Month: April 2016

Categories
онцлох-нийтлэл туслах-ангилал

Төрийн байгуулалтын байнгын хорооны хуралдаан өндөрлөлөө

Хууль зүйн байнгын хорооны өнөөдрийн
хуралдаанаар Төрийн албаны
тухай хуулийг хэлэлцэж санал дүгнэлтээ Төрийн байгуулалтын байнгын хороонд
хүргүүлсэн. УИХ-ын Төрийн байгуулалтын байнгын хорооны өнөөдрийн
хуралдаанаар Төрийн албаны тухай хуулийн шинэчилсэн найруулга болон Төрийн
албаны тухай хуульд нэмэлт өөрчлөлт оруулах тухай хуулийн төслийн анхны
хэлэлцүүлгийг хийх байсан ч хойшлууллаа. Уг
хуулийн төслийг боловсруулах үүрэг бүхий ажлын хэсгийг ахалж буй УИХ-ын гишүүн
Г.Батхүү тус төсөлтэй холбоотой гарсан саналыг нэгтгэх шаардлага байгааг
уламжлав. Ингэснээр уг хуулийн төслийн анхны хэлэлцүүлгийг ирэх долоо хоногт
хийхээр болов.

Үүний дараа нь Монгол Улсын Их хурлын чуулганы хуралдааны дэгийн
тухай хуульд нэмэлт өөрчлөлт оруулах тухай хуулийн төслийн анхны хэлэлцүүлгийг
хийж, санал дүгнэлтээ УИХ-ын Аюулгүй байдал, гадаад бодлогын байнгын хороонд
хүргүүлэх байсан ч мөн л хойшлууллаа. Хэлэлцүүлгийн
шатанд УИХ-ын гишүүн Х.Тэмүүжин “УИХ-ын дэгийн тухай хуулийг Засгийн газар
санаачлах нь хэр зохимжтой вэ” гэсэн асуудал хөндөгдөж, мөн энэ хүрээнд олон
зүйлийг нягтлах шаардлагатай хэмээн үзсэнээр дараа долоо хоногт энэ асуудлыг
үргэлжлүүлэхээр боллоо.

Categories
мэдээ спорт

Дэлхийн чөлөөт бөхийн холбооны ерөнхийлөгч маргааш Монголд ирнэ

Улаанбаатар хотноо энэ сарын 22-24-ний өдрүүдэд болох зуны олимпын ХХХI наадмын чөлөөт бөх, сонгомол барилдааны сонгон шалгаруулалтын “The first “Last-Chance” тэмцээн болох гэж буй. Дэлхийн таван тивийн 81 орны баг оролцох энэхүү тэмцээнд оролцохоор ирсэн гадаадын бөхчүүд Спортын төв ордон, “Чингис” зочид буудлын Бялдаржуулалтын танхим, “Говь ресорт” амралтын бэлтгэлийн төвд бэлтгэл сургуулилтаа базааж байгаа аж. Тухайлбал, Спортын төв ордонд АНУ, БНСУ, Гондурас, Колумб, Молдав, Норвег, Украины тамирчид, “Говь ресорт” амралтад Казахстан, Латви, Финланд, Франц, Швед зэрэг нийтдээ хорь орчим орны 80 гаруй бөх бэлтгэл сургуулилтаа хийж байгаа юм байна.

Мөн өчигдөр манай улсад 26 орны бөх ирсэн бол Дэлхийн бөхийн нэгдсэн холбооны төлөөлөгчид энэ сарын 21-нд манай улсад ирэх нь. Дашрамд сонирхуулахад, “RIO-2016” олимпын эрх авах чөлөөт, сонгомол бөхийн дэлхийн нэгдүгээр шатны тэмцээнийг нээхээр Дэлхийн чөлөөт бөхийн холбооны ерөнхийлөгч Лалович пүрэв гарагт буюу маргааш Монголд ирнэ.

