Month: July 2016

Монгол Улсын Ерөнхий сайд Ж.Эрдэнэбат үүрэг хариуцуулах тухай захирамж гаргалаа. Энэхүү захирамжаар Засгийн газрын зарим гишүүнийг нөхөн томилох хүртэлх хугацаанд түүний үүргийг хууль тогтоомжийн хүрээнд зохих журмын дагуу хариуцан гүйцэтгэж байхыг холбогдох сайд нарт даалгасан байна. Үүнд:

1. Монгол Улсын Засгийн газрын гишүүн- Барилга, хот байгуулалтын сайдын үүргийг Монгол Улсын Засгийн газрын гишүүн-Зам тээврийн хөгжлийн сайд Д.Ганбат

2. Монгол Улсын Засгийн газрын гишүүн- Хүнс, хөдөө аж ахуй, хөнгөн үйлдвэрийн сайдын үүргийг Монгол Улсын Засгийн газрын гишүүн-Монгол Улсын Шадар сайд У.Хүрэлсүх

3. Монгол Улсын Засгийн газрын гишүүн-Эрчим хүчний сайдын үүргийг Монгол Улсын Засгийн газрын гишүүн-Уул уурхай, хүнд үйлдвэрийн сайд Ц.Дашдорж

4. Монгол Улсын Засгийн газрын гишүүн-Эрүүл мэндийн сайдын үүргийг Монгол Улсын Засгийн газрын гишүүн-Хөдөлмөр, нийгмийн хамгааллын сайд Н.Номтойбаяр тус тус хариуцах юм гэж Засгийн газрын Хэвлэл мэдээллийн албанаас мэдээллээ.

Энэ сарын 18-нд Ардчилсан намын Үндэсний зөвлөлдөх хороо хуралдсан. Нийт зургаан асуудлыг хэлэлцэхээр болж, Гүйцэтгэх зөвлөлөөр хэлэлцэх асуудлыг батлан оруулсан ч зөвхөн УИХ-ыг ирэх 12 дугаар сард хийх тов гаргаснаас өөр зарчмын шийдэлд хүрч чадаагүй юм.Уг хурлыг үргэлжлүүлэх боломжгүй болж, хаасан нь УИХ-ын гишүүн асан Г.Батхүү тэргүүтэй нэр хүнд нь олон нийтэд унасан хэсэг нөхдийн ажиллагаанаас болсон гэж буруутгах гишүүд Ардчилсан нам дотор олон байгаа аж. Зарим эх сурвалжуудын хэлж байгаагаар Ардчилсан намын Үндэсний зөвлөлдөх хорооны хурлыг энэ сарын 29-нд дахин зарлан хуралдуулж магадгүй гэнэ. Хэрэв ҮЗХ хуралдахаар болбол АН-ын Гүйцэтгэх зөвлөл өмнө нь хуралдаж таарна.

Улаанбаатар хотын Захирагчийн ажлын алба, түүний харьяа газрууд, нийслэлийн хэмжээнд хийгдсэн инженер хангамж, хот тохижилт, ногоон байгууламж, АСЕМ-ийн уулзалтын хүрээнд хийгдсэн тохижилтын ажилтай Хотын Ерөнхий менежер бөгөөд Захирагчийн ажлын албаны даргын үүргийг түр орлон гүйцэтгэгч Т.Гантөмөр танилцлаа.

Тэрээр өөрийн чиг үүргийн дагуу харъяа 23 байгууллагын үйл ажиллагаатай төлөвлөсөн хуваарийн дагуу танилцах юм. Эхний хоёр өдөр Улаанбаатар хотын Шуурхай удирдлага зохицуулалтын төв, Улаанбаатар хотын Замын Хөдөлгөөний Удирдлагын төв, Нийтийн үйлчилгээний Улаанбаатар нэгтгэл, Улаанбаатар нэгтгэлийн Зүүн салбар, Улаанбаатар лифт, Ус сувгийн удирдах газрын үйл ажиллагаатай танилцаж, санал солилцов. Энэ үеэр байгууллагууд 2012-2016 онд хийсэн ажлын товч тайлангаа тавьж, тулгарч буй бэрхшээл, цаашид анхаарах шаардлагатай асуудлууд, шийдвэрлэх шаардлагатай байгаа ажлуудын талаар саналаа хэлж байлаа.

“Улаанбаатар лифт” НӨҮГ нийслэлийн хэмжээнд 352 лифт шинэчлэгдсэн, 2016 оны 3,4 улиралд 82 лифт шинэчлэхээр төлөвлөөд байгааг хэлсэн. Хотын Ерөнхий менежер “Жил ирэх тусам лифт хэрэглэгчдийн тоо нэмэгдэнэ. Өсөн нэмэгдэж байгаа хэрэгцээг тооцон ажиллах хэрэгтэй. Санхүүгийн боломж бололцоог судалж үзэх хэрэгтэйг” санууллаа.

