Month: June 2016

Олон улсын хөдөлмөрийн байгуллага (ОУХБ)-аас Япон улсын Засгийн газрын санхүүгийн дэмжлэгтэйгээр “Монгол Улсад нийгмийн хамгаалал, хөдөлмөр эрхлэлтийн үйлчилгээг дэмжих, АСЕАН-ы туршлагаас суралцах нь” (МАПС) төслийг Хүн амын хөгжил, нийгмийн хамгааллын яам, Хөдөлмөрийн яам, Монголын ажил олгогч эздийн холбоо, Монголын үйлдвэрчний эвлэлүүдийн холбоотой хамтран хэрэгжүүлсэн. Энэхүү төслийн нэг бүрэлдэхүүн хэсэг болох “Хөдөө орон нутагт залуу малчдын хөдөлмөр эрхлэлт, бизнесийг дэмжих, ур чадварыг хөгжүүлэх арга хэмжээ болон нийгмийн хамгааллын үйлчилгээний уялдааг сайжруулахад чиглэсэн туршилтын хөтөлбөр”-ийн үр дүнг танилцуулах семинар энэ сарын 14-ний өдөр “Блү Скай” зочид буудалд болно.

Семинарын нээлтэд УИХ-ын гишүүн, Засгийн газрын гишүүн, Хөдөлмөрийн сайд Г.Баярсайхан, ОУХБ-ын БНХАУ, Монгол Улсыг хариуцсан товчооны дарга Тим Дэ Мэйэр нар оролцож үг хэлэх юм байна. Мөн төслийг хамтран хэрэгжүүлэгч төрийн болон төрийн бус байгууллага, хөгжлийн түншүүд, сургалтын байгууллагууд, судлаачид, үйлдвэрчний эвлэл, ажил олгогчдын болон малчдын хоршооны төлөөлөл оролцох юм.

2015 оны долдугаар сараас 2016 оны тавдугаар сар хүртэлх хугацаанд Баянхонгор аймгийн Галуут, Өвөрхангай аймгийн Нарийнтээл суманд хэрэгжсэн туршилтын хөтөлбөрт 90 залуу малчин өрх хамрагдсан бөгөөд хөтөлбөрийн хүрээнд малчдыг мал маллагааны арга барил, малын гаралтай түүхий эдэд анхан шатны боловсруулалт хийх ур чадварыг нь дээшлүүлэх мөн бизнесийн болон нийгмийн даатгалын мэдлэг олгох сургалтад хамруулжээ. Мөн малчдын хоршоог болон орон нутагт хөдөлмөр эрхлэлт, нийгмийн даатгал, бизнесийн зөвлөх үйлчилгээ үзүүлэх асуудал хариуцсан ажилтнуудыг чадавхижуулах замаар дэмжлэг үзүүлсэн байна.

Семинарт оролцогчид туршилтын хөтөлбөрийн хүрээнд хэрэгжүүлсэн үйл ажиллагаа, үр дүнг дүгнэн цаашид залуу малчдын ур чадварыг хөгжүүлэх боломжийг нэмэгдүүлэх, сумын түвшинд аж ахуй эрхлэлтийн сургалт, бизнесийн зөвлөх үйлчилгээ бий болгох, малчдын хоршооны хөгжлийг дэмжих, малчдын нийгмийн даатгалд хамрагдалтыг нэмэгдүүлэх, хөдөлмөр эрхлэлтийн үйлчилгээний албан хаагчдын чадавхи, орон нутгийн холбогдох талуудын зохицуулалтыг сайжруулах талаар хэлэлцэж, зөвлөмж гаргах юм байна

Саналын хуудсыг хэвлүүлэх ажил өнөөдөр эхэлж байна. Түүнийг
хэвлүүлэх, хүргүүлэх, хадгалах, хамгаалах ажлыг Сонгуулийн ерөнхий
хорооноос байгуулсан Ажлын хэсэг эрхлэн зохион байгуулж байгаа билээ.

Саналын хуудсыг Сонгуулийн ерөнхй
хорооноос баталсан загвар, захиалсан тоо, чанар, шаардлагын дагуу хэвлэж
буй эсэхэд Ажлын хэсэг хяналт тавих бөгөөд саналын хуудасны эх бэлтгэл,
хэвлэх, боож баглах, хүлээлцэх явцад хэвлэх үйлдвэрийн ажилчдаас гадна Ажлын хэсгийн гишүүд, нам, эвсэл, төрийн бус байгууллагын ажиглагчид ажиглах юм.