Categories
мэдээ нийгэм

УИХ-ын гишүүн А.Тлейханы туслахад торгуулийн ял оноолоо

Нийслэлийн анхан шатны шүүхээс УИХ-ын гишүүн А.Тлейханы туслах Ш.Айдос нарын хэргийг хэлэлцлээ. Түүнийг хуурамч бичиг баримт үйлдэж залилангийн гэмт хэрэг хийсэн гэм буруутайд тооцож торгуулийн ял оноож байгаа юм. Түүнд Эрүүгийн хуулийн тусгай ангийн 148.2, 233.1-ээр буюу бусдаас их хэмжээний мөнгө залилсан, тамга, тэмдэг хуурамчаар үйлдсэн гэсэн зүйл заалтыг үндэслэн хөдөлмөрийн хөлсний доод хэмжээг 52 дахин үржүүлсэнтэй тэнцэх хэмжээний мөнгөн торгууль оногдуулсан байна. Ш.Айдос нь Монгол Улсын Ерөнхийлөгч, УИХ-ын дарга нарын нэрийн өмнөөс “Шинэ Монголын хөгжлийн төлөө” хэмээх төрийн бус байгууллагын үйл ажиллагааг дэмжиж, санхүүгийн дэмжлэг үзүүлнэ үү гэсэн утга бүхий хуурамч албан тоот үйлдэн “Оюу-толгой”, “Номин холдинг, “MCS”, “Жаст” групп, “Мобиком” корпораци, “Ган хийц”, Очир ундраа” компани зэрэг томоохон байгууллагад илгээжээ. Уг албан бичгийн хариуд “MCS” группээс гурван сая төгрөг, “Жаст” группээс нэг сая төгрөг тус тус авчээ. Ш.Айдосыг өнгөрөгч 2015 оны арванхоёрдугаар сараас эхлэн урьдчилан хорих ангид 44 хоног хорьсон тул дээрх мөнгөн торгуулиас тодорхой хувь нь хасагдаж байгаа аж.

Categories
энтертаймент-ертөнц

Сергей Лавровын жийнсэн өмдний талаар тайлбар хийв

Энэ сарын 14-ний өдөр ОХУ-ын Гадаад хэргийн сайд Сергей Лавров Монгол Улсад албан ёсны айлчлал хийхээр ирсэн. Тэрбээр онгоцноос буух үедээ жийнсэн өмдтэй буусан нь хүмүүсийн шүүмжлэлийг дагуулсан билээ. Түүнийг бага орнуудад хүндэтгэлгүй хандаж байна хэмээн гадны хэвлэлүүд ч бичсэн байв. Энэ талаар ОХУ-ын Гадаад хэргийн яамны хэвлэлийн төлөөлөгч Мария Захарова тайлбар хийсэн байна.

Мария Захарова “ОХУ-ын төлөөлөгчид шөнө онгоцонд хоносон. Монголд албан ёсны хэлэлцээ эхлэхээс өмнө зочид буудалд албаны хувцсаа сольж өмсөх төлөвлөгөөтэй байсан. Шөнийг онгоцонд өнгөрөөсний дараа костюмтай гарч ирнэ гэдэг сонин байх байсан. Ямар нэгэн буруу зүйл хийсэн гэж бодохгүй байна. Төлөөлөгчид хэлэлцээний өмнө зочид буудалд албаны хувцсаа сольж өмсөхөө мэдэж байсан. Бид хэнд ч үл хүндэтгэсэн байдал үзүүлэхийг хүсээгүй” хэмээн онцолжээ.

Categories
мэдээ нийгэм

Зочлох үйлчилгээний сургалт явуулна

“Найрсаг Улаанбаатар” хөтөлбөрийн хүрээнд аялал жуулчлал, зочлох үйлчилгээний салбарын зөвлөх мэргэжилтний сургалтыг жил бүр зохион байгуулдаг болсон. 2015 онд аялал жуулчлалын салбарын дээд шагнал “Үлисс”-ийн шагналт судлаач, Хонконгийн Политехникийн их сургуулийн Зочид буудал, аялал жуулчлалын тэнхимийн эрхлэгч, профессор Кайе Чон Улаанбаатар хотод хүрэлцэн ирж “Нийтийн үйлчилгээний чанар ба соёл” сургалтыг зохион байгуулсан.

