их Британи, Япон, Катар, Турк зэрэг олон орны төлөөлөгчид оролцож байгаа нь МУЗН-ийн үйл ажиллагааг дэлхийн улс орнууд өндрөөр үнэлэн, хамтран ажиллах сонирхолтой байгаагийн илрэл хэмээн үзэж байна” гэв. Мөн Олон улсын Улаан загалмай, Улаан хавирган сар нийгэмлэгүүдийн холбоо ч бүх шатандаа МУЗН-тэй хамтран ажиллаж, үйл ажиллагааг нь дэмжсээр байх болно гэдгийг ноён Элхаж Эс Сю илэрхийлсэн юм.

Уулзалтад Улсын Их Хурлын гишүүн, Монголын улаан загалмай нийгэмлэгийн ерөнхийлөгч Н.Энхболд болон албаны бусад хүмүүс байлцав хэмээн Улсын Их Хурлын Тамгын газрын Хэвлэл мэдээлэл, олон нийттэй харилцах хэлтсээс мэдээлэв.

Зам, тээврийн хөгжлийн сайд Д.Ганбат энэ сарын 22-24-ний өдрүүдэд Дундговь, Өмнөговь аймагт ажиллаж, нутгийн удирдлагууд болон иргэд хөдөлмөрчидтэй уулзлаа.

Засгийн газрын 2016-2020 оны үйл ажиллагааны хөтөлбөрт тусгагдсан зам, тээврийн салбарт хэрэгжүүлэх зорилт, арга хэмжээ болон Монгол Улсын тогтвортой хөгжлийн үзэл баримтлал-2030, Төрөөс төмөр замын тээврийн талаар баримтлах бодлого, Төрөөс иргэний нисэхийн салбарт 2020 он хүртэл баримтлах бодлого, Шинэ бүтээн байгуулалт дунд хугацааны зорилтот хөтөлбөр зэрэг хөгжлийн баримт бичгүүдийг танилцуулсан юм.

Тэрбээр Дундговь, Өмнөговь аймгийн нөхцөл байдал, тулгамдаж буй асуудлыг шийдвэрлэх, цаашид хэрэгжүүлэх үйл ажиллагааг Засгийн газрын бодлоготой уялдуулах зорилгоор ийнхүү томилолтоор ажилласан байна.

Дундговь аймаг нь Улаанбаатар хотоос 280 км-ийн зайд оршдог.Өнгөрсөн оны байдлаар 2.7 сая толгой мал тоолуулсан бөгөөд хүнсний ногоо 44 га талбайд тариалж буй гэх мэт мэдээллүүдийг тус аймгийн Засаг дарга О.Бат-Эрдэнэ өглөө.

Авто замын хувьд аймгийн төв болон Дэлгэрцогт, Луус, Хулд гэсэн сумд Даланзадгад-Улаанбаатарыг холбосон хатуу хучилттай замтай холбогддог.

Орон нутагт 15.2 км хатуу хучилттай замтай бөгөөд Улаанбаатар-Мандалговь чиглэлд өдөрт хоёр удаа том оврын автобус зорчигч, тээврийн үйлчилгээ үзүүлж байгаа талаар танилцуулав.

Засаг дарга О.Бат-Эрдэнэ уулзалтын үеэр улс орны эдийн засгийн нөхцөл хүнд байгаатай адил өмнөх Засаг дарга сар бүр арав гаруй сая төгрөг зарцуулж, найм болон есдүгээр сарын хөрөнгийг ашигласнаар Засаг даргын нөөц хөрөнгө дууссан талаар сайдад уламжиллаа.

Тэрбээр мөнгөгүй гээд гар хумхиж суулгүй гадаад, дотоодын хөрөнгө оруулалт, хувийн хэвшлийг идэвхжүүлэх тал дээр анхаарал хандуулан ажиллаж байгаа талаар мэдээлэл өгөв.

Мөн Засгийн газрын өргөтгөсөн хуралдаан дээр Арвайхээр-Мандалговь- Говьсүмбэр- Сайншанд чиглэлийн хөндлөн чиглэлийн авто замыг тавиулах зайлшгүй хэрэгцээ шаардлага байгаа тул шийдүүлж өгөхийг хүсэв.

Ингэснээр босоо чиглэлийн авто замын ачаалал багасч, эдийн засгийн хувьд хэмнэлт гарах ач холбогдолтойтул ТЭЗҮ хийгээд өгчихвөл хөрөнгө оруулалт хийгдэх боломжийг судлахаа илэрхийллээ.

