Month: March 2016

Чингис зочид буудалд болсон “Өвчлөхөөс нь өмнө урьдчилан сэргийлье” уриатай өдөрлөгийн үеэр “Денк Фарм” компанийн Гадаад худалдаа эрхэлсэн захирал Франк Циммерманн хүндэт зочдын нэг байлаа. Түүнтэй цөөн хором ярилцсан юм.

-Монголд тавтай морил. Энэ удаад танайх ямар бүтээгдэхүүн үйлчилгээгээ танилцуулж байна вэ?

-Монголчууд “Денк Фарм” компанийг олон бүтээгдэхүүнээр маань танина. Энэ удаа Денк группийн зүгээс “Денк нутришн” хэмээх шинэ салбар охин компанийнхаа бүтээгдэхүүнүүдийг танил­цуулж байна. Орчин үед өвчилсөн хойно нь бус өвчлөхөөс нь өмнө урьдчилан сэргийлэх чиг хандлага хүчтэй болсон. Иймээс бие махбодын хэвийн ажиллагааг хангахад шаардлагатай олон амин дэм, микроэлементүүд агуулсан хүнсний нэмэлт бүтээгдэхүүнүүдийг бид танилцуулж байна.

-Эмийн зохисгүй хэрэг­лээ газар авсан тухай шүүмж­лэл өрнөж байна. Эм үйлдвэрлэгчийн хувьд танай компанийн зүгээс хэрэглэгчдээ хайрлах ямар философи хэрэгжүүлдэг вэ?

-Жороор олгодог эмийг эмчийн зааврын дагуу зөв хэрэглэх учиртай. Монгол болон зарим оронд эмийн санд ороод “Би даралтны эм авъя” гээд авчихаж болдгийг анзаарсан. Германд бол зөвхөн эмчийн бичсэн жороор л үйлчилнэ. Эмчийн жоргүй бол та яаж ч гуйгаад нэмэргүй. Герман компанийн хувьд эмийн зөв хэрэглээний энэхүү зарчмыг бүтээгдэхүүнээ экспортолж байгаа бүх улсдаа мөрдүүлэхэд хувь нэмрээ оруулж, хатуу баримтлахыг хичээж ажилладаг. Монголд байдал сайжирч байгаа. Антибиотикийг эмийн санд жоргүйгээр олгохоо больсон гэж сонссон. Энэ бол том дэвшил.

Нэг зүйлийг салгаж ойлгох хэрэгтэй. Хүнсний нэмэлт бүтээгдэхүүн эм хоёр маш том ялгаатай. Эмийн бүтээгдэхүүн эмчлэх зорилготой, найрлага, тун өндөр, огт өөр бүтээгдэхүүн. Эмийг зөвхөн жороор олгодог бол жоргүйгээр олгож болно гэсэн ангилалд хүнсний нэмэлт бүтээгдэхүүн багтдаг юм. Хүнсний нэмэлт бүтээгдэхүүн бие махбод хэвийн ажиллахад зайлшгүй шаардлагатай амин­дэм, эрдэс бодисыг агуулдаг.

-Монголчуудын хувьд маш олон хүнсний нэмэлт бүтээгдэхүүнтэй өнгөрсөн хугацаанд танилцлаа. Сүлжээний бизнесүүд ч маш их байдаг. Ихэнх хүмүүсийн хувьд ашигтай, тустай гэсэн бүхнийг идэж уусаар байгаад одоо хэр баргийн бүтээгдэхүүнд итгэхээ байсан болов уу. Ийм хүмүүст ямар арга замаар хүрэх вэ?

-Шинжлэх ухааны ул суурьтай судалгаа, нотолгооны үндсэн дээр эдгээр бүтээгдэхүүнийг үйлдвэрлэж, хэрэглэгчид хүргэж байгаа юм. “Денк фарм”-ын хувьд Монголын зах зээлд бүх бүтээгдэхүүн нь чанартай гэдгээрээ танигдсан. Энэ бүтээгдэхүүнийг хэрэглэсэн хүмүүсийн сэтгэл ханамж бүтээгдэхүүндээ итгэх итгэлийг маань улам нэмэгдүүлдэг. Энэ удаа нэвтрүүлж байгаа хүнсний нэмэлтийн гол онцлог гэвэл ихэнх бүтээгдэхүүн мөхлөг хэлбэртэй нунтаг байгаа. Усгүйгээр шууд хуурайгаар нь хэрэглэхэд тэр дороо маш хурдан шимэгдэнэ. Өөрөөр хэлбэл шимэгдэлт сайн, эмийн идэвхтэй бодисын тогтвортой чанарыг сайн хадгалсан, ходоодыг цочроохгүй гэх мэт хүнээ бодсон технологийн шийдлийг олсон гэсэн үг.