Харин энэ жил ХБНГУ-ын Ахмад экспертүүдийн байгууллагын зөвлөх мэргэжилтэн, зочид буудлын салбарын 50 жилийн туршлагатай эксперт Хайди Диксон ирж, зочид буудлын үйлчилгээний мэргэшүүлэх цуврал сургалтыг энэ сарын 21-ний өдрөөс удирдан явуулах гэж байна. Маргаашийн сургалтад зочлох үйлчилгээний салбарын удирдлага, менежер, үйлчилгээний ахлах ажилтнууд хамрагдах ба “Шангри-Ла Улаанбаатар” зочид буудлын их танхимд эхэлнэ. Сургалтууд үнэ төлбөргүй юм байна.

Categories
онцлох-нийтлэл туслах-ангилал

“Оюутолгой” хоёр сая тонн баяжмал экспортолжээ

“Оюу толгой” компани 2016 оны эхний улирлын үйлдвэрлэлийн тайлангаа танилцууллаа. “Оюу толгой” ХХК-ийн гүйцэтгэх захирал Эндрью Вүдлэй “Аюулгүй ажиллагааг улам бүр сайжруулахын зэрэгцээ олон үзүүлэлтээр шинэ амжилт тогтоосон энэ улирлын үйлдвэрлэлийн тайлан нь манай хамт олны ур чадвар, хичээл зүтгэлийг илтгэж байна. Үйлдвэрлэл эхэлснээс хойш гурван жил гаруйхны хугацаанд хоёр сая тонн баяжмал экспортолсон нь бидний хэр хурдацтай өсч хөгжиж буйн нэг илэрхийлэл юм. Зах зээлийн нөхцөл байдал таагүй хэвээр байгаа ч “Оюу толгой”-н хамт олон тогтвортой, дэлхийд өрсөлдөхүйц зэсийн үйлдвэрлэлийг цогцлоох зорилгодоо хүрэхээр урагшилж байна. Энэ хүнд хэцүү цаг үед манай баг хамт олон гол зорилгодоо анхаарал төвлөрүүлэн ажиллаж, зардал бууруулах, бүтээмж нэмэгдүүлэх чиглэлд ахиц гаргаж буйд сэтгэл хангалуун байна” хэмээн цохон тэмдэглэжээ.

Энэ оны нэгдүгээр улиралд баяжуулах үйлдвэрт боловсруулсан хүдрийн хэмжээ өмнөх улирлаас 3.1 хувиар өсч улирлын дүнгээр өдөрт дунджаар 106,000 орчим мянган тонн хүдэр боловсруулав. Энэ улиралд боловсруулсан хүдрийн хэмжээ, хүдэр дэх зэсийн агуулга нэмэгдсэнтэй уялдан баяжмалын үйлдвэрлэл өссөн. Баяжмал дахь зэсийн хэмжээ өмнөх улирлаас 0.5 хувь нэмэгдэж, улирлын дээд түвшинд хүрчээ. Харин урьдчилан тооцоолж байсанчлан, алтны үйлдвэрлэл өмнөх улирлаас 30 орчим хувиар буурсан байна. Энэ нь нь хүдэр дэх алтны агуулга болон ил уурхайн хоёрдугаар үе шатны олборлолт дуусах дөхөж буйтай холбоотой гэнэ.

Тус компани алтны өндөр агуулга бүхий ил уурхайн хоёрдугаар үе шатны олборлолтыг эн энэ оны хоёрдугаар улиралд дуусгах төлөвтэй байгаа тул “Туркойз Хилл” компани 2016 онд 210,000–260,000 унц баяжмал дах алт үйлдвэрлэх төлвөө 255,000 – 285,000 унц алт болгон нэмэгдүүлжээ “Туркойз хилл” компани энэ онд “Оюу толгой”-гоос 175,000 – 195,000 тонн баяжмал дах зэс үйлдвэрлэх төлвөө хэвээр хадгалж байна гэж мэдээлэв.

