Онцгой байдлын ерөнхий газрын даргын А/131 дугаар тушаалын дагуу төв, орон нутгийн Онцгой байдлын газар, хэлтсийн усчин-аврагч, шумбагчдыг бэлтгэх сургалт “Усан спорт сургалтын төв”-д амжилттай явагдаж дууслаа. Усчин аврагчдын үүрэг гүйцэтгэлийн чадамжийг нэмэгдүүлэх зорилготой тус сургалтад 20 аймгийн 81 аврагч хамрагдсан юм.
Эдгээр аврагчид өнөөдөр нээлттэй хичээл хийж, Онцгой байдлын ерөнхий газрын удирдлагуудад юу сурч, мэдсэнээ тайлагнаж, мэргэжлийн үнэмлэхээ гардаж авлаа.
Усанд эрэн хайх, аврах ажиллагаа явуулна гэдэг олон талын чадвар, тэсвэр тэвчээр шаарддагддаг. Тэгвэл зарим аврагчид маань усны мандал дээр сэлэлт сайтай боловч гүний шумбалт тааруу байх нь бий. Тиймээс энэ удаагийн сургалтаар 3-4 төрлөөр сэлэлт хийх, гол, нууранд хэрхэн хүний амь нас аврах, усанд эндсэн хүнийг хэрхэн гүнээс гаргаж авах, хүн үүрээд уснаас хэрхэн гарах, усан дотор хоорондоо дохиогоор хэрхэн ойлголцох зэрэг арга техникийг эзэмшсэнээрээ үр дүнтэй сургалт болжээ.
Түүнчлэн энэ удаагийн сургалт Төв усан бассейнд хийгдэж байгаагаараа давуу талтай. Учир нь усан бассейн нь гүндээ 5 м, гүехэндээ 1,2 м байдаг учир гүний аврах ажиллагааны шумбалтын дасгалуудыг хийхэд тохиромжтой байсан юм.
Улсын Филармонийн уран бүтээлчид энэ сард “Монголын сайхан орон” төслийг хэрэгжүүлж байна. Төслийн хүрээнд П.И.Чайковскийн “Симфони №6” болон “Времена года” буюу “Эргэх дөрвөн улирал” зэрэг концертыг тоглох юм байна.
Японы хойд хэсгийн Хоккайдо аралд өнөөдөр /2016.06.16/ 5.3 магнитудын газар хөдөллөө. Газар хөдлөлтийн улмаас цунами үүсээгүй, АЦС-уудад гэмтэл гараагүй гэдгийг албаныхан мэдээлжээ. Өмнө нь өнгөрсөн дөрөвдүгээр сард Японы өмнөд хэсгийн Кюшү аралд хүчтэй газар хөдөлснөөс 49 хүн амь үрэгдсэн юм.
Ойрын өдрүүдэд бороо орж, сэрүүсэх төлөвтэй байна. Даваа гараг хүртэл ихэнх нутгаар бороо орох бөгөөд 17-19-нд нутгийн баруун хэсгээр, 19-нд төвийн аймгууд, 19-ний өдөр зүүн бүсийн нутаг, 19-нд говийн бүсийн нутгаар дуу цахилгаантай ширүүн бороо, орж салхи секундэд 14-16 хүрч сэрүүснэ.
Сүүлийн өдрүүдэд орон нутагт хур тунадас ихтэй байгаагаас гол мөрний усны түвшин нэмэгдэж зарим гол үерлээд байна. Тухайлбал, Хөвсгөл аймгийн Дэлгэрмөрөн, Бэлтэс, Сэлэнгэ, Бүгсий, Идэр зэрэг голуудын усны түвшин ихээхэн нэмэгджээ. Өнөөдрийн байдлаар Мөрөн хотын хажуугаар урсдаг Дэлгэрмөрөн гол хэвийн үедээ 1 метр 64 см байдаг бол 1 метр 39 см-ээр нэмэгдэж 303 см болж аюултай түвшинд ойртжээ. Мөн Сэлэнгэ мөрөн хэвийн үедээ 213 см байдаг бол 1метр 60 см-ээр нэмэгдэж 373 см болсон байна. Цаашид усархаг бороо орох төлөвтэй байгаа тул томоохон голуудын усны хэмжээ аюултай түвшинд хүрч болзошгүй байгаа ажээ. Тиймээс ард иргэдийг гол усны үерээс болгоомжилж аюулгүй байдлаа ханган зорчихыг Онцгой байдлын газраас анхаарууллаа.