Нийтийн үйлчилгээний Улаанбаатар нэгтгэлийн хувьд нийслэлийн төвийн гол гудамжуудын цэвэрлэгээ, зам засвар арчлалт, ногоон байгууламжийг хариуцан ажилладаг. Машин техникийн хүрэлцээг нэмэгдүүлэх шаардлагатай, өвлийн бэлтгэлийг хангах ажлын хүрээнд хийгддэг давс, бодис нөөцлөх ажил эхэлсэн. Гэхдээ нөөцийг нэмэгдүүлэх шаардлагатай гэлээ. Мөн зэрлэг ургамал устгалд химийн бодис ашиглахгүй үндсээр нь устгах аргыг хэрэглэж байгаа. Цаашид нэмэлт аргуудыг судалж үзэх хэрэгтэй байгаагаа хэлэв.

Харин Ус сувгийн удирдах газар Улаанбаатар хотын ундны усны эх үүсвэрийн нөөц хүчин чадал, ус хангамжийн өнөөгийн байдлаар танилцуулга хийж, хэрэгжүүлж байгаа төсөл хөтөлбөрт хамтарч ажиллахыг хүссэн. Мөн шугам хоолойг доторлох, шинээр байгууламж барих, ажилчдын нийгмийн асуудлыг шийдэх хэрэгтэй байна гэсэн хүсэлт тавилаа гэж Улаанбаатар хотын Захирагчийн ажлын албанаас мэдээллээ.

Өнөөдөр МАН-ын Удирдах зөвлөл хуралдаж дөрвөн сайдаа тодруулах бололтой. Түүний дараа байнгын хороо, чуулган хуралдаж магадгүй байна.

Ерөнхий сайд Ж.Эрдэнэбат Засгийн газрынхаа бүтцийг 13 яам, 16 сайд, 27 агентлагтай байхаар зураглан УИХ-д оруулж, батлуулсан. Харин Засгийн газрын бүрэлдэхүүн буюу 15 сайдын нэрийг өргөн мэдүүлэхэд дөрвөн сайдынх хувьд Авлигатай тэмцэх газраас тэднийг ашиг сонирхлын зөрчилтэй гэсэн үндэслэлийг гаргасан тул Ерөнхий сайд буцаан татах шийдвэрийг гаргасан. Ардын намын бүлгээр Засгийн газрын бүрэлдэхүүнээ бүрэн томилуулах эрх Ерөнхий сайдад бий ч олон нийтийн шүүмжлэлийг хүлээн авч, сэлгээ хийх шийдвэр гаргаснаараа Үндсэн хуулиар олгогдсон бүрэн эрхийнхээ хүрээнд эрх мэдлээ хэрэгжүүллээ гэж тодорхойлж болохоор байгаа юм. Нөгөө талаар Засгийн газрыг “мэргэжлийн” гэх “томьёололтой” нь байгуулахын тулд “мэргэжлийн хэлээр” ярьж чадах хүмүүсийг санал болгож, танхимаа бүрдүүлснийг сануулах улстөрч цөөнгүй байгаа.

Харин одоо дөрвөн сайддаа хэн, хэнийг нэр дэвшүүлэх вэ? Зарим эх сурвалжийн таамгаар Эрүүл мэндийн сайдад Хавдар судлалын үндэсний төвийн захирал Л.Төмөрбаатар, Хүнс хөдөө аж ахуй, хөнгөн үйлдвэрийн сайдад дэд сайд асан Ж.Сауле, Эрчим хүчний сайдад МАН-ын нарийн бичгийн дарга Т.Гантулга, Барилга хот байгуулалтын сайдад УИХ-ын гишүүн Д.Цогтбаатар нарын нэр яригдаж эхлээд буй. МАН-ын зүгээс олон нийтэд өгч буй мэдээллээр “дөрвөн сайд нарыг парламентын гаднаас санал болгоно, Ерөнхий сайд ийм зарчим барьж байна” гэх мэдээлэл дуулдаж буй. Хэрэв тэгвэл Барилга хот байгуулалтын сайдыг УИХ-аас санал болгохгүй болж таарч байна. Мөн зарим эх сурвалж Эрүүл мэндийн сайдад Ж.Цолмонгийн нэрийг дахин өргөн барина гэсэн мэдээллийг ч түгээгээд байгаа.

Өнөөдөр хуралдах Удирдах зөвлөлийн хурлаар хэн хэнийг дэвшүүлэх вэ гэдгийг нэгмөр шийдэх биз ээ.

Э.МӨНХ