Month: June 2016

Монголчууд барилгын үндсэн материалынхаа 60 хувийг дотооддоо үйлдвэрлэдэг
болсон. Тодруулбал, барилгын материалын 25 үйлдвэр тоног төхөөрөмжийг шинэчлэн,
180 үйлдвэр ашиглалтад оруулсан байна. Тиймээс цаашид ч барилгын материалын үйлдвэрлэлийг
төрөлжүүлэн цемент, төмөр хийц, дулаалгын материал зэрэг бүтээгдэхүүний хэрэгцээг
дотоодын үйлдвэрлэлээр бүрэн хангахаар болжээ.

Ингэхдээ компаниудтай хамтран ажиллана. Тодруулбал, “Өлгий Цемент”
ХХК нь Баян-Өлгий аймаг болон бусад аймгуудын хэрэгцээг хангахаар ажиллах аж. Баруун
таван аймгийн цементийн хэрэглээ жилд 150.000 тонн байдгаас Баян-Өлгий аймгийнх
30000 тонн. Тус үйлдвэр ашиглалтад орсноор улс орон нутгийн төсөвт татвар хураамж
байдлаар жилд 1.5-3.5 тэрбум төгрөгийг төвлөрүүлж, шинээр 80 хүний ажлын байр бий
болгоно гэж тооцоолжээ.

Мөн “Вестрон Холд” ХХК нь Ховд аймгийн Буянт суманд жилд 250.000
тонн цемент үйлдвэрлэх хүчин чадалтай, технологын хуурай аргын цементийн үйлдвэрийг
олон улсын болон үндэсний стандартуудыг хангасан үйлдвэр барихаар ажиллаж байна.
Тус үйлдвэр ашиглалтад орсноор шинээр 100 хүний ажлын байр бий болох гэнэ.

Түүнчлэн баруун бүсийн нефтийн бүтээгдэхүүний үйлдвэрийг Баян-Өлгий
аймгийн Цагааннуур суманд барих бөгөөд жилд 25000 тонн газрын тос боловсруулж, үүнээс
7500 тонн бензин, 10000 тонн дизель түлш, 8000 тонн мазут зэрэг нэмүү өртөг шингэсэн
бүтээгдэхүүн үйлдвэрлэж бүс нутгийн газрын тосны бүтээгдэхүүний нийлүүлэлт, хангамжийн
эх үүсвэрийг жилд 20-25 мянган тонноор нэмэгдүүлнэ. Улс, орон нутгийн төсөвт татвар,
хураамж байдлаар жилд 2.5 тэрбум төгрөгийг төвлөрүүлэх аж. Ингэснээр орон нутагт
25-30 шууд ажлын байр бий болно гэж тооцжээ.

Баруун аймгуудад барилгын материал, цементийн үйлдвэр, нефть боловсруулах
үйлдвэрүүдийг байгуулсанаар тээвэрлэлтийн зардал багасаж орон сууц шатахууны үнэ
хямдарна гэж АН-ын үзэж байна.

НИТХ-ын шийдвэрээр нийслэлийн алслагдсан гэр хорооллын хүүхдүүдийг хөгжүүлэх, авьяас чадварыг нь нээх зорилгоор өнгөрсөн оны хоёрдугаар сараас Монголын хүүхдийн ордны салбар дугуйлангуудыг нээн хичээллүүлсэн. Салбар дугуйлангууд нь Сонгинохайрхан дүүргийн 3,9,27 хороо, Чингэлтэй дүүргийн 1,18 дугаар хороо, Баянзүрх дүүргийн 2,9 дүгээр хороо, Сүхбаатар дүүргийн 17 дүгээр хороонд байрлаж байна. Мөн Сүхбаатар дүүргийн Хүүхэд гэр бүлийн хөгжлийн төв, Хан-Уул дүүргийн 19 дүгээр хорооллол, Яармаг дахь 34 дүгээр сургууль, 10 дугаар хорооны Иргэний танхим, долдугаар сургууль, “Морингийн даваа”-нд байрлах 135 дугаар сургууль зэрэг газарт тус тус байрлан хичээллэж байна.

Салбар дугуйлангуудад мэргэжлийн багш нар дуу, бүжиг, англи хэл, драм, гар урлал, уран зураг, амьдрах ухаан зэрэг сургалтыг явуулж байгаа ажээ. Сургалт гурван сарын хугацаатай, үнэ төлбөргүй явагдах бөгөөд шинэ хичээлийн жилийн элсэлтээ авах юм байна. Харин одоогоор Монголын хүүхдийн ордон зуны сургалтад хамрагдах хүүхдүүдээ бүртгэж байна. Тодруулбал, төгөлдөр хуур, шанз, морин хуурж, бүжиг, зураг, шатар, драм, ятга, хийл, цахилгаан хөгжим болон математик, англи, япон, хятад хэлний хичээлээр сургалт болно.