Япон улсын Засгийн газрын Соёлын газрын буцалтгүй тусламжаар хэрэгжиж буй “Монголын Үндэсний Музейн үзмэрийн хадгалалтын тоног төхөөрмжийг сайжруулах төсөл”-ийн хүрээнд үзмэрүүдийг хамгаалан хадгалах зориулалт бүхий тоног төхөөрөмжийг гардуулах ёслол маргааш болох юм.
Хэтэрхий халуун цай, кофе уух нь эрүүл мэндэд аюултайг Дэлхийн эрүүл мэндийн байгууллагын дэргэдэх хорт хавдар судлах олон улсын агентлаг хүлээн зөвшөөрчээ. “Индепендент” сонинд ингэж мэдээлсэн байна.
Тавь гаруй хоногийн дараа болох “Рио-2016” зуны олимпийн медаль бэлэн болжээ. Томас Бах ахлагчтай “Рио-2016” олимпийг зохион байгуулах хорооноос өгсөн мэдээллээр 2400 гаруй медаль үйлдвэрлэжээ. Медалийн загвар нь “Рио-2016” олимпийн бэлгэдэл, түүнийг тойрон эртний грекийн ялалтын бэлгэ тэмдэг болох лаврын навч байрлажээ. Харин нөгөө тал нь Эртний Грекийн охин тэнгэр Панатинайко нь Акрополис цэнгэлдэх хүрээлэнгийн урд буйгаар байгалийн үзэмж, үндэсний хэв маягийн оруулан бүтээжээ. Харин Параолимпийн медаль онцлогтой бөгөөд харааны бэрхшээлтэй тамирчдад зориулан товруутай байх юм. Мөн сэгсрэх чимээгээр алт, мөнгө, хүрэл гэдгийг нь ялгаж болно. Алтан медаль сэгсрэхэд нь хамгийн чанга дугарах бөгөөд мөнгө хүрэл нь арай бүдэгхэн сонсогдох ажээ. Медалиуд нь бүгд 500 гр жинтэй бөгөөд тамирчид зүүхэд тэдний зүрхэн тушаа байрлахаар хийгджээ. Мөнгөн ус хэрэглэхгүйгээр олборлосон цэвэр алтаар бүрсэн бөгөөд мөнгө хүрэл медалийн 30 хувийг дахин боловсруулсан мөнгөөр хийсэн байна.
Хүн амын хөгжил, нийгмийн хамгааллын яамнаас санаачлан, хүний хөгжил сангийн 1,6 тэрбум төгрөгийн санхүүжилтээр санхүүжүүлэн барьж байгуулсан Баянгол дүүргийн хүүхэд, гэр бүл хөгжлийн ордон өнөөдөр нээлтээ хийлээ. Тус ордон ашиглалтанд орсоноор залуу гэр бүлүүдийг харилцааны сургалт, сэтгэл зүйн зөвөлгөө мэдээллээр бүрэн хангаж, шинэ төрсөн хүүхдийн төрсний гэрчилгээ, 16 насанд хүрч буй залуучуудад иргэний үнэмлэхийг гардуулан өгөх, залуу гэр бүлийн гэрлэх ёслолыг зохион байгуулах юм. Мөн ахмад гэр бүлийн бахархлын хүндэтгэлийн ёслол, хүүхэд залуучуудад чиглэсэн үйл ажиллагааг Баянгол дүүргийн нутаг дэвсгэрийн хүрээнд тогтмол явуулж байх юм байна. 
2016-2017 оны хичээлийн жилийн их, дээд сургуулиудад элсэн суралцах оюутнуудын Элсэлтийн ерөнхий шалгалт өчигдөр орон даяар эхэлсэн өчигдөр 12:00 цагаас монгол хэл, бичгийн шалгалтаар эхэлсэн. Энэ жил улсын хэмжээнд 36207 сурагч ЕБС-ийг төгсөж байгаа билээ. Өмнөх жилийн төгсөгчидтэй нийт 37.200 гаруй шалгуулагч ЭЕШ-д оролцох юм.