Month: June 2016

2016 оны
зургадугаар сарын 1-ний байдлаар нутгийн 60 хувьд буюу Ховд, Говь-Алтай,
Хөвсгөл, Булган, Орхон, Сэлэнгэ, Дархан-Уул, Төв, Хэнтий, Дорнод, Сүхбаатарын
ихэнх, Баян-Өлгий, Увс, Завхан, Архангай, Өвөрхангай, Баянхонгор, Өмнөговь,
Дорноговийн зарим сумдын нутгаар зуншлага сайн, нийт нутгийн 30 хувьд дунд
зэрэг, 10 хувьд нь гантай байна. 2016-2017 онд 60 гаруй сая мөл өвөлжих
төлөвтэй байна гэсэн мэдээллийг Хүнс, хөдөө аж ахуйн яам өгч байна.

Засгийн газрын
өнөөдрийн хуралдаанаар хөдөө аж ахуйн салбарын 2016-2017 оны өвөлжилтийн
бэлтгэл хангах асуудлыг хэлэлцээд тогтоол гаргаж, төлөвлөгөө гарган, биелэлтэд
нь хяналт тавьж, шаардлагатай арга хэмжээг тухай бүрт нь шуурхай шийдвэрлэж
ажиллах, аймаг, нийслэл, сум, дүүргийн өвс тэжээлийн аюулгүйн нөөцийг
бүрдүүлэхийг даалгалаа.

Өвөл хаврын
бэлчээрийн даацад тулгуурлан сум дундын болон аймаг дундын отрын бүс нутгууд,
хилийн зурвас газар, байгалийн тусгай хамгаалалттай газруудад отроор өвөлжих,
хаваржих өрх, малын тоог тохирон холбогдох газруудтай гэрээ байгуулах, зарим
шаардлагатай хадлангийн талбайг өнжөөх, сэлгэх өөр аймгийн нутагт хадлан
бэлтгэх гэрээ хэлэлцээр хийж зохицуулахыг тус тогтоолоор үүрэгжүүллээ.

Мөн малын гоц
халдварт, халдварт өвчин, паразиттах өвчин, ариутгал, халдваргүйжүүлэлтийн арга
хэмжээг технологит хугацаанд нь чанартай зохион байгуулах, мал эмнэлгийн
дуудлага, үйлчилгээний бэлэн байдлыг бүрдүүлж шуурхай удирдлагаар хангаж
ажиллахыг даалгалаа.

Бүртгэлтэй ажилгүй иргэд оны эхний тавдугаар сарын эцэст 33.7 мянга болжээ. Энэ нь өмнөх оны мөн үеийнхээс 1.7 мянган хүн буюу 5.2 хувиар, өмнөх сарынхаас 0.3 мянган хүн буюу 0.9 хувиар өссөн үзүүлэлт юм байна.

Улсын хэмжээнд үйл ажиллагаа явуулж буй 36.6 мянган аж ахуй нэгжээс 551 мянга орчим ажиллагсад цалинжиж байгаа юм байна. Үүнээс 25.7 мянга нь 192-300 мянга хүртэлх төгрөгөөр, 54 мянга нь 1 сая 500 мянгаас дээш төгрөгөөр цалинжиж байгаа ажээ. Түүнчлэн гурван хүн тутмын нэг нь 500 мянга хүртэлх цалинтай, 10 хүний нэг нь нэг сая 500 мянгаас дээш цалин авч байгаа гэсэн судалгааг Үндэсний Статистикийн хорооноос гаргажээ. Мөн хамгийн өндөр цалин олгож буй аж ахуй нэгж уул уурхайн салбарт бий бөгөөд дунджаар 1 сая 960 мянган төгрөг бол хамгийн доод цалинг олгож буй нь зочид буудлын салбар бөгөөд дунджаар 580 мянган төгрөгөөр цалинжуулдаг байна.

Энэ оны эхний таван сарын байдлаар хөдөлмөрийн хөлсний доод хэмжээ буюу 192 мянган төгрөгөөс 300 мянган төгрөгийн цалин авч буй иргэдийн тоо буурч, 300-600 хүртэлх цалин авагсдийн тоо нэмэгдэх хандлагтай байгааг ҮСХ-ны мэргэжилтнүүд мэдээллээ.