Зам, тээврийн хөгжлийн сайд Засгийн газрын мөрийн хөтөлбөрт бүх аймгийг хатуу хучилттай авто замаар холбох зорилтын дагуу одоо зургаан аймгийг холбох ажил үлдсэн талаар онцоллоо. Авто зам барихдаа үрэлгэн байдлаар хандалгүй, зөв шийдлээр хөрөнгө босгож, хаана ямар замыг, хэрхэн барих, ачаа зорчигч тээврийн асуудал зэргийг нарийн тооцоолох хэрэгтэйг хэлсэн юм.

Сайд Д.Ганбат иргэд хөдөлмөрчидтэй уулзах үеэр тэдний асуултад хариулж, санал бодлыг нь сонслоо. Уул уурхайн ашигт малтмалыг хэрхэн зөв замаар ашиглаж, жижиг дунд үйлдвэрлэлийг хөгжүүлэх тал дээр шинэ Засгийн газраас ямар бодлого баримталж байгаа талаар орон нутгийн иргэд ихээхэн ач холбогдол өгч байлаа.

Тухайлбал, улс орны эдийн засагт өндөр ач холбогдолтой Оюу толгой, Тавантолгой, Эрдэнэт үйлдвэрийн томоохон үйлдвэр, төслүүд хэзээ үр ашгаа өгөх талаар иргэд асуулт асууж, санал бодлоо илэрхийллээ.

Мөн Тавантолгойн цахилгаан станц хэзээ баригдаж ашиглалтад орох, Тавантолгой-Гашуунсухайт чиглэлийн төмөр зам ашиглалтад оруулах асуудал Мэргэжлийн Засгийн газрын зорилтод байгаа эсэх талаар ихээхэн сонирхож байв. Салбарын сайд 2019 он гэхэд тус төмөр зам бүрэн ашиглалтад орж, тээвэрлэлтээ эхлүүлэх боломжтой талаар иргэдэд мэдээллээ.

Сайд Д.Ганбат орон нутагт ажиллах үеэрээ уул уурхайн тээвэрлэлтийн үйл ажиллагааны зохион байгуулалттай танилцаж, тулгараад буй саад бэрхшээлийг арилгах талаар судлах зорилгоор Өмнөговь аймагт ажилласан. Тэрбээр Эрдэнэс Тавантолгой компанийн удирдлагуудтай уулзаж, уурхайн үйл ажиллагаатай танилцлаа.

Мөн Тавантолгой-Гашуунсухайт чиглэлийн автозамын нөхцөл байдал, тээвэрлэлтийн үйл ажиллагаа, боомтын нөхцөл байдалтай танилцаж, тулгамдаад буй асуудлыг шийдвэрлэх талаар арга хэмжээ авч ажиллахаар болов.

Тус чиглэлийн замын ашиглалт, тээвэрлэлтийн үйл ажиллагаа хангалтгүй түвшинд байгаа тул харилцан уялдаа холбоотойгоор зохион байгуулалтыг сайжруулж, тээвэрлэлтийг боловсронгуй болгох тал дээр цогц арга хэмжээ авах шаардлагатай байгааг онцоллоо. Мөн Гашуунсухайт боомтод тулгараад буй олон асуудал, бэрхшээлийг шийдвэрлэх шаардлага гарсан байгааг хэлж байв.

Тэрбээр боомтын удирдлагууд болон тээвэрлэгч аж ахуй нэгжийн төлөөлөлтэй уулзаж, тэдний саналыг Засгийн газрын хуралдаанд танилцуулж шийдвэрлэхээ амласан юм.

Салбарын сайдыг Гашуунсухайт боомтод ажиллах үеэр нүүрс тээвэрлэлтийн том оврын машинуудын дараалал тус боомтоос Цагаанхад хүртэл 20 орчим километрийн цуваа үүсгэсэн байлаа. Энэ нь боомтын нэвтрүүлэх хүчин чадал, хяналтын системээс гадна БНХАУ-ын хилийн боомтод үүсээд буй ачаалалтай холбоотойг албаныхан хэлж байв.

Үүнийг шат дараатайгаар шийдвэрлэж, нэгдсэн хяналтын системтэй болгож, боомтын нэвтрүүлэх хүчин чадлыг сайжруулахад анхаарч ажиллахаар боллоо.