Month: June 2016

Малчид, иргэдэд зориулсан мэдээ:

Өнөөдөр ихэнх нутгаар дуу цахилгаантай түр зуурын бороо орж, өмнөх өдрөөс дулаарна.

2016 оны 06 дугаар сарын 11-ний 09 цагаас 21 цаг хүртэлх цаг
агаарын урьдчилсан мэдээ:

Ихэнх нутгаар үүлшиж, түр зуурын бороо орно. Дуу цахилгаантай. Салхи их төлөв зүүн өмнөөс секундэд 6-11 метр. Алтай, Хангай, Хөвсгөл, Хэнтэйн уулархаг нутаг, Туул, Тэрэлж голын хөндийгөөр 14-19 градус, Их нууруудын хотгор болон Алтайн өвөр говиор 27-32 градус, говийн аймгуудын нутгаар 21-26 градус, бусад нутгаар 18-23 градус дулаан байна.

УЛААНБААТАР ХОТ: Үүлшиж, түр зуурын бороо орно. Салхи зүүн хойноос секундэд 6-11 метр. 19-21 градус дулаан байна.

Өглөө 06 цагт Улаанбаатарт: 8 градус дулаан, харьцангуй чийг 81 хувь, агаарын даралт 869 гектопаскаль байлаа. Даралт өдөртөө тогтвортой байна.

Хотуудын 2016 оны 06 сарын 11-ний өдөр, 20 цаг хүртэл цаг агаарын урьдчилсан мэдээ

2016 оны 06 дугаар сарын 12-ноос 06 дугаар сарын 16-ныг хүртэлх

цаг агаарын урьдчилсан төлөв:

12-13-нд ихэнх нутгаар, 14-нд нутгийн зүүн хагаст, 15-нд нутгийн зүүн өмнөд хэсгээр бороо орно. Дуу цахилгаантай. Салхи борооны өмнө түр зуур ширүүснэ. Хангай, Хөвсгөл, Хэнтэйн уулархаг нутаг, Туул, Тэрэлж голын хөндийгөөр шөнөдөө 1-6 градус, өдөртөө 14-19 градус, Их нууруудын хотгор болон говийн бүсийн өмнөд хэсгээр шөнөдөө 11-16 градус, өдөртөө 21-26 градус, бусад нутгаар шөнөдөө 6-11 градус, өдөртөө 17-22 градус дулаан байна. 14-нд баруун зүгийн нутгаар, 15-наас ихэнх нутгаар дулаарна гэж Ус цаг уурын орчны хүрээлэнгээс мэдээлж байна.

“Нас барагсдыг амьдруулах “шидтэн”-үүд
нийгмийн даатгалд одоо ч байна” нэртэй материал өнгөрсөн оны есдүгээр сард
“Өнөөдөр” сонинд хэвлэгдсэн билээ. Энд дурьдсанаар нийгмийн даатгалынхан 10
гаруй мянган нас барсан хүний данс руу 1.5 тэрбум төгрөгийн тэтгэврийн мөнгө
шилжүүлсэн тухай дурьджээ. Тэгвэл энэ талаар Нийгмийн даатгалын ерөнхий газраас
/НДЕГ/ өнөөдөр мэдээлэл хийлээ.

НДЕГ-ын
дарга Д.Мэндбаяр “Энэ хугацаанд шат дараалсан зургаан удаагийн хяналт шалгалт
явуулсан. Үндэсний аудитын газар, ЦЕГ-ын Эрүүгийн цагдаагийн газар, аймаг,
нийслэл дүүргийн хяналт, НДЕГ, ХАХНХЯ зэрэг байгууллагаас оршуулгын тэтгэмжтэй
холбоотой асуудлаар шат дараатай шалгалт явуулсан. Ингээд хоёр шалтгааныг
нэрлэсэн. Нэгдүгээрт, 2006-2008 онд төрийн байгууллагын уялдаа холбоо сул
байсан. Үүнээс болж мэдээллийг нэг сарын хоцрогдолтой солилцож байсан.
Хоёрдугаарт, нас барсан гэх бүртгэлийг ар гэрийнхэн нь 1-2 сараар хугацаа алдаж
бүртгүүлдэг байсан. Энэ хоёр асуудлаас үүдэлтэй гэх дүгнэлт гарсан. Өөрөөр
хэлбэл, нас барсан гэх мэдээллийг нийгмийн даатгалын байгууллага сарын дараа
авч байна гэсэн үг. Энэ хугацаанд тэтгэвэр, тэтгэмжийн мөнгө банкны данс руу
шилжчихсэн байдаг. Ингээд нас барсан гэдгийг нь мэдээд данснаас нь мөнгөө
эргүүлж татах үйлдэл хийсэн.

