Энэ долоо хоногийн баасан гарагаас эхлэн /22-24/-ний өдрүүдэд Улаанбаатар хотод болох Зуны олимпийн ХХХI наадмын чөлөөт бөх, сонгомол барилдааны сонгон шалгаруулалтын “The first “Last-Chance” тэмцээнд дэлхийн таван тивийн 81 орны баг оролцох мэдүүлгээ ирүүлсэн байна.
Тэмцээнд оролцохоор ирсэн гадаадын бөхчүүд Спортын төв ордон, “Чингис” зочид буудлын Бялдаржуулалтын танхим, “Говь ресорт” амралтын бэлтгэлийн төвд бэлтгэл сургуулилтаа хийж байна. Тухайлбал Спортын төв ордонд АНУ, БНСУ, Гондурас, Колумб, Молдав, Норвег, Украин, “Говь ресорт” амралтанд Казахстан, Латви, Финланд, Франц, Швед зэрэг нийтдээ хорь орчим орны ная гаруй бөхчүүд бэлтгэл сургуулилтаа хийж байна. Бөхчүүд өдөр бүр 10.00-12.00, 15.00-17.00 цагуудад бэлтгэл сургуулилтаа хийж байна. Мөн өнөөдөр 26 орны бөхчүүд ирнэ. ДБНХ-ны төлөөлөгчид дөрөвдүгээр сарын 21-ний өдөр манай нийслэлд бууна. Манай улсаас энэ тэмцээнд эмэгтэйчүүдийн 48 кг-д Ц.Намуунцэцэг, 75 кгд О.Бурмаа, эрэгтэйчүүдийн 97 кг-д Д.Хүдэрбулга нар барилдах юм.
Өчигдөр Япон улсын Нагано хотод 18 дахь удаагийн “Нагано марафон” олон улсын тэмцээнд болж өнгөрлөө. Тус тэмцээнд Монгол Улсын гавьяат тамирчин Б.Сэр-од 2:15:56 цагийн амжилтаар мөнгөн медаль хүртэж, аман хүзүүдлээ.
АСЕМ-ын дээд түвшний уулзалтын хүрээнд зохион байгуулах Ази, Европын парламентын түншлэлийн есдүгээр уулзалт энэ сарын 21,22-ны өдрүүдэд Улаанбаатар хотод болно. Уулзалтад өнөөдрийн байдлаар 23 орны 100 гаруй парламентын гишүүд оролцох төлөвтэй байгааг албаныхан хэлж байгаа юм. Эдгээр төлөөлөгчдөөс 3-5 орны УИХ-ын дарга болон зургаан орны УИХ-ын дэд дарга хүрэлцэн ирэх юм байна.
Нийслэлийн Удирдах ажилтнуудын ээлжит Шуурхай зөвлөлгөөн боллоо. Зөвлөлгөөнийг нийслэлийн Засаг дарга бөгөөд Улаанбаатар хотын Захирагч Э.Бат-Үүл удирдан явуулав. Зөвлөлгөөнөөр өмнөх хурал дээр өгсөн үүргийн биелэлтийг танилцуулж, нийслэлийн Засаг дарга цаг үеийн асуудлаар холбогдох байгууллагуудад үүрэг даалгавар өглөө. Мөн дүүргүүдийн Засаг дарга нар өнгөрсөн 14 хоногийн нөхцөл байдлаа танилцуулав. Өнгөрсөн 14 хоногийн хугацаанд Сонгинохайрхан, Чингэлтэй, Баянгол, Сүхбаатар, Хан-Уул, Налайх, Багахангай дүүрэгт гэмт хэргийн шинжтэй дуудлага мэдээлэл буурсан үзүүлэлттэй байгаа бол Баянзүрх, Багануур дүүрэгт өсчээ.
АН-ын ҮЗХ-ны гишүүд өнөөдөр хуралдахаар товлосон. Хурал 18.00 цагаас болох тухай мэдээлэл байна. Уг хурал энэ он гарснаас хойш хэдэнтээ тов зарлаад нэг ч удаа хуралдаж амжаагүй байгаа юм. Хамгийн сүүлд л гэхэд дөрөвдүгээр сарын 16-нд болно гэж Ерөнхий нарийн бичгийн даргын үүргийг түр орлон гүйцэтгэгч Л.Эрхэмбаяр мэдээлж байсан боловч өнөөдрийг хүртэл хойшлуулсан билээ. 
