Month: June 2016

Цагдаагийн байгууллага тавдугаар сарын 20-ноос зургадугаар сарын 17-ныг хүртэл хугацаанд “Сонгуулийн тухай хууль” зөрчсөн болон Сонгуулийн үйл ажиллагаатай холбоотой гэмт хэрэг, зөрчлийн 604 гомдол, мэдээлэл хүлээн авчээ.

Үүнээс 362 нь Улаанбаатар хотод, хөдөө орон нутагт 242 нь бүртгэгдсэн байна.

Бүртгэгдсэн зөрчлийг ангилбал

• Сурталчилгааны самбар, зурагт хуудас, бусад эд зүйл гэмтээсэн 174,
• Нэр дэвшигчийг мэдээллийн хэрэгсэл, фэйсбүүк хуудас, пэйж хуудсаар гүтгэсэн, нэр төрийг нь гутаасан 76,
• Бэлэг сэлт, эд зүйл тараасан, дайллага цайллага хийсэн 65,
• Ухуулга сурталчилгаа хийх үеэр саад учруулсан 23,
• Сурталчилгааны байр, намын байранд танхайрсан 30,
• Хууль зөрчин сонгуулийн сурталчилгаа явуулсан 153,
• Бусад 83 байжээ.

Сонгуулийн сурталчилгаа эхэлснээс хойш ирсэн гомдол, мэдээллийн 38 хувь нь сонгуульд нэр дэвшигчийн сурталчилгааны самбар, зурагт хуудас, ухуулах хуудас, бусад материалыг санаатайгаар болон хууль бусаар гэмтээх, устгах, бохирдуулсан гэх зөрчлүүд байгаа аж.

Дээрх гомдлуудын ихэнх нь эзэн холбогдогчгүй бөгөөд гурван удаагийн энэ төрлийн мэдээллийг хүүхдүүд үйлдсэн болохыг тогтоожээ.

Цагдаагийн байгууллагад ирүүлсэн зөрчлийг шалгаад

• Эрүүгийн хэрэг үүсгэхээс татгалзсан 16,
• Захиргааны арга хэмжээ тооцуулахаар шүүхэд шилжүүлсэн 72,
• Захиргааны арга хэмжээ ногдуулсан 3,
• Зөрчил болох нь тогтоогдоогүй, хариу мэдэгдсэн 37,
• Газар дээр нь шийдвэрлэсэн 11,
• Ажиллагаанд байгаа 469 гомдол шалгагдаж байна.

Цагдаагийн байгууллагад өгсөн дуудлага мэдээллээ буцаах, нэр дэвшигч болон менежер , ажилтнуудын үйл ажиллагаа уялдаа холбоогүйгээс сурталчилгааны самбар, эд зүйлсээ алдлаа гэх андуурсан дуудлага мэдээлэл гарсаар байгаа аж.

Тиймээс сонгуульд оролцож байгаа нам, эвсэл, бие даагчид болон иргэд Сонгуулийн тухай хуулийн хүрээнд үйл ажиллагаа явуулахыг анхааруулж байна.

Энэ сарын 21-нд ихэнх нутгаар, 22-нд төв болон зүүн аймгуудын нутгаар, 23-нд баруун зүгийн нутгийн баруун, зүүн зүгийн нутгийн зүүн хэсгээр, 24-нд баруун аймгуудын нутаг, төвийн аймгуудын баруун хэсгээр дуу цахилгаантай бороо орно.

Салхи 21-нд нутгийн өмнөд хэсгээр, 22-нд говь талын нутгаар секундэд 12-14 метр хүрч ширүүснэ. 21, 22-нд нутгийн хойд хэсгээр сэрүүсч Хангай, Хөвсгөл, Хэнтэйн уулархаг нутаг, Туул, Тэрэлж голын хөндийгөөр шөнөдөө 1-6 хэм, өдөртөө 12-17 хэм, говийн бүс нутгийн өмнөд хэсгээр шөнөдөө 11-16 хэм, өдөртөө 25-30 хэм, бусад нутгаар шөнөдөө 7-12 хэм, өдөртөө 18-23 хэм дулаан байна. 23-нд баруун аймгуудын нутгаар, 24-нд ихэнх нутгаар дулаарна.