Жишээлбэл би маш их гүйдэг. Спортоор хичээллэх үед хүний биед зайлшгүй шаардлагатай байдаг магни хэвийн хэмжээнээсээ хөлсөөр 3-5 дахин алдагддаг. Ийм үед стресст орох, булчингаар хатгуулж өвдөх шинж тэмдгүүд илэрч эхэлдэг. Дутагдсан кальци, магнигаа гаднаас зайлшгүй нөхөх шаардлагатай. Энэ бүтээгдэхүүнүүд хүний эрүүл амьдралын хэв маягт зайлшгүй хэрэгтэй болж байгаа гэсэн үг.

-Монголчуудад өөр ямар бүтээгдэхүүнээ санал болгож байгаа вэ?

– Үений тэжээл гэгдэх “Joint active”, эр бэлгийн эсийн боловсролтыг сайжруулахад тустай “Fertilo forte”, дархлаа дэмжих “immune active” зэрэг бүтээгдэхүүнийг энэ удаа Монголд оруулж ирээд байна. Эдгээр бүтээгдэхүүнүүд нь сүүлийн үеийн технологиор хийгдсэн бөгөөд усаар даруу­лах шаардлагагүй, аманд шууд уусгаж хэрэглэдэг нунтаг хэлбэртэй гэдгээрээ онцлог.

Calcium active буюу усанд уусгаж хэрэглэх кальцийн бэлдмэл нь сүүлийн үеийн “Efferfescent technology”-иор хийгдсэн тул усанд уусангуутаа молекулын хамгийн жижиг бүтцэд задардаг учраас маш хурдан шимэгдэж хүрэх ёстой газраа очиж үйлчилдэг давуу талтай. Манайд өмнө нь эмчилгээний кальцийн бэлдмэл байсан бол энэ удаа хүнсний нэмэлт хэлбэрээр жирэмсэн болон хөхүүл үед хэрэглэх кальцийн бэлдмэлийг санал болгож байна.

“Immun active” гэсэн бүтээгдэхүүн байгаа. Үүнд селен, цайр гэх мэт дархлааг сайжруулах чухал элемент агуулагддаг. Ханиад томууг дарахад туслах төдийгүй селен нь хорт хавдрын эсрэг хаан элемент гэж нэрлэгддэг. Эд маань хүний биед зохистой хэмжээгээр байж элдэв өвчнөөс урьдчилан сэргийлэх боломжтой.

-Германд зарагддаг бүтээгдэхүүнүүд гэж та хэлсэн. Харьцангуй өндөр үнэтэй бүтээгдэхүүнийг Монголын хөрсөнд яаж буулгах вэ?

-Таны хэлсэнчлэн Германд арай илүү үнэтэй байгаа. Гэхдээ ямар ч байсан Монголын хэрэглэгчдэд герман чанарыг боломжийн үнээр олгож байгаа гэдгээ итгэлтэй хэлье.

-Залуу ээж, аав нарын хувьд элдэв төрлийн витаминаас татгалзаж, хоол хүнснээсээ шаардлагатай шим тэжээлээ авах ёстой гэсэн хандлагатай байдаг. Тэдэнд та юу хэлэх вэ?

