Month: March 2016

Өнөөдөр баруун зүгийн нутгаар, 23-нд төв болон говийн нутгаар ахиухан
хэмжээний нойтон цас орохыг анхаарууллаа. 23-нд төвийн нутаг, говийн нутгийн
зарим газраар, 24-нд Хангай, Хөвсгөлийн уулсаар, 26-нд нутгийн хойд хэсгээр хур
тунадас, нойтон цас орно.

Салхи 23-нд зүүн зүгийн нутгаар, 26-нд зарим газраар секундэд 12-14
метр хүрч ширүүснэ. Завхан голын эх, Увс нуурын болон Дархадын хотгор, Идэр,
Тэс голын хөндийгөөр шөнөдөө 13-18 градус, өдөртөө 4-9 градус, Хэнтэйн уулархаг
нутаг, Тэрэлж, Хэрлэн, Халх голын сав газраар шөнөдөө 9-14 градус хүйтэн,
өдөртөө 3 градус хүйтнээс 2 градус дулаан, говийн бүс нутгийн өмнөд хэсгээр
шөнөдөө 1-6 градус хүйтэн, өдөртөө 7-12 градус дулаан, бусад нутгаар шөнөдөө
5-10 градус хүйтэн, өдөртөө 2-7 градус дулаан байна. Харин гуравдугаар сарын
сүүлчээр дулаарна гэж Ус цаг уур орчны шинжилгээний газраас
мэдээллээ.

Нийслэлийн удирдлагын зөвлөлийн ээлжит хуралдаан “Нийслэлийн үйлчилгээний нэгдсэн төв”-д боллоо. Хуралдаанаар Нийслэл, дүүргийн хөрөнгө оруулалтаар хийгдэх ажлын гүйцэтгэлийг сайжруулах, нэгдсэн хяналтын тогтолцоонд шилжүүлэхтэй холбогдуулан Нийслэлийн худалдан авах ажиллагааны газар, Хөрөнгө оруулалтын газар, Авто замын газруудын гүйцэтгэгч байгууллагуудтай харилцах үйл ажиллагааг “Нийслэлийн үйлчилгээний нэгдсэн төв”-д төвлөрүүлэн Нийслэлийн худалдан авах ажиллагааны танхим байгуулах, Эзэнгүй нохой, муур устгалын ажлын зардлыг шинэчлэх асуудлыг хэлэлцлээ.

Нийслэлийн үйлчилгээний нэгдсэн төвд “Нийслэлийн худалдан авах ажиллагааны танхим”-ыг байгуулснаар Худалдан авах ажиллагаа, Хөрөнгө оруулалт, Авто замын газар гүйцэтгэгч байгууллагуудтай төсөл, хөтөлбөр дээр хамтран ажиллахдаа хүсэлт хүлээж авахаас эхлээд гүйцэтгэгчийг сонгон шалгаруулах хүртэл худалдан авах ажиллагааны бүх үйл явц тус танхимд нээлттэй явагдах юм. Тус үйл явцыг хуульд нийцүүлэн зохион байгуулахаар холбогдох журам гаргаж, ирэх даваа гарагийн нийслэлийн удирдлагын зөвлөлийн хуралдаанаар хэлэлцэхээр боллоо. Журамд холбогдох газруудын үйл ажиллагааг дэлгэрэнгүй тусгана.

Харин эзэнгүй нохой, муур устгалын ажлын зардлыг шинэчлэх асуудлыг лхагва гарагт 11 цагаас болох нийслэлийн Засаг дарга дүүргийн Засаг дарга нартай хийх удирдлагын хуралдаанаар хэлэлцэхээр боллоо. Улаанбаатар хотын Захирагчийн ажлын албанаас одоо мөрдөж буй 7500 төгрөгийг 11 800 төгрөг болгох хүсэлтэй байгаа юм.

Нийслэлийн үйлчилгээний нэгдсэн төв ажиллаж эхэлсэнээс хойш /2016.01.04/ 124 550 иргэнд үйлчилгээ үзүүлээд байна. Үйлчилгээ авч буй иргэдгийг дүүргээр ангилвал үйлчилгээний төвийн байршлаас хамаарч Баянзүрх дүүргийн иргэд үйлчлүүлэх нь их байгаа юм. Энэ үеэр нийслэлийн үйлчилгээний нэгдсэн төвийн дараагийн салбарыг Хан-Уул дүүргийн Мишээл экспо төв, Сонгинохайрхан дүүргийн Драгон төвд байгуулах бэлтгэл ажил үргэлжилж байгаа бөгөөд ирэх дөрөвдүгээр сард ашиглалтад оруулна гэдгийг Нийслэлийн үйлчилгээний нэгдсэн төвөөс мэдээллээ.