Categories
мэдээ улс-төр

Төрийн албаны тухай хуулийг хэлэлцлээ

Хууль зүйн байнгын хорооны өнөөдрийн хуралдаанаар Төрийн албаны тухай хуулийг хэлэлцэж санал дүгнэлтээ Төрийн байгуулалтын байнгын хороонд хүргүүллээ. Хэлэлцүүлгийн үеэр УИХ-ын гишүүд хуультай холбоотой асуудлаар ийн санал хэлсэн юм.

УИХ-ын гишүүн Л.Болд:

-Төрийн албан хаагчын үйл ажиллагаанд хориглох зүйлс гэж зааж өгсөн байна. Үүнд албан үүрэгтэйгээ холбогдуулж нам, шашны үйл ажиллагаанд төрийн албаны хаагчийн хувьд оролцох, улс төрийн сонгуульт албан тушаал эрхлэх гэх мэт намын хууль, улс төрийн хуулийн заалтаар зохицуулах юмыг энд хольсон байна. Ингэх юм бол сайн дэвшил болж чадахгүй. Тиймээс энэ заалтыг хасах санал оруулж байна.

УИХ-ын гишүүн Х.Тэмүүжин:

-Надад гурван санал байна. Нэгдүгээрт, төрийн албан хаагчдад хариуцлагын ямар төрөл байх юм бэ гэдгийг тогтоож өгөхгүй бол бид иргэндээ хариуцлага тооцдог шиг торгох гээд байна. Эсвэл захиргааны хариуцлага тооцдог системээр баривчлах гээд байна. Төрийн албан хаагчдад цалингаас нь илүү торгууль оногдуулаад ирэхээр торгууль шийтгэлээ авлигаар аргал гэж байгаагаас ялгаагүй. Харин бусад улс орнуудад төрийн албан хаагчийг торгох биш, ил далд сануулах, цалингаас хувь хасах, албан тушаал тодорхой хугацаагаар бууруулах юм уу эсвэл бүр мөсөн бууруулах, халах, төрийн албанд эргэж орохгүйгээр халах гэх мэт олон хувилбар байдаг.

Хоёрдугаарт, албан тушаалтан, төрийн албан хаагчийг халдаг. Гэтэл нөгөө хүн нь шүүх дээр очоод маргаан үүсгэчихдэг. Ингээд зарим хэсэг нь эргэж томилогддог. Иймд маргаан шийдвэрлэж байгаа хуулиа нэг болгохгүй бол төрийн албан хаагчийг халж байгаа маргаан нэг бол Хөдөлмөрийн тухай хуулиар яваад нэг бол Төрийн албаны тухай хуулиар яваад холилдоод байна. Шүүх дээр ирсэн ихэнх маргааныг харахаар хөдөлмөрийн хуулийг барьж шийдсэнээс болж буцаад томилогдоод байгаа юм. Гэтэл үнэхээр ажил дээрээ хариуцлага алдсан уу алдсан, гэмт хэргийн шинжтэй үйлдлээр шалгагдаж байгаа юу шалгагдаж байгаа тохиолдол цөөнгүй бий. Тэгсэн атал шүүх дээр маргаан нь нотлогдоогүй байгаа учир буцаад энэ хүнийг томилох ёстой гэсэн шийдвэр гаргачихдаг. Гэхдээ гэмт хэрэг нь нотлогдоогүй учраас эргэж томилогдож байгаа учраас түүний гаргасан албаны зөрчил бол тусдаа хэрэг юм. Иймд Төрийн албаны тухай хуульд төрийн албан хаагч ажлаас чөлөөлөгдөх шалтгаанууд тодорхой байх ёстой. Харин гадаадын иргэн юм уу, онцгой авьяастай гэрээт албан хаагчдыг Хөдөлмөрийн хуулиар зохицуулах нь зүйтэй байх.

