Month: April 2016

Улсын Их Хурлын Өргөдлийн байнгын хороонд ирүүлсэн өргөдөл гомдлын дагуу хоёр асуудлаар холбогдох албан тушаалтнуудаас тайлбар авах уулзалтыг өнөөдөр /2016.04.13/ Төрийн ордон дахь Нээлттэй сонсголын танхимд зохион байгуулав.

Энэхүү уулзалтад Улсын Их Хурлын Өргөдлийн байнгын хорооны дарга Ж.Батзандан, Улсын Их Хурлын гишүүн Д.Сарангэрэл, С.Ганбаатар болон Эрчим хүчний яам, Барилга хот байгуулалтын яам, Эрчим хүчний зохицуулах хороо, УБЦТС ТӨХК, Мэргэжлийн хяналтын ерөнхий газар, Шударга өрсөлдөөн хэрэглэгчийн төлөө газар, Барилгын хөгжлийн төв, Стандартчилал хэмжил зүйн газрын холбогдох албан тушаалтнууд, иргэдийн төлөөлөл оролцлоо.

Цахилгааны төлбөрийн суурь үнэ 2000 төгрөг гэв

Улсын Их Хурлын Өргөдлийн байнгын хорооны дарга Ж.Батзандан уулзалтын эхэнд тус байнгын хорооноос Монгол Улсын Их Хурлын тухай хуулийн 19.2.7 дахь хэсэгт заасны дагуу нийтийн эрх ашгийг хөндсөн чухал асуудлын хүрээнд өнөөдрийн уулзалтыг зохион байгуулж байгааг онцлоод “Монголын хэрэглэгчдийн эрх ашгийг хамгаалах нийгэмлэгүүдийн нэгдсэн холбоо” төрийн бус байгууллагын ерөнхийлөгч А.Ариунболд, Нийслэлийн Баянзүрх дүүргийн иргэн Д.Цэрэндолгор нараас ирүүлсэн өргөдлийн дагуу “Өрхийн цахилгааны төлбөрийг аж ахуйн нэгжийн тарифаар тооцож байгаа” талаарх гомдлыг хэлэлцэж эхлэв.

Орон сууц барьж буй зарим компани, иргэн оршин суугчдаас цахилгаан, эрчим хүчний төлбөрийг үйлдвэр, аж ахуйн нэгж, байгууллагын тарифаар тооцон авч хэрэглэгчдийг хохироож байгаа зөрчил тасралтгүй гарсаар байгааг уг уулзалтад оролцсон иргэд хэлж байлаа. Тодруулбал, 2015 онд 17500 өрхөөс 948.150.000 орчим төгрөгийг аж ахуйн нэгж, байгууллагын тарифаар тооцонжавсан байна. Энэ дагуу удаа дараа асуудал хариуцсан шат шатны байгууллагуудад хандаж, асуудлыг шийдвэрлүүлэхийг хүссэн боловч шийдэгдэхгүй байсаар өнөөг хүрсэн. Нэг өрх сард дунджаар цахилгааны төлбөрт 250-300 мянган төгрөг төлж байна гэж Нийслэлийн Баянзүрх дүүргийн иргэн Д.Цэрэндолгор хэлэв.

Мөн Улсын Их Хурлын гишүүн Д.Сарангэрэл Багахангай дүүргийн иргэдэд цахилгааны төлбөрийн асуудал хүндрэлтэй байдгийг тэмдэглээд 80 метр квадратаас дээш талбайтай орон сууцны цахилгааны төлбөрийн суурь үнэ гэж 15 мянган төгрөг авч байгаа талаар тайлбар өгөхийг хүслээ. Энэ асуултад Эрчим хүчний зохицуулах хорооны зохицуулагч Д.Батсайхан цахилгааны төлбөрийн суурь үнэ 2000 төгрөг байдгийг хэлээд 15 мянган төгрөг авах нь үндэслэлгүй болохыг хэлсэн. Тэрээр, иргэдээс аж ахуйн нэгж, байгууллагын тарифаар төлбөр авч байгаа нь тухайн орон сууцыг хариуцагч компаниудын үйл ажиллагаанаас хамааралтай. Тухайлбал, Үл хөдлөх хөрөнгийн гэрчилгээ, цахилгааны тэжээлийн нөөц кабельгүй, техникийн баримт бичгийн бүрдүүлэлт хангалтгүйгээс улсын комисс хүлээж авахгүйгээс дээрх хүндрэл үүсэж байгааг дурдав.

