Month: April 2016

“Нийтийн үйлчилгээний Улаанбаатар нэгтгэл” ОНӨААТҮГ 1,000, дүүргүүдийн тохижилт үйлчилгээний компаниуд нийт 2,500 улиасыг хэлбэржүүлж, хотын хэмжээнд нийт 3,500 мод бутанд тайралт хийлээ. Тайралт хэлбэржүүлэлт нь мод, бутны ургалтыг сайжруулах, залуужуулах ач холбогдолтой.

“Нийтийн үйлчилгээний Улаанбаатар нэгтгэл”-ийн Зүүн салбар өргөгч болон хог тээврийн 8 машинаар Энхтайваны өргөн чөлөө буюу зүүн 4 замаас Офицеруудын ордон хүртэл 476 улиас, 94 бутыг хэлбэржүүлж тайрсан.

Харин Баруун салбар Энхтайваны өргөн чөлөө, 5 шараас Саппоро хүртэл 480 улиасыг хэлбэржүүлэв.

Энэ долоо хоногоос мод бутыг хортон шавьжаас хамгаалах шоходойлтыг хийж эхэлсэн бөгөөд нийт 4,500 модыг шохойдоно.

Мөн нийслэлийн бүх гудамж талбайн зүлгийг самнаж цэвэрлэх, модны тогоо гаргах, мод сөөгийг услах ажил хуваарийн дагуу эхлээд байна гэж Улаанбаатар хотын Захирагчийн ажлын албанаас мэдээллээ.

Энэ жил Завхан аймагт Загастайн даваа буюу Улиастайгаас Тосонцэнгэл чиглэлийн 67 км, Цахир-Тосонцэнгэл чиглэлийн 127.1 км хатуу хучилттай авто замыг барих юм байна. Завхан аймгийг Улаанбаатар хоттой холбох хатуу хучилттай замын ажил дөрөвдүгээр сарын 18-нд эхлэх талаар албаны эх сурвалж мэдээллээ. Автозамын барилгын ажлыг гүйцэтгэхээр “Насны зам ” компани шалгарчээ.

Тооны хэлээр:

Зам Тээврийн яам Завхан-Улаанбаатарын замын ажлын тендерийг 2013 онд зарласан. Хүлээгдэж буй үр дүн 194,1 км. Ажлын явц: 51%. Ажлын нээлт: 2016 оны 4/18. Гүйцэтгэгч:“Насны зам”, “Хурдны зам” компаниуд. Хүлээн авах хугацаа: 2017 он.

Хаврын дунд сар гарч, гол мөрөн цөнгөө түрж эхэлжээ. Зарим газарт цас хайлаагүй, гол мөрөн баринтагаа тавиагүй мэт харагдах ч ийм үед гол, нуурын усан дээгүүр зорчиход хамгийн эрсдэлтэй байдгийг ОБЕГ-аас сануулж байна.

Дөрөвдүгээр сарын нэгдүгээр арав хоногийн байдлаар Монгол орны ихэнх гол, мөрөн, нуур битүү мөсөн бүрхүүлтэй боловч томоохон гол, мөрний адгаар мөс хайлжээ. Мөсөн дээгүүр ус урсах, мөс нимгэрэх, мөс харлах зэрэг үзэгдэл хаа сайгүй ажиглагдаж, мөсний зузаан дөрөвдүгээр сарын 1-ний өдрийнхөөс 10-40 см нимгэрч, мөс хэврэгшсэн байгааг мэргэжилтнүүд онцоллоо.

Цаашид цөн түрэх, цөнгийн хахаа ажиглагдаж, голын усны түвшин нэмэгдэх болно. Иймд ард иргэд мөсөн дээгүүр машин тэрэг, морь тэмээн уналгатай болон явган зорчихгүй байхыг санууллаа.

Нийслэлийн хэмжээнд авто тээврийн болон өөрөө явагч хэрэгслийн албан татвар, агаарын бохирдлын төлбөр, авто зам ашигласны төлбөр хураах ажлыг нэгдүгээр сараас эхлэн тавдугаар сарыг дуустал зохион байгуулж байна. Дөрөвдүгээр сард 4, 9 дугаараар төгссөн тээврийн хэрэгсэл эзэмшигчид татвараа төлөх журамтай бөгөөд өнгөрсөн гурван сард татвар, төлбөрт хамрагдаагүй тээврийн хэрэгсэл эзэмшигчийг илрүүлэн захиргааны арга хэмжээ авч ажиллаж байна. Нийслэлийн Татварын газрын өгсөн мэдээллээр 262.304 тээврийн хэрэгсэл эхний улирлад албан татварт хамрагдахаас 157.576 тээврийн хэрэгсэл хамрагджээ.

Улаанбаатар хотын цагдаагийн газрын Замын хөдөлгөөний аюулгүй байдлыг хангах хэлтсээс Улаанбаатар хотын замын хөдөлгөөнд оролцож байгаа тээврийн хэрэгслүүдэд татвар, төлбөрөө төлсөн эсэхэд тавих хяналт, шалгалтыг эрчимжүүлж, зөрчлийг илрүүлж, хуулинд заасан арга хэмжээ тооцох, албан татвар, төлбөр төлөөгүй замын хөдөлгөөнд оролцож буй тээврийн хэрэгслийг гудамж замд суурилуулсан теле камерын тусламжтайгаар илрүүлэх зэрэг ажлыг зохион байгуулан ажиллаж байна. Хураагдсан тээврийн хэрэгслүүдийн гэрчилгээг татварын албаны нэг цэгийн үйлчилгээгээр дамжуулан эргүүлэн олгох бөгөөд албан татвар, төлбөр төлөгчдөд хүндрэл, чирэгдэлгүй үйлчилгээ үзүүлэхээр ажиллаж байгаа юм.

Улсын бүртгэл, статистикийн газраас мэдээлснээр оны эхний улирлын байдлаар нийт 19043 эх амаржиж, 19141 хүүхэд төрсөн байна. Мөн энэ хугацаанд 4146 хүн нас баржээ. Эндээс хүн амын ердийн өсөлт таван хувьтай байгаа үзүүлэлт гарч байгаа аж. Энэ нь Монгол Улсын 1000 хүн ам тутамд таван хүнээр өсч буйг харуулж буй ажээ. Гэвч энэ тоо сүүлийн гурван жилийн үзүүлэлттэй харьцуулахад харьцангуй бага үзүүлэлт юм байна.

Энэ нь төрөлт буурсантай холбоотой бөгөөд өмнөх оны мөн үеийнхээс амаржсан эх 598 буюу гурван хувиар, хүүхдийн тоо 294 буюу 4.2 хувиар буурсан байна. Эхний улирлын байдлаар 427 хүүхэд энджээ. Энэ нь өмнөх оны үзүүлэлтээс 106 хүүхэд буюу 33 хувиар, тав хүртэлх насандаа 491 хүүхэд эндэж, 120 хүүхэд буюу 32.3 хувиар өссөн байна.

Он гарснаас хойш ХӨСҮТ-д 25355 халдварт өвчний тохиолдол бүртгэгджээ. Энэ нь өмнөх оны мөн үеийнхээс 16247 хүн буюу 2.8 дахин нэмэгдсэн үзүүлэлт юм. Үүний 15540 нь улаан бурхнаар өвчилсөн аж. Бусад төрлийн өвчин болох вируст хепатитаар өвчлөгчид 113 буюу 44.1 хувиар, тэмбүүгээр 435 хүн буюу 21.9 хувиар, сүрьеэгээр 136 хүн буюу 11.7 хувиар халдварт өвчнүүд харьцангуй бууралттай гарсан байна.