Гуравдугаарт, Төрөөс гарсан зардал мөнгийг буруутай нь тогтоогдсон албан тушаалтнаар төлүүлдэг систем тогтох гэж байна. Үүнтэй холбогдуулж төрийн албан хаагчдын буруутай үйлдлээс болж хохирсон иргэний хохирлыг барагдуулах нь тусдаа, хэрэг бүртгэгч мөрдөн байцаагч, шүүгч, прокурорын алдаатай шийдвэрийн улмаас хүн эрх чөлөөгөө хасуулаад эрүүл мэндээрээ хохироод явсан маргаан тусдаа. Энэ мэтчилэн маргаануудын тус бүрт нь зааглаж өгөх хэрэгтэй.

УИХ-ын гишүүн Ж.Батзандан:

-120 гаруй мянган хүнийг төрийн албан хаагч нэрээр нэг хашаанд шахаад илүү цагийн мөнгө ч өгдөггүй, хэн нэгэн албан тушаалтны дарангуйлалд байлгаж байдаг газар болгож хувиргасан. Төрийн албыг нийтийн захиргаа, нийтийн алба хэлбэр лүү явуулах чиглэлээр бодлого тодорхойлж үзсэн. Гэхдээ буцаад уламжлалт хэв маяг руу ирж байх шиг байна, энэ хуулийн төслөөр бол. Үүнийг сайн бодоорой. Өөрчилбөл өөрчилсөн шиг өөрчилмөөр байна. Жишээ нь, төрийн албанд орохын тулд намын харъяаллаас татгалзсан байна гэжээ. Намаас нэг өдрийн өмнө гараад жинхэнэ төрийн албан хаагч болж чадах уу. Сэтгэл зүйн шинэчлэл 3-5 жилийн дотор явагддаг юм. Бусад улс орнуудын жишгийг харахад сүүлийн таван жил улс төрийн албан тушаал хашаагүй, аль нэг намын гишүүнчлэлгүй хүнийг томилдог юм байна лээ. Тиймээс шинэчлэлийг хийвэл хийсэн шиг хийх хэрэгтэй. Эрүүл мэнд, боловсролын салбарт хүйсийн тэгш байдал алдагдсан. Дандаа эмэгтэй багш, эмч нар байна. Үүнийг хэрхэн зохицуулах юм бэ.

Categories
мэдээ нийгэм

Эрт үед шавьжууд ч том байсан

Эрт дээр үед зөвхөн үлэг гүрвэлүүд том байгаагүй аж. Одооны будаа шиг жижигхэн хэмжээтэй үлэмж хорхой шавьжнууд ч бас том хэмжээтэй байжээ. АНУ-ын Баруун дунд мужын Глейндейл хотын их сургуулийн эрдэмтэд “үлэмж биетийн” шалтгаан нь хүчилтөрөгч гэдэгт итгэлтэй байна.

Зарим нэг мэдээллээр, энэ амин чухал хий геологийн янз бүрийн үед нягтралын хүчтэй хэлбэлзэлтэй байжээ. Хүчил төрөгч 300 сая жилийн өмнө агаар мандлын 35 хувийг (өнөөдөр 21%) эзэлж байсан нь амьтан, хорхой шавьжийн хэмжээг том болгосон байлаа. Гэхдээ хамаг хорхой шавьж том байсангүй тэдний 10–20% нь үлэмж биетэй байсан аж. Тухайлбал, тэмээлзгэнэ 0,8 метрийн далавчтай байсан гэнэ. Хүчилтөрөгчийн үүргийг тогтоохын тулд эрдэмтэд 2,5 мм-аас 4 см-ийн хэмжээтэй өнөөгийн дөрвөн цог хорхойн анатомийг судалсан байлаа. Тэдний уушгиний гуурсан хоолойг онцлон судалсан байна. Хорхой шавьжны уушгины гуурсан хоолой нь бүх биеэр нь тарсан байдаг онцлоготой. Хүнд бол тэр нь ганцхан байдаг.