Айл өрхөд цахилгаан борлуулах тарифыг /НӨАТ-гүй/ ангиллаас нь хамааруулан төлбөр тооцох үзүүлэлтийн нэгжид багтаан энгийн тоолууртай хэрэглэгчийн иргэний сарын нийт хэрэглээ 150 кВт.ц хүртэл бол 79 төгрөг, сарын нийт хэрэглээ 151 кВт.ц болон түүнээс дээш бол 96.60 төгрөг байхаар тогтоосон бөгөөд 2013 оны 08 дугаар сарын 05-ны өдрөөс эхлэн мөрдөж байгаа юм байна. Харин 2 тарифт тоолууртай бол өдрийн хэрэглээ /өглөөний 06.00 цагаас шөнийн 21.00 цаг хүртэл/ 84 төгрөг, оройн хэрэглээ /оройн 21.00 цагаас өглөөний 06.00 цаг хүртэл/ төгрөг байдаг байна.

Үйлдвэр, аж ахуйн нэгж, байгууллагуудад цахилгаан борлуулах тарифыг хэд хэдэн ангиллаар тогтоосон байна. Жишээлбэл, уул уурхайн олборлох, боловсруулах аж үйлдвэрт энгийн оолууртай бол 155.90 төгрөг, бусад аж ахуйн нэгжийн энгийн тоолуурт 128.50 төгрөг, Улаанбаатар хот, аймгийн төвийн нийтийн зориулалттай зам талбайн гэрэлтүүлэгт улирал болон өглөө, оройн цагаас хамаарч 77.10-128.50 төгрөг байхаар зохицуулжээ.

Хэлэлцсэн асуудалтай холбоотойгоор оролцогчид асуулт асууж, санал хэлсний дараагаар холбогдох байгууллагуудад чиглэл өгөх байнгын хорооны тогтоол гаргахаар тотлоо.

Байнгын хорооноос холбогдох байгууллагуудад чиглэл өгөх тогтоол гаргахаар тогтов

Уг уулзалтаар хэлэлцсэн дараагийн асуудал нь Нийслэлийн Баянгол дүүргийн иргэн Л.Оюунбилэг, Баянзүрх дүүргийн иргэн Д.Мягмарсүрэн, Т.Мэндсайхан, Хан-Уул дүүргийн иргэн Л.Адьяацэрэн нарын иргэдээс “Шинээр худалдаж авсан орон сууцны талбай гэрээнд заасан хэмжээнд хүрэхгүй иргэдийг хохироож байгаа” тухай байв.

Шинээр орон сууц худалдан авсан иргэдэд учирч буй дийлэнх асуудал нь орон сууцны талбайн хэмжээ гэрээнд зааснаас дунджаар 6-8 метр квадратаар дутуу байна. Ингэснээр нэг өрхөд ойролцоогоор 15-23 орчим сая төгрөгийн хохирол учирч байгааг өнөөдрийн уулзалтад оролцсон иргэд хэлж байв.

Улсын Их Хурлын гишүүн Д.Сарангэрэл, орон сууцны талбайн хэмжээний талаарх стандарт мэдээллийг иргэдэд сурталчлах, таниулах арга хэмжээ авч ажиллах шаардлагатай байгааг холбогдох байгууллагуудын мэргэжилтнүүдэд анхаарууллаа. Мөн уг асуудлыг Байнгын хорооны тогтоолд тусгуулах саналаа илэрхийлсэн юм.

Ийнхүү байнгын хорооны гишүүд хэлэлцэж буй асуудалтай холбогдуулан өргөдөл гаргагч иргэн болон холбогдох албан тушаалтнуудаас асуулт асууж, тодруулсны дараа Байнгын хорооны дарга Ж.Батзандан Улсын Их Хурлын гишүүдийн саналыг тусган Байнгын хорооноос тогтоол гаргаж холбогдох байгууллагуудад чиглэл өгөх болно гэдгээ хэллээ хэмээн Улсын Их Хурлын Тамгын газрын Хэвлэл мэдээлэл, олон нийттэй харилцах хэлтсээс мэдээлэв.