Хүүхдийн эрх, хүүхдийн хамгааллын тухай
хуульд зааснаар насанд хүрээгүй хүүхдээр хийлгэж болохгүй ажлын жагсаалтыг
Хөдөлмөрийн сайдын тушаалаар шинэчлэн баталжээ.

Нийтийн эрх ашгийг хамгаалагч хуульчдийн төлөөлөл ипотекийн таван хувийн зээлийн нөхцөл, иргэний хуульд оруулсан өөрчлөлтийг эсэргүүцэж мэдээлэл хийлээ. Тэд нийтийн эрх ашгийг зөрчиж буй асуудлуудыг гаргаж, олон түмэнд хүргэхийг зорьдог хуульчдын бүлэг бөгөөд ямар нэг улс төрийн ашиг сонирхол байхгүй, нам бус гэдгээ онцолж байлаа. Хуульч О.Батхүү “Оорн сууцны ипотекийн таван хувийн зээлийг олгохдоо иргэдийг ялгаварлан гадуурхаж байна. Зээлийн санхүүжилтийг “Тэтгэврийн сангийн хөрөнгө”-өөс буюу татвар төлөгчдийн мөнгөөр олгохоор болсон. Ингэхдээ 21 аймаг болон алслагдсан гурван дүүрэг, хотод цөөн хэдэн байрлалд л хамаарахаар зохицуулсан нь татвар төлөгчдийн мөнгийг хуваарилахдаа ялгавартай хандаж байна гэж үзэж байна. Татвар төлдөг бүх хүн адил нөхцлөөр зээлд хамрагдмаар байна” гэв. Мөн тэд 2015 оны арванхоёрдугаар сарын 3-ны өдөр Иргэний хуульд оруулсан өөрчлөлтийг эсэргүүцэж буй юм. Тухайн өөрчлөлтөөр иргэд хоорондоо мөнгө зээлэх асуудлыг хууль бус гэж заасан нь буруу хэмээн тэд үзэж буй юм. Энэ тухай хуульчид “Энэ бол банкуудад л ашигтай шийдвэр. Чөлөөт эдийн засагт суурилсан өнөөгийн нийгэмд иргэд хоорондын харилцаанд төр хутгалдан орж байгаа нь өөрөө Үндсэн хууль, иргэний хуулийн үндсэн зарчмыг зөрчиж байна. Уг хуулийн өөрчлөлтийг энэ оны есдүгээр сарын 1-ний өдрөөс эхлэн мөрдөн ажиллахаар болсон учраас асуудлыг Үндсэн хуулийн цэцэд өгөхөөр болсон” гэв.

Мөн хуульчид ханшийн зөрүүнээс болж их хэмжээний алдагдал хүлээж буй компаниудад гарц байгаа гэдгийг хэлж байв. Банкуудаас ам.доллараар зээл авсан бүх компаниуд өнөөдөр дампуурах аюулд өртөөд буй юм. Жишээлбэл, 2013 онд нэг сая доллар зээлсэн компани 1.3 тэрбум төгрөг банкинд төлөх байсан бол өнөөдөр хоёр тэрбум төгрөг төлөх болсон. Зөвхөн ханшийн зөрүүнд 700 сая төгрөг төлөхөөр болоод байна. Гэвч уг асуудлыг Иргэний хуулийн 218.1 дэх хэсэгт зохицуулсан байдаг гэнэ. Үүнд “Төлбөр гүйцэтгэх хугацаа болохоос өмнө мөнгөний ханш өссөн, буурсан бол үүрэг үүсэх (гэрээ байгуулсан) үеийн ханшаар тооцож төлбөр төлнө” гэж заасан байдаг ажээ.

Э.Отгонтуяа

Өнөөдөр төрийн бус байгууллагууд болон иргэд Ялалтын талбай дээр “УИХ-д дүн тавих сонгогчдын цуглаан”-ыг зохион байгуулж байна.