“Найрсаг Улаанбаатар” хөтөлбөрийн хүрээнд “PLAYTIME- 2016” олон улсын амьд хөгжмийн наадмыг энэ сарын 24-26-ны өдрүүдэд зохион байгуулах гэж байна. 3 дахь жилдээ зохион байгуулагдаж буй энэхүү наадам уламжлал ёсоор Гачуурт тосгоны Монгол Шилтгээнд болох юм.

Тэгвэл наадамд зориулан тус өдрүүдэд Монголын Хүүхдийн Ордноос өглөөний 09:00 цагаас эхлэн үнэ төлбөргүй автобус үйлчлэх юм байна. Дашрамд дурдахад, “Playtime-2016” наадамд дэлхийд алдартай Шведийн “The Radio Dept” болон Японы “Roth Bart Baron”, “The You”, “Fu-Ching-Gido”, Францын “Charles Baptise”, Сингапурын “Annajudgeapril”, ОХУ-ын “Slackers”, БНСУ-ын “Shenanigans”, БНХАУ-ын ӨМӨЗО-ны “9596” Финландийн “Catself” зэрэг гадаадын амьд хөгжмийн 10 хамтлаг болон “Нисванис”, “The Lemons”, “Аясын салхи”, “UFO” зэрэг үндэсний шилдэг 25 амьд хөгжмийн хамтлаг дуучид оролцоно. Мөн 20 гаруй DJ-гийн бүтээлийг “Playtime”, “Шинэ Давалгаа” тайзаар дамжуулан хүргэх аж.

Монгол Улсын Ерөнхийлөгчид Бүгд Найрамдах Итали Улсаас Монгол Улсад суух Онц бөгөөд Бүрэн эрхт Элчин сайд Андрэ дэ Фэлип итгэмжлэх жуух бичгээ өргөн барилаа.Итгэмжлэх жуух бичгээ өргөн барьсантай холбогдуулан Элчин сайдыг хүлээн авч уулзав.

Ерөнхийлөгч Элчин сайд Андрэ дэ Фэлипэд хандан Бүгд Найрамдах Итали Улсаас Монгол Улсад суух анхны суурин Элчин сайдаар томилогдон ирж, үүрэгт ажилдаа орж байгаад баяр хүргэн ажилд нь амжилт хүсэн ерөөв.

Тэрбээр Бүгд Найрамдах Итали Улсаас Монголд Элчин сайдын яамаа нээж байгаа нь Италийн тал хоёр талын харилцааг чухалчлан үзэж байгаагийн илрэл гэж ойлгож буйгаа илэрхийлэн, монголын тал ч Монгол, Италийн харилцаанд чухал ач холбогдол өгдгийг тэмдэглэлээ.

Италийн Сенатын танхимын Ерөнхийлөгч Пьетро Грассо энэ дөрөвдүгээр сард Монголд албан ёсны айлчлал хийсэн нь Италийн талаас хэрэгжсэн анхны дээд хэмжээний айлчлал байсныг дурдав.

Түүнчлэн АСЕП-ийн уулзалтад Италийн парламентын 2 танхимын удирдлага оролцсон бол удахгүй болох АСЕМ-ийн дээд түвшний уулзалтад Итали Улсын Ерөнхий сайд оролцоно гэдэгт итгэлтэй буйгаа Ерөнхийлөгч илэрхийллээ.

Элчин сайд Андрэ дэ Фэлип хоёр улсын хоорондын түүхэн харилцааг цаашид өргөжүүлэн хөгжүүлэхийн төлөө хүчин чармайлт гарган ажиллахаа мэдэгдэж, өөрийн хуримтлуулсан мэдлэг туршлагаа зориулахаа амлав.

Ерөнхийлөгч Элчин сайдын ажилд Монголын Гадаад хэргийн яам, Ерөнхийлөгчийн Тамгын газраас дэмжин ажиллахыг мэдэгдэж, түүний нэр хүндтэй, хариуцлагатай ажилд амжилт хүссэнээр уулзалт өндөрлөв.

Уулзалтын дүрсийг доорх хаягаар үзнэ үү.

Авлигатай тэмцэх газраас Шударга байдлын үнэлгээний дүнг төрийн байгууллагын албан тушаалтнуудад танилцуулав. Шударга байдлын үнэлгээ нь тухайн байгууллагын гадаад ба дотоод шударга байдлын болон бодлогод оролцогчдын дүгнэлтэд үндэслэсэн үнэлгээ аж.

Шударга байдлын үнэлгээний мэдээлэл цуглуулах судалгаанд нийтдээ 4340 нэгжийг хамруулсан бөгөөд гадаад шударга байдлын үнэлгээнд 2330 иргэн, аж ахуйн нэгж, байгууллагын төлөөлөл, дотоод шударга байдлын үнэлгээнд 1390 төрийн албан хаагч, бодлогод оролцогчдын үнэлгээнд 620 шинжээч оролцжээ.

Авлигатай тэмцэх газрын Судалгаа шинжилгээний албаны дарга, ахлах комиссар Д.Дуламсүрэн Шударга байдлын үнэлгээг танилцуулах уулзалтад хэлсэн үгэндээ үнэлгээний үр дүнг ашиглаж, өөрсдийн байгууллага дахь шударга, ил тод, хариуцлагатай байдлыг нэмэгдүүлэх, төрийн албан дахь авлига, хүнд суртлыг бууруулах чиглэлээр ажиллахыг хүсэв.

Улаанбаатар хотын дулааны төв шугамд энэ зун хийгдэх нягтын шахалт болон засварын ажлын хуваарийн дагуу өнөөдрөөс долдугаар сарын 05 хүртэл Нисэх, Буянт ухаа-1,2 хороолол, 013-р цэргийн анги, Дэвшил, Төв цэвэрлэх байгууламж, Цэргийн хотхон, 10 буудал орчмын халуун усыг хязгаарлах юм байна.

Монгол, Туркийн эрдэмтэд Тоньюкукийн гэрэлт хөшөөнд археологийн малтлага, судалгааны ажил хийхээр боллоо. ШУА, Түүх, археологийн хүрээлэн, БНТУ-ын ТИКА байгууллагатай хамтран Монгол Улсын нутагт буй Эртний Түрэгийн үеийн дурсгалуудыг судлах, хадгалж хамгаалах төслүүдийг 1997 оноос эхлэн хэрэгжүүлж байна.

ШУА-ийн Түүх, археологийн хүрээлэн, МУИС-ийн судлаач, багш нар БНТУ-ын эрдэмтэдтэй хамтран Эртний Түрэгийн мэргэн сайд Тоньюкукт зориулсан гэрэлт хөшөө бүхий тахилын цогцолборт археологийн малтлага судалгааны ажлыг өнөөдөр эхлүүлж байна. Малтлага ирэх наймдугаар сарын 5-ны өдрийг хүртэл үргэлжилнэ.

Хоёр орны хамтарсан судалгааны анги Тоньюкукийн цогцолборыг малтан судалснаар уг дурсгалын өнөөгийн байгаа байдлыг шинжлэх ухааны аргазүйн дагуу баримтжуулан бүтэц, зохион байгуулалтыг нь тодруулж сэргээн засварлах, хадгалж хамгаалах ажлын бэлтгэлийг хангах юм. Археологийн судалгааны нээлтийн ажиллагаа 6 сарын 20- ны өдрийн 15:00 цагт Төв аймгийн Эрдэнэ суманд байрлах Тоньюкукийн цогцолборт болно.