“Шийдлийн цаг”-ийн өнөөдрийн уулзалтад Монгол Улсын сайд, Засгийн газрын Хэрэг эрхлэх газрын дарга С.Баярцогт, тус газрын дэд дарга Г.Ганболд нар оролцлоо. Энэ үеэр Ерөнхий сайдын үүрэг даалгаврын биелэлт, үр дүнгийн талаар танилцуулсан юм. Тухайлбал, техникийн саатлын улмаас түр саатаад байсан баруун аймгуудын нислэгийг үргэлжлүүлэхээр болжээ. МИАТ компанийн “Боинг” онгоц энэ сарын 16-наас эхний нислэгээ хийхээр болжээ. Улаанбаатараас Ховдын чиглэлд “МИАТ” компани Бойнг-737 агаарын хөлгөөр зорчигч тээвэрлэнэ. Харин Ховдоос Увс, Баян-Өлгий аймгийн төвүүд рүү “Аэромонголиа” компани Фокер-50 онгоцоор зорчигчдод үйлчлэх юм байна.
Энэ оны гуравдугаар сард Ерөнхий сайд Ч.Сайханбилэг “Шийдлийн цаг”-аар Улаанбаатар цахилгаан түгээх сүлжээ компанид ажилласан. Энэ үеэр яригдсан “Шинэ холболт” төсөл энэ сарын 15-наас хэрэгжинэ. Үүний үр дүнд цахилгаанд шинээр холбогдох хугацаа хоёр хоёр дахин буурна, өөрөөр хэлбэл, 80 хоногт гүйцэтгэдэг байсан ажлуудыг 40 хоногт хийж гүйцэтгэнэ. Системд бүртгүүлсэн 411 мянган иргэний төлсөн НӨАТ-ын хоёр хувийг буцаан олгох ажлыг энэ сард зохион байгуулахаар бэлтгэл ажлыг хангаж байгаа аж.
Улаанбаатар хотын төв замууд болон Чингисийн талбайг 2013 оноос эхлэн тусгай зориулалтын автомашин ашиглан угаадаг болсон. Чингисийн талбайг долоо хоног бүрийн Мягмар, Пүрэв гарагт өглөөний 08.00-10.00 цагийн хооронд угааж байгаа бол Их тойруу, Бага тойруу, Нарны зам, Энхтайваны өргөн чөлөө, Чингисийн өргөн чөлөөний замыг оройн 23.00 цагаас өглөөний 06.00 цагийн хооронд 22 хүний бүрэлдэхүүнтэй баг цэвэрлэгээний тусгай зориулалтын 11 машин механизмаар угааж байна. 
Өнөөдөр өглөө Хууль зүйн байнгын хорооны хуралдаанаар АТГ-ын даргыг чөлөөлөх хүсэлтийг хэлэлцэж, одоогийн дарга Н.Ганболдыг чөлөөлөхийг дэмжсэн. Үүнтэй зэрэгцэн АТГ-ын дараагийн даргын асуудал хэвлэлийнхний гол сэдэв болжээ. Зарим хэвлэл мэдээллийн хэрэгсэл, цахимаар УИХ-ын гишүүн Х.Тэмүүүжинг АТГ-ын даргаар томилохоор хэлэлцэж байгаа талаар мэдээллээ.
Өнөөдөр Монголын телевизүүдийн холбооноос хэвлэлийн хурал хийлээ. Тус хурлаар тун удахгүй болох гэж байгаа АСЕМ болон Үндэсний их баяр наадам, сонгуулийн ажлыг хэрхэн дамжуулах талаар мэдээлэл өгсөн юм.
УИХ-ын гишүүн Х.Баттулгын сонгогдсон тойрог болох Баянхонгор аймгийн иргэдийн төлөөлөл бүхий 100 гаруй хүн түүнтэй уулзахаар иржээ. Өнгөрсөн даваа гаригт УИХ-ын гишүүн Х.Баттулгын байрласан Баянгол зочид буудалд цагдаа, тусгайгийнхны ажиллагаа явуулж, шалтгалт хийсэн билээ. Үүнээс үүдэн нутгийн иргэд нь УИХ-ын гишүүн Х.Баттулгыг баривчлах гэж байна гэсэн түгшүүртэйгээр хотод ирсэн ажээ. Иймээс ямар нэг эмх замбараагүй байдал үүсгэхгүйн тулд иргэдийн төлөөллийг УИХ-ын гишүүн Х.Баттулгатай уулзаж дуусах хүртэл Төрийн ордны гол хаалгаар хүн орохыг түр хязгаарлаад байна. 
Улсын Их Хурлын Аюулгүй байдал, гадаад бодлогын байнгын хорооны дарга М.Сономпил, Улсын Их Хурлын гишүүн Д.Дэмбэрэл, Ж.Энхбаяр, Засгийн газрын гишүүн, Батлан хамгаалахын сайд Ц.Цолмон нар Зэвсэгт хүчний Жанжин штабт ажиллав.
Шударга өрсөлдөөн хэрэглэгчийн төлөө газрын хуучин дарга нар нэгнийгээ жийлцэж эхэллээ. Тодруулбал, өнөөдөр тус газрын дарга асан Т.Аюурсайхан О.Магнайгийн эсрэг мэдээлэл хийлээ.
УИХ-ын Хууль зүйн байнгын хорооны хуралдааны цагийг сунган үргэлжлүүлж байна. Одоо тус байнгын хорооны хуралдаанаар Хууль сахиулах тухай болон холбогдох бусад хуулийн төслүүдийн анхны хэлэлцүүлгийг хийж буй юм.
АНУ-ын ерөнхийлөгчийн сонгуульд нэр дэвшээд буй бизнесмэн, тэрбумтан Дональд Трампын талаар “Huffingtonpost” сониныхон сонирхолтой зураглал хийжээ. Түүнийг дэлхийн улс орнуудын талаар ямар бодолтой явдаг талаар түүний хэлсэн үг, ярилцлагууд дундаас түүвэрлэн газрын зураг бүтээсэн байна. Энэ дунд манай улс ч багтсан бөгөөд тэрээр манай улсыг “Хятадтай төстэй улс” хэмээн үздэг талаараа нэг бус удаа ярьж байжээ. Түүнчлэн Монголыг “Азийн Мексик” хэмээн хэлсэн бөгөөд “Хятад улс тэднийг газар нутагтаа нэвтрүүлэхгүйн тулд Цагаан хэрмийг барьсан” гэсэн байна.