Month: July 2016

Улаанбаатар хотын Захирагчийн ажлын алба, Нийтийн үйлчилгээний Улаанбаатар нэгтгэл ОНӨААТҮГ, Баянзүрх, Баянгол, Чингэлтэй, Хан-Уул, Сүхбаатар дүүргийн Засаг даргын Тамгын газар хамтран Төв цэнгэлдэх хүрээлэнгийн тохижилт, талбайн цэвэрлэгээний ажлыг баяр наадмын өмнөх болон тэмдэглэн өнгөрүүлэх өдрүүдийн хугацаанд амжилттай сайн зохион байгууллаа.

Төв цэнгэлдэх хүрээлэнгийн гадна, дотор талбайн цэвэрлэгээний зураглал, төсвийн хуваарилалтын дагуу 6-р сарын 25-ны өдрөөс эхлэн Тохижилт үйлчилгээний байгууллагуудад Төв цэнгэлдэх хүрээлэнгийн гадна, дотор талбай болон наадамчдад зориулсан авто машины зогсоолууд болон Их эзэн Чингис хааны нэрэмжит талбай, нийт 172.2 мянган м2 талбайг цэвэрлэсэн байна. Мөн нийтийн үйлчилгээний байгууллагууд ногоон байгууламжийн арчилгаа, усалгаа болон зэрлэг ургамлыг устгах ажлуудыг хийжээ. Хог цэвэрлэгээ, тохижилтын ажилд Улаанбаатар хотын Захирагчийн ажлын албаны Тохижилт, хог хаягдлын удирдлагын хэлтсээс дүүргүүдийг нэгдсэн удирдлагаар ханган хяналт тавьж ажилласан байна. Наадмын өдрүүдээр 215 зам талбайн үйлчлэгч, 69 жолооч, инженер техникийн ажилчид 309.7 тн хогийг цэвэрлэжээ. Мөн зам цэвэрлэгээний тусгай зориулалтын автомашинаар 7-р сарын 9-12-ны хугацаанд өдөрт 2-3 удаа цэнгэлдэх хүрээлэнгийн гадна талбайн автозам болон цэнгэлдэхийн дотор талын гүйлтийн замын тоосыг соруулж угааснаар цэнгэлдэх орчмын агаарын чийгшилтийг нэмэгдүүлж нийслэлчүүдийн ая тухтай орчинд наадамлах нөхцөл бүрдсэн байна. Түүнчлэн Төв цэнгэлдэх хүрээлэнд нийтийн бие засах газрууд хэвийн ажилласан бөгөөд бохир соруулах ажлыг тогтмол хийж гүйцэтгэсэн, Төв цэнгэлдэх хүрээлэнгийн гадна талбайд 200ш хогийн савыг дүүргүүдэд хүлээлгэн өгч байршуулсан, дотор талбайд 40ш тэргэнцэр байрлуулах ажлыг зохион байгуулсан гэж Улаанбаатар хотын Захирагчийн ажлын албанаас мэдээллээ. Үндэсний Их баяр наадмыг тэмдэглэн өнгөрүүлэх ажлын хүрээнд Улаанбаатар хотын Захирагчийн Ажлын Албанаас “Ногоон эко систем” ТББ-тай хамтран Төв цэнгэлдэх хүрээлэнгийн гадна талбайд “Цэмцгэр наадацгаая” үйл ажиллагааг зохион байгуулж, сайн дурын 100 оюутан энэхүү үйл ажиллагаанд нэгджээ гэж Нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээллээ.

Нийслэлийн Засаг дарга бөгөөд Улаанбаатар хотын Захирагч С.Батболд өнөөдөр Азийн хөгжлийн банкны Монгол дахь суурин төлөөлөгчөөр шинээр томилогдсон хадагтай Еланда Фернанда Ломмен болон Азийн хөгжлийн банкны Хот байгуулалтын мэргэжилтэн Арнауд Хэкман нарыг хүлээн авч уулзлаа.

Уулзалтын эхэнд хадагтай Еланда Фернанда Ломмен, Азийн хөгжлийн банк Монгол Улсын Засгийн газар, Нийслэлийн ЗДТГ-тай хамтран хэрэгжүүлж байгаа төслүүдийн явцын талаар товч мэдээлэл өглөө.

