Алтайн нуруунаас эхтэй Булган, Хар бут, Ховд, Хөвсгөлийн уулсаас эхтэй Богд, Завхан, Орхон, Улиастай, Хэнтэйн нуруунаас эхтэй Сэлэнгэ мөрөн, Баянхонгор аймгийн Байдраг, Шаргалжуут гол Өвөрхангай аймгийн Онги голууд үерийн аюултай түвшинд хүрсэн бөгөөд маргааш өдөр төв, зүүн аймгуудын зарим газраар, 24-ний өдөр баруун аймгуудын нутаг, төвийн аймгуудын баруун хэсгээр, 25-ны өдөр баруун болон төвийн аймгуудын зарим газраар бороо орох тул гол, мөрний усны түвшин нэмэгдэх төлөвтэй байна. Тиймээс иргэд амралт аялал, зугаалгаар явахдаа гол усны ойролцоо амарч зугаалахгүй, сонор сэрэмжтэй байх, бага насны хүүхдийг гол усны эрэг дагуу явуулж, тоглуулахгүй байх, хүүхдэд тавих хараа хяналтаа дээшлүүлэх, голуудын усны түвшин нэмэгдэж байгаа тул баталгаатай гүүр, гарам, гарцтай газраар автомашинтай зорчиж аюулгүй байдлаа хангахыг Онцгой байдлын ерөнхий газраас анхааруулж байна.
УИХ-ын даргын гаргасан захирамжаар энэ долоо хоногт УИХ-ын хаврын чуулган хуралдах ёстой. Тиймээс УИХ-ын даргын дэргэдэх зөвлөл хуралдаж, чуулганы хуралдаан болон Байнгын хороогоор хэлэлцэх асуудлын дарааллыг тогтоожээ. 
Сайн малчин хөтөлбөрийн хүрээнд Төрийн болон Хаан банкуудад нийт 36811 малчин 142 тэрбум 859.4 сая төгрөгийн зээл авах хүсэлт ирүүлжээ. Жилийн 10 хувийн хүүтэй эл зээлийг одоогийн байдлаар 34363 малчинд 132 тэрбум 220.0 сая төгрөгийн зээл аваад байна хэмээн Монголбанкнаас мэдээллээ. 2020 он хүртэл хоёр үе шаттай хэрэгжих уг төсөл мал аж ахуйн үйлдвэрлэлийн түүхий эдийн бэлтгэл, үйлдвэрлэл, борлуулалтыг дээшлүүлэх, анхан шатны үйлдвэрлэлээс эцсийн хэрэглэгч хүртэлх үе шатны санхүүгийн үйлчилгээний хүртээмжийг нэмэгдүүлэхэд чиглэжээ.
Украин улсын Дьяково боомтын хилийн шалган дэр Монгол Улсын хоёр иргэн “Дипломат шуудан” гэх наалт бүхий найман хайрцаг тамхи хилээр нэвтрүүлэхийг завдаад баригдсан тухай мэдээлэгдсэн билээ. Гадаад хэргийн яамнаас энэ талаар Будапешт дахь Элчин сайдын яаманд нарийн бичгийн дарга, зөвлөхөөр ажиллаж байсан Д.Дөхөмбаяр уг хэрэгт холбогдсон тухай өчигдөр мэдээлсэн.
“Өдрийн сонин”-оос удахгүй болох баяр наадмын бөхийн таавар ямар байх талаар хэлэлцүүлэг зохион байгуулж, бөхийн мэргэжилтнүүд, бөх судлаачид, ахмад бөхчүүдийн саналыг сонслоо. Тэд энэ жилийн наадамд 1024 бөх зодоглохоороо ихээхэн онцлог болно гэдгийг юуны өмнө дурдаж байлаа. Монголын үндэсний бөхийн холбооноос энэ жилийн сар шинийн барилдаанаас хойш өнөөдрийг хүртэл найман удаагийн томоохон барилдааныг зохион байгуулаад байгаа аж. Эдгээр барилдаанд өнгөлсөн, сайн барилдсан, хамгийн сайн бэлтгэлтэй байгаа бөхчүүдийг наадамд тун дээгүүр барилдана гэсэн таамгийг дэвшүүлж байв.
Сүүлийн хагас сарын хугацаанд ам.долларын ханш буурсан үзүүлэлттэй байна. Өчигдөр найман шарга валютын зах болон арилжааны банкуудад нэг ам.долларыг 1950 төргөрөөр худалдан авч 1952 төгрөгөөр арилжиж байсан бол өнөөдрийн байдлаар нэг ам.долларыг 1946 төгрөгөөр худалдан авч 1950 төгрөгөөр арилжиж байна. Салбарын мэргэжилтнүүдийн зүгээс долларын ханшийг үргэжлэн буурах төлөвтэй хэмээн мэдээллээд байна. Түүнчлэн суларч буй ханшийг ам.долларын суурь эрэлт буурч, нийлүүлэлт өссөн, оны эхний дөрвөн сарын байдлаар төлбөрийн тэнцэл 200 сая ам.долларын ашигтай гарсан зэрэг үзэгдлүүдтэй холбон тайлбарлаж байгаа юм.
Монгол Улсын өдөр тутмын топ хэвлэл “Өдрийн сонин” өнөө жилийн наадмын бөхийн тухай хэлэлцүүлгийг зохион байгуулж байна. Энэ жилийн наадам Ардын хувьсгалын 95 жилийн тэгш ойтой учраас 1024 бөх зодоглох юм. Наадмын түрүү бөхөөр хэн тодрохыг бөхөд хайртай ард түмэн таамаглаж эхлээд байгаа. Залуу арслан Э.Оюунболд, П.Бүрэнтөгс нар 10 давж түрүүллээ гэхэд шууд даян аварга, С.Мөнхбат, Г.Эрхэмбаяр нарын аваргууд түрүүлбэл дархан аварга, заан Ч.Санжаадамба, харцага Ц.Содномдорж нар түрүүлбэл улсын аварга цол хүртэх өндөр магадлалтай байгаа юм.
Ирэх долоодугаар сарын 1-нээс Замын-Үүд өртөөнд түр хугацаагаар ачаа олгохгүй болжээ. Энэ талаар УБТЗ-ын дарга А-181 тоот тушаал гаргасан байна. Иймд тус боомтоор ачаа тээврийн үйл ажиллагаа явуулж буй иргэд, аж ахуйн нэгж, байгууллагууд эртнээс зохицуулалт хийх шаардлагатай байгаа аж.
Монголын рок поп урлагт өөрсдийн гэсэн байр суурийг хэдийнээ эзлэн залуусын зүрх сэтгэлийг эзэмдсээр байгаа “Камертон” хамтлаг фенүүддээ гэнэтийн бэлгээ задаллаа. Тэд энэ удаад бүх цомгууд Apple iTunes-д худалдаанд гаргасан байна.