Энэхүү цуглаанд ‘’Гал үндэстэн холбоо’’, ‘’Шинэ аравт’’, ‘’Аравтын төлөө’’ сонин, ‘’Босоо Хөх Монгол’’, ’’ Бие даагч иргэдийн холбоо’’, ‘’Нүүдэлчин түмний холбоо’’, ‘’Монгол тэнгэр үнэн’’, ‘’Монгол язгуур ухаан эрдмийн хүрээлэн’’, ‘’Монгол тулгатан’’ тэргүүтэй арав гаруй төрийн бус байгууллагын гишүүд дэмжигчид манлайлан оролцож байгаа юм. Эдгээр иргэний хөдөлгөөнүүд нэгдэж’’Эвлэн мандах хүч’’-ийг байгуулжээ. Ялалтын талбай дээр очиход 600 гаруй хүмүүс цугласан байв. Энэ үеэр тэнгэрийн онгодтой бөө буулгаж байгаа нь олны сонирхолыг их татаж байсан юм. Иргэд утсаар бичлэг хийж, үгийг нь анхааран сонсч, хурайлцгааж байв.

Мөн иргэдээс өнгөрсөн дөрвөн жилийн хугацаанд УИХ-ын гишүүдийн хийж бүтээсэн ажилд хэр сэтгэл хангалуун байгаа талаар санал асууж, саналыг хар цагаан хоёр хуудсаар ялган хурааж байсан юм. Хэрэв иргэд сайн ажилласан гэж үзэж байгаа бол цагаан хуудсыг хайрцганд хийж, муу ажилласан гэвэл хар хуудсыг сонгож байв. Сонгогчдын ихэнх нь хар хуудас сонгож байгаа харагдсан бөгөөд хар хуудастай хайрцаг нь бараг л дүүрсэн харагдана лээ. Түүнчлэн иргэдээс 1. Үндсэн хууль зөрчин намын жагсаалтаас УИХ-ын 28 гишүүн сонгогдохыг, 2. Сонгуулийн хар машинаар саналын хуудас тоолохыг та дэмжих эсвэл дэмжихгүй талаар саналаа өгнө үү гэсэн “Бүх ард түмний санал асуулга” саналыг хуудсыг бөглүүлж байсан юм.

Цуглаанд УИХ-ын дарга З.Энхболдыг оролцуулахаар урьж, УИХ-ын үйл ажиллагааны талаар тайлан тавиулах гэсэн боловч ирээгүй гэдгийг зохион байгуулагчид мөн хэлсэн юм. Мөн энэ үеэр урлаг соёлын одод, дуучид, яруу найрагчид үгээ хэлж, эх орны сэдэвтэй ая дуугаа өргөх , яруу найргаа унших хүсэлтээ илэрхийлсэн аж. Цуглаан одоо ялалтын талбай дээр үргэлжилж байгаа юм.

Цэвэр усны гачигдалд байгаа олон улс орныг усны гачигдлаас гаргах, цэвэр усны нөөцийг нэмэгдүүлэх, арвилан хэмнэх зорилгоор НҮБ-аас 1993 онд жил бүрийн гуравдугаар сарын 22-ны өдрийг “Дэлхийн усны өдөр” болгон тэмдэглэдэг болсон билээ. Харин манай улс 2005 оноос хойш “Дэлхийн усны өдөр”-ийг тэмдэглэж эхэлсэн юм.

Үүнтэй холбоотойгоор Монголын урлагийн зөвлөл, АНУ-ын Элчин сайдын яам хамтран Монголд тулгамдаж буй усны хэт хэрэглээ, усны нөөцийн хомсдол болон усыг хайрлан хамгаалах, зохистой хэрэглэх олон нийтийн ойлголтыг дээшлүүлэх зэрэг асуудлыг хөндөн “Ухаалаг Ус” төслийг хэрэгжүүлж эхэлжээ. Төслийн хүрээнд өнөөдөр Чингисийн талбайд усны асуудлыг хөндсөн “Ухаалаг Ус” мөсөн баримлыг танилцууллаа. АНУ-ын Колумбын Их Сургуулийг төгсөгч, уран бүтээлч Ё.Төгөлдөр, уран барималч Ц.Батмөнх нар хамтран тус бүтээлдээ усны хэт хэрэглээнээс болж хомсдол үүсч буйг шүүмжлэн харуулсан байна.

Мөн төслийн хүрээнд АНУ-ын найруулагч Тиерри Диантанида, Баптист Рожет-Лучайрийн “Цангасан ертөнц”, найруулагч Жефф Орловскийн “Мөсөн голын мөхөл”, найруулагч Николь Ньюхамын “Хувьсгалч өөдрөг үзэлтнүүд” зэрэг баримтат киног Өргөө, Гэгээнтэн, Тэнгис кино театрт энэ сарын 22, 24, 26-нд тус тус үнэ төлбөргүйгээр үзүүлэн, уулзалт хэлэлцүүлэг зохион байгуулах юм байна.

Ж. Хулан