Улаанбаатар хот Азийн хөгжлийн банкны санхүүжилтээр “Гэр хорооллыг хөгжүүлэх, хөрөнгө оруулалтыг дэмжих хөтөлбөр” төслийг 3 үе шаттайгаар хэрэгжүүлж байгаа бөгөөд төслийн хүрээнд Баянхошуу, Долоон буудал орчмыг дахин төлөвлөж хотын дэд төв болгон хөгжүүлнэ. Энэхүү төслийн хүрээнд Баянхошуу, Сэлбэ дэд төвүүдийн хэсэгчилсэн ерөнхий төлөвлөгөөг батлуулж, иргэдийг түр суурьшуулах 50 айлын орон сууцны барилгыг 2 дэд төвд барьж ашиглалтад оруулсан юм. Мөн бохирын шугам татаж эхэлсэн төдийгүй цаашид цэцэрлэг, сургууль, Мэргэжлийн сургалт үйлдвэрлэлийн төв, бизнес инкубатор, дулааны станц барихаар төлөвлөөд байгаа юм.

Азийн хөгжлийн банкны хот байгуулалтын мэргэжилтэн Арнауд Хэкман хэлэхдээ, “Төслийн эхний үе шат дууссан, одоо төслийн хоёрдугаар үе шатны ТЭЗҮ-ийг боловсруулж байна. Ирэх найман сардаа багтаагаад ТЭЗҮ бэлэн болно” гэлээ. Нийслэлийн Засаг дарга С.Батболд, Баянхошуу, Долоон буудал орчмыг дэд төв болгон хөгжүүлэх энэхүү төслийг ямар ч саадгүй үргэлжлүүлэхэд тал талаасаа анхаарч ажиллах хэрэгтэй. Гэхдээ бидэнд хугацаа бага байгаа учраас аль болох хамгийн түрүүнд шийдэх ёстой, тулгамдсан ажлуудаа эхлээд хийх нь зүйтэй байна. Улаанбаатар хотын гэр хорооллыг хөгжүүлэх энэхүү төсөл хэрхэн хэрэгжихээс хотын хөгжил харагдана гэдгийг онцлов.

Улаанбаатар хот Азийн хөгжлийн банктай хамтран “Төлбөрийн чадварт нийцсэн орон сууц” төслийг хэрэгжүүлэхээр судалгааны ажлыг эхлүүлсэн бөгөөд нийтийн тээврийг хөгжүүлэх BRT төсөл хэрэгжиж байна гэж Нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээллээ.

Тулгар төрийн 2225, Их Монгол Улс
байгуулагдсаны 810, Ардын хувьсгалын 95 жилийн үндэсний их баяр наадмын
хүчит бөхийн барилдаанд амжилттай барилдан улсын заан, харцага, начин
цол хүртсэн хилчин тамирчиддаа ХХЕГ-ын удирдлагууд хүндэтгэл үзүүллээ.

Хүчит 1024 бөх барилдсанаас Хилийн 0101
дүгээр ангийн тамирчин Б.Пүрэвсайхан улсын заан, Хилийн 0277 дугаар
ангийн тамирчин Д.Бат-Эрдэнэ харцага, Хилийн 0165 дугаар ангийн тамирчин
Б.Баатарцол, Хилийн 0257 дугаар ангийн тамирчин Б.Ганхуяг, Хилийн 0253
дугаар анги “Хилчин” спорт хорооны тал хээрийн бүс хариуцсан
дасгалжуулагч, зааварлагч хошууч Л.Батзориг, мөн ангийн тамирчин
Ч.Батчулуун нар улсын начин цол хүртсэн юм.

Мөн үндэсний сурын харваанд “Хилчин”
спорт хорооны тамирчин зааварлагч, дэслэгч, улсын мэргэн Б.Ёндон дэд
байр эзэлж хилчин дайчид хиймортой сайхан наадлаа. Наадмын өмнө “Хилчин”
бөхийн гал уламжлал ёсоороо Бугын сангийн аж ахуй дахь “Хилчин”
цогцолборт бэлтгэлээ базаасан байна.

