Month: March 2016

“Гэртээ харих зам” хөтөлбөрийг хэрэгжүүлэх ажлын хүрээнд Сүхбаатар дүүргийн нутаг дэвсгэрт тэнүүчлэн амьдарч буй гэр оронгүй, тэнэмэл амьдралтай иргэдээ бүртгэлжүүлэн, нөхцөл байдлын үнэлгээ хийх ажил өнөөдрөөс эхлэн Цагдаагийн нэг, хоёрдугаар хэлтсүүдэд явагдаж байна.

Дээрх ажлыг Засаг даргын Тамгын газар, 1-20 дугаар хороодын ажлын алба, Нийгмийн Халамж үйлчилгээний хэлтэс, Цагдаагийн хэлтсүүд, Бүртгэлийн хэлтэс, дүүргийн Эрүүл мэндийн төв, хорооны ӨЭМТ-үүд, Хүүхэд гэр бүл хөгжлийн төв хамтран зохион байгуулж байгаа юм.

Өнөөдөр тус ажлын хэсгийн дарга, дүүргийн Засаг даргын орлогч Л.Нармандах холбогдох мэргэжилтнүүдийн хамт бүртгэлжүүлэх ажлын явцтай газар дээр нь танилцаж, “…бүртгэлжүүлэх нь эхний ажил, цаашид энэ иргэдээ нийгэмшүүлэх тал дээр түлхүү анхаарч ажиллах тул нөхцөл байдлын үнэлгээгээ маш сайн хийх хэрэгтэй” гэж зөвлөлөө.

Нийслэлийн Засаг даргын захирамжийн дагуу нийслэлд бүртгэлтэй бүх төрлийн автотээврийн болон өөрөө явагч хэрэгслийн албан татвар, агаарын бохирдлын төлбөр,автозам ашигласны төлбөр хураах ажлыг хуулийн дагуу 2016 оны 1 сараас эхлэн 5 сарыг дуустал зохион байгуулж байна. Нийслэлийн татварын газраас өгсөн мэдээллээр 1,2 дугаар сард нийслэлийн 9 дүүргээс нийт 62,350 авто тээврийн болон өөрөө явагч хэрэгсэл албан татварт хамрагджээ.

Автотээврийн үндэсний төвийн мэдээллээр 2016 оны 2 дугаар сарын 29-ны байдлаар Монгол Улсад нийт 795 754 тээврийн хэрэгсэл бүртгэлтэй байгаагаас нийслэлд 469 335 тээврийн хэрэгсэл бүртгэлтэй байгаа юм. Мөн тус газрын мэдээгээр сүүлийн 4 жилд татвар төлөөгүй, техникийн үзлэгт хамрагдаагүй, шилжилт хөдөлгөөн хийгээгүй 95 770 тээврийн хэрэгсэл байгаа бөгөөд эдгээр тээврийн хэрэгслийг олон нийтэд мэдээлж улсын бүртгэлээс хасахаар төлөвлөжээ. Судалгаанд хамрагдсан 95 770 тээврийн хэрэгслээс 1-р дүгээр сард 501, 2-р дугаар сард 213 тээврийн хэрэгслийг өмчлөгчийн хүсэлтийн дагуу улсын бүртгэлээс хассан байна. Хэрвээ тээврийн хэрэгсэл эзэмшигч нь олон жил татвараа төлөөгүй, үзлэг оношилгоонд хамрагдаагүй бол Автотээврийн үндэсний төвд хандан тээврийн хэрэгслээ бүртгэлээс хасуулах, эсвэл албан татвар төлбөрөө барагдуулан бүртгэлээ эргэн сэрээх боломжтой гэж Нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээллээ.

Сүүлийн үед золбин болон гэрийн тэжээвэр ноход иргэдэд халдсан тохиолдол ихсэх хандлагатай байна. Энэ сарын 16-ны өдөр Хан-Уул дүүргийн 6 дугаар хорооны иргэн Г-ийн нохой тус хорооны иргэн А-ийн зүүн гар хөлийг хазаж гэмтээсэн, Сонгинохайрхан дүүргийн 24 дүгээр хорооны иргэн Б-ын “Дундад Ази” үүлдрийн нохой тус хорооны иргэн Г-ын мөр, гуяыг хазаж гэмтээсний улмаас хохирогч Гэмтэл согог судлалын үндэсний төвийн Эрчимт эмчилгээний тасагт хэвтэн эмчлүүлж байгаад амь насаа алдсан харамсалтай тохиолдол гарсан. Тиймээс иргэдэд дараах зөвлөмжийг хүргэж байна. Үүнд:

• Хашаандаа нохойтой тохиолдолд өдрийн цагаар нохойг сул тавихгүй байх
• Хаалга, хашаандаа анхааруулсан таних тэмдэг заавал байршуулах
• Мал эмнэлэгт бүртгүүлэх, тогтмол вакцинд хамруулах
• Зохих хамгаалалт буюу хошуувч, хүзүүвчтэй байлгах шаардлагатайг анхааруулж байна.