150-300
орчим хүний мөнгө нас барснаас хойш нэг сарын дараа данс руу нь шилжсэн гэх
тооцоог шалгалтаар гаргасан. Нас барсан гэдгийг нь мэдээд энэ мөнгөний 90
хувийг харилцах данснаас буцаан татсан. Одоо 19 сая төгрөгийн асуудал
шүүхийн шатанд явж байна.

Энд нэг
зүйлийг дурдахад, Олон улсын нягтлан бодох бүртгэлээс зөвшөөрөгдөх алдааг
нэрлэсэн байдаг. Өөрөөр хэлбэл, бид сард 100 орчим тэрбум төгрөгийн тэтгэвэр,
жилд нэг их наяд тэтгэвэр тэтгэмжийг 360 гаруй мянган иргэнд олгодог. Ийм
нөхцөлд дээрх алдааг зөвшөөрөгдөх хэмжээ хэмээн тооцдог. Гэхдээ цаашид зөрчил
дахин гаргахгүйн тулд системтэй ажиллахаар төлөвлөгөө гаргасан. Цаашид
мэдээллийн зөрүүтэй байдал, хоцрогдол гарахгүй гэдгийг хариуцлагатайгаар мэдэгдэж
байна.

Холбогдох
байгууллагын шалгалтын хийсэн дүгнэлтийг танилцуулъя.

Монгол Улс, Япон улс хоорондын Эдийн засгийн түншлэлийн хэлэлцээр энэ сарын 7-ны өдрөөс хүчин төгөлдөр болж байна. Энэхүү хэлэлцээрийн хүрээнд Монгол Улсаас экспортолж байгаа 97 бүлгийн 5700 орчим нэр төрлийн бараа бүтээгдэхүүн, Японоос импортолж байгаа 9300 орчим нэр төрлийн бараа бүтээгдэхүүний гаалийн татварыг тэглэх болон үе шаттайгаар бууруулж эхэлнэ. Энэ талаар Гадаад хэргийн сайд Л.Пүрэвсүрэн “Хоёр улсын Засгийн газар худалдааны харилцааг зохицуулсан эрх зүйн орчинг бүрдүүлсэн, одоо бизнес эрхлэгчдийн хийх ажил үлдсэн” гэж онцоллоо. Монгол Улс, Япон улс хоорондын Эдийн засгийн түншлэлийн хэлэлцээр хэрэгжиж эхэлснээс хойш гурван жилийн дотор үйлдвэрлэл 0.06 хувиар, дотоодод үйлдвэрлэсэн бүтээгдэхүүний хэрэглээ 0.5 хувиар өснө гэж МУИС-ийн судалгааны баг тооцоолжээ. Гэсэн хэдий ч энэ хэмжээ 2024 оноос эхлэн нэмэгдэхгүй, хэвэндээ хадгалагдана гэсэн тооцоо гарсан байна. Мөн импортын татвараас орж ирдэг байсан орлого буурч, төсвийн орлого бүрдүүлэлтэд 0.04-0.05 хувийн дарамт үүсгэх хүлээлттэй байгаа юм. Монгол, Япон улсын хоорондын гадаад худалдааны жилийн эргэлт 300 сая орчим ам.доллар байгаа бөгөөд 2015 онд Японд 20.3 сая ам.долларын үнэ бүхий бараа, бүтээгдэхүүн экспортолж, 274.6 сая ам.долларын бараа бүтээгдэхүүн импортолсон болохыг статистикаас харж болно. Эдийн засгийн түншлэлийн хэлэлцээр хоёр талын худалдааны эргэлтийн 95 хувьд нь нөлөөлнө гэж Монгол Улсаас Япон улсад суугаа Элчин сайд С.Хүрэлбаатар мэдэгдлээ.

Нийслэлийн Удирдлагын зөвлөлийн 2016 оны 6 дугаар сарын 09-нд болсон ээлжит хуралдаанаар “Нийслэлийн нутгийн захиргааны байгууллага албан тушаалтанд хандсан албан бичгийг шийдвэрлэх журам”-ын төслийг хэлэлцлэв. Журмын төслийг Нийслэлийн ЗДТГ-ын Нутгийн захиргаа удирдлагын хэлтсийн дарга Ү.Ганболд танилцууллаа.