Өнөөдөр тэд саналын хуудас хэвлэх “Мөнхийн үсэг групп” ХХК-ийн
хэвлэх үйлдвэрийн үйл ажиллагаа түүний дотор хэвлэх техник,
технологитой танилцсны дараа саналын хуудасны эх бэлтгэх ажлын явцыг
ажиглав.

Нийт 595 төрлийн
хоёр сая орчим саналын хуудас хэвлэх ажиллагаа цагдаагийн байгууллагын
хамгаалалт, тагнуулын асуудал эрхэлсэн байгууллагын хяналт дор явагдана.

Саналын хуудсыг санал авах өдрөөс 3-аас доошгүй хоногийн өмнө санал авах байранд хүргүүлсэн байхаар тооцож хэвлүүлж байна гэж СЕХ-ны хэвлэл, мэдээллийн төлөөлөгч мэдээлэв.

“Найрсаг Улаанбаатар” хөтөлбөрийн хүрээнд орчин үеийн хотын соёлыг түгээн сурталчлах, орчин үеийн бүжгийн төрлийг дэмжих зорилготой “UB Dance” фестивалийн аварга шалгаруулах тэмцээн энэ сарын 19-нд “Чингисийн талбай”-д зохион байгуулагдана.

Хоёр дахь жилдээ зохион байгуулж буй тус фестиваль олон улсын шинж чанартайболох бөгөөд орчин үеийн чөлөөт бүжгийн 50-60 хамтлаг рэп, хип хоп, брэк, электро, гудамжны бүжгийн төрлөөр өрсөлдөх ажээ. Тодруулбал, тэмцээнд Өвөрмонголын Хөх хот, Шинжаан, ОХУ-ын Буриад, Тува улсаас хамтлагууд оролцох юм байна. Мөн энэ үеэр график зураг, экстрим спорт, салса бүжгийн аварга шалгаруулах тэмцээн явагдах юм.

“UB Dance” чөлөөт бүжгийн фестивалийг Нийслэлийн соёл урлагийн газар, “Улаанбаатар” чуулгатай хамтран зохион байгуулж байгаа бөгөөд Солонгос, Япон, Монголын шүүгч нар хамтран шүүх аж.

Тэмцээний эхний шатыг “Хамтлаг бүжиг” болон “1:1 баатл” тулаан гэсэн хоёр төрлөөр явуулсан бөгөөд шалгарсан хамгийн өндөр оноотой 10 хамтлаг уран бүтээлчдээс шилдгийг тодруулах юм байна. Шагналын сан өмнө жил 13 сая байсан бол энэ жил “Шилдэг бүжигчин”-ийг 5 сая төгрөгөөр урамшуулах аж.

Улсын хэмжээнд энэ оны эхний таван сард 12481 гэмт хэрэг бүртгэгдсэн нь өмнөх оны мөн үеийнхээс 249 хэрэг буюу 2.0 хувиар буурчээ.

Өмнөх оны мөн үеийнхээс нийт гэмт хэргийн тоо буурахад аж ахуйн эсрэг 275, тээврийн хэрэгслийн хөдөлгөөний аюулгүй байдал, ашиглалтын журмын эсрэг 190, нийгмийн аюулгүй байдлын эсрэг 65 зэргээр гэмт хэрэг буурсан нь голлон нөлөөлсөн аж. Гэмт хэргийн улмаас 4646 хүн гэмтэж, 356 хүн нас барсан нь өмнөх оны мөн үеийнхээс гэмтсэн хүн 68 буюу 1.4 хувь, нас барсан хүн 71 буюу 16.6 хувиар буурсан байна.

Өнөө маргаашдаа нутгийн төв хэсгээр их хэмжээний бороо орох тул үер усны аюулаас сэрэмжтэй байхыг анхааруулж байна.

14-нд нутгийн зүүн хагаст, 15-нд баруун болон зүүн зүгийн нутгийн хойд, 16-нд Хангай, Хөвсгөлийн уулархаг нутаг болон зүүн зүгийн нутгийн зүүн, 17-нд баруун зүгийн нутгийн хойд хэсгээр бороо орно. Дуу цахилгаантай. Борооны өмнө салхи түр зуур ширүүснэ. 14-нөөс дулаарч Хангай, Хөвсгөл, Хэнтэйн уулархаг нутаг, Туул, Тэрэлж голын хөндийгөөр шөнөдөө 5-10 градус, өдөртөө 17-22 градус, Их нууруудын хотгор болон говийн бүсийн өмнөд хэсгээр шөнөдөө 13-18 градус, өдөртөө 26-31 градус, бусад нутгаар шөнөдөө 8-13 градус, өдөртөө 22-27 градус дулаан байна