Ерөнхийлөгчийн зарлигаар долдугаар сарын 10-ны өдөр Зэвсэгт хүчний Агаарын цэргийн командлагч хурандаа Очирын Энхбаяр, Зэвсэгт хүчний Хуурай замын цэргийн штабын дарга хурандаа Батцэнгэлийн Ганбаатар, Агаарын цэргийн штабын дарга хурандаа Батчулууны Батбаяр нар Бригадын генерал цол хүртсэн. Тэгвэл өнөөдөр шинэхэн генералуудыг Батлан хамгаалахын сайд Ц.Цолмон хүлээн авч уулзаж баяр хүргэжээ.

Сайд энэ үеэр “Агаарын цэргээс хоёр бригадын генерал цол хүртсэн сайхан үйл явдал болж байна. Цоо шинэ салбарыг хөгжүүлэх том үүрэг та бидний өмнө бий. Цаашдаа манай гурван генерал батлан хамгаалах салбарынхаа төлөө улам ихээр хичээж ажиллана гэдэгт итгэж байна. Та бүхэндээ баяр хүргэж, хамгийн сайн сайхан бүхнийг хүсэн ерөөе” гэлээ.

Батлан хамгаалахын сайдтай хамт яамны Стратегийн бодлого, төлөвлөлтийн газрын дарга, бригадын генерал Г.Сайханбаяр, Төрийн захиргааны удирдлагын газрын дарга, хошууч генерал З.Болдбаатар, Бодлогын хэрэгжилтийг зохицуулах газрын дарга, дэд хурандаа Э.Бямбажав нар баяр хүргэж, амжилт хүссэн байна.

Афганистан улсад явагдаж буй НАТО-гийн тэргүүлсэн “Шийдвэртэй дэмжлэг” ажиллагаанд АНУ-ын Зэвсэгт хүчинтэй хамтран үүрэг гүйцэтгэж байгаа Монгол улсын цэргийн багийн III ээлжийн бие бүрэлдэхүүн үүргээ нэр төртэй гүйцэтгэсээр байна.

Албан үүргээ хариуцлагатай гүйцэтгэж байгаа манай цэргийн багийн алба хаагчдыг энэ сарын 15-нд “НАТО”-гийн медалиар шагнасан байна. Шагнал гардуулах ёслолын арга хэмжээнд Кабулын хамгаалалтын хүчний захирагч, бригадын генерал Айн Томас, баазын орлогч дарга, дэд хурандаа Рэйн Сигрейвис зэрэг хүндэт зочид уригдан оролцож, цэргийн багийн бие бүрэлдэхүүнд НАТО-гийн медалийг гардуулан өгч баяр хүргэсэн байна. Тэд Монголын дайчидтай хамтран ажиллахад урамтай байдаг, сонор сэрэмжээ алдаггүй, өндөр хариуцлагатай дайчид бол монгол цэрэг хэмээн онцолсон байна.

Шагнал гардуулсан хүндэт зочдод манай энхийг сахиулагчид үндэсний соёл уламжлал, урлагийн тоглолт, гардан тулааны үзүүлбэрээ сонирхуулсан байна.

Тулгар төрийн 2225 жил, Их Монгол Улс байгуулагдсаны 810 жил, Ардын хувьсгалын 95 жил, Үндэсний их баяр наадмын үзүүр түрүүг “Алдар” спорт хорооны “Бөхбилэгт” дэвжээний бөхчүүд болох Улсын аварга Ч.Санжаадамба, Улсын арслан Р.Пүрэвдагва нар булаацалдсан билээ.

Харин арслан Р.Пүрэвдагвын хувьд наймын даваанд Улсын арслан П.Бүрэнтөгстэй барилдсан барилдаан нь маргаантай болж дахин барилдаад давсан билээ. Тэгвэл тэрээр энэ тухайгаа хэвлэлд өгсөн ярилцлагадаа “П.Бүрэнтөгс бид хоёрын дунд ямар нэгэн маргаан байхгүй, шударга л барилдсан шүү дээ” гэж хэлжээ.

Та энэ тухай дэлгэрэнгүй ярилцлагыг ”Өдрийн сонин”-ы өнөөдрийн дугаараас уншаарай.