Тэрээр, нийслэлээс төрийн үйлчилгээг хөнгөн, шуурхай, тэгш хүргэх зорилгоор өргөдөл гомдлыг шийдвэрлэх хэд хэдэн тусгай програм нэвтрүүлж, албан бичгийн шийдвэрлэлтийг иргэд хянах боломжтой болсон. Мөн нийслэлийн үйлчилгээг нэг цэгээс хүргэх зорилгоор Нийслэлийн үйлчилгээний нэгдсэн төвийг 3 салбарт нээн ажиллуулж байна. Иргэд, аж ахуйн нэгжүүд нэг цэгийн үйлчилгээнээс төрийн 400 гаруй үйлчилгээг нэг дороос авах боломжтой болсон. Цаашид нийслэлийн нутгийн захиргааны байгууллагад хандсан баримт бичгүүдийг Нийслэлийн Үйлчилгээний нэгдсэн төв дээр хүлээн авах, бүртгэх, шийдвэрлэлтэд нэгдсэн хяналт тавих тогтолцоог бүрдүүлэх зорилгоор энэхүү журмыг боловсруулсан. Нийслэлийн нутгийн захиргааны албан тушаалтанд хандсан албан бичгийг бүртгэх, шилжүүлэх шийдвэрлэх, үнэлэх хянах үйл ажиллагааг зохицуулах, нээлттэй, шуурхай, ил тод байдлыг бүрдүүлэхэд журам чухал үүрэг гүйцэтгэнэ гэдгийг онцлов.

Нийслэлийн нутгийн захиргааны байгууллагуудад ирж байгаа албан бичгийг хяналтын нэг тогтолцоонд шилжүүлснээр ажлын уялдаа холбоо, бүтээмж, үр дүн, гүйцэтгэл эрс сайжирна. Бүх албан хаагчид нэгдсэн нэг систем ашиглан албан бичигт хариу өгөх тайлбар хийх боломжтой болж, нэгдсэн бүртгэл дээр хянагдах юм.

Нийслэлийн удирдлагууд журмын төслийн танилцуулгыг сонсоод асуулт асууж, саналаа хэлэв.

Нийслэлийн Засаг дарга Э.Бат-үүл “Нийслэлд ирж байгаа бүх албан бичиг нэг газар төвлөрч байх ёстой. Төр хэнд ч тэгш үйлчилгээ үзүүлэх үүрэгтэй. Тиймээс иргэдийн албан бичгийг нийслэлийн үйлчилгээний нэгдсэн төвөөр дамжуулаад авчихдаг мөртлөө албан байгууллага, төрийн байгууллагаас ирж байгаа бичгийг Засаг даргын Тамгын газар, эсвэл аль нэг агентлаг дээр дарга нь өөрөө хүлээж аваад шийдвэрлэдэг байх нь төрийн тэгш байх зарчмыг алдагдуулна. Тиймээс хэн ч байсан, хаанаас ч ирсэн хамаагүй бүх албан бичиг, өргөдөл хүсэлт Нийслэлийн үйлчилгээний нэгдсэн төвөөр дамжиж хянагдсан, бүтгэгдсэн байх ёстой. Тэгэж байж бид тэгш хүртээмжтэй үйлчилгээг үзүүлж чадна. Тиймээс энэ журамд заавал энэ зохицуулалтыг маш нарийн тусгаж шийдвэрлэх ёстой” гэв. Нийслэлийн удирдлагууд, нутгийн захиргааны байгууллагуудад ирж байгаа албан бичгийг төрлөөр нь ялгаж, нэг цэгийн үйлчилгээгээр нэрлэсэн албан бичгийг хүлээж авч шийдвэрүүлнэ гэсэн байдлаар журамд тусгавал илүү үр дүнтэй болно гэсэн саналыг хэллээ. Хуралдаанаас, энэхүү журмын төсөлд нийслэлийн удирдлагын зөвлөлийн гишүүдийн саналыг тусган дахин боловсруулах үүргийг өгчээ.

Авто тээврийн хэрэгслийн татвар хураалтын хяналтын үзлэг, шалгалт зургадугаар сарын 6-ны өдрөөс эхэлсэн. Нийслэлийн Засаг даргын Тамгын газар, Улаанбаатар хотын Захирагчийн ажлын алба, нийслэлийн Татварын газар, Улаанбаатар хотын Цагдаагийн газар, Авто тээврийн үндэсний төв зэрэг хэд хэдэн байгууллагын хамтарсан шалгалт зургадугаар сарын 19-ний өдрийг дуустал явагдах юм байна. Автомашин эзэмшигч нь тээврийн хэрэгслийн албан татвар, агаарын бохирдлын төлбөр, авто зам ашигласны төлбөрөө төлөөгүй бол тээврийн хэрэгсэл болон жолоочийн бичиг баримтыг хураан авч, татварын байцаагч нар болон хариуцсан ахлах зохицуулагчид шилжүүлж өгөх аж. Татварын улсын байцаагч нь тухайн иргэн, аж ахуйн нэгж байгууллагын тээврийн хэрэгслийн албан тавтар, агаарын бохирдлын төлбөр, авто зам ашигласны төлбөрийг төлүүлж, гэрчилгээн дээр бичилт хийн баталгаажуулснаар буцаан олгох юм байна.