Эрдэнэт үйлдвэрийн Дулааны станцыг өргөтгөл хийхээр болсон. Тус өргөтгөлийн ажил нь 12.5 мегаватын дөрвөн труба генератор буюу үндсэндээ 50 мегаваттын цахилгаан үйлдвэрлэх төсөл аж. Уг төслийг хэрэгжүүлэхээр Эрдэнэт үйлдвэр БНХАУ-ын Харбины Интернейшнл компанитай гэрээ байгуулан ажиллаж эхэлжээ. Түүнчлэн Дайлин хотын институтад зураг төслийг нь хийж дуусчээ.

Одоогийн байдлаар байгаль орчны нарийвчилсэн үнэлэгээ хийгдэж байгаа бөгөөд бичиг баримтын ажил үндсэндээ ирэх сарын 1 гэхэд дуусах юм байна. Төслийн ерөнхий инженер Пин та У Эрдэнэт үйлдвэрийн Ерөнхий захирлын үйлдвэрлэл эрхэлсэн орлогч Д.Даваасамбуу болон бусад холбогдох цех нэгжийнхэнтэй уузлалт хийжээ.

Ойрын үед маркетингийн мэргэжилтнүүд нь ирж ажиллах гэнэ. Уг төслийг хэрэгжүүлснээр Эрдэнэт үйлдвэр цахилгаан хэрэглээний төлбөрийн хэмжээ буурна гэж үзэж байгаа аж. Сүүлийн гурван жилд манай компанийн цахилгааны зардал үнийн өсөлтөөр шалтгаалан 67 хувь өссөн байна. 2015 онд компанийн цахилгаан зардал гурван тэрбумаар нэмэгдэж, жил дунджаар 10 гаруй тэрбум төгрөгийн төлбөр хийдэг болсон.

Тэр утгаараа энэ ажлыг эхлүүлэх нь цагаа олсон тун ажил чухал ажил болж байгааг Үйлдвэрлэл эрхэлсэн орлогч Д.Даваасамбуу онцоллоо. Ирэх сарын 1-ээс газар шорооны ажил эхлэх бөгөөд өнөөдөр төслийн ажиллагсдын байрлах орон сууцны тухай хэлэлцэж, мөн ажлыг хурдавчлах, илүү тодорхой болгох талаар хэлэлцжээ.

Дорноговь аймгийн Даланжаргалан сумын нутагт дахь Их нартын
байгалийн нөөц газарт 1990-ээд оны сүүлчээр 300 гаруй аргаль угалз байсан
бол өнөөдөр 1000 гаруй болж үржсэн байна.

Орон нутгаас Их нартын байгалийн нөөцийн тусгай хамгаалалттай
газар нутгийг хамгаалах хамгаалалтын захиргааг 2013 онд Даланжаргаланд шинээр
байгуулж, төсөв хөрөнгийг нь баталж өгснөөр байнгын ажилтнуудтай болж байгаль
хамгаалах, ялангуяа аргаль угалзыг хамгаалах чиглэлээр хийсэн ажлууд
тодорхой үр дүнд хүрчээ.

Их нартын байгалийн нөөц газар нь тус аймгийн Даланжаргалан,
Айраг сумын нутгийг хамарсан 50 орчим мянган га газар бөгөөд байгалийн өвөрмөц
тогтоц бүхий аргаль, янгирын өсч үржих тааламжтай нөхцөл бүрдсэн газар нутаг
хэмээн судлаачид дүгнэдэг.

Монгол хүн сансарт ниссэний 35 жилийн ой өнөөдөр тохиож байна. Монгол Улсын иргэн, сансрын нисгэгч Ж.Гүррагчаа, ЗХУ-ын сансрын нисгэгч В.А Жанибековын хамтаар 1981 оны гуравдугаар сарын 22-ны өдрийн 14.58 цагт хуучнаар ЗХУ-ын Байконуур дахь сансрын хөлөг хөөргөх талбайгаас “Союз-39” хөлгөөр хөөрсөн гэдэг.

Тэд сансарт нийт найман өдрийн турш дэлхийг 124 удаа тойрч, гуравдугаар сарын 30-нд эх дэлхийдээ амжилттай газардсан аж. Энэхүү тэмдэглэлт үйл явдал нь Монгол Улс сансрын уудамд техникээ гаргаж туршсан дэлхийн тав дахь орон, сансрын судалгааны төхөөрөмж бүтээж, нислэгийн явцад ашигласан 20 дахь орон, өөрийнхөө сансрын нисгэгчийг нисгэсэн дэлхийн арав дахь орон болж, түүхэнд нэрээ мөнхөлсөн байдаг.

Шинэчлэлийн Засгийн газраас 2012 онд хэрэгжүүлсэн “Нүүрс” хөтөлбөрөөс их хэмжээний мөнгө хувьдаа завшиж шамшигдуулсан хэргээр Л.Гансүх нарын гурван хүнд холбогдох хэргийг хоёр шатны шүүхээс шийдвэрлэсэн байгаа. Харин тэд дараагийн шатны шүүх бол Дээд шүүхэд хандсан ч хэргийг хэлэлцэлгүй 14 хоногоор сунгасан. Энэ нь нэлээд маргаан дэгдээсэн юм. Тэгвэл эл хэргийг шүүх хурал маргааш Дээд шүүхийн эрүүгийн хэргийн танхмын шүүхэд болно. Дашрамд дуулгахад, Л.Гансүхэд 3,6 тэрбум төгрөг завшсан гэх үндэслэлээр анхан болон давж заалдах шатны шүүхээс 4.6 жилийн хорих ял оноосон билээ.