Month: June 2016

Монгол Улсын ШУА, ШУА-ийн Түүх, археологийн хүрээлэн, БНТУ-ын ТИКА байгууллагатай хамтран Монгол Улсын нутагт буй эртний Түрэгийн үеийн дурсгалуудыг судлах, хадгалж хамгаалах төслүүдийг 1997 оноос эхлэн хэрэгжүүлж байна.

Харин энэ удаа ШУА-ийн Түүх, археологийн хүрээлэн, МУИС-ийн судлаач, багш нар БНТУ-ын эрдэмтэдтэй хамтран эртний Түрэгийн мэргэн сайд Тоньюкукт зориулсан гэрэлт хөшөө бүхий тахилын цогцолборт археологийн малтлага судалгааны ажлыг зургадугаар сарын 20-ноос наймдугаар сарын 05 хүртэлх хугацаанд хийх гэж байна. Судалгааны төслийн нээлтийн үйл ажиллагаа зургадугаар сарын 20-ны өдөр Төв аймгийн Эрдэнэ суманд байрлах Тоньюкукийн цогцолбор дурсгалт газар болсон юм.

ШУА-ийн Эрдэмтэн нарийн бичгийн дарга, академич Т.Галбаатар хэлсэн үгэндээ, “Түрэгийн хаант улсын түүхэнд холбогдох томоохон дурсгалыг малтан судлах ажил нь 1800-гаад оны сүүл үеэс эхэлсэн бөгөөд хожим 1957 онд манай нэрт археологич Намсрайн Сэр-Оджав томоохон малтлага судалгааны ажил хийсэн байдаг. Харин энэ удаад Монгол-Туркийн хамтарсан төслийн хээрийн шинжилгээний ангийнхан дахин судалгааны ажил эхлүүлж байгаад баяртай байгаа”-гаа илэрхийлээд цаашид хоёр орны эрдэмтдийн энэ удаагийн хээрийн судалгааны ажил дараа дараагийн нэгэн бүтээн босголтын эхлэл болох ёстой хэмээв.

Хоёр орны хамтарсан судалгааны анги Тоньюкукийн цогцолборыг малтан судалснаар уг дурсгалын өнөөгийн байгаа байдлыг шинжлэх ухааны аргазүйн дагуу баримтжуулан бүтэц, зохион байгуулалтыг нь тодруулж сэргээн засварлах, хадгалж хамгаалах ажлын бэлтгэлийг хангах аж.

Монгол, Туркийн археологийн хамтын ажиллагаа 20 орчим жилийн түүхтэй бөгөөд өмнө нь Архангай аймгийн Хөшөө Цайдам дахь Түрэгийн Билгэ хааны тахилын онгоныг малтан судалж, Евразийн түүх, археологийн судалгаанд томоохон байр суурь эзлэх 3000 орчим үнэт олдвор эх хэрэглэгдэхүүнийг илрүүлж байжээ.

Агаарын температур, аадар бороо зэргээс шалтгаалан хуурай сайр, гуу жалгаар уруйн үер буух нөхцөл бүрдэх боломжтой учир гол мөрөн ба хуурай сайр, гуу жалга даган нутаглаж буй малчид, иргэдийг үер усны аюулаас болгоомжлохыг холбогдох байгууллагаас анхааруулаад байна.

Тухайлбал, Улаанбаатар хотод Сэлбэ голын эрэг дагуу тавьсан машинууд урсах аюултай байгааг иргэд олон нийтийн сүлжээгээр мэдээлсээр байна. Усархаг бороо орсны улмаас голын эрэг, үерийн далан, гуу жалга дагуух хөрс суларч ойр орчимд нь байх айл өрх, иргэд, эд зүйлс урсах аюултай байгааг анхаарна уу.

Эх, хүүхдийн эрдэм шинжилгээний төвийн Сэхээн амьдруулах тасагт энэ сарын 18-ны өдөр архинд гүн хордсон нэгэн хүүхэд иржээ.