Бага биетээс томрох тусам гуурсан хоолойн хэмжээ нь 20 хувиар нэмэгдэж байжээ. Тэр хоолой нь тодорхой хэмжээнд хүртэл томроод цаашид өсдөггүй ажээ. Цох хорхойд гуурсан хоолой нь 15,2 сантиметраас илүү өсдөггүй. Өмнөд Америкийн Titanus giganteus гэдэг цох л одоо тийм хэмжээний гуурсан хоолойтой. Хүчил төрөгчийн төвшин нь нэмэгдэхээр бие нь өсдөг гэж эрдэмтэд дүгнээд балар эртний цагт шавьжууд том байсан гэжээ.

Categories
мэдээ нийгэм

Их Монгол Улсын гудамжны замыг өргөтгөнө

Ази, Европын дээд түвшний 11 дэх уулзалт 2016 оны 07 дугаар сард Улаанбаатар хотноо зохион байгуулахтай холбогдуулан нийслэлийн авто замын сүлжээг сайжруулах, зочид, төлөөлөгчид болон иргэдийн аюулгүй зорчих нөхцөлийг хангах, хотын өнгө үзэмжийг нэмэгдүүлэх зорилгоор авто замын 6 төсөл, арга хэмжээг хэрэгжүүлэхээр төлөвлөөд байна.

Эдгээр ажлын нэг болох Их Монгол Улсын гудамжны 2.1 км авто замын өргөтгөл шинэчлэлтийн ажлыг эхлээд байна. Уг замыг нийслэлийн төсвийн хөрөнгөөр “Эрдэнэ зам”, “Тотал инж” ХХК-иуд барьж байгаа бөгөөд ажлын явц 20 хувьтай байна.
Их Монгол улсын гудамж буюу Замын цагдаагийн баруун урд уулзвараас Маршалын гүүрийн урд уулзвар хүртэлх 2.1 км авто замын зорчих хэсэг нь одоо 9 метр өргөнтэй бөгөөд өргөтгөл шинэчлэлтийн ажлын хүрээнд авто замын зорчих хэсгийг 14 метр болгон өргөтгөж, замын 2 талаараа явган хүний замтай, нэг талаараа дугуйн замтай, гэрэлтүүлэг, борооны ус зайлуулах далд шугамтай, 4 эгнээ бүхий болгон шинэчлэх юм.

Уг ажлыг гэрээ ёсоор 2016 оны 06 дугаар сарын 30-нд ашиглалтад өгөх бөгөөд нийслэлийн Авто замын газраас 06 дугаар сарын 15-нд бүрэн дуусгахаар хуваарь гарган ажиллаж байна.

Замын өргөтгөлд 8 аж ахуйн нэгжийн барилгын түр хашаа болон гадна талбай, тохижилт орсон бөгөөд газар чөлөөлөлтийн ажил удаашрахгүй бол замыг хуваарийн дагуу ашиглалтад оруулахаар байгаа юм. Одоогоор нэг аж ахуйн нэгж хашаагаа чөлөөлжээ гэж гэж Нийслэлийн Авто замын газраас мэдээллээ.

Categories
гадаад мэдээ

Эквадорт амиа алдагсдын тоо 525 хүрчээ

Эквадорын Ерөнхий прокурорын газраас газар хөдлөлтийн улмаас амиа алдагсдын тоо 525 хүрсэн талаар мэдэгдсэнийг “РИА Новости” мэдээллэв. Газар хөдлөлтийн улмаас хохирогчдын дунд Колумбын 11, Кубын 3, Доминиканы Бүгд найрамдах улсын 1, Их Британи болон Ирландын 1, Канадын 2 иргэн тус тус байгаа аж.

Энэ сарын 16-ны орой Эквадорт 1979 оноос хойш анх удаа 7.8 магнитудын хүчтэй газар хөдлөлт болсон. Албан ёсны мэдээллээр, өнөөдрийн байдлаар 4000 гаруй бэртэж гэмтсэн хүн байгаа аж. Нийт 230 хүн ор сураггүй алга болсон бөгөөд тус улсад учирсан хохирол хэдэн тэрбум ам.доллараар үнэлэгдэх нь тодорхой болжээ.