Нийслэлийн ИТХ-ын Тэргүүлэгчдийн ээлжит хуралдаан 2016
оны 6 сарын 10-нд болж хуралдаанаар “Түрээсийн орон сууцны үйл
ажиллагааны журам”-ыг хэлэлцэн баталлаа. Хуралдаанд энэ асуудлыг
Нийслэлийн Засаг даргын Хот байгуулалт, хөрөнгө оруулалтын асуудал
хариуцсан орлогч С.Очирбат танилцууллаа.

Нийслэлийн
Баянзүрх дүүргийн 13 дугаар хорооны нутаг дэвсгэр Монелын баруун Алтан-Өлгийд
бага сургууль, цэцэрлэгийн цогцолбор ашиглалтад оржээ.2013 онд нийслэлийн ИТХ
Улаанбаатарын 83 байршилд бага сургууль, цэцэрлэгийн цогцолбор барихаар шийдвэр
гаргасан. Үүний 16-г нь сургууль, цэцэрлэггүй хороодод барьж
эхлээд байгаа юм.

Ингэхдээ орчин тойрныг нь тохижуулан, замыг нь засаж
байгаа аж. Энэ ажлын хүрээнд Баянзүрх дүүрэгт сүүлийн гурван жилд гурван
цогцолбор ашиглалтад оруулсан байна. Үүний нэг нь энэхүү 137 дугаар бага
сургууль, 212 дугаар цэцэрлэг юм. Бага сургууль нь 180, цэцэрлэг нь 120 хүүхэд
хүлээн авах хүчин чадалтай. Спорт, урлаг заал, цайны газартай энэ цогцолборт
Алтан-Өлгийн 4-5 дугаар хэсгийн 13-20 дугаар гудамж, баруун Алтан-Өлгийн 1-4
дүгээр хэсгийн 21-37 дугаар гудамж, Бунханы 1-4 дүгээр гудамж, Монелын 11-13
дугаар хэсгийн 32-53 дугаар гудамжны хүүхдүүд хамрагдах юм байна.

Засгийн газраас “Эрдэнэс Тавантолгой”-н 322 ширхэг хувьцааг 300.000 төгрөгөөр худалдан авах тухай шийдвэр гаргасан билээ. Хэрвээ та хувьцаагаа зарах гэж байгаа бол дараах заавраар хзсэлтээ гаргаарай. Шаардлага:

1. 322 ширхгээс их хувьцаатай байх ёстой. Хувьцааны тоог шалгах: https://net.schcd.mn/registration/

2. 18 нас хүрсэн байх ёстой.

3. Брокер, дилерийн компанид данстай байх шаардлагагүй.

Өөрийн үйлчлүүлдэг банкны аль ч салбарт өргөдөл гаргах боломжтой ба өргөдлийг гурван хувь үйлдсэн байна. Өргөдлийн маягтыг:https://www.schcd.mn/wp-content/uploads/2016/06/mayagt1.pdf хаягаар орж авах боломжтой. Өргөдлийн маягтын ард талд өөрийн иргэний үнэмлэхээ сканнердаж хавсаргана. Маш олон хүн өргөдөл гаргаж байгаа учир цаг хожихын тулд өөрөө өргөдлөө гурван хувь хэвлээд үнэн зөв бөглөн банкинд өгнө үү.

Энэ онд улсын хэмжээнд 323 мянган га-д үр тариа, үүнээс 301.5 мянган га-д улаанбуудай, үлдсэн га-д үр тарианы төрлийн бусад ургамлыг тариалахаар төлөвлөсөн. Мөн 13.4 мянган га-д төмс, 7.1 мянган га-д хүнсний ногоо, 16.3 мянган га-д малын тэжээлийн ургамал, 25.3 мянган га-д тосны ургамал нийтдээ 385.2 мянган га-д хаврын тариалалтыг хийхээр зорилт дэвшүүлсэн.

Өнөөдрийн (06.10) байдлаар 323 мянган га-д үр тариа тариалахаас 362.4 мянган га-д тариалж, үр тарианы тариалалтыг 115.5 хувьтай гүйцэтгээд байна. Үүн дотор улаанбуудайг 301.5 га-д тариалахыг 340.7 мянган га-д тариалж, төлөвлөсөн хэмжээнээс 13 хувиар давуулан тариалсан байна. Ингэснээр энэ хаврын үр тариа тэр дундаа улаанбуудайн тариалалтын ажил амжилттай дууслаа.