-Бодит байдал дээр таны хэлсэнчлэн хоол хүнснээсээ шаардлагатай бүх шим тэжээлээ авчихдаг бол сайн хэрэг. Ингэхийн тулд маш олон нэр төрлийн хоолыг их хэмжээгээр идэх шаардлагатай болно. Гурван хүүхдийн аав хүний хувьд хүүхдүүдээсээ амин дэмээр баялаг салат идэхийг гуйгаад үнэхээр дийлдэггүй. Залуу үеийнхэн маань макдональдс зэрэг түргэн хоол иддэг болохоор бие махбодод шаардлагатай аминдэмийг хангалттай авч чаддаггүй. Бид ийм хэв маягаар амьдарч байгаа учраас шаардлагатай шим тэжээлийг зайлшгүй нэмэлтээр авах болдог. Хүнсний нэмэлт гэж нэрлэгдсэн учир нь энд бий.

Шаардлагатай нэмэлтийг авч чадахгүй л бол таны биед ямар нэг юм болохоо байчих гээд байдаг. Заримдаа амин дэмээр баялаг хоол хүнс хэрэглээд ч хангалтгүй байх үе бий. Жишээ нь жирэмсний эхний гурван сард ургийн тархи, мэдрэл хөгжихөд зайлшгүй шаардлагатай элемент бол фолийн хүчил байдаг. Та юу ч идээд үүнийг хангалттай хэмжээгээр авахгүй учраас фолийн хүчил агуулсан бэлдмэлийг жирэмсэн эхчүүд хэрэглэдэг. Бас нэг жишээ гэвэл өвлийн улиралд нарны гэрэл хангалттай биш учраас Европт хүн бүр өвлийн цагаар Д аминдэм агуулсан бэлдмэл хэрэглэцгээдэг.

-Ингэхэд юу та бүхнийг Монголд ирэхэд хүргэсэн бэ?

-Манай компанийн хувьд Монголд ажиллаад удаж байгаа учраас олон жилийн өмнөх түүхийг сөхөх нь. Компанийн үүсгэн байгуулагч 1998 онд анх Монголд зочилж ирсэн гэдэг. Зүгээр л аялж явсан түүнд яагаад ч юм Монгол маш их таалагдсан гэсэн. Ирэнгүүтээ Монголын зах зээлд очиж ажиллана гэсэн шийдвэрийг гаргаад ажилласан. Монголчуудын гайхалтай зочломтгой зан миний сэтгэлийг үргэлж татдаг. Түүнчлэн манай компани олон улсын зах зээлд ажилладаг компани. Дэлхийн 70 гаруй оронд бүтээгдэхүүнээ экспортолдог. Миний ирэх дуртай газрын нэг Монгол учраас монголчуудад шинэ бүтээгдэхүүнээ хүргэхээр ажиллаж байна.

Түрээсийн орон
сууцны бүртгэлд хамрагдах хүсэлтэй иргэдийг өнөө өглөөнөөс бүртгэж эхэлсэн
бөгөөд яг одоо бүртгэлд хамрагдах хүсэлтэй иргэд ТОСК-ийн байрны гадаа
дугаарлаж байна.

Гэрэл зургийг Ц.МЯГМАРСҮРЭН

Монгол Улсын Соёлын гавьяат зүтгэлтэн, Ардын билиг зүйч Жамцын Бадраагийн мэндэлсний 90 жилийн ой тохиож байгаа билээ. Ойн хүрээнд өнөөдөр ГХЯ-ны дэргэд байрлах “Халуун элгэн нутаг” дууны хөшөөнд хүндэтгэл үзүүлж, цэцэг өргөлөө. Ёслолд Ж.Бадраа агсны үр хүүхэд, найз нөхөд болон Ардын жүжигчин Л.Цогзолмаа, Соёлын гавьяат зүтгэлтэн Д.Ухнаа, Төрийн хошой шагналт хөгжмийн зохиолч Н.Жанцанноров нар оролцсон юм.

Ж.Бадраа нь 1926 онд Хөвсгөл аймгийн Бүрэнхаан сумын нутагт Жамцын ууган хүү болон мэндэлсэн бөгөөд монгол ардын дуу, хөгжмийн түүх, уламжлал угсаатны зүйн чиглэлээр 60 гаруй шүүмж өгүүлэл бичиж хэвлүүлжээ. Түүний зохиосон 300 орчим дуу байдгаас “Халуун элгэн нутаг” дуу нь ХX зууны манлай дуугаар тодорч байсан юм. Ж.Бадраа агсны мэндэлсний 90 жилийн ойн хүрээнд түүний уран бүтээлийг хүүхэд, залуу үеийнхэнд сурталчлах, түгээн дэлгэрүүлэх, өвлүүлэх арга хэмжээг Хөвсгөл аймгийн болоод улсын хэмжээнд зохион байгуулж эхэлсэн байна.

