Энэ оны нэгдүгээр сараас НӨАТ-ын тухай хууль шинэчилсэн найруулгаар хэрэгжиж эхлээд байгаа. Хууль хэрэгжиж эхэлснээс хойш иргэд бараа худалдан авсан баримтаа бүртгүүлээд НӨАТ-ын хоёр хувийн урамшуулал авах эрхтэй болсон. Үүнтэй холбогдуулан баримт бүртгүүлэх процессыг хөнгөвчлөх зорилгоор андройд утсанд зориулагдсан “E-Barimt” аппликейшнийг хэрэглээнд гаргасан билээ.
Аппликейшнийг өнөөдрөөс эхлэн iPhone, iPad дээр суулгах боломжтой болжээ. Уг аппликейшнийг та гар утсандаа суулгаснаар баримт дээрх QR хэсгийг уншуулж, баримтаа шууд бүртгүүлэх боломжтой юм байна.
Аппликейшнийг дараахь линкүүдээр татаж аваарай.
App Store:https://itunes.apple.com/mn/app/ebarimt/id10715102…
Google Play:https://play.google.com/store/apps/details?id=mn.m…
Эрүүл мэнд, спортын сайд Г.Шийлэгдамбыг 2015 оны 11 дүгээр сард АТГ-аас авлигын хэрэгт сэжиглэн саатуулсан билээ. Түүнээс хойш эрүүл мэндийн салбар сайдгүй байгаа бөгөөд сайдын үүргийг Шадар сайд Ц.Оюунбаатар давхар хашиж буй. 
Элэгний С вирусын эсрэг “Харвони” эмийн эмчилгээг эрүүл мэндийн даатгалд хамруулж өгөхийг хүссэн иргэдийн төлөөлөл өнөөдөр Хүн ам нийгмийн хөгжлийн яамны төрийн нарийн бичигт шаардлага хүргүүллээ. Улмаар ХАНХЯ-аас уг эмийг эрүүл мэндийн даатгалд хамруулах эсэх асуудлыг шийдвэрлэж өгөхөө мэдэгдсэн байна.
Монгол Улсын Ерөнхийлөгч Ц.Элбэгдорж нийгмийн идэвхтэй залуус болон нүүрном, жиргээчдийн төлөөлөлтэй уулзалт хийж байна. Он гарснаас хойш Ерөнхийлөгч гурав дахь удаагаа цуврал уулзалтаа хийж буй юм. Ерөнхийлөгч уулзалтаараа цаг үеийн асуудлын хүрээнд ярилцах бөгөөд зарим сонирхсон асуултад хариулж байна.
Австралийн тээврийн сайдын хэлснээр Мозамбик, Өмнөд Африкаас олдсон хэсгүүд алга болсон онгоцны үлдэгдэл мөн гэнэ. Шинжилгээнд явуулсан хоёр хэсгийн нэгийг нь Өмнөд Африкаас нэгэн жуулчин олсон бол нөгөөг нь Мозамбикаас олсон юм.
Харвын хуурайшилт эхэлж байгаатай холбогдуулан ОБЕГ-ын дарга ой хээрийн түймрээс урьдчилан сэргийлэх албан даалгавар гаргажээ. Улсын хэмжээнд өнгөрсөн онд 16 аймгийн 114 суманд 354 удаагийн ой хээрийн түймэр гарч, 45,6 мянган га ой, 6602 мянган га хээр, нийт 6.6 сая гар талбай шатсан байна. Ой хээрийн түймрийн улмаас ард иргэд, аж ахуйн нэгжид 3.3 тэрбум төгрөг, экологид 59.4 тэрбум төгрөгийн хохирол учирч, түймрийг унтраахын тулд 517.9 сая төгрөгийн зардал гарчээ.
Зэвсэгт хүчний 027 дугаар анги буюу Батлан хамгаалах, хууль сахиулах алба хаагчдын нэгдсэн эмнэлгийн шинэ байрыг өчигдөр ашиглалтад хүлээлгэн өгчээ. Энэхүү цогцолбор барилгыг 2011 оноос хойш барьж эхэлсэн бөгөөд 2013 онд ашиглалтад өгөх ёстой байсан аж. Барилга гүйцэтгэгч талаас хамааралтайгаар хугацаа алдсан юм байна. Барилгын явцтай өнгөрсөн арван нэгдүгээр сард Батлан хамгаалах яамны Төрийн нарийн бичгийн дарга Б.Батсайхан танилцахдаа барилга гүйцэтгэгч талыг ажлаа шуурхайлж, ашиглалтад өгөх хугацааг богино байхыг сануулж байсан юм. Цэргийн нэгдсэн эмнэлгийн цогцолбор барилга нь А,Б,В гэсэн блокоос бүрдэх бөгөөд А блокод хэвтэн эмчлүүлэгчид, Б блокод амбулатори, В блокод усан эмчилгээ, спорт заал байхаар төлөвлөн барьжээ. Шинэ эмнэлэгт Австрын талаас хөнгөлөлттэй зээлээр авсан 17 тэрбум төгрөг бүхий тоног төхөөрөмж, рентген аппаратаар тоноглосон аж. Тоног төхөөрөмж дээр ажиллах алба хаагчдаа ч сурган мэргэшүүлсэн юм байна.
Нийслэлийн Засаг дарга болон, дүүргийн Засаг дарга нарын зөвлөлийн хурал өчигдөр болж, хурлаар золбин нохой, муур устгалын талаар хэлэлцлээ.
Өнөөдөр сүрьеэтэй тэмцэх олон улсын өдөр тохиож байна. Дэлхийн эрүүл мэндийн байгууллагын шийдвэрээр жил бүрийн гуравдугаар сарын 24-ний өдрийг дэлхий нийтээр сүрьеэтэй тэмцэх өдөр болгон зарласан байдаг. Сүрьеэ өвчнийг анх 1882 оны энэ өдөр Германы микробиологич Роберт Кох уг өвчний үүсгэгчийг нээж байжээ. Сүрьеэ нь агаар дуслын замаар халдварладаг, савханцараас үүсдэг өвчин юм. Манай улсын хувьд сүүлийн жилүүдэд уг өвчнөөр өвчлөгсдийн тоо эрс нэмэгдсэн ба насны хувьд залуужиж байгааг эмч мэргэжилтнүүд хэлж байна. Мөн манай улсын хүн амын дунд хамгийн их тохиолддог халдварт өвчлөлүүдийн нэг юм.