Харин хүнсний ногооны тариалалт энэ өдрүүдэд үргэлжилж байна. Одоогийн байдлаар 12.4 мянган га-д төмс тариалж, тариалалтын явц 92.3 хувьтай, 6.2 мянган га-д хүнсний ногоо тариалж, тариалалтын явц 87.3 хувьтай, 13.5 мянган га-д малын тэжээл тариалж, тариалалт 83.1 хувьтай, 25.3 мянган га-д тосны ургамал тариалахаас 50.2 мянган га-д тариалж, 198.6 хувьтай, хаврын тариалалт амжилттай үргэлжилж байна.

Энэ хавар нийт 385.2 мянган га-д тариалалт хийхээр төлөвлөснөөс өнөөдрийн байдлаар 444.9 мянган га-д тариалалт хийгдээд байна. Ингэснээр энэ хаврын тариалалтын төлөвлөгөөг 15.5 хувиар давуулан гүйцэтээд байна гэсэн үг юм.

Урин дулаан цаг ирж хөдөө орон нутгийг зорьсон тээврийн хэрэгслийн хөдөлгөөний ачаалал нэмэгдэж байна. Үүнтэй холбоотойгоор амралтын өдрүүдэд хөдөө орон нутгийн замд осол гарах нь ихэсчээ. Тухайлбал, өнгөрсөн амралтын өдөр орон нутгийн замд гарсан ослын улмаас дөрвөн хүн амиа алдаж гурван хүн хүнд гэмтсэн байна.

Дархан Уул аймгийн Хонгор сумын Цайдамын хөндий гэх газар H.Sonata маркийн О жолоочтой автомашин онхолдож зорчигч 16 настай эмэгтэй Б –ийн амь нас хохирч , гурван хүн гэмтсэн бол Төв аймгийн Баянхангай сумын Атар-13 гэх газар Г гэх жолоочтой H.Sonata маркийн авто машин Northbenz маркийн А жолоочтой авто машинтай мөргөлдөж жолооч 31 настай эрэгтэй Г –ийн амь нас хохирсон байна.

Тиймээс орон нутгийн замд замын хөдөлгөөнд оролцохдоо жолооч та цаг агаарын байдал, замын нөхцөлд хөдөлгөөний хурдыг зөв тохируулан аюулгүй байдлаа сайтар хангаж анхаарал болгоомжтой оролцохыг сэрэмжлүүлж байна.

Нийслэлийн эдийн засагт аялал жуулчлалын салбарын эзлэх хэмжээг 20
хувьд, аялал жуулчлал, зочлох үйлчилгээний салбарт ажиллагсдын тоог 35
мянгад хүргэж, Улаанбаатар хот 2020 он гэхэд 2 сая, 2030 онд 5 сая
жуулчин хүлээж авах зорилт бүхий “Найрсаг Улаанбаатар” хөтөлбөрийг 2015
оноос эхлэн нийслэлийн Засаг даргын Тамгын газар, нийслэлийн Соёл
урлагийн газар, Аялал жуулчлалын газар, нийслэлийн Улаанбаатар чуулга,
хувийн хэвшлийн байгууллагуудтай хамтран үндсэн 7 зорилтын хүрээнд
хэрэгжүүлж байна. Тус хөтөлбөрийн хүрээнд энэ оны 01 сараас эхлэн
“Дэлхийн цирк Монголд”, “Улаанбаатар бүүк фэйр” номын фестиваль, “Гэгээн
Муза” драмын урлагийн наадам, “Улаанбаатар марафон-2016”, “Монгол
цэргийн жавхаа-2016”, “Улаанбаатар-Венийн үдэш” зэрэг үйл ажиллагааг
зохион байгуулав. Мөн Үндэсний их баяр наадмын өдрүүд болон энэ оныг
дуустал соёл урлаг, аялал жуулчлалын олон арга хэмжээг зохион байгуулна
гэж Нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээллээ.

“НАЙРСАГ УЛААНБААТАР” ХӨТӨЛБӨРИЙН ХҮРЭЭНД 2016 ОНД ЗОХИОН БАЙГУУЛАХ СОЁЛ УРЛАГИЙН АРГА ХЭМЖЭЭ