Түрээсийн орон сууцын бүртгэлд хамрагдах хүсэлтэй иргэдийг өнөө өглөөнөөс бүртгэж эхэлсэн. Өнөөдөр болон маргааш “Буянт Ухаа I” хороололд зарлагдсан түрээсийн орон сууцад орох хүсэлтэй иргэд бүртгүүлэх юм. Өчигдөр өглөөний 09.00 цагаас эхлэн иргэд ТОСК-ийн үүдэнд дугаарлаж, зарим нь шөнө машиндаа сахиж хоножээ. Мөн зарим иргэд үүрийн 05.00 цагт ТОСК-ийн үүдэнд ирж, дугаарласан байна. Харин бүртгэлийн ажил өглөө 08.30 цагт эхэлж иргэдийг дарааллын дагуу бүртгэж буй ч бүрдүүлэх бичиг баримт дутуу гэх шалтгааны улмаас эргэж буцан арын иргэддээ хүлээлт үүсгээд байгаа аж. Бүртгүүлэхээр ирсэн ахмадууд бухимдалтай байгаа ба тэд хэлэхдээ “ТОСК ямар ч зохион байгуулалтгүй ажиллаж, иргэдэд хүндрэл учруулж байна. Өглөө эрт ирж дугаарласан иргэдийг дугаарынх нь дагуу оруулах ёстой. Гэтэл өчигдөр дугаар авч нэрээ бичүүлсэн гэх хүмүүс гарч ирээд байгаа учир эмх замбараагүй байдал үүсч, урдуур дайрах тохиолдол гараад байна. Мөн журамд заагаагүй өөр олон бичиг баримт шаардаж байна.” гэлээ.

Энэ талаар ТОСК-ийн тэргүүн дэд захирал Д.Алтанхуягаас тодрууллаа. Тэрээр хэлэхдээ “Бид өмнө нь мэдэгдэл хийхдээ бүртгэлийн өмнөх өдөр нь ирж хонож дугаарлахгүй байхыг ахмадуудаасаа хүссэн. Байгууллагаас зохиож буй ажилд дэг журамтай оролцвол богино хугацаанд олон хүн бүртгэх боломжтойгоо ч хэлсэн. Харин ахмадууд маань дур мэдэн өөрсдөө дугаар бичиж, дугаарлахаар ирсэн иргэдэд бид өмнө нь дугаар авчихсан байсан гэх мэт зөрчилдөөн үүсгээд байна. Бидний зүгээс иргэддээ ирээд бүртгүүл, хэрвээ энэ хоёр өдөртөө бүртгүүлж амжихгүй бол дахин хоног гаргаж бүртгэж өгнө гэж хэлж байгаа. Дээрээс нь энэ ажлыг санаатайгаар, зохион байгуулалттайгаар үймүүлэх гэсэн хэд хэдэн тохиолдол гарсан. Харин бичиг баримтын асуудлын хувьд журмын дагуух бичиг баримт шаардаж байгаа. Гэвч хорооныхоо тодорхойлтыг зөвхөн иргэн Дорж гээд өөрийнхөө нэр дээр л бичүүлж авч ирэх гэх мэтээр буцаагдаж байгаа. Тухайн хаяг дээр бүртгэлтэй байдаг бусад хүмүүсийнхээ ч тодорхойлолтыг авчрах ёстой. Жишээлбэл, магадгүй нэг гэрийн хүмүүс аав нь өндөр настанаар, ээж нь хувийн хэвшлээр, хүргэн нь төрийн албан хаагчаар гэх мэт энэ долоон бүлгээр зэрэг ороод ирэх магадлал их байгаа учраас бид тухайн хаяг дээр бүртгэлтэй иргэн бүрийн мэдээллийг авах шаардлагатай байгаа юм. Нэг өрх бол нэг л байрыг түрээслэх учиртай.” гэв.

Бүртгэл яг одоо ТОСК-ийн байранд үргэлжилж байна.

Ж.ХУЛАН