Гадаад хэргийн сайд Л.Пүрэвсүрэн Монгол Улсад албан ёсны айлчлал хийж буй ОХУ-ын Гадаад хэргийн сайд Сергей Викторович Лавровыг хүлээн авч уулзлаа. Ганцаарчилсан уулзалтын үеэр Гадаад хэргийн сайд Л.Пүрэвсүрэн Сергей Викторович Лавровыг хүрэлцэн ирсэнд талархаж буйгаа илэрхийлээд “Олон жилийн найрамдалт харилцаа тогтвортой хөгжиж байгаа төдийгүй цаашдаа салбар бүрт тэгш хөгжинө гэдэгт итгэж байна” хэмээн хэлэв. Ганцаарчилсан уулзалтын дараа сайд нар албан ёсны хэлэлцээ хийлээ.

Ерөнхий сайд Ч.Сайханбилэгийн ахалдаг Ази, Европын дээд түвшний 11 дүгээр уулзалтыг зохион байгуулах, чиг үүргээр хангах Үндэсний зөвлөлийн 22 дугаар хуралдаан дөрөвдүгээр сарын 14-нд болж, Ази Европын Парламентийн түншлэлийн 9 дүгээр хуралдааны бэлтгэл ажлын явц, дээд түвшний уулзалтын үеэр ажиллах сайн дурынхны үйл ажиллагаа, “АСЕМ Вилла” цогцолборын тохижуулалтын ажил зэрэг мэдээллүүдийг сонсож хэлэлцлээ.

Улаанбаатар хотод дөрөвдүгээр сарын 21-23-нд болох Ази Европын Парламентийн түншлэлийн 9 дүгээр уулзалтад 32 орны 156 төлөөлөгч оролцохоор болсон байна. Уулзалтыг зохион байгуулах бэлтгэл хангагдсан гэж УИХ-ын Тамгын газрын Ерөнхий нарийн бичгийн дарга Б.Болдбаатар танилцуулав.

Мөн АСЕМ-ын дээд түвшний уулзалтыг шууд дамжуулах, гадаад, дотоодын сэтгүүлчид ажиллах “Хэвлэлийн төв”-ийн асуудлаар Европын өргөн нэвтрүүлгийн холбоотой хамтран ажиллах тухай саналыг сонсож хэлэлцлээ. Европын өргөн нэвтрүүлгийн холбоо нь 56 орны 73 байгууллагыг эгнээндээ нэгтгэсэн, телевизийн мэдээ, мэдээлэл, спортын арга хэмжээ, олон улсын хурал, чуулганыг олон улсад шууд дамжуулах чиглэлээр үйл ажиллагаа явуулдаг мэргэжлийн байгууллага юм. Тус холбоо нь 2010 онд Брюссель хотноо зохион байгуулагдсан АСЕМ-ын дээд түвшний 8 дугаар уулзалт, 2014 онд Миланд болсон АСЕМ-ын дээд түвшний 10 дугаар уулзалт, Лондонгийн зуны олимп, “Евровишн” хөгжмийн наадам зэрэг арга хэмжээний шууд дамжуулалт, хэвлэлийн төвийн техник, зохион байгуулалтыг хариуцан ажилласан туршлагатай аж.

Түүнчлэн, дээд түвшний 200 гаруй төлөөлөгч байрлах “АСЕМ Вилла” цогцолборын ногоон байгууламжийн ажилд БХЯ-ны харьяа Зэвсэгт хүчний жанжин штабын 100 гаруй цэргийн албан хаагч, ШУТИС-ийн 800 гаруй оюутныг оролцуулах бөгөөд тэдний дэмжлэгтэйгээр хотхоны 12 га газарт моджуулалт, зүлэгжүүлэлтийн ажлыг ирэх долоо хоногоос эхлүүлэхээр боллоо.

АСЕМ-ын Дээд түвшний уулзалтыг зохион байгуулах сайн дурын ажилд Монголын хөтөч тайлбарлагчдын холбоонд бүртгэлтэй 300 орчим иргэн болон 18 их, дээд сургуулийн 1100 гаруй оюутан залуус бүртгүүлсэн байна. Бүртгүүлсэн хүмүүсийг 4 чиглэлээр сургалтанд хамруулж, ялгах тэмдэг, хувцас, хэрэгслээр хангах бөгөөд тэдгээрийг удирдан зохион байгуулах түр штабыг Монголын хүүхдийн ордонд дөрөвдүгээр сарын 18-аас ажиллуулахаар болов.