2016 онд Нийслэлийн замын сангийн хөрөнгө оруулалтаар хэрэгжүүлэх хотын авто зам, замын байгууламжийн засвар, арчлалтын ажлууд эхлээд байна. 2016 онд нийслэлийн гол гудамж талбайн засвар арчлалтын ажилд 3 тэрбум төгрөгийг төсөвлөсөн. Энэ онд замын сангийн хөрөнгө оруулалтаар нийслэлийн авто замын 69 гудамжны 17900 м2 талбайд нөхөөс, 23 гудамжинд 143800 урт метр хагарал засварын ажил /гагнаас/ хийнэ. Мөн авто замын тэмдэг тэмдэглэгээг 47 гудамжны 50000 м2 талбайд хийж, 9 байршилд гэрлэн дохио суурилуулж, 6 гүүр хоолой, туннелийг засварлахаар төлөвлөөд байна гэж Нийслэлийн Автозамын газраас мэдээллээ.
Монгол Ардын Намын Бага хурлын IV хуралдаан Тусгаар Тогтнолын Ордны Их танхимд эхэллээ. Энэ удаагийн Бага хурлаар Монгол Ардын Намын УИХ-ын сонгуульд оролцох мөрийн хөтөлбөрийг эцэслэн батлах, МАХН-тай сонгуульд хамтарч орох эсэх асуудлыг хэлэлцэх аж. Яг одоо МАН-ын Бага хурлын ирц 73 хувьтай, Бага хурлын гишүүдэд сургалт зохион байгуулах ажил хаалттай явагдаж байна. Үүний дараа МАХН-тай эвсэх эсэх асуудлыг хэлэлцэх юм байна.
МАХН-ын дарга Н.Энхбаяр өнгөрсөн сарын сүүлээр БНСУ руу эмчилгээгээ хийлгэхээр явсан билээ. Н.Энхбаярыг 7 хоногийн хугацаатай явсан гэсэн мэдээлэлийг намын нөхдүүд нь өгч байсан. БНСУ руу яваад 20 гаруй хоносон Н.Энхбаяр өнгөрсөн амралтын өдрүүдээр Монголдоо эргэн иржээ. Өнөөдөр МАН-ын Бага чуулганы IV хуралдаан болж, МАХН-тай эвсэх эсэхийг шийдэхээр болсон. Мөн АН-ын ҮЗХ-ны хуралдаан болох юм. Ирэх сонгуулийн чухал асуудлууд өнөөдөр шийдэгдэх гэж байгаа учраас тэрбээр эх орондоо ирсэн гэсэн мэдээлэл байна.
УИХ-ын гишүүн Х.Баттулга ард нь байдаг гэх Тусгаар тогтнол, эв нэгдлийн нам даргаа саяхан өөрчилсөн. Харин түүний залгамж халааг намаасаа гарсанаа мэдэгдсэн Г.Уянга гишүүн үргэлжлүүлэх нь гэсэн бор шувуу олны дунд ниссэн. Тэгвэл Улсын дээд шүүхийн Иргэний хэргийн танхимын шүүгчид Тусгаар тогтнол, эв нэгдлийн нам (ТТЭНН)-ын даргын өөрчлөлтийг бүртгүүлэх хүсэлтийг удахгүй хэлэлцэхээр төлөвлөжээ. Тэгэхээр энэхүү хүсэлтийг нь хүлээн авах, эсэх хурлыг удахгүй товлох юм байна. Ямартай ч МҮАН-аасаа гарч тус намын дарга болохоор зэхэж буй Г.Уянгын хүсэл удахгүй биелэх бололтой.
Номхон далайн дулаан урсгал Эль Ниногийн нөлөөллөөс үүдэн сүүлийн хоёр долоо хоногт Энэтхэгт цаг агаар хэт халж байна. Тус улсын Телингана, Андхра Прадеш зэрэг өмнөд мужуудад хэт халж байгаагийн улмаас олон арван хүн нас барсан талаар BBC агентлаг мэдээллээ.