2016-2017
оны хичээлийн жилийн их, дээд сургуулиудад элсэн суралцах оюутнуудын Элсэлтийн ерөнхий
шалгалт өнөөдөр орон даяар монгол хэл, бичгийн шалгалтаар эхэлээ. Монгол хэл, бичгийн
шалгалт өнөөдөр 12:00 цагт эхэлж, 100 минут үргэлжилж дууссан байна. Энэ жил улсын
хэмжээнд 36207 сурагч ЕБС-ийг төгсөж байгаа бөгөөд өмнөх жилийн төгсөгчидтэй нийт
37200 гаруй шалгуулагч ЭЕШ-д оролцож байгаа аж. Маргааш Англи хэл, Монгол улсын
түүх, Химийн хичээлүүдийн шалгалт болно.

Улаанбаатар хотын Замын цагдаагийн газрын ЖШУХ нийт 307 дуудлага мэдээ мэдээлэл хүлээн авснаас зам тээврийн ослын 228 дуудлага бүртгэгдсэн байна. Үүнээс гэмт хэргийн шинжтэй гомдол мэдээлэл 11 бүртгэгдэж 18 хүн хүнд хөнгөн гэмтсэн. Хүүхэд зам тээврийн осолд өртсөн үүнээс сургуулийн өмнөх насны 2, сургуулийн насны 3, Согтууруулах ундааны зүйл хэрэглэсэн үедээ хөдөлгөөнд оролцсон жолооч 2, явган зорчигч 0. Согтуугаар тээврийн хэрэгсэл жолоодсон 72 жолоочийг журамлан гарч болзошгүй осол хэргээс урьдчилан сэргийлсэн.

Тухайлбал: СХД-ийн нутаг Баянхошууны зам, Хөтлийн замд Т.Fielder маркийн авто машины жолооч М нь согтууруулах ундааны зүйл хэрэглэсэн үедээ тээврин хэрэгсэл жолоодон N.Bluebird маркийн Д, H.Accent маркийн Т жолоочтой авто машинтай мөргөлдөж зорчигч 14 настай эрэгтэй Э нарын 6 хүн гэмтсэн.

ХУД-ийн нутаг Нисэхийн зам, Буянт ухаагийн 7 -р гудамж 6-257 тоот хашааг M.Lancer маркийн авто машины жолооч Л нь согтууруулах ундааны зүйл хэрэглэсэн үедээ тээврийн хэрэгсэл жолоодон явахдаа мөргөж онхолдож зорчигч 34 настай эрэгтэй Ү нарын 3 хүн гэмтсэн.

Хөдөө орон нутагт: Баян-өлгий аймгийн Өлгий сумаас Цагааннуур томгон явах замд H.Accent маркийн М жолоочтой авто машин онхолдож жолооч 51 настай эрэгтэй М -ийн амь нас хохирсон.

Баянзүрх дүүргийн 22 дугаар хороо Монел баруун Алтан-Өлгийд бага сургууль, цэцэрлэгийн цогцолбор барилга ашиглалтад орлоо. Монел Алтан-Өлгий орчимд үүнтэй нийлээд хоёр цогцолбор ашиглалтад орж байгаа бөгөөд энд суралцах хүүхдүүдийнхээ тав тухтай орчныг бүрдүүлэх зорилгоор эргэн тойрныг тохижуулж, замыг засварлаж байгаа юм.

Баянзүрх дүүрэгт сүүлийн гурван жилд гурван бага сургууль, цэцэрлэгийн цогцолбор ашиглалтад орж байгаа бөгөөд үүний нэг нь Монел баруун Алтан-Өлгийн 137 дугаар бага сургууль, 212 дугаар цэцэрлэг юм. Бага сургууль нь 180, цэцэрлэг нь 120 хүүхэд хүлээн авах хүчин чадалтай. Мөн стандартын спорт, урлаг заал, цайны газар гэхчилэн гадна, дотно тохижилтыг бүрэн шийджээ. Албан ёсоор 08 сарын 20-нд бүртгэлээ эхлүүлж, 09 сарын 01-нээс хүүхдүүдээ хүлээн авах юм.
Хамран сургах тойрог:

• Баянзүрх дүүргийн 22 дугаар хороо Алтан-Өлгийн 4,5 дугаар хэсгийн 13-20 дугаар гудамж
• Баруун Алтан-Өлгийн 1-4 дүгээр хэсгийн 21-37 дугаар гудамж
• Бунхан 1-4 дүгээр гудамж
• Баянзүрх дүүргийн 5 дугаар хороо Монелын 11-13 дугаар хэсгийн 32-53 дугаар гудамжны хүүхдүүд энэхүү сургууль, цэцэрлэгт хамрагдана гэж Нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээллээ.