Засгийн газрын ээлжит бус хуралдаан өчигдөр үдээс хойш болж, “Сайн хувьцаа” арга хэмжээг хэрэгжүүлэхтэй холбоотой зарим асуудлыг хэлэлцэн шийдвэр гаргасан байна. “Эрдэнэс Таван толгой” компанийн 1072 хувьцааг эзэмшиж байгаа “Сайн хувьцаа” арга хэмжээний дагуу хувьцаагаа худалдах эрхтэй нэг сая 650 мянган иргэнээс өнөөдрийн байдлаар 650 мянган иргэн хувьцааныхаа 30 хувь буюу 322 хувьцааг Засгийн газарт худалдах санал гаргаад байна. Хувьцаагаа худалдах хүсэлтээ эхний ээлжинд гаргасан 368 мянган иргэний хувьцаа борлуулсны төлбөрийн гуравны нэг болох 100 мянган төгрөг ирэх долоо хоногт тухайн иргэний дансанд орно гэж Засгийн газрын хуралдаанд Нийгмийн халамж, үйлчилгээний ерөнхий газрын дарга Ц.Туваан мэдээлэв.
“Сайн хувьцаа” арга хэмжээг санхүүжүүлэх зорилгоор Засгийн газрын үнэт цаасыг 15 хүртэл жилийн хугацаатай, дотоодын зах зээлд үе шаттайгаар гаргаж, “Эрдэнэс Таван толгой” ХК-ийн төрийн эзэмшлийн энгийн хувьцааны ногдол ашиг болон тус компанийн төрийн эзэмшлийн хувьцааг худалдсанаас олох орлогоос эргэн төлөх нөхцөлтэйгээр санхүүжүүлэн холбогдох гэрээ байгуулж ажиллахыг Сангийн сайд Б.Болорт даалгасан юм. “Эрдэнэс Таван толгой” компанийн өөрийн эзэмшлийн хувьцааг худалдах хүсэлт гаргасан Монгол Улсын иргэний эзэмшиж байгаа 1072 хүртэлх энгийн хувьцаанаас эхний ээлжинд 322 хувьцааг багцаар нь 300426 төгрөгөөр зохих журмын дагуу шууд, цаашид үлдэх хувьцааг Монголын Хөрөнгийн биржээр дамжуулан худалдан авахаар шийдвэрлэлээ.
Засгийн газрын хуралдааны дараа Сангийн сайд Б.Болор мэдээлэл хийхдээ “Засгийн газрын ээлжит бус хуралдаанаар “Сайн хувьцаа” хөтөлбөрийн журмыг хэлэлцэж, тогтоолд зарим өөрчлөлт оруулахаар шийдвэрлэлээ. Хэвлэл мэдээллийн зарим хэрэгслээр “Сайн хувьцаа” хөтөлбөрийг хэрэгжүүлэх хүрээнд улсын төсөвт дарамт учруулж, хууль зөрчиж байна гэсэн мэдээлэл цацагдсан байна. Ийм зүйл байхгүй. Мөн ирэх сараас цалин тэтгэврийн асуудал хүндэрнэ, урсгал зардлаа санхүүжүүлж чадахгүй шэсэн мэдээллүүд үндэслэлгүй болохыг мэдэгдэж байна. Цалин тэтгэвэр, урсгал зардлууд хуваарийн дагуу хийгдэж байгаа, цаашид ч асуудал гарахгүй” гэж байлаа.
Улсын бүртгэл, статистикийн ерөнхий газраас бүртгэлийн үйлчилгээний шат дамжлагыг бууруулж, төрийн үйлчилгээг иргэдэд түргэн шуурхай хүргэх зорилтын хүрээнд Нийслэлийн үйлчилгээний нэгдсэн төвүүдэд гадаад паспортын үйлчилгээг өнөөдрөөс нэвтрүүлж эхэллээ.
НӨАТ-ын тухай хууль энэ оны эхний өдрөөс хэрэгжиж эхлээд буй. Тэгвэл энэхүү урамшуулалтай НӨАТ-ын тухай хуулийн дагуу иргэд худалдан авсан бараа, үйлчилгээнийхээ баримтаар сугалаанд оролцох боломжтой болсон. Уг сугалааны ээлжит тохирол энэ сарын 19-нд буюу ирэх ням гарагт 19:30 цагаас МҮОНТ шууд дамжуулах гэж байна.
Нийслэлийн тээврийн газраас зуслангийн чиглэлийн нийтийн зорчигч тээврийн үйлчилгээг 06 сарын 11-ний өдрөөс эхлэн явуулж эхэлсэн.
“Боловсрол суваг” телевизийн “Яг түүн шиг” цэнгээнт нэвтрүүлгийн шүүгч, НИТХ-ын төлөөлөгч, “Шар айраг” хамтлагийн дуучин, уулын спортын мастер Г.Ганхүүтэй уулзаж хөөрөлдлөө.
Сая хүүхдийн баярын үеэр Тэрэлж рүү явагсад буцаж ирэхдээ бөөн түгжрэлд ороод, 4-5 цаг болж байж, зарим нь өглөө үүрээр л нэг юм гэрийн бараа харцгаажээ. Бүүр хошин хэлц хүртэл гараад амжсан байх жишээтэй. “Хөвсгөлөөс ирэгсэд-2 буюу Тэрэлжээс буцагсад” гээд зурагт хуудас хүртэл хийчихсэн байгаа юм. Тэрэлжээс ирэгсдийн замын түгжээнд орсон гол шалтгаан нь ердөө л урсгал сөрж давхисан амиа бодсон жолооч нараас болсон. Нэг их айхтар авхаалж самбаатай, хурдан түргэн явдаг хүмүүс болох гэж оролдогсдын балаг. Урсгал сөрөгсөд эсрэг урсгалын тээврийн хэрэгслүүдийн өөдөөс давхиж очсоноос болоод тухайн замыг наашаа ч үгүй, цаашаа ч үгүй болгочихсон. Уг нь хэсэгхээн хугацаанд хүлээцтэйхэн хандсан бол хэзээ ч тэгж олон цагаар түгжрэлд нам зогсохгүй, бага хурдаар явсаар байгаад асуудал шийдэгдэх байсан. Яахав, ойрын ирээдүйд хотоос орж гарах гарцуудын тоог зайлшгүй нэмэх хэрэгтэй гэдэг нь эндээс харагдаж байгаа юм. Санаагаар болдог бол Богд уулыг нүхлээд Төв аймгийн Зуунмод сумтай холбочихмоор. Бас нэг гарц нэмэгдэнэ. Дагаад хэт төвлөрөл ч саарна. Хараад байхад хотын замын түгжрэл гацааны бараг тал хувь нь жолоочийн өөдгүй байдлаас болж байгаа. Хэдхээн хором хүлээгээд л болох байсан зам дээр заавал урсгал сөрж очоод таг болгочихдог. Тэгэхээр жолооч нарын ухамсарт л жаахан юм хийх хэрэгтэй байна л даа. Жолооны курст бүүр эхнээс нь энэ талаар тусгай багш нараар хичээл заалгадаг баймаар санагддаг. Арван жил, их дээд сургуулиудад ч гэсэн замын хөдөлгөөний соёлын талаар тусгай хөтөлбөр бий болгох шаардлага гарч байх шиг. Жолоо барих нь хүн бүрийн л эзэмшсэн байх зүйлийн нэг тул жолоо барих эрх авагсдын ухамсарт л шинэчлэл хийх хэрэгтэй байна даа.
Өмнөговь аймгийн Булган сумын бага сургуулийг 1962-1966 онд төгссөн сурагчдыг энэ удаагийн “Нэг ангийнхан” буландаа урилаа. Эдний ангийнхан Булган сумын бага сургуулийн гурав дахь төгсөгчид юм байна. Төгсөлтийнхөө 50 жилийн ойг тэмдэглэж Чингисийн талбайд 12:00 цагаас уулзахаар товложээ. Уулзалтыг зохион байгуулж буй ангийн дарга П.Ядамдорж, Х.Цэрэндаваа хоёр цагаасаа эртлэн ирж автобус унаа, уулзалтын маршрутыг бэлтгэжээ. Х.Цэрэндаваа “Ангийнхныгаа хүлээж авахад бэлэн боллоо. Сургуулиа төгсөөд 50 жил болсон байна. Ангийнхан маань хөдөө голдуу байдаг ч ажлаа амжуулаад тэмдэглэлт баяртаа заавал ирж байгаа юм” хэмээн ярьж байтал ангийн хэсэг хүүхдүүд ирлээ. П.Ядамдорж “Манайхан цаг барьдаг хүмүүс шүү. Ажил, амьдрал нь сайн уу” гэсээр угтлаа. Нэг нэгнийхээ мэндийг мэдэлцэж хоорондоо хөгжилтэй яриа дэлгэж байх хооронд ангийнхан товлосон цагтаа бүгд цуглажээ. Эдний ангийнхан 26 хүүхэдтэй байсан бөгөөд 11 эрэгтэй, 14 эмэгтэй сурагчтай байсан аж. Жар нэлээд гарсан ч бага ангийн дурсамжаа ярихад сурагч насандаа очиж буй мэт сэтгэгдэл төрж байлаа. Ангийнхан Чингисийн талбай дээр дурсгалын зургаа татуулаад Гандан хийдэд очихоор хөдөллөө.
П.Ядамдорж “Манай ангийнхан тухайн үед монтаж гэж хийлгэж байсангүй. Хэдэн хар зурагтай л төгсөж байсан. Тэдгээрийг нь нэгтгэж байгаад 50 жилийнхээ ойгоор монтаж хийж ангийнхандаа тараасан юм. Монтажинд 50 жилийн өмнөх болоод дараах зургийг харьцуулж дурсгал болгон хийлээ. Хамт олон маань сайхан хүлээж авч байна” гэлээ. 
“За” гэдэг үгийн цаана маш их зүйл багтдаг. Энэ үгийг хэлэхэд нэрэлхэх, зөвшөөрөх, хурдан салахын түүс болох, хоромхон мартахын эхлэл гэх мэт олон янзаар бодлоготой, бодлогогүй амнаас гардаг. Энэ мэтээр энэ үг алба, амины олон ажлыг амжуулна ч, бас алдуулна ч. Эцсийн эцэст энэ үгийн цаана хүний мөс харагдаж байдгийг бодууштай юм шүү.” Энэ үгийг Монгол Улсын Төрийн шагналт, Урлагийн гавьяат зүтгэлтэн зохиолч, найруулагч Ламзавын Ванган нэгэнтээ хэлжээ. Тэгвэл Ламзавын Ванган агсны намтар уран бүтээлийн “Хүний мөр” хэмээх ном хэвлэгдэн гарлаа.
Монгол Улс, Мьянмарын Холбооны Бүгд Найрамдах Улсын хооронд дипломат харилцаа тогтоосны 60 жилийн ойн хүрээнд Монгол Улсын Ерөнхийлөгч Ц.Элбэгдорж 2016 оны зургаадугаар сарын 14-16-ны өдрүүдэд Мьянмарын Холбооны Бүгд Найрамдах улсад ажлын айлчлал хийсэн билээ. Уг айлчлал амжилттай болж өндөрлөн, Монгол Улсын Ерөнхийлөгч өчигдөр орой эх орондоо хүрэлцэн ирлээ.