Тодруулбал, 12 настай хурдан морины унаач хүү хэд хоног дараалан архи ууж гүн хордсон, ухаан алдаж таталт өгсөн байдалтай ирсэн байна. Архинд хордсон хүү Ховд аймгийн Булган сумаас ирсэн. Зуны амралтаараа нэгэн нэр алдартай уяачийнд хурдан морь унахаар ирсэн гэнэ.

Хүүхэд архинд хордсон энэ хэргийг Баянгол дүүргийн Цагдаагийн нэгдүгээр хэлтэс шалгаж байгаа юм байна. Хүүгийн уусан 0,5 литрийн архины шилийг Шүүх эмнэлэгт хүргүүлсэн байгаа ба хүүг хэнтэй хэдэн шил архи уусныг тодруулахаар ажиллаж байгаа аж.

Сонгуулийн сурталчилгаа үргэлжилж байгаа хэдий ч нам, нэр дэвшигчийн талаар санал асуулга явуулах, нийтлэх, тараахыг хуульд заасанчлан маргаашнаас эхлэн хориглох юм байна.

Тодруулбал, Сонгуулийн тухай хуулийн 70.2-т “Аливаа этгээд санал авах өдөр хүртэлх долоо хоногийн хугацаанд нам, нэр дэвшигчдийн талаар санал асуулга явуулах, энэ төрлийн мэдээллийг, бүх төрлийн мэдээллийн хэрэгсэл ашиглан нийтлэх, тараахыг хориглоно” хэмээн заажээ.

Малчид, иргэдийн анхааралд: Өнөө маргаашдаа нутгийн төв хэсгээр 22-нд төв болон зүүн аймгийн нутгаар, 23-нд баруун зүгийн нутгийн баруун, зүүн зүгийн нутгийн зүүн хэсгээр, 24-нд баруун аймгийн нутаг, төвийн аймгийн баруун хэсгээр дуу цахилгаантай, үргэлжилсэн бороо орно. Салхи 21-нд нутгийн өмнөд хэсгээр, 22-нд говь талын нутгаар 12-14 м/с хүрч ширүүснэ.

Мөн зөвшөөрөлгүйгээр үерийн далан дээр буусан айл өрхүүд сэрэмжтэй байх, хөдөө орон нутгийг зорих гэж буй иргэд замын зарим хэсэгт үзэгдэх орчин хязгаарлагдаж байгааг санаж анхаарал болгоомжтой зорчино уу.

ОХУ-ын Тува улсын Овярский, Увс нуурын орчимд шувууны томуу өвчний H5 вирусээр үүсгэгдсэн халдвар энэ сарын 17-нд бүртгэгдсэн байна. Энэ тухай ДАЭМБ-д мэдээлжээ. Увс нуурын орчимд хийсэн идэвхтэй тандалт судалгаагаар 17 шувууны сэг, зэмээс шувууны томуугийн H5 вирусийг илрүүлсэн аж.

УЛСЫН ДЭЭД ШҮҮХИЙН ШҮҮГЧИЙН БОЛОН АНХАН, ДАВЖ ЗААЛДАХ ШАТНЫ ЗАРИМ ШҮҮХИЙН ШҮҮГЧ, ЕРӨНХИЙ ШҮҮГЧИЙН СОНГОН ШАЛГАРУУЛАЛТ ЗАРЛАГДЛАА.

Шүүхийн ерөнхий зөвлөлийн даргын 2016 оны 06 дугаар сарын 09-ний өдрийн 77 дугаар тушаалаар Анхан болон Давж заалдах шатны зарим шүүхийн 54 шүүгч, Ерөнхий шүүгчийн, 2016 оны 06 дугаар сарын 20-ны өдрийн 84 дүгээр тушаалаар Улсын дээд шүүхийн Захиргааны хэргийн танхимын 2 шүүгчийн, мөн өдрийн 85 дугаар тушаалаар зарим Анхан шатны шүүхийн 2 шүүгчийн сул орон тоонд тус тус сонгон шалгаруулалт зарлалаа.

Дэлгэрэнгүй мэдээллийг www.judcouncil.mn хуудаснаас авна уу.

Лавлах утас: 7000-8030, 7000-8041

ШҮҮХИЙН МЭРГЭШЛИЙН ХОРООНЫ АЖЛЫН АЛБА

2016.06.20

Нийслэлийн Сонгуулийн хорооны өргөтгөсөн хурал боллоо. Хуралд нийслэлийн Сонгуулийн хорооны гишүүд, дүүргүүдийн Сонгуулийн хорооны дарга нар болон Улаанбаатар хотын цагдаагийн газар, нийслэлийн Мэдээллийн технологийн газар, Онцгой байдлын газар, “Улаанбаатар цахилгаан түгээх сүлжээ” ТӨХК-ийн удирдлагууд оролцов. Хурлаар Сонгуулийн санал хураалтын бэлтгэл ажил, санал авах байрны бэлэн байдал, сонгуулийн зохион байгуулалтын талаар санал солилцож, нийслэлийн Сонгуулийн хорооны дарга Ё.Гэрэлчулуун үүрэг даалгавар өглөө.

Сонгуулийн Ерөнхий хорооноос “Нийслэлийн Сонгуулийн хороо”-г 2016 оны дөрөвдүгээр сарын 18-ны өдрийн 21 дүгээр тогтоолоор нийт есөн гишүүний бүрэлдэхүүнтэй байгуулсан. Сонгуулийн тухай хуульд заасны дагуу нийслэлийн Сонгуулийн хороо дүүргүүдийн сонгуулийн хороог байгуулах, санал авах байруудад ажиллах боловсон хүчнийг сургах, гэрчилгээ олгох, сонгуульд оролцох нам, эвсэл, нэр дэвшигч нарыг бүртгэх, сонгогчдын нэрсийн жагсаалттай холбоотойгоор сонгогч шилжих асуудлыг шийдвэрлэх, саналын хуудас хэвлүүлэх, санал авах байрыг бэлтгэх зэрэг сонгуулийн зохион байгуулалттай холбоотой ажлуудыг хуулийн хугацаанд хийж хэрэгжүүлж байна.

УИХ-ын болон нийслэлийн ИТХ-ын төлөөлөгчдийг сонгох сонгогчдын нэрсийн жагсаалтад бүртгэлтэй нийт 924629 сонгогч нийслэлийн есөн дүүргийн 397 санал авах байранд саналаа өгнө. Үүнд:

Баянзүрх дүүрэгт – 220,130 буюу 23.8 хувь
Сонгино хайрхан дүүрэг – 205,276 буюу 22.2 хувь
Баянгол дүүрэгт -140,846 буюу 15.2 хувь
Чингэлтэй дүүрэгт -111.022 буюу 12.0 хувь
Хан-Уул дүүрэгт -105.874 буюу 11.5 хувь
Сүхбаатар дүүрэгт -96.265 буюу 10.3 хувь
Налайх дүүрэгт -23,976 буюу 2.5 хувь
Багануур дүүрэгт -19,442 буюу нийт сонгогчдын 2.1 хувь
Бага хангай дүүрэгт -2,798 буюу 0.3 хувь сонгогч бүртгэгдсэн.

Сонгуулийн тухай хуулийн 35.2-т зааснаар дүүргүүдийн сонгуулийн хороо санал авах байруудыг байгуулан ахлах зохион байгуулагч, зохион байгуулагч нарыг томилов. Сонгуулийн Ерөнхий хорооны 2016 оны гуравдугаар сарын 23-ны өдрийн 14 дүгээр тогтоолоор баталсан “Санал авах байрыг бэлтгэх заавар”-ын дагуу санал авах байрыг санал авах өдрөөс таваас доошгүй хоногийн өмнө буюу зургадугаар сарын 24-нд бэлэн болгох юм.

Саналын хуудас нийслэлийн хувьд сонгогчийн тооноос хамаарч бусад орон нутгаас хэд дахин их хэмжээтэй байгаа бөгөөд 21 аймагт нэг сая саналын хуудас хэвлэж бэлдсэн бол нийслэлд 924,629 ширхэг шаардлагатай байгаагаас Сонгуулийн Ерөнхий хороо өмнөх жилүүдийн сонгогчдын ирцэд тулгуурлан дараах байдлаар саналын хуудсын тоог хуваарилав. Үүнд:

Багануур дүүрэгт – 18,713
Бага хангай дүүрэгт – 2,681
Баянгол дүүрэгт – 127,678
Баянзүрх дүүрэгт – 205,291
Налайх дүүрэгт – 22,999
Сонгино хайрхан дүүрэг – 194,567
Сүхбаатар дүүрэгт – 86,454
Хан-Уул дүүрэгт – 97,848
Чингэлтэй дүүрэгт – 103,223 нийт 859,454 саналын хуудсыг хэвлүүлж дууссан бөгөөд зургадугаар сарын 22-ноос эхлэн дүүргүүдийн сонгуулийн хороонд, зургадугаар сарын 26-наас өмнө санал авах байруудад тараахад бэлэн болоод байна.

Энэ үеэр нийслэлийн Сонгуулийн хорооны дарга Ё.Гэрэлчулуун дараах үүрэг даалгаврыг өглөө. Үүнд:

Санал авах байрны цахилгаан хангамж, аюулгүй байдал, мэдээлэл харилцаа холбооны найдвартай ажиллагаа, санал авах, тоолох ажиллагааг баримтжуулах камер, саналын хуудсыг хадгалах сейф, сонгогчийн бүртгэл дэх зургийг нийтэд болон ажиглагчид үзүүлэх дэлгэц /телевизор, проектор/ зэргийн бэлэн байдал нийт санал авах байруудад хангалтгүй байгаа тул тухайн нутаг дэвсгэр дэх төрийн өмчийн болон орон нутгийн байгууллагаас шилжүүлэн ашиглуулах асуудлыг шийдвэрлэх

Саналын хуудсыг тээвэрлэх, хадгалах өрөө тасалгааг урьдчилан бэлтгэх, саналын хуудсыг харгалзах индекс, тоо ширхэгийн дагуу санал авах байруудад хуваарилах, санал авах байруудад очсон саналын хуудасны аюулгүй байдлыг хангах

Нийслэлийн Онцгой байдал, “Улаанбаатар цахилгаан түгээх сүлжээ” ТӨХК, Нийслэлийн Улсын бүртгэл статистикийн газар, Мэдээлэл технологийн газар, Улаанбаатар хотын цагдаагийн газар өөр өөрийн чиг үүргийн дагуу сонгуулийн зохион байгуулалтын ажилд дэмжлэг үзүүлэх

Сонгуулийн сурталчилгаа явуулж байх үеэр иргэд хууль бус үйлдэл гаргаж, нэр дэвшигчдийн сурталчилгаааг үймүүлж, сурталчилгааны самбаруудыг урж, тасдаж байна гэсэн гомдол нэр дэвшигчдээс их ирж байгаа тул Улаанбаатар хотын цагдаагийн газар шуурхай шалгаж, холбогдох арга хэмжээг авч, гарсан шийдвэрийг сонгуулийн байгууллагуудад хүргүүлэхэд анхаарч ажиллахыг үүрэг болгов.

Сонгогч бүр сонгогчдын нэрсийн жагсаалтад байгаа эсэхийг Улсын бүртгэл, стастистикийн ерөнхий газрын www.burtgel.mn веб сайт руу орж шалгах боломжтой. Мөн нийслэлийн иргэд Та бүхэн санал өгөх байраа мэдэж амжаагүй байгаа бол www.cityelection.mn цахим хуудас болон 1800-1617 утаснаас үнэгүй лавлана уу гэж нийслэлийн Сонгуулийн